2 Азфыстыты

3 Ӕмӕ Соломон Иерусалимы, Мориайы+ хохыл, райдыдта Йегъовӕйы хӕдзар аразын+. Уый уыд, Йегъовӕ йӕ фыд Давидмӕ кӕм фӕзынд+ ӕмӕ Давид йевусаг Орнӕйы*+ найгӕнӕн мусы кӕй ӕрцӕттӕ кодта, уыцы бынат. 2 Аразын ӕй райдыдта, цыппӕрӕм аз куы уыд паддзах, уӕд, дыккаг мӕйы дыккаг бон+. 3 Соломон ӕцӕг Хуыцауы хӕдзарӕн ӕрӕвӕрдта ахӕм бындур: йӕ дӕргъ раздӕры барӕнтӕй* уыд ӕхсай ӕлмӕрины, йӕ уӕрх та – дыууын ӕлмӕрины*+. 4 Хӕдзарӕн разырдыгӕй цы мӕсыг+ уыд, уымӕн йӕ дӕргъ уыд дыууын ӕлмӕрины, хӕдзарӕн йӕ уӕрх цас уыди, уыйас. Йӕ бӕрзӕнд та уыд сӕдӕ дыууын ӕлмӕрины. Мидӕгӕй йӕ бамбӕрзта сыгъдӕг сызгъӕринӕй. 5 Сӕйраг уат*+ бамбӕрзта ӕхсӕлыбӕласы фӕйнӕджытӕй, стӕй йӕ бамбӕрзта хуыздӕр сызгъӕринӕй+ ӕмӕ йӕ срӕсугъд кодта пальмӕбӕлӕсты+ нывтӕй ӕмӕ рӕхыстӕй+. 6 Стӕй ма хӕдзар срӕсугъд кодта зынаргъ дуртӕй+. Сызгъӕрин+ та уыд сызгъӕрины бӕстӕйӕ. 7 Уый фӕстӕ хӕдзар, хъайвантӕ, къӕсӕртӕ, къултӕ ӕмӕ дуӕрттӕ сызгъӕринӕй бамбӕрзта+ ӕмӕ къултыл скодта херувимты нывӕфтыдтӕ+.

8 Уый фӕстӕ та сарӕзта Ӕппӕты сыгъдӕг бынат*+. Йӕ дӕргъ уыд дыууын ӕлмӕрины, хӕдзарӕн йӕ уӕрх цас уыди, уыйас, ӕмӕ йӕ уӕрх дӕр уыд дыууын ӕлмӕрины+. Стӕй йӕ бамбӕрзта хуыздӕр сызгъӕринӕй, бахъуыд ын ӕхсӕзсӕдӕ таланты*. 9 Зӕгӕлтыл+ та ацыд фӕндзай сиклы сызгъӕрин. Ӕмӕ сызгъӕринӕй бамбӕрзта уӕллаг уӕттӕ дӕр.

10 Уый фӕстӕ Ӕппӕты сыгъдӕг бынаты скодта дыууӕ херувимы+ ӕмӕ сыл сызгъӕринӕй цъар сӕвӕрдта+. 11 Херувимтӕн+ сӕ базырты дӕргъ иумӕйагӕй уыд дыууын ӕлмӕрины. Иу херувимӕн йӕ иу базыр уыд фондз ӕлмӕрины ӕмӕ ӕндзӕвыд хӕдзары къулыл. Ӕмӕ йӕ иннӕ базыр дӕр уыд фондз ӕлмӕрины, ӕмӕ уый та ӕндзӕвыд иннӕ херувимы базырыл+. 12 Иннӕ херувимӕн дӕр йӕ иу базыр уыд фондз ӕлмӕрины ӕмӕ ӕндзӕвыд хӕдзары къулыл. Ӕмӕ йӕ иннӕ базыр дӕр уыд фондз ӕлмӕрины, ӕмӕ уый та ӕндзӕвыд иннӕ херувимы базырыл+. 13 Уыцы херувимты базыртӕ уыдысты фӕйнӕрдӕм ӕмӕ сӕ дӕргъ уыд дыууын ӕлмӕрины. Херувимтӕ кодтой лӕугӕ ӕмӕ кастысты сӕйраг уаты ’рдӕм.

14 Стӕй ӕрвхуыз ӕндахӕй+, тарсырх къуымбилӕй, сырх-сырхид ӕндӕхтӕй ӕмӕ зынаргъ хъуымацӕй скодта ӕмбӕрзӕн+. Йӕ уӕлӕ та йын ӕндӕхтӕй скодта херувимты нывтӕ+.

15 Уый фӕстӕ хӕдзарӕн разырдыгӕй скодта дыууӕ цӕджындзы+, сӕ дӕргъ уыд ӕртын фондз ӕлмӕрины, ӕмӕ дзы алкӕцыйыл дӕр сӕвӕрдта, фондз ӕлмӕрины бӕрзӕндӕн чи уыд, ахӕм сӕртӕ+. 16 Стӕй скодта рӕхыстӕ+ ӕмӕ сӕ цӕджындзты сӕртыл фӕрдгуытау бакодта. Скодта ма сӕдӕ гранаты+ дӕр, ӕмӕ уыдон та бакодта рӕхыстыл. 17 Цӕджындзтӕ сӕвӕрдта кувӕндонӕн разырдыгӕй. Иу дзы сӕвӕрдта рахизырдыгӕй, иннӕ та – галиуырдыгӕй. Ӕмӕ, рахизырдыгӕй цы цӕджындз лӕууыд, уый схуыдта Иахин*, галиуырдыгӕй чи лӕууыд, уый та – Вооз*+.