Хӕларзӕрдӕдзинадӕй маст атад

НИДЕРЛАНДТЫ дыууӕ Ӕвдисӕны, Георг ӕмӕ Манон, бацыдысты иу ацӕргӕ сылгоймагмӕ, цӕмӕй йын Хуыцауы Паддзахады тыххӕй хорз хабар фехъусын кодтаиккой. Фӕлӕ сӕм уыцы сылгоймаг хорз цӕстӕй нӕ ракаст. Йӕ ныхӕстӕй йын базыдтой, йӕ фыццаг лӕг дӕр ӕмӕ йӕ дыккаг лӕг дӕр кӕй амардысты, стӕй йӕ фырт дӕр кӕй фӕзиан. Базыдтой ма уый дӕр, ӕмӕ артритӕй тынг рынчын кӕй уыди. Кӕд сӕ ныхасы рӕстӕг иу гыццыл ӕрсабыр, уӕддӕр сӕм тарӕрфыгӕй касти.

Фӕлӕ куы ацыдысты, уӕд Георг Манонӕн загъта, зӕгъгӕ, дам, ацы сылгоймагӕн дидинджытӕ балхӕнӕм ӕмӕ йӕм фӕстӕмӕ бацӕуӕм, уымӕн ӕмӕ, дам, иунӕг ӕмӕ мастӕфхӕрд адӕймаг у. Куы йӕм баздӕхтысты, уӕд уыцы сылгоймаг, Рие, дисы дӕр бафтыд, стӕй йын ӕхсызгон дӕр уыди. Фӕлӕ йӕ не ’вдӕлди, ӕмӕ ӕндӕр хатт фембӕлыныл баныхас кодтой. Георг ӕмӕ йӕм Манон нысангонд рӕстӕг куы бацыдысты, уӕд сын дуар ничи бакодта. Ӕмӕ та йӕм кӕд ӕндӕр хатт дӕр ӕрбацыдысты, уӕддӕр та хӕдзары никӕй баййӕфтой. Суанг ма афтӕ дӕр ахъуыды кодтой, ӕмӕ сӕ йӕхи ӕмбӕхсы.

Иу бон уӕддӕр Георг Риейы хӕдзары баййӕфта. Уый дзы хатыртӕ ракуырдта, йӕ ныхасӕн хицау кӕй нӕ разынд, уый тыххӕй ӕмӕ йын загъта, рынчындонмӕ кӕй бахауд. «Сымах куы ацыдыстут, уӕд цы сарӕзтон, уый дӕ нӕ бауырндзӕн,– загъта Рие.– Ӕз райдыдтон Библи кӕсын!» Уый фӕстӕ дзӕбӕх аныхӕстӕ кодтой, ӕмӕ Библи ахуыр кӕнын райдыдтой.

Рие Библи ахуыр кӕнын куы райдыдта, уӕдӕй фӕстӕмӕ тынг фӕивта: йӕ зӕрдӕмӕ рухс бакалд ӕмӕ сси амондджын, хӕларзӕрдӕ сылгоймаг. Кӕд хӕдзарӕй ӕддӕмӕ нӕ цыди, уӕддӕр йӕ ног дины тыххӕй уайтагъд дзурын райдыдта, чи-иу ӕй бабӕрӕг кодта, уыдонӕй алкӕмӕн дӕр. Рынчын кӕй уыди, уый тыххӕй ӕмбырдтӕм арӕх нӕ цыд. Фӕлӕ-иу йӕ зӕрдӕ хурварс абадт, хотӕ ӕмӕ-иу ӕй ӕфсымӕртӕ куы бабӕрӕг кодтой, уӕд. 82 азы йыл цы бон сӕххӕст ис, уыцы бон районон конгрессы донаргъуыд райста.

Рие амарди цалдӕр мӕйы фӕстӕ. Йӕ дзауматы ’хсӕн ын ссардтой йе ’мдзӕвгӕ. Фыста, зӕронд, иунӕг адӕймаг мӕгуыр кӕй у ӕмӕ хӕларзӕрдӕдзинад тынг ахсджиаг кӕй у, уый тыххӕй. Манон загъта: «Ацы ӕмдзӕвгӕ кӕсгӕйӕ мӕ зӕрдӕ суынгӕг. Тынг амондджын дӕн, Йегъовӕйы фӕрцы Риемӕ хӕларзӕрдӕдзинад кӕй равдыстам, уый тыххӕй».

Йегъовӕ йӕхӕдӕг уарзӕгой ӕмӕ хӕларзӕрдӕ кӕй у, уый нӕ разӕнгард кӕны, цӕмӕй мах дӕр уыцы миниуджытӕ ӕвдисӕм (Еф. 5:1, 2). Уацамынды ӕнтыстджын уыдзыстӕм, «Хуыцауы лӕггадгӕнджытӕ кӕй стӕм, уый... нӕ хӕларзӕрдӕдзинадӕй» куы ӕвдисӕм, уӕд (2 Кор. 6:4, 6).