Матфейы

14 Раст уыцы рӕстӕг Ирод*, уымы хицау, фехъуыста Йесойы тыххӕй+ 2 ӕмӕ йӕ лӕггадгӕнджытӕн загъта: «Уый Аргъауӕг Иоанн у. Мӕрдтӕй сыстад, ӕмӕ ахӕм диссӕгтӕ* дӕр уымӕн аразы»+. 3 Хабар та уыдис афтӕ, ӕмӕ Ирод йе ’фсымӕр Филиппы ус Иродиадӕйы тыххӕй Иоанны ӕрцахста, сбаста йӕ ӕмӕ йӕ ахӕстоны бакодта+, 4 Иоанн ын афтӕ кӕй дзырдта, йемӕ цӕрын дын не ’мбӕлы, зӕгъгӕ, уый тыххӕй+. 5 Ӕмӕ кӕд Ироды фӕндыд Иоанны амарын, уӕддӕр адӕмӕй тарст, уымӕн ӕмӕ йӕ пехуымпарыл нымадтой+. 6 Фӕлӕ Иродӕн йӕ гуырӕнбон+ куы уыди, уӕд уым кафыд Иродиадӕйы чызг. Йӕ кафт Ироды зӕрдӕмӕ афтӕ тынг фӕцыд, 7 ӕмӕ йын расомы кодта, цыдӕриддӕр мӕ ракурай, уый дын ратдзынӕн+, зӕгъгӕ. 8 Уӕд чызг йӕ мады ардыдӕй загъта: «Тӕбӕгъыл мын Аргъауӕг Иоанны сӕр ӕрбахӕсс»+. 9 Уыцы ныхас паддзахӕн тынг зын уыди, фӕлӕ, сомы кӕй ракодта, уый тыххӕй, стӕй, йемӕ фынгыл чи бадт, уыдоны ӕфсӕрмӕй дӕр бардзырд радта, ӕрбахӕссут ын ӕй+, зӕгъгӕ. 10 Ӕмӕ йӕ адӕмы арвыста, ӕмӕ ахӕстоны Иоаннӕн йӕ сӕр акъуырдтой. 11 Ӕмӕ йын йӕ сӕр тӕбӕгъыл ӕрбахастой ӕмӕ йӕ чызгмӕ радтой, чызг та йӕ бахаста йӕ мадмӕ+. 12 Уый фӕстӕ Иоаннӕн йӕ ахуыргӕнинӕгтӕ бацыдысты, йӕ мард ын рахастой ӕмӕ йӕ баныгӕдтой+. Стӕй ацыдысты ӕмӕ уыцы хабар Йесойӕн радзырдтой. 13 Уый фехъусгӕйӕ, Йесо бӕлӕгъы сбадт ӕмӕ йӕхи хибар ранмӕ айста – фӕндыди йӕ иунӕгӕй баззайын+. Фӕлӕ адӕм уый куы базыдтой, уӕд горӕттӕй йӕ фӕдыл фистӕгӕй ацыдысты.

14 Йесо бӕлӕгъӕй куы рахызт ӕмӕ уыйбӕрц адӕм куы федта, уӕд сын фӕтӕригъӕд кодта+, ӕмӕ дзы рынчын чи уыди, уыдоны сдзӕбӕх кодта+. 15 Куы ӕризӕр, уӕд ӕм йӕ ахуыргӕнинӕгтӕ бацыдысты ӕмӕ йын загътой: «Ам цӕрӕг дӕр нӕй, стӕй ӕгӕр баизӕр. Арвит адӕмы, цӕмӕй хъӕутӕм ацӕуой ӕмӕ сӕхицӕн хӕринаг балхӕной»+. 16 Фӕлӕ сын Йесо загъта: «Цӕуын сӕ никуыдӕм хъӕуы. Сымах сын бахӕрын кӕнут исты»+. 17 Уыдон та йын загътой: «Ӕмӕ нӕм фондз дзулы ӕмӕ дыууӕ кӕсаджы йеддӕмӕ куы ницы ис»+. 18 Уӕд сын Йесо загъта: «Рахӕссут-ма сӕ». 19 Уый фӕстӕ адӕмы кӕрдӕгыл ӕрбадын кодта, уыцы фондз дзулы ӕмӕ дыууӕ кӕсаджы райста, арвмӕ скаст, Хуыцауӕн раарфӕ кодта+, стӕй дзултӕ ӕрсаста ӕмӕ сӕ йӕ ахуыргӕнинӕгтӕм алӕвӕрдта, уыдон та сӕ байуӕрстой адӕмыл+. 20 Гъемӕ иууылдӕр бахордтой ӕмӕ бафсӕстысты. Цы къӕбӕртӕ ма дзы баззад, уыдон куы ӕрӕмбырд кодтой, уӕд уыдысты дыууадӕс чыргъӕды сӕ тӕккӕ дзагӕй+. 21 Афтӕмӕй та, чи бахордта, уыдон,– сылгоймӕгты ӕмӕ сывӕллӕтты нӕ банымадтой, афтӕмӕй,– уыдысты фондз мин лӕджы бӕрц+. 22 Уый фӕстӕ йӕ ахуыргӕнинӕгтӕн загъта, зӕгъгӕ, фӕтагъд кӕнут, бӕлӕгъы сбадут ӕмӕ денджызы иннӕ фарсмӕ ацӕут, ӕз та уал адӕмы арвитон+.

23 Адӕмы куы арвыста, уӕд ссыд хохмӕ кувынмӕ+. Ӕмӕ кӕд тынг ӕнафон уыд, уӕддӕр уым уыди иунӕгӕй. 24 Уӕдмӕ бӕлӕгъ былӕй тынг адард, ӕмӕ йӕ уылӕнтӕ хостой+, уымӕн ӕмӕ цыди дымгӕйы ныхмӕ. 25 Уӕд сӕм боныцъӕхтыл* Йесо денджызыл къахӕй бацыд+. 26 Йӕ ахуыргӕнинӕгтӕ йӕ денджызыл цӕугӕ куы федтой, уӕд фӕтарстысты ӕмӕ дзурын райдыдтой: «Цыдӕр нӕм ӕрбацӕуы!»+ Ӕмӕ фыртӕссӕй хъӕр систой. 27 Фӕлӕ сӕм Йесо уайтагъд сдзырдта: «Цӕмӕй фӕтарстыстут? Уый ӕз дӕн+. Ма тӕрсут». 28 Ӕмӕ йын уӕд Петр загъта: «Хицау, кӕд уый ды дӕ, уӕд зӕгъ, ӕмӕ дӕм ӕз доныл бацӕуон». 29 Йесо йын загъта: «Рацу!» Ӕмӕ Петр дӕр бӕлӕгъӕй рахызт+ ӕмӕ доныл Йесойы ’рдӕм араст. 30 Фӕлӕ йӕ алыварс куы акаст ӕмӕ, куыд тынг дымы, уый куы федта, уӕд фӕтарст ӕмӕ ныгъуылын райдыдта, ӕмӕ ныхъхъӕр кодта: «Хицау, фервӕзын мӕ кӕн!» 31 Йесо йӕм йӕ къух фӕдардта, фӕхӕцыди йыл ӕмӕ йын загъта: «Кӕм ис дӕ уырнындзинад, цӕмӕн фӕдызӕрдыг дӕ?»+ 32 Ӕмӕ бӕлӕгъмӕ куы бахызтысты, уӕд дымгӕ дӕр банцад. 33 Уӕд, бӕлӕгъы чи уыд, уыдон йӕ разы сӕ зонгуытыл ӕрхаудтой ӕмӕ йын загътой: «Ды ӕцӕгдӕр Хуыцауы Фырт дӕ»+. 34 Ӕппынфӕстаг бахӕццӕ сты денджызы иннӕ фарсмӕ, Геннисаретмӕ+.

35 Ӕмӕ уыцы бӕстӕйы цӕрджытӕ Йесойы куы базыдтой, уӕд алы рӕттӕм фӕхабар кодтой, ӕмӕ йӕм рынчынты се ’ппӕты дӕр кӕнын райдыдтой+. 36 Ӕмӕ йын-иу ныллӕгъстӕ кодтой, дӕ уӕлӕдарӕсы хаутыл дын уӕддӕр андзӕвӕм+, зӕгъгӕ. Гъемӕ-иу сыл чидӕриддӕр андзӕвыд, уыдонӕн-иу сӕ низ ӕрбайсӕфт.