Ӕппӕты гыццылдӕр дзуттаг дамгъӕйӕн ис стыр уӕз

Хуыцау зӕрдӕ цӕмӕй бавӕрдта, уыдон иууылдӕр кӕй сӕххӕст уыдзысты, ууыл нӕ бон у фидарӕй ӕууӕндын? Чырысти ууыл ӕппындӕр нӕ дызӕрдыг кодта ӕмӕ цӕуыл ахуыр кодта, уый адӕмы уырнындзинад фидар кодта. Ӕркӕсӕм-ма, Йесо адӕмы хохыл куы ахуыр кодта, уӕд цы цӕвиттонтӕ ӕрхаста, уыдонмӕ. Фыст сты Матфейы 5:18 стихы: «Ӕцӕг уын зӕгъын: арв ӕмӕ зӕхх куы нал уой, уӕддӕр Закъоны тӕккӕ гыццылдӕр дамгъӕ кӕнӕ дамгъӕйӕ иу хахх дӕр нӕ фӕхъӕудзӕн – ӕппӕт дӕр сӕххӕст уыдзӕн».

Дзуттаг алфавиты цы дамгъӕтӕ ис, уыдонӕй ӕппӕты гыццылдӕр дамгъӕ у י (йод). Уыцы дамгъӕйӕ райдайы тетраграмматон, Хуыцауы ном Йегъовӕa. Уымӕй уӕлдай ма, Хуыцауы Закъоны цы дзырдтӕ ӕмӕ цы дамгъӕтӕ уыд, уыдоны «дамгъӕйӕ иу хахх дӕр» тынг ахсджиагыл нымадтой чиныджы дӕснытӕ ӕмӕ фарисейтӕ.

Чырысти куыд загъта, афтӕмӕй, арв ӕмӕ зӕхх куы нал уой, уӕддӕр Хуыцауы закъоны тӕккӕ гыццыл хай дӕр ӕнӕсӕххӕстӕй нӕ баззайдзӕн. Фӕлӕ Библи зӕгъы, арв ӕмӕ зӕхх ӕнустӕм кӕй уыдзысты (Псалом 78:69). Уӕдӕ уыцы ныхӕстӕй бӕрӕг у, Хуыцауы закъоны алы ныхас дӕр кӕй сӕххӕст уыдзӕн.

Цымӕ Йегъовӕ Хуыцау лыстӕг хабӕрттӕ ахсджиагыл нымайы? Ахъуыды-ма кӕнӕм ахӕм цӕвиттоныл: рагон израилӕгтӕн загъд уыд, цӕмӕй Куадзӕны уӕрыккӕн йе стджытӕй иу дӕр ма асастаиккой (Рацыд 12:46). Чи зоны, уыдон лыстӕг хабӕрттӕ уыдысты. Цымӕ израилӕгтӕ ӕмбӕрстой, уӕрыккӕн йе стджытӕ сӕттӕн цӕуылнӕ уыд, уый? Ӕвӕццӕгӕн, нӕ. Фӕлӕ Йегъовӕ Хуыцау зыдта, уыцы лыстӕг хабӕрттӕ фидӕнмӕ кӕй амыдтой: Мессийӕйы, ома Чырыстийы, хъизӕмӕртты хъӕдыл куы амардтой, уӕд ын йе стджытӕй иу дӕр нӕ асастой (Псалом 34:20; Иоанны 19:31–33, 36).

Уӕдӕ Чырыстийы ныхӕстӕй цы базонӕн ис? Махӕн дӕр нӕ бон у фидарӕй ӕууӕндын, Йегъовӕ Хуыцау зӕрдӕ цӕмӕй бавӕрдта, уыдӕттӕ иууылдӕр лыстӕг хабӕртты онг кӕй сӕххӕст кӕндзӕн. Цӕй стыр уӕз ис ӕппӕты гыццылдӕр дзуттаг дамгъӕйӕн!