Кӕй нӕ фӕнды, цӕмӕй дзы раппӕлой?
ГЫЦЦЫЛ чызгӕн уыцы бон иннӕ бонты хуызӕн нӕ уыд. Кӕд ын алы хатт «ма кӕн» дзурын хъуыд, уӕд абон йӕхи уӕлдай хорз дардта, нӕ фыдуаг кодта. Фӕлӕ йӕ уыцы изӕр йӕ мад куы схуыссын кодта, уӕд кӕуын райдыдта. Мад ӕй куы бафарста, «цы кӕныс», зӕгъгӕ, уӕд ын кӕуынхъӕлӕсӕй загъта: «Ау, абон дзӕбӕх чызг нӕ уыдтӕн?»
Уыцы ныхӕстӕ мады кардау иннӕрдӕм ахызтысты. Йӕ чызг фыдуаг кӕна ӕмӕ йын йӕ ных ма бакъуыра, уымӕн гӕнӕн нӕ уыд. Фӕлӕ абон, кӕд ӕй уыдта, йӕ гыццыл чызг куыд тынг архайдта, цӕмӕй ма фыдуаг кодтаид, уӕддӕр дзы нӕ раппӕлыд.
Ӕрмӕст гыццыл чызджытӕй нӕ фӕхъӕуы ӕппӕлын ӕмӕ сын ныфсытӕ ӕвӕрын. Уынаффӕтӕ ӕмӕ нӕ уайдзӕф тӕ куыд хъӕуынц, афтӕ нӕ хъӕуынц хорз ныхӕстӕ дӕр.
Исчи нӕ зӕрдиагӕй куы раппӕлы, уӕд нӕхи куыд фӕхатӕм? Ӕхсызгон нын нӕ вӕййы ӕмӕ ныл хур нӕ ракӕсы? Уымӕй бӕрӕг вӕййы, нӕ хорз нын чидӕр кӕй уыны, чидӕр нӕ кӕй уарзы. Арфӕйы ныхӕстӕ нӕ ныфс бауадзынц, зӕгъгӕ, нӕ фыдӕбон дзӕгъӕлы нӕ уыд, ӕмӕ та нӕм афтӕмӕй фӕзыны ног хъарутӕ, фӕфӕнды нӕ дарддӕр дӕр истытӕ аразын. Уӕдӕ диссаг нӕу, арфӕйы ныхӕстӕ зӕгъынӕн нын рӕстӕг чи ссары, уыцы адӕймаг нын зынаргъдӕр кӕй свӕййы (Ӕмбисӕндтӕ 15:23).
Йесо Чырысти зыдта, адӕймагӕй йӕ хорз хъуыддӕгты тыххӕй раппӕлын кӕй фӕхъӕуы, уый. Фӕсномыг ныхасы талантты тыххӕй хицау (ӕвдисы Йесойы) йӕ дыууӕ иузӕрдион цагъарӕй сӕ куысты тыххӕй раппӕлыд: «Хорз, мӕ иузӕрдион цагъар!» Ӕвӕдза, куыд ӕхсызгон сын уыдаиккой ацы ныхӕстӕ! Хицау кӕд зыдта, йӕ дыууӕ цагъарӕн сӕ бон алцы ӕмхуызон саразын кӕй нӕ уыд ӕмӕ ӕмхуызон ӕнтыстджын кӕй нӕ уыдысты, уӕддӕр сӕ иухуызон фӕбузныг ӕмӕ сӕ дыууӕйӕ дӕр раппӕлыд (Матфейы 25:19—23, НФ).
Уӕдӕ нӕ уыцы гыццыл чызджы мад рох ма уӕд. Искӕмӕн цӕмӕй исты дзӕбӕх ныхӕстӕ зӕгъӕм ӕмӕ дзы раппӕлӕм, уый тыххӕй нӕ нӕ хъӕуы ӕнхъӕлмӕ кӕсын, цалынмӕ кӕуын райдайа. Нӕ, адӕймагӕй гыццыл истӕй тыххӕй дӕр ӕппӕлын фӕхъӕуы. Уӕдӕ-иу исчи исты хорздзинад куы сараза, уӕд-иу дзы раппӕлӕм.