Чырыстӕттӕ бирӕфӕразон цӕмӕн хъуамӕ уой?

БИРӔФӔРАЗОНДЗИНАД у, Хуыцауы сыгъдӕг тыхӕй цы миниуджытӕ гуыры, уыдонӕй иу (Гал. 5:22). Йегъовӕ йӕхӕдӕг дӕр у бирӕфӕразон Хуыцау. Ӕмӕ адӕймаг Хуыцаумӕ гӕсгӕ конд кӕй у, уый тыххӕй йӕм ацы миниуӕг ис. Адӕймаг Хуыцауы Ныхасмӕ гӕсгӕ ӕмӕ йӕ сыгъдӕг тыхы разамындмӕ гӕсгӕ куы архайа, уӕд йӕ бон уыдзӕн уыцы миниуӕг йӕ удыхъӕды фидар кӕнын (Райд. 1:26, 27). Уымӕ гӕсгӕ Библи чырыстӕтты разӕнгард кӕны, цӕмӕй ацы миниуӕг сӕ удыхъӕды рӕзын кӕной ӕмӕ йӕ сӕ царды ӕвдисой (Кол. 3:12). Хуыцауы лӕггадгӕнджытӕ иннӕтӕй уыцы миниуӕгӕй хицӕн кӕнынц (2 Кор. 6:4–6). Апостол Павел загъта: «Алкӕимӕ дӕр ут бирӕфӕразон» (1 Фес. 5:14). Павел куыд бамбарын кодта, афтӕмӕй нӕм ацы миниуӕг куы нӕ уа, уӕд Хуыцауы хорзӕх не ссардзыстӕм. Фӕлӕ адӕймаг цӕмӕндӕр куы быхса, фӕлӕ хъуыр-хъуыр ӕмӕ хъаст куы кӕна, уӕд афтӕ зӕгъӕн нӕ уыдзӕн, ӕмӕ бирӕфӕразон у. Павелы ныхӕстӕм гӕсгӕ хъуамӕ «цингӕнгӕйӕ» фӕразӕм (Кол. 1:9–12).

Бирӕфӕразон чи вӕййы, уымӕн йӕ зӕрдӕйы вӕййы циндзинад. Стӕй ма йын уый ӕрхӕссы бирӕ ӕндӕр хорздзинӕдтӕ дӕр. Йегъовӕйӕн йӕ бирӕфӕразондзинад цы хорздзинӕдтӕ хӕссы, уыдонӕй иу у, йӕ ном кӕй скадджын вӕййы, уый. Хуыцауы бирӕфӕразондзинады фӕрцы сбӕлвырд, Сайтан мӕнг ныхӕстӕ кӕй кодта, афтӕ куы загъта, зӕгъгӕ, Хуыцау хорз хицау нӕу ӕмӕ йын уый бар дӕр нӕй, цӕмӕй хицау уа (Райд. 3:1–5; Иов 1:7–11; 2:3–5). Фӕлӕ Хуыцау Адам, Евӕ ӕмӕ Сайтаны уайтагъд куы фесӕфтаид, уӕд хабар куыд рауадаид? Уӕд, чи зоны, исчи ахъуыды кодтаид, Сайтан кӕмдӕр раст кӕй уыд. Фӕлӕ Йегъовӕ бирӕфӕразон кӕй у, уый фӕрцы адӕмӕн фадат фӕзынд, цӕмӕй фӕлварӕнты равдисой: 1) кӕй сӕ фӕнды, цӕмӕй Хуыцау сӕ Хицау уа; 2) цы диссаджы миниуджытӕ йӕм ис, уый тыххӕй сӕ кӕй фӕнды, цӕмӕй йын лӕггад кӕной; 3) сӕхи зондӕй цӕрын сӕ кӕй нӕ фӕнды, фӕлӕ Йегъовӕйы разамындмӕ гӕсгӕ, уымӕн ӕмӕ йӕ разамынд ӕппӕты хуыздӕр у (Пс. 84:10).

Йесо Чырысти бирӕфӕразон ӕмӕ коммӕгӕс кӕй уыд, уый тыххӕй йӕ Хуыцау скадджын кодта – Паддзахӕй йӕ сӕвӕрдта ӕмӕ йын «нӕ бавгъау кодта, ӕппӕт иннӕ нӕмттӕй уӕлдӕр чи у, ахӕм ном» (Фил. 2:5–11). Йесо ма цы арфӕдзинӕдтӕй схайджын, уыдонӕй иу у йӕ «усаг», ома йӕ сӕрст ӕфсымӕртӕ. «Усаг» ма Библийы хуыйны «сыгъдӕг горӕт – Ног Иерусалим». Уыцы горӕты къулӕн йӕ бындуры ис дыууадӕс дуры ӕмӕ сыл фыст ис Уӕрыччы дыууадӕс апостолы нӕмттӕ (2 Кор. 11:2; Рарг. 21:2, 9, 10, 14).

Йӕ удыхъӕды бирӕфӕразондзинад чи фидар кӕны ӕмӕ, Хуыцау йӕ фӕнд кӕд сӕххӕст кӕндзӕн, уымӕ фӕразонӕй чи ӕнхъӕлмӕ кӕсы, уыдон дӕр арфӕгонд цӕуынц (Дзут. 6:11–15). Ахӕм адӕм зӕрдӕрухс сты, уымӕн ӕмӕ сӕм уыцы миниуӕг кӕй ис, уымӕй Хуыцауы фӕзмынц, йӕ фӕндон ын ӕххӕст кӕнынц ӕмӕ йӕ хорзӕхӕй хайджын сты. Бирӕфӕразон кӕй сты, уый фӕрцы ма схайджын уыдзысты ӕндӕр арфӕдзинадӕй дӕр – иннӕтӕн дӕр баххуыс кӕндзысты, цӕмӕй Хуыцауы базоной ӕмӕ ӕнустӕм цӕрой (1 Тим. 4:16).