Бӕрӕгбӕттӕa

Сӕ нысаниуӕг. Бонтӕ (фылдӕр улӕфгӕ бонтӕ), кӕцытӕ баст сты цавӕрдӕр цау бӕрӕг кӕнынимӕ. Уыцы бонты ма фӕкӕнынц бинонты кӕнӕ бынӕттон куывдтӕ. Бӕрӕгбон вӕййы динон, адӕмон кӕнӕ та гӕнӕн ис уа ӕмгӕрттимӕ фембӕлыны фадат.

Раст уаид хайад исын, чи зоны, чырыстон бындур цы бӕрӕгбонӕн нӕй, уым, ды йын динон нысаниуӕг куы нӕ дӕттай, уӕд?

Еф. 5:10, 11-ӕм стихты дзырдӕуы: «Фӕлварут, цы у хорз фӕндон Хуыцауӕн, ма ут хайджын талынджы ӕнӕдыргъ хъуыддӕгты, фӕлӕ уайдзӕф кӕнут уыдонӕн».

2 Кор. 6:14—18-ӕм стихты дзырдӕуы: «Цы ис иумӕйагӕй рӕстдзинадӕн ӕнӕзакъондзинадимӕ? Цы ис иумӕйагӕй рухсӕн талынгимӕ? Цы ис ӕмуддзинадӕй Чырысти ӕмӕ Велиары ӕхсӕн? Кӕнӕ цавӕр ӕмхайад ис рӕстгӕнӕгӕн ӕнӕрӕстгӕнӕгимӕ? Цы иудзинад ис Хуыцауы кувӕндонӕн гуымирытимӕ? [...] „Ӕмӕ уымӕ гӕсгӕ, рацӕут уыдоны ӕхсӕнӕй ӕмӕ ахицӕн ут, зӕгъы Хицау, ӕмӕ хӕстӕг ма цӕут ӕнӕсыгъдӕгмӕ, ӕмӕ уӕ Ӕз райсдзынӕн... ӕмӕ сымах уыдзыстут Мӕн фырттӕ ӕмӕ чызджытӕ, зӕгъы Ӕппӕтылхӕцӕг Хицау“». (Иегъовӕйы зӕрдӕбынӕй куы уарзӕм ӕмӕ ӕппӕт тыхтӕй куы архайӕм йӕ зӕрдӕ ссарыныл, уӕд нын уый баххуыс кӕндзӕн ӕнӕчырыстон ӕгъдӕуттӕ ныууадзынӕн, кӕцытӕн, гӕнӕн ис тынг аргъ кодтам. Иегъовӕйы ӕцӕгдӕр чи зоны ӕмӕ йӕ чи уарзы, уый йӕхи ӕнамонд нӕ хаты, мӕнг хуыцӕуттӕ кӕнӕ мӕнгдзинадимӕ баст ӕгъдӕуттӕй йӕхи кӕй хизы, уый тыххӕй. Ӕцӕг уарзондзинад ӕй разӕнгард кӕны, цӕмӕй мӕнгдзинадыл ма цин кӕна, фӕлӕ ӕцӕгадыл. Кӕс 1 Коринфӕгтӕм 13:6.)

Абар Рацыды 32:3—10. Бафиппайын ма хъӕуы, израилӕгтӕ Египеты дины ӕгъдӕуттӕ кӕй райстой, ӕмӕ сӕ кӕй схуыдтой — «Иегъовӕйы бӕрӕгбон» (АМТ). Фӕлӕ сӕ Иегъовӕ уый тыххӕй карзӕй бафхӕрдта. Абон мах уынӕм ӕрмӕстдӕр нырыккон ӕгъдӕуттимӕ баст бӕрӕгбӕттӕ. Иуӕй-иутӕ нӕм, гӕнӕн ис, ӕвзӕр ма кӕсой. Фӕлӕ йӕ Иегъовӕ зоны, уыдон муртатты динты ӕгъдӕуттӕй кӕй рацыдысты. Хуыцау цы хъуыды кӕны, уый нын ахсджиагдӕр нӕу?

Цӕстуынгӕ цӕвиттон. Зӕгъӕм, зындгонд адӕймаджы хӕдзары раз ӕрӕмбырд бирӕ адӕм ӕмӕ дзурынц, зӕгъгӕ, ӕрбацыдысты йӕ гуырӕнбонмӕ. Уымӕн йӕ зӕрдӕмӕ нӕ цӕуы гуырӕнбонтӕ кӕнын. Уый нӕ уарзы адӕм фырхӕрд ӕмӕ фыднозт куы фӕкӕнынц, уый, ӕмӕ йӕ зӕрдӕмӕ нӕ цӕуынц ӕнӕгъдау митӕ дӕр. Фӕлӕ уыцы адӕм уӕддӕр уыцы хъуыддӕгтӕ кӕнынц, ӕмӕ ма уымӕй уӕлдай, уый ницӕмӕ ӕрдаргӕйӕ, кӕрӕдзийӕн лӕвӕрдтӕ дӕр кӕнынц! Фӕлӕ уыдон ӕрмӕст ууыл нӕ лӕууынц. Бӕрӕгбоны бонӕн снысан кодтой уыцы адӕймаджы знӕгтӕй иуы райгуырӕн бон. Йӕхи куыд хатид? Фӕндид дӕ ахӕм бӕрӕгбоны хайад исын? Адӕм растдӕр афтӕ бӕрӕг кӕнынц Цыппурс.

Чырыстӕттӕн ӕмбӕлы Ногазы бӕрӕгбон бӕрӕг кӕнын?

Энциклопеди («The World Book Encyclopedia») «Уорлд бук»-мӕ гӕсгӕ «н. э. агъоммӕ 46 азы Ромы хицау Юлий Цезарь афӕдзы райдианыл банымадта 1 январь. Ромӕгтӕ уыцы бон рахицӕн кодтой Янусӕн, бахизӕнтӕ, рахизӕнтӕ, дуӕрттӕ ӕмӕ алы райдианы хуыцауӕн. Январы мӕй дӕр схуыдтой Янусы тыххӕй, кӕцыйӕн уыд дыууӕ цӕсгомы — иу дзы каст размӕ, иннӕ та фӕстӕмӕ» (1984 азы уагъд, 14 т., 237 ф.).

Ногазы бӕрӕгбон алы бӕстӕты дӕр бӕрӕг кӕнынц алыхуызӕтты ӕмӕ алы афонты. Арӕх уыцы бӕрӕгбӕтты рӕстӕджы минасыл схӕцынц ӕмӕ нозтыл бафтынц. Фӕлӕ Ромӕгтӕм 13:13-ӕм стихы дзырдӕуы: «Куыд боныгон, афтӕ нӕхи дардзыстӕм хӕрзӕгъдау, нӕхи нӕ ратдзыстӕм минас ӕмӕ нуазынмӕ, нӕдӕр адджын монцтӕм ӕмӕ ӕнӕгъдау хъуыддӕгтӕм, нӕдӕр быцӕутӕм ӕмӕ хӕлӕгдзинадмӕ». (Кӕс ма 1 Петры 4:3, 4; Галатӕгтӕм 5:19—21.)

Куыд райдыдтой бӕрӕг кӕнын Сыгъдӕг Валентины бон?

Энциклдопеди «Уорлд бук»-ы дзырдӕуы: «Сыгъдӕг Валентины бон равзӕрд дыууӕ чырыстон хъизӕмаргӕнӕджы цытӕн (сӕ дыууӕ дӕр хуындысты Валентинтӕ) цы бӕрӕгбон уыд, уымӕй. Фӕлӕ уыцы бонимӕ баст ӕгъдӕуттӕ.... ӕвӕццӕгӕн, равзӕрдысты Луперкалийӕ — рагон ромаг бӕрӕгбӕттӕй, кӕцыты нысан кодтой алы аз дӕр 15 февралы. Уыцы бон иу куывтой Юнонӕйӕн, ромаг ус-хуыцауӕн — сылгоймӕгтӕ ӕмӕ ӕмкъайады бардуагӕн, ӕмӕ Панӕн, ӕрдзы хуыцауӕн» (1973 азы уагъд, 20 т. 204 ф.).

Мадӕлтӕн кувыны ӕгъдау кӕцӕй равзӕрд?

«Бритайнаг энциклопедийы» дзырдӕуы: «Бӕрӕгбон равзӕрд, рагон грекъӕгтӕм мадӕн табу кӕныны ӕгъдауӕй. Мартъийы идӕты-иу Къаннӕг Азийы сӕрмагондӕй табу кодтой мадӕн ӕмӕ-иу кӕндтӕ кодтой хуыцӕутты Кадджын мад Кибелӕ, кӕнӕ Рейӕйы ном ссарынӕн» (1959 аз, 15 т., 849 ф.).

Цавӕр библион стихтӕ ӕмбарын кӕнынц чырыстоны ахаст, паддзахады историйы цы зынгӕ бӕрӕгбӕттӕ вӕййы, уыдон нысан кӕнынмӕ?

Иоанны 18:36-ӕм стих: «Йесо дзуапп лӕвӕрдта [ромаг хицауӕн]: Мӕ Паддзахад нӕу ацы дунейӕ».

Иоанны 15:19-ӕм стих: «Сымах [Йесойы фӕдылдзӕуджытӕ] дунейӕ куы уаиккат, уӕд дуне уарзид йӕхионты; сымах та дунейӕ кӕй не стут, фӕлӕ уӕ Ӕз кӕй равзӕрстон дунейӕ, уымӕ гӕсгӕ ӕнӕуынон стут дунейӕн».

1 Иоанны 5:19-ӕм стих: «Ӕппӕт дуне... ис фыддзинады [«Фыдбылызы къухы», НД]». (Абар Иоанны 14:30; Раргомад 13:1, 2; Данелы 2:44.)

Ӕндӕр бынӕттон ӕмӕ паддзахадон бӕрӕгбӕттӕ

Уыдон сты бирӕ. Се ’ппӕтыл нӕ бон нӕу ам ӕрдзурын. Фӕлӕ уӕлдӕр цы историон бӕлвырдгӕнӕнтӕ ӕрхастам, уыдон нын ӕмбарын кӕнынц, цавӕрдӕр бӕрӕгбон ӕвзаргӕйӕ, цӕмӕ хъӕуы хъус дарын, ӕмӕ амынд библион принциптӕ та хорз разамынд сты, Иегъовӕ Хуыцауӕн ӕппӕт зӕрдӕйӕ лӕггад кӕнын кӕй фӕнды, уыдонӕн.

[Фиппаинаг]