Иегъовӕйы Ӕвдисӕнтӕ Библи цӕй фӕрцы ӕмбарынц?
Фыццаджыдӕр, Ӕвдисӕнтӕ зӕрдиагӕй ӕууӕндынц, Библи Хуыцауы Ныхас кӕй у ӕмӕ дзы цы ис фыст, уыдон сын зонд амонынӕн кӕй сты (2 Тим. 3:16, 17; Ром. 15:4; 1 Кор. 10:11). Уымӕ гӕсгӕ уыдон нӕ агурынц ӕххуыс философон бӕлвырдгӕнӕнты, цӕмӕй Библийы ӕцӕгад иуварс кӕной кӕнӕ Библийы хӕрзӕгъдау домӕнтӕм гӕсгӕ чи нӕ цӕры, уыдоны раст кӕной.
Библи символикон ӕвзагӕй цӕуыл дзуры, уымӕн йӕ мидис сӕхи ныхӕстӕй не ’мбарын кӕнынц, фӕлӕ Библийӕ (1 Кор. 2:13). Иуӕй-иу фӕлгонцты ахӕсгӕ нысаниуӕг фылдӕр хатт ссарӕн вӕййы Библийы иннӕ хӕйтты. (Цӕвиттонӕн кӕс Раргомады 21:1, стӕй, «денджыз» цы нысан кӕны, уый тыххӕй бакӕс Исайы 57:20. Раргомады 14:1-аг стихы «Уӕрыкк» кӕй ӕвдисы, уый тыххӕй та кӕс Иоанны 1:29 ӕмӕ 1 Петры 1:19.)
Пехуымпарӕдтӕ куыд ӕххӕст кӕнынц, уый базонынӕн сын ӕххуыс кӕны Йесойы уынаффӕ, зӕгъгӕ, хъус дарын хъӕуы, рагзагъд цаутӕ куыд ӕххӕст кӕнынц, уымӕ (Лукайы 21:29—31; абар 2 Петры 1:16—19). Уыдон ӕргом дзурынц уыцы цауты тыххӕй ӕмӕ хъусдард здахынц, Библи сӕ куыд ӕмбарын кӕны, уымӕ.
Йесо загъта, зӕххыл ын кӕй уыдзӕн «ӕууӕнкджын ӕмӕ зондджын цагъар» (йӕ сӕрст фӕдылдзӕуджыты къорд) ӕмӕ уый уылты кӕй дӕтдзӕн монон хӕринаг йӕ «хӕдзаронтӕн» (Матф. 24:45—47, НД). Иегъовӕйы Ӕвдисӕнтӕ аргъ кӕнынц уыцы скондӕн. Фыццаг чырыстӕттау уыдон дӕр зын фарстатӕ скъуыддзаг кӕнынӕн ӕххуыс агурынц уыцы «цагъары» къорды разамонӕг советӕй, уымӕн ӕмӕ йӕ уынаффӕтӕ бындуриуӕг кӕнынц адӕймаджы зондыл нӕ, фӕлӕ Хуыцауы Ныхас ӕмӕ йын йӕ лӕггадгӕнджытимӕ цы ахастытӕ ис, уый кӕй зонынц, ууыл, стӕй ма сын ӕххуыс кӕны, Хуыцауӕй афтӕ зӕрдиагӕй кӕй курынц, уыцы сыгъдӕг уд (Ап. к. 15:1—29; 16:4, 5).