Нӕ уырнындзинад нӕ разӕнгард кӕны хорз хъуыддӕгтӕм
1 Ной, Моисей ӕмӕ Раавы сӕ уырнындзинад сразӕнгард кодта архайдмӕ. Ной сарӕзта ковчег. Моисей ныууагъта, фараоны хӕдзары йын цы рӕстӕгмӕйы ӕвӕлмон цард уыд, уый. Раав бамбӕхста сгарджыты, байхъуыста сӕм ӕмӕ уый фӕрцы фервӕзын кодта йӕ бинонты (Дзут. 11:7, 24—26, 31). Абон мах та нӕ уырнындзинад цавӕр хорз хъуыддӕгтӕм разӕнгард кӕны?
2 Хъусын кӕнынмӕ. Нӕ уырнындзинад нӕ разӕнгард кӕны, цӕмӕй адӕмӕн дзурӕм нӕ диссаджы Хуыцауы тыххӕй ӕмӕ не ’нусон амондджын цардӕн цы сарӕзта, уый тыххӕй (2 Кор. 4:13). Хаттӕй-хатт нӕ ныфс нӕ фӕхӕссӕм уацамынды цӕуынмӕ. Фӕлӕ Иегъовӕйы «ӕдзухдӕр [куы] уынӕм нӕ размӕ», уӕд нӕ уый бафидар кӕндзӕн ӕмӕ нал тӕрсдзыстӕм (Пс. 15:8). Уый фӕстӕ нын нӕ уырнындзинад ӕххуыс кӕндзӕн, цӕмӕй нын фадат куы фӕзына, уӕд хорз хабар хъусын кӕнӕм нӕ хӕстӕджытӕн, нӕ сыхӕгтӕн, не ’мкусджытӕн, не ’мкъласонтӕн ӕмӕ иннӕтӕн (Ром. 1:14—16).
3 Иумӕ ӕмбырд кӕнынмӕ. Иу хорз хъуыддаг ма у иудадзыг ӕмбырдтӕм цӕуын дӕр. Цӕмӕн? Чырыстон фембӕлдтӕм кӕй цӕуӕм, уымӕй бӕрӕг у, Хуыцауы сыгъдӕг уды фӕрцы Йесо не ’хсӕн кӕй ис, ууыл кӕй ӕууӕндӕм, уый (Матф. 18:20). Уый дзурӕг у, кӕй нӕ фӕнды хъусын, «Уд цы дзуры аргъуантӕн [«ӕмбырдтӕн», НД]», уымӕ (Рар. 3:6). Мах лӕмбынӕг хъусӕм амындтӕм, уымӕн ӕмӕ уырнындзинады цӕстӕй уынӕм, не Стыр Зондамонӕг Иегъовӕ нӕ кӕй ахуыр кӕны, уый (Ис. 30:20).
4 Раст хатдзӕгтӕ кӕнынмӕ. Фенӕн цӕмӕн нӕй, ууыл фидарӕй куы ӕууӕндӕм, уӕд Хуыцауы хъуыддӕгтӕ нӕ царды уыдзысты фыццаг бынаты (Дзут. 11:1). Уый тыххӕй бирӕ хатт адӕймаджы бахъӕуы йӕхи истӕмӕй фӕцух кӕнын. Цӕвиттон, иу хистӕр нӕлгоймаг не сразы, бирӕ ӕхца кӕм бакуыстаид, ахӕм куыстыл, уымӕн ӕмӕ уӕд фембӕлдтӕ цух кодтаид, йӕ бинонтӕй дард цардаид ӕмӕ пионерӕй нал лӕггад кодтаид. Уӕдӕ мах ӕппӕт зӕрдӕйӕ ӕууӕндӕм Библийы ныхӕстыл, зӕгъгӕ, Иегъовӕ ницы цух ныууадздзӕн, «фыццаджыдӕр... Хуыцауы Паддзахад ӕмӕ Йӕ рӕстдзинад» чи агуры, уыдоны (Матф. 6:33, НФ).
5 Нӕ уырнындзинад нӕ цардыл тынг кӕй фӕзыны, уый адӕмӕй ӕнӕбафиппайгӕ нӕ баззайы. Ӕцӕгдӕр, нӕ уырнындзинад зындгонд у ӕппӕт зӕххыл (Ром. 1:8). Цӕй уӕдӕ нӕ хорз хъуыддӕгтӕй ӕвдисӕм, нӕ уырнындзинад удӕгас кӕй у, уый (Иак. 2:26).