Псалом

78 Мӕ адӕм, байхъусут мын мӕ закъонмӕ+,

Уӕ хъус ӕрдарут мӕ ныхӕстӕм+.

 2 Ӕз дзурдзынӕн ӕмбисӕндтӕй+.

Дзурдзынӕн рагон фӕсномыг ныхӕстӕ*+,

 3 Кӕй фехъуыстам ӕмӕ кӕй зонӕм, уыцы ныхӕстӕ+,

Нӕ фыдӕлтӕ нын кӕй радзырдтой+,

 4 Сӕ фырттӕй кӕй нӕ сусӕг кӕнӕм+

Ӕмӕ ӕрцӕуинаг фӕлтӕрӕн дӕр кӕй дзурӕм+,–

Йегъовӕйы кад ӕмӕ хъаруйы тыххӕй+

Ӕмӕ, цы диссаджы хъуыддӕгтӕ сарӕзта, уыдоны тыххӕй+.

 5 Уый Иаковӕн радта амындтӕ*+,

Ӕрфидар кодта закъон Израилы+.

Нӕ фыдӕлтӕн сӕ бафӕдзӕхста+,

Цӕмӕй сӕ сӕ фырттӕн амоной+,

 6 Цӕмӕй сӕ зона ӕрцӕуинаг фӕлтӕр, чи райгуырдзӕн, уыцы фырттӕ+,

Ӕмӕ сӕ уыдон та сӕ фырттӕн радзурой+.

 7 Цӕмӕй сӕ зӕрдӕ Хуыцауыл дарой+,

Ма рох кӕной Хуыцауы хъуыддӕгтӕ+, фӕлӕ йын йӕ фӕдзӕхстытӕ ӕххӕст кӕной+.

 8 Ӕмӕ цӕмӕй ма суой сӕ фыдӕлты хуызӕн+.

Уыдон уыдысты хивӕнд ӕмӕ ӕнӕсӕттон фӕлтӕр+.

Уыдон сӕ зӕрдӕ нӕ бацӕттӕ кодтой+

Ӕмӕ Хуыцауыл ӕнувыд нӕ уыдысты+.

 9 Ефремы фырттӕ уыдысты гӕрзифтонг фатӕхсджытӕ+,

Фӕлӕ тохы бон лидзынмӕ фесты+.

10 Уыдон Хуыцауы бадзырд не ’ххӕст кодтой+

Ӕмӕ сӕ нӕ фӕндыд йӕ закъонмӕ гӕсгӕ цӕрын+.

11 Райдыдтой йын рох кӕнын йӕ хъуыддӕгтӕ дӕр+

Ӕмӕ сын денджызы раз цы диссӕгтӕ равдыста, уыдон+.

12 Уый сӕ фыдӕлты раз арӕзта диссӕгтӕ+

Египеты+ зӕххыл, Цоаны быдыры+.

13 Адих кодта денджыз, цӕмӕй йыл ахызтаиккой+,

Дӕттӕ къултау слӕууын кодта+.

14 Бонӕй сӕ кодта мигъы фӕрцы+,

Ӕнӕхъӕн ӕхсӕв та – арты рухсы фӕрцы+.

15 Ӕдзӕрӕг быдыры-иу къӕдзӕхтӕ афаста+,

Цӕмӕй сын дон лӕвӕрдтаид парахатӕй, цыма йӕ арф дӕттӕй иста, афтӕ+.

16 Айнӕг къӕдзӕхӕй рауагъта дӕттӕ+,

Ӕмӕ цӕугӕдӕттау ныггуылф кодтой+.

17 Фӕлӕ уыдон ноджы фылдӕр тӕригъӕдтӕ арӕзтой йӕ разы+ –

Цыдысты Иунӕг Стыр Хуыцауы ныхмӕ ӕнӕдон бӕстӕйы+.

18 Сӕ зӕрдӕты фӕлвӕрдтой Хуыцауы+ –

Хӕринагӕй сӕ зӕрдӕ цы агуырдта, уый дзы куырдтой+.

19 Ӕмӕ райдыдтой Хуыцауы ныхмӕ дзурын+.

Уыдон дзырдтой: «Хуыцауӕн йӕ бон у, ӕмӕ нын ӕдзӕрӕг быдыры фынгтӕ ӕрӕвӕра?»+

20 Уый ӕрцавта къӕдзӕх+,

Цӕмӕй ракӕлой дӕттӕ ӕмӕ агуылф кӕной цӕугӕдӕттӕ+.

Фӕлӕ та дзырдтой: «Дзул дӕр нын ратдзӕн+?

Науӕд йӕ адӕмӕн хӕринаг ӕрцӕттӕ кӕндзӕн?»+

21 Йегъовӕ уый куы фехъуыста, уӕд мӕстӕй рафыхт+.

Арт ссыгъди Иаковы ныхмӕ+,

Йӕ маст ссыгъд Израилмӕ+.

22 Уымӕн ӕмӕ Хуыцауыл не ’ууӕндыдысты+,

Кӕй сӕ фервӕзын кӕндзӕн, уый сӕ нӕ уырныдта+.

23 Уый бардзырд радта мигътӕй ӕмбӕрзт арвӕн

Ӕмӕ байгом кодта уӕлӕрвты дуӕрттӕ+.

24 Ӕмӕ сыл къӕвдайау уарын кодта маннӕ, цӕмӕй хордтаиккой+,

Лӕвӕрдта сын хор уӕларвӕй+.

25 Адӕм хордтой зӕдты* дзул+.

Хӕринагцух сӕ нӕ уагъта+.

26 Уый арвыл сыстын кодта скӕсӕйнаг дымгӕ+

Ӕмӕ йӕ хъаруйӕ радымын кодта хуссайраг дымгӕ+.

27 Рыгау сыл ныууарын кодта бирӕ хӕринаг+,

Денджызы змисау – бирӕ мӕргътӕ+.

28 Ныккалдта сӕ йӕ цӕрӕнбынаты астӕумӕ+,

Йӕ цатырты алыварс+.

29 Ӕмӕ адӕм бахордтой, сӕхи дзӕбӕх бафсӕстой+.

Цы сӕ хъуыди, уый сын радта+.

30 Уыдон ӕфсис нӕ зыдтой.

Ӕмӕ сӕ хӕринаг нырма сӕ дзыхы уыд+,

31 Афтӕ сӕм Хуыцауы маст ссыгъд+.

Ӕмӕ сын райдыдта сӕ домбай лӕгты марын+,

Ныццагъта Израилы сагсур лӕппуты.

32 Фӕлӕ уыдон уӕддӕр арӕзтой тӕригъӕдтӕ+

Ӕмӕ йын йӕ диссаджы хъуыддӕгтыл не ’ууӕндыдысты+.

33 Уый тыххӕй сын сӕ царды бонтӕ комулӕфтау аскъуыдта+,

Афтӕ сын бакодта, ӕмӕ сӕ царды азтӕ фесты тыхстӕй.

34 Цӕгъдын-иу сӕ куы райдыдта, уӕд-иу ын лӕгъстӕ кодтой+,

Фӕстӕмӕ-иу раздӕхтысты ӕмӕ-иу Хуыцауы агуырдтой+.

35 Ӕрхъуыды-иу кодтой, Хуыцау кӕй у сӕ Къӕдзӕх+,

Ӕмӕ Иунӕг Стыр Хуыцау – сӕ Мастисӕг+.

36 Уыдон ыл хъавыдысты сӕ ныхӕстӕй хинӕй рацӕуынмӕ+,

Ӕмӕ йӕ се ’взагӕй – фӕсайынмӕ+.

37 Сӕ зӕрдӕтӕ йыл ӕнувыд нӕ уыдысты+,

Иузӕрдион нӕ уыдысты йӕ бадзырдыл+.

38 Фӕлӕ уый уыд фӕлмӕнзӕрдӕ+. Сӕ рӕдыд-иу сын ныххатыр кодта+ ӕмӕ-иу сӕ нӕ фесӕфта+.

Бирӕ хӕттыты-иу йӕ маст баурӕдта+

Ӕмӕ-иу сыл йӕ фыдӕх иууылдӕр нӕ ныккалдта.

39 Рох дзы нӕ уыд, адӕм* йеддӕмӕ кӕй ницы сты+,

Кӕй амӕлынц ӕмӕ сӕ цард ууыл кӕй фӕвӕййы*+.

40 Цал ӕмӕ цал хатты сыстадысты йӕ ныхмӕ ӕдзӕрӕг быдыры+,

Цал хатты йын фӕриссын кодтой йӕ зӕрдӕ ӕдзӕрӕг бӕстӕйы!+

41 Цал ӕмӕ цал хатты фӕлвӕрдтой Хуыцауы+

Ӕмӕ цал хатты бауагътой маст Израилы сыгъдӕг Хуыцауы+.

42 Ферох ын кодтой йӕ къух+,

Знагӕй сӕ цы бон фервӕзын кодта*, уыцы бон+,

43 Куыд равдыста йӕ нысӕнттӕ Египеты+

Ӕмӕ Цоаны быдыры – йӕ диссӕгтӕ+.

44 Ферох сӕ, Нилы къанӕуттӕ туг куыд фестын кодта+

Ӕмӕ сӕ бон куыд нал уыд сӕ цӕугӕдӕттӕй дон нуазын+.

45 Фӕкодта сӕ дзынгаты* бын, цӕмӕй сыл хӕцыдаиккой ӕмӕ сӕ тухӕнӕй мардтаиккой+,

Ӕмӕ хӕфсыты бын, цӕмӕй сын зиан хастаиккой+.

46 Сӕ тыллӕг сын бахӕрын кодта хъӕндилтӕн*,

Сӕ къухты фӕллой – мӕтыхтӕн+.

47 Ныццагъта сын сӕ сӕнӕфсир ихӕй+

Ӕмӕ сӕ сикоморбӕлӕстӕ – ставд ихӕй+.

48 Сӕ фос сын ныццагъта ихӕй+,

Сӕ хӕдзарон фосыл сын рын рауагъта.

49 Ныккалдта сыл йӕ судзгӕ маст+,

Йӕ масты цӕхӕртӕ, йӕ фыдӕх ӕмӕ бӕллӕх+,

Рарвыста зӕдты ӕфсад ӕмӕ фыдбылыз ӕрхастой+.

50 Уый ӕрцӕттӕ кодта фӕндаг йӕ мастӕн+.

Нӕ сын хъахъхъӕдта сӕ уд мӕлӕтӕй

Ӕмӕ сӕ фыднизы хай фӕкодта+.

51 Ӕппынфӕстаг ныццагъта Египеты фыццаггуырдты се ’ппӕты дӕр+,

Сӕ лӕджы хъаруйы райдиан – Хамы+ цатырты.

52 Уый фӕстӕ йӕ адӕмы фысты дзугау ракодта+

Ӕмӕ сӕ ӕдзӕрӕг быдыры кодта, дзуг куыд кӕнай, афтӕ+.

53 Куы сӕ кодта, уӕд сын тас ницӕмӕй уыди, ницӕмӕй тарстысты+.

Уыдонӕн се знӕгтӕ денджызы бын фесты+.

54 Уый сӕ ӕрбакодта йӕ сыгъдӕг зӕхмӕ+,

Ацы хӕхбӕстӕм, йӕ рахиз къухӕй кӕй самал кодта, уырдӕм+.

55 Уыдоны тыххӕй иннӕ адӕмты иу иннӕйы фӕдыл фӕсырдта+.

Барӕн бӕндӕнӕй баргӕйӕ сыл адих кодта зӕхх+,

Ӕмӕ Израилы мыггӕгты сӕхи хӕдзӕртты ӕрцӕрын кодта+.

56 Фӕлӕ уыдон райдыдтой Иунӕг Стыр Хуыцауы фӕлварын ӕмӕ йӕ ныхмӕ цӕуын+

Ӕмӕ йын йӕ амындтӕ не ’ххӕст кодтой+.

57 Ныууагътой-иу ӕй ӕмӕ-иу ыл гадзрахатӕй рацыдысты сӕ фыдӕлтау+,

Ӕрдын ӕнӕ босӕй иннӕрдӕм куыд фӕвӕййы, афтӕ-иу иннӕрдӕм фесты+.

58 Мӕсты йӕ кодтой, къуыппытыл кӕй куывтой, уымӕй+,

Сӕ мӕнгхуыцӕуттӕн кӕй табу кодтой, уымӕй-иу ын йӕ маст ссыгътой+.

59 Хуыцау фехъуыста+ ӕмӕ мӕстӕй рафыхт+,

Ӕмӕ йын Израил тынг фенад+.

60 Ӕмӕ фӕстагмӕ ныууагъта, Силомы+ цы цатыр уыд, уый,

Зӕххон адӕмы ’хсӕн кӕм цард, уыцы цатыр+.

61 Ӕмӕ йӕ хъару радта уацары+

Ӕмӕ йӕ рӕсугъддзинад – знаджы къухмӕ+.

62 Йӕ адӕмы хъамайы амӕттаг фӕкодта+,

Йӕ бынтӕм йӕ маст ссыгъд+.

63 Йӕ лӕппуты йын арт аныхъуырдта,

Йӕ чызджытӕн ын нӕ кодтой чындзӕхсӕвы зарджытӕ+.

64 Йӕ сауджынтӕ хъамайӕ фӕцагъды сты+,

Ӕмӕ сӕ устытӕ кӕугӕ дӕр нӕ кодтой+.

65 Уӕд Йегъовӕ райхъал, фынӕй адӕймаг куыд райхъал уа+,

Тыхджын лӕг сӕнӕй куыд ӕрӕрвонг уа, афтӕ+.

66 Ӕмӕ йе знӕгты фӕстейӕ асырдта ӕмӕ сӕ ныццагъта+,

Ӕнустӕм сӕ ныффидиссаг кодта+.

67 Иосифы цатырыл йӕ къух систа+

Ӕмӕ Ефремы мыггаг нӕ равзӕрста+.

68 Фӕлӕ равзӕрста Иудӕйы мыггаг+,

Кӕй бауарзта, уыцы Сионы хох+.

69 Йӕ кувӕндон сарӕзта, хӕхты цъуппытӕ куыд сты, афтӕ+,

Зӕхх ӕнустӕм куыд ӕрфидар кодта, афтӕ+.

70 Уый равзӕрста Давиды, йӕ лӕггадгӕнӕджы+,

Фысты фысдӕттӕй йӕ ракодта+.

71 Давид рацу-бацу кодта ногзӕддаг фысты фӕдыл+,

Ӕмӕ йӕ Хуыцау ӕркодта, цӕмӕй уа йӕ адӕмы, Иаковы, фыййау+

Ӕмӕ йӕ бынты, Израилы, фыййау+.

72 Ӕмӕ сӕ уый хызта иузӕрдионӕй*+,

Йӕ арӕхстджын къухӕй сӕ кодта+.