КӔСДЖЫТЫ ФАРСТАТӔ

Рагон горӕт Иерихон цыбыр рӕстӕгмӕ кӕй бацахстой, уымӕн цавӕр бӕлвырдгӕнӕнтӕ ис?

Йесо Навины 6:10–15, 20 куыд фыст ис, афтӕмӕй-иу израилаг ӕфсад Иерихоны алыварс бон иу хатт ӕрзылд, ӕмӕ афтӕ – ӕхсӕз боны дӕргъы. Ӕвдӕм бон та йӕ алыварс ӕрзылдысты авд хатты. Ӕмӕ уӕд Хуыцау афтӕ бакодта, ӕмӕ Иерихоны фидар къултӕ ныккалдысты. Уый фӕрцы израилӕгтӕ горӕт бацахстой. Цымӕ, Библийы ацы хабары тыххӕй цы фыст ис, ома Иерихон ахӕм цыбыр рӕстӕгмӕ кӕй бацахстой, уымӕн археологтӕ исты бӕлвырдгӕнӕнтӕ ссардтой?

Рагзаманты-иу цавӕрдӕр ӕфсад, къултӕй ӕхгӕд чи уыд, ахӕм горӕт бацахсынмӕ куы хъавыд, уӕд-иу йӕ алыварс ӕртыхст ӕмӕ-иу горӕтӕй ӕддӕмӕ рацӕуын никӕй уагъта. Уыцы уавӕр-иу бирӕ рӕстӕг куы ахаста, уӕд-иу горӕты цӕрджытӕ, хойрагӕй сӕм цы уыд, уымӕн йӕ фылдӕр хӕрд фесты. Ӕфсад-иу горӕт куы бацахста, уӕд-иу сын сӕ мулк, стӕй ма-иу сӕм хойрагӕй цы баззад, уый фӕхаста. Гъе уымӕ гӕсгӕ археологтӕ дӕр Палестинӕйы рагон горӕтты хӕлддзӕгты ’хсӕн хойраг тынг гыццыл йе та бынтондӕр не ссарынц. Фӕлӕ Иерихоны хӕлддзӕгты ’хсӕн археологтӕ ссардтой тынг бирӕ хойраг. Иу журналы уый фӕдыл фыст уыд: «Ӕлыг мигӕнӕнтӕй уӕлдай ма дзы ӕппӕты фылдӕр цы ссардтой, уый уыд хор. [...] Афтӕ бирӕ хор ӕндӕр никӕцы горӕты ссардтой» (Biblical Archaeology Review).

Библийы куыд фыст ис, афтӕмӕй израилӕгтӕ Иерихонӕй хойраг ӕппындӕр нӕ рахастой, уымӕн ӕмӕ сын Йегъовӕ афтӕ бафӕдзӕхста (Йес. Н. 6:17, 18). Фыст ма дзы ис, израилӕгтӕ уыцы горӕт уалдзӕджы, хуымгӕрдӕнты тӕккӕ фӕстӕ, кӕй бацахстой, ӕмӕ-иу уыцы афон та горӕты хор бирӕ уыд (Йес. Н. 3:15–17; 5:10). Уӕдӕ Иерихоны бирӕ хор кӕй баззад, уый ууыл дзурӕг у, ӕмӕ йӕ израилӕгтӕ ӕцӕгдӕр цыбыр рӕстӕгмӕ бацахстой, Библи куыд зӕгъы, растдӕр афтӕ.