Паддзахады залтӕ аразыны хъуыддаг Беларусь ӕмӕ Уӕрӕсейы
1. Цавӕр хъуыддагӕн хъӕуынц Паддзахады залтӕ?
1 Иегъовӕ у не Стыр Зондамонӕг. Ӕмӕ йӕ фӕнды, цӕмӕй йын йӕ адӕм куыд ӕмбӕлы, афтӕ кувой ӕмӕ сӕ уымӕ гӕсгӕ ахуыр кӕны (Ис. 30:20, 21). Иегъовӕйы Ӕвдисӕнтӕн уыцы ахуырад сӕ лӕггадимӕ баст у, ӕмӕ уый тыххӕй ӕмбырды фембӕлдтӕ тынг ахсджиагыл нымайынц. Кӕд сын фадат вӕййы, уӕд сӕ фембӕлдтӕ вӕййынц Паддзахады залы,– уый тынг хорз бынат у, ӕнӕкъуылымпыйӕ Хуыцауы хъуыддӕгтыл ахуыр кӕнынӕн ӕмӕ уырнындзинад фидар кӕнынӕн (Дзут. 10:24, 25).
2. а) Паддзахады залтӕ аразыны программӕ чи сфидар кодта ӕмӕ цы бантыст? ӕ) Нӕ территорийы цал Паддзахады залы саразын хъӕуы?
2 1999 азы Разамонӕг Совет сфидар кодта Паддзахады залтӕ аразыны программӕ, цӕмӕй мӕгуыр бӕстӕты, Паддзахады залтӕ тынг кӕм хъӕуы, уым арӕзт цӕуой. Уыцы программӕйы руаджы ныронг Беларус ӕмӕ Уӕрӕсейы арӕзт ӕмӕ цалцӕггонд ӕрцыд 225 Паддзахады залы! Фӕлӕ нырма хъӕуы саразын 528 Паддзахады залы. Уыцы нымӕцмӕ нӕ хауынц, фидӕны ӕмбырдтӕ куы фылдӕр кӕной, уӕд цы залтӕ хъӕудзӕн аразын, уыдон. Зӕгъӕм, ӕрвылаз 70 Паддзахады залы бӕрц куы аразӕм, уӕддӕр ма дӕс азӕй фылдӕр бахъӕудзӕн, цӕмӕй, цал залы хъӕуы, уыйбӕрц арӕзт ӕрцӕуа.
3. а) Паддзахады залтӕ аразынӕн цы пълан ис? ӕ) Хуымӕтӕг Паддзахады залтӕ хуыздӕр цӕмӕн сты?
3 Паддзахады залтӕ аразынц уыциу пъланмӕ гӕсгӕ, куы бахъӕуы, уӕд ӕй бынӕттон уавӕртӕм гӕсгӕ гыццыл фӕивынц. Паддзахады залтӕ зынаргъ кӕй не слӕууынц, хуымӕтӕг ӕрмӕст уымӕн не сты, фӕлӕ ма сӕ дарын бирӕ рӕстӕг ӕмӕ ӕхца кӕй нӕ домы, уый тыххӕй дӕр. Зӕгъӕм, ӕнӕуи бандӕтты бӕсты саразынц фӕлмӕн даргъ бандӕттӕ. Зынаргъ кондиционерты бӕсты саразынц хуымӕтӕг вентиляци. Не ’фсымӕрты кӕй уарзӕм, уый нын баххуыс кӕндзӕн, цӕмӕй ӕгӕр бирӕ ма домӕм ӕмӕ ӕмбарӕм, бирӕ рӕтты ма кӕй хъӕуы Паддзахады залтӕ аразын (2 Кор. 8:13–15). Паддзахады зал аразыны фӕнд цы ӕмбырдмӕ ис, уый хъуамӕ архайа филиалы разамындмӕ гӕсгӕ. Зал саразыны фӕстӕ ма филиал дӕтдзӕн амындтӕ, цӕмӕй ӕнцон зилӕн ӕмӕ ӕнцон дарӕн уа. Афтӕмӕй сӕ нӕ бахъӕудзӕн, филиал фыццаг цы пълан ӕрӕрвыста, уымӕй уӕлдай залы ноджы цыдӕртӕ аразын.
4. а) Цы бакӕнын хъӕуы, цӕмӕй ӕмбырд Паддзахады зал аразын райдайа? ӕ) Зал аразгӕйӕ ӕмбырдыл цы хӕстӕ ис?
4 Ӕмбырд Паддзахады зал аразын куы сфӕнд кӕна, уӕд хъуамӕ цыбыр фыстӕг арвита филиалмӕ. Филиалы Паддзахады залтӕ аразыны тыххӕй дзуапп цы хайад дӕтты, уый сӕм ӕфсымӕртӕй искӕй арвитдзӕн. Уыцы ӕфсымӕр фембӕлдзӕн ӕмбырды комитетимӕ ӕмӕ сын бамбарын кӕндзӕн, Паддзахады зал саразынӕн сӕ цы бакӕнын хъӕуы, уый. Ӕркӕсдзысты, ӕмбырды бон суыдзӕн зӕхх ӕмӕ аразынӕн ӕрмӕг балхӕнын ӕви нӕ. Паддзахады залтӕ аразыны хайад спълан кӕндзӕн, кӕд ӕй райдайдзысты аразын, уый ӕмӕ йӕ залтӕ аразджыты къорды графикмӕ бахӕсдзысты. Бынӕттон хистӕр нӕлгоймӕгтӕй уыцы куысты чи архайы, уыдон хъуамӕ залӕн хорз бынат бацагурой. Зӕхх кӕнӕ хӕдзар куы ссарой, уӕд филиалмӕ фӕхабар кӕндзысты ссудӕйы тыххӕй. Ссудӕ куы рахицӕн кӕной ӕмӕ аразыны бар куы раттой, уӕд Паддзахады залтӕ аразынӕн цы фондз къорды ис, уыдонӕй иу къордӕй цалдӕр ӕфсымӕры снысан кӕндзысты, цӕмӕй сын зал аразынӕн баххуыс кӕной. Кӕй зӕгъын ӕй хъӕуы, куыстытӕн сӕ фылдӕр кӕндзӕн ӕмбырд. Паддзахады залтӕ аразджыты къордӕн йӕ сӕйраг хӕс у куыстытӕ пълан кӕнын ӕмӕ разамынд дӕттын.
5. Ӕмбырд ма разамынд куыд фӕисы?
5 Цалынмӕ зал арӕзт нӕ фӕуа, уӕдмӕ ӕмбырды хистӕр нӕлгоймӕгтӕ филиалӕй исдзысты разамынд фыстӕджыты кӕнӕ, Паддзахады залтӕ аразыны хайад уыцы районмӕ кӕй снысан кодта, уыцы ӕфсымӕры уылты. Хистӕр нӕлгоймӕгтӕ ӕмӕ арӕзтадон программӕйы чи архайы, уыцы ӕфсымӕртӕ-иу хъуамӕ лӕмбынӕг ӕркӕсой, уыцы фыстӕджыты дзырд цӕуыл цӕуы, уымӕ. Хъуамӕ ма ӕмгуыст кӕной арӕзтады цӕстдарӕгимӕ, йе ’ххуысгӕнӕгимӕ ӕмӕ, Паддзахады залтӕ аразыны хайад цы ӕфсымӕры снысан кодта, уыимӕ.
6. Ахсджиаг цӕмӕн у, цӕмӕй ӕмбырды алчидӕр зал аразынӕн ӕххуыс кӕна?
6 Барвӕндон кусджытӕ ӕмбырдӕй. Ӕмбырд хорз куы не ’ххуыс кӕна, уӕд куыст ныддаргъ уыдзӕн ӕмӕ дзы чи фыдӕбон кӕны, уыдоны рӕстӕг ӕмӕ фӕрӕзтӕ хардз цӕудзысты (Ӕмб. 13:12). Иуӕй-иу горӕтты, ӕмбырдӕй алчидӕр ӕнӕзивӕгӕй ӕмӕ зӕрдиагӕй кӕй архайдта, уый фӕрцы Паддзахады залтӕ сарӕзтой ӕхсӕз къуыримӕ (Ис. 6:8). Уымӕй уӕлдай ма, зал тагъд куы саразынц, уӕд бирӕ рӕстӕг ӕмӕ ӕхца дӕр нӕ бахардз вӕййы. Паддзахады зал цас тагъддӕр саразой, уыйас тагъддӕр ӕмбырд чырыстон царды фӕткмӕ гӕсгӕ архайын райдайдзӕн (Неем. 2:3–5, 17, 18; 6:15).
7. Паддзахады зал аразынӕн ӕххуыс кӕнын кӕй фӕнды, уыдонӕй цы домдӕуы?
7 Цӕмӕй ӕмбырды хотӕ ӕмӕ ӕфсымӕртӕ Паддзахады зал аразынӕн ӕххуыс кӕной, уый тыххӕй сӕ курдиат фыссын нӕ хъӕуы. Хъуамӕ сыл 18 азӕй къаддӕр ма цӕуа ӕмӕ сын ӕмбырды хорз ном уа. Адӕймаг аразынмӕ хорз куы арӕхса, уӕд уый ахсджиаг у, фӕлӕ ноджы ахсджиагдӕр та у – барвӕндон кусджытӕ цӕттӕ кӕй вӕййынц цыфӕнды куыст дӕр зӕрдиагӕй кӕнынмӕ. Ӕфсымӕртӕ ӕмӕ хотӕ уӕхски-уӕхск куы фӕкусынц, уӕд сын фылдӕр бантысы.
8. а) Цӕмӕй ацы хъуыддаджы фылдӕр баххуыс кӕнай, уый тыххӕй дӕ бон цы саразын у? ӕ) Куыд ма ис ӕндӕр хуызы дӕр ӕххуыс кӕнӕн?
8 Ӕрӕджы донаргъуыд чи райста, ахӕм ӕфсымӕр ӕмбырды хистӕр нӕлгоймаджы бафарста, мӕ бон баххуыс кӕнын цӕмӕй у, зӕгъгӕ. Стӕй ӕфсымӕр йӕ куысты хицауы бафарста, йӕ бон у ӕртӕ къуырийы отпусчы ацӕуын ӕви нӕ. Хицау сразы ис ӕмӕ ӕфсымӕр йӕ отпуск цингӕнгӕйӕ арвыста Паддзахады зал аразгӕйӕ. Хӕринаггӕнӕгӕй чи куыста, иу ахӕм хо йӕ хицауӕй йӕхи ракуырдта, цӕмӕй цалдӕр боны кусджытӕн хӕринаг кодтаид. Дӕ бон та цы у саразын, цӕмӕй ды дӕр ацы ахсджиаг куысты фылдӕр архайай? Кӕд дын уый фадат нӕй, ӕмӕ дзы бакусай, уӕд дӕ бон нӕ уаид ӕндӕр хуызы баххуыс кӕнын? Зӕгъӕм, сыхаг ӕмбырдтӕй уӕм цы барвӕндон кусджытӕ ис, уыдонӕй искӕмӕн дӕ бон у цӕрӕнуат раттын, хӕринаг сын цӕттӕ кӕнын, ӕхца кӕнӕ ӕндӕр фӕрӕзтӕй фӕкӕсын, агъуыстытӕ ӕфснайын кӕнӕ Паддзахады зал аразджыты къордӕн сӕ дзаумӕттӕ ӕхсын? Иуӕй-иу хатт барвӕндон кусджытӕ куы нӕ фӕфаг кӕны, уӕд филиал иннӕ ӕмбырдтӕм фыстӕг арвиты, цӕмӕй сӕм фӕкӕсой. Цӕй стыр арфӕдзинад у, уыцы ӕмбырдтӕ ӕвӕстиатӕй хъуыддагмӕ куы бавналынц!
9. Районон цӕстдарджытӕ куыд ахъаз кӕнынц залтӕ аразыны хъуыддагӕн?
9 Районон цӕстдарджытӕ дӕр бирӕ аразынц – хоты ӕмӕ ӕфсымӕрты разӕнгард кӕнынц, цӕмӕй канд сӕхи горӕты ма ӕххуыс кӕной залтӕ аразынӕн, фӕлӕ ма ӕндӕр рӕтты дӕр. Уыдон зонынц, куыд хорз у, ӕмбырд Паддзахады залы фембӕлдтӕ куы уадза ӕмӕ ӕфсымӕртӕн фембарын кӕнынц, куыд ахсджиаг у Иегъовӕ Хуыцауӕн ахӕм хуызы лӕггад кӕнын.
10. Паддзахады залтӕ аразджыты къордӕй искӕмӕн цӕрӕнбынат дӕтгӕйӕ, нӕ зӕрдыл цы хъуамӕ дарӕм?
10 Паддзахады залтӕ аразджыты къордтӕн цӕрӕнбынӕттӕ. Паддзахады залтӕ аразджыты къордӕй исчи ӕмбырдӕн куы феххуыс кӕны, уӕд сын уыцы ӕмбырд цӕрӕнбынат ссары. Уыцы ӕнувыд ӕфсымӕртӕ ӕмӕ хотӕй бирӕтӕ ныууагътой сӕ хӕдзӕрттӕ ӕмӕ цалдӕргай азты дӕргъы алы рӕтты аразынц залтӕ (Лук. 9:58). Уыдон афтӕ нӕ хъуыды кӕнынц, ӕмӕ Паддзахады залтӕ кӕй аразынц, уый цыбыр рӕстӕгмӕ хъуыддаг у, фӕлӕ сӕ бирӕ рӕстӕг фӕнды афтӕ лӕггад кӕнын. Паддзахады хъуыддаджы афтӕ кӕй фыдӕбон кӕнынц, уымӕ гӕсгӕ сӕ хъӕуы бынат улӕфынӕн, Библи ахуыр кӕнынӕн ӕмӕ хорз фынӕй кӕнынӕн. Уый ӕмбаргӕйӕ, ӕмбырдтӕй иуӕй-иутӕ Паддзахады залтӕ аразджыты къордӕй искӕй сӕхимӕ цӕрынмӕ фӕхонынц, сӕхӕдӕг та уыцы рӕстӕг ацӕуынц сӕ хӕстӕджытӕм, йе та ӕмбырдӕй искӕмӕ цӕрынмӕ, цалынмӕ зал арӕзт нӕ фӕвӕййы, уӕдмӕ. Цы диссаджы зӕрдӕйы уаг равдисынц!
11. Цӕмӕй исчи Паддзахады залтӕ аразджыты къорды куса, уый тыххӕй цы хъӕуы?
11 Дӕ бон у фылдӕр аразын? Бинонтӕ цы ӕфсымӕртӕн нӕй ӕмӕ цардӕмбал кӕмӕн ис, уыдонӕй «Паддзахады залтӕ аразынӕн барвӕндон кусӕджы курдиат» чи байдзаг кодта, уыдоны, гӕнӕн ис, филиал цыбыр рӕстӕгмӕ фӕхона Паддзахады залтӕ аразджыты къордимӕ ӕндӕр ран кусынмӕ. Фӕхонынц сӕ дыууӕ къуырийӕ ӕртӕ мӕймӕ, фӕлӕ ма чи зоны, уыцы рӕстӕг ноджы ӕртӕ мӕйы дӕр ахӕсса. Уый фӕстӕ иуӕй-иу барвӕндон кусджыты, гӕнӕн ис, ӕмӕ фӕхоной Паддзахады залтӕ аразджыты къордимӕ лӕггад кӕнынмӕ. Цардӕмбал дын ис ӕви нӕ, дӕ уырнындзинад фидар у, хорз ӕнӕниздзинад дын ис ӕмӕ дӕ бон уӕззау куыст кӕнын у? Фӕнды дӕ ахӕм арфӕйаг хъуыддаджы фылдӕр лӕггад кӕнын? Уӕд дын де ’мбырды хистӕр нӕлгоймӕгтӕ ӕхсызгонӕй ратдзысты анкетӕ.
12. Барвӕндон кусджытӕ цавӕр арфӕдзинӕдтӕй сты хайджын?
12 Паддзахады залтӕ аразгӕйӕ цы мингай барвӕндон кусджытӕ феххуыс кӕнынц, уыдон, кӕй зӕгъын ӕй хъӕуы, раппӕлинаг сты. Сӕ уарзондзинад ӕмӕ удуӕлдайдзинад бӕлвырд кӕны, Иегъовӕ йӕ сыгъдӕг удӕй кӕй архайы, уый (Ап. к. 20:35). Кӕд дӕ уавӕртӕ амонынц ахӕм хуызы лӕггад кӕнын, уӕд дӕм стыр арфӕдзинӕдтӕ ӕнхъӕлмӕ кӕсы, куы фенай, Иегъовӕйы кадджын кӕнынӕн цы Паддзахады зал сарӕзтат, ууыл дӕ хотӕ ӕмӕ ӕфсымӕртӕ куыд цин кӕнынц, уый. Паддзахады залтӕ аразыны программӕйы чи архайдта, иу ахӕм ӕфсымӕр загъта: «Зал арӕзт куы фӕвӕййӕм ӕмӕ нӕ ӕндӕр ранмӕ цӕуын куы фӕхъӕуы, цӕмӕй та уым дӕр ног залыл кусын райдайӕм, уӕддӕр тынг райгонд вӕййӕм, ноджы та иу зал кӕй сарӕзтам ӕмӕ Иегъовӕйы адӕмӕн сӕ бон кӕй у уым ӕмбырд кӕнын». Уӕдӕ дын кӕд уыцы фадат ис, цӕмӕй Паддзахады залтӕ аразай, уӕд ӕй ма ауадз!
13. Паддзахады залтӕ аразыны программӕйӕн йӕ нысан цы у?
13 Паддзахады залтӕ аразыны руаджы хицауад ӕмӕ нӕ алыварс цы адӕмтӕ ис, уыдон уынынц, Иегъовӕйы адӕм сӕ уарзондзинад алыхуызон хъуыддӕгты кӕй ӕвдисынц. Ацы хъуыддаджы зӕрдиагӕй кӕй ӕххуыс кӕнӕм, уый Иегъовӕ рохуаты нӕ ныууадздзӕн. Иегъовӕйӕн ӕхсызгон у уынын, йӕ зынгзӕрдӕ, удуӕлдай лӕггадгӕнджытӕ иумӕ ӕмвӕндӕй ӕмӕ фӕрнӕй куыд кусынц ӕмӕ сын уӕлдайджынтӕй арфӕ кӕны. Ныфс нӕ ис, Паддзахады залтӕ аразыны программӕ ӕрмӕст уымӕн кӕй нӕу ахъаз, ӕмӕ нӕ территорийы залтӕ кӕй хъӕуы, фӕлӕ ма кадджын кӕны не Стыр Зондамонӕг Иегъовӕ Хуыцауы.
[Нывтӕ 2 фарсыл]
Паддзахады зал Кропоткины (Краснодары край)
[Ныв 3 фарсыл]
Аразджыты къорд Башкирийы
[Ныв 3 фарсыл]
Паддзахады зал Братскы (Иркутскы облӕст)
[Ныв 4 фарсыл]
Паддзахады зал Миассы (Челябинскы облӕст)
[Ныв 5 фарсыл]
Псковы Паддзахады залы къултӕ ӕмӕ сӕр аразынмӕ цӕттӕ кӕнынц
[Нывтӕ 6 фарсыл]
Аразджыты къорд ӕмӕ ног Паддзахады зал Сыктывкары (Республикӕ Коми)
[Нывтӕ 7 фарсыл]
Паддзахады зал Краснодары
[Ныв 8 фарсыл]
Паддзахады зал Ӕрыдоны