Паддзахады залты арӕзтад кадджын кӕны Хуыцауы
1. Паддзахады залтӕ аразын ахсджиаг цӕмӕн у?
1 Залтӕ аразыны хъуыддаг у нӕ лаггады ахсджиаг хай. Раджы заманты дӕр нау, хӕсгӕ кувӕндоны цатыр, кувӕндон ӕмӕ Иерусалимы къултӕ кӕй арӕзтой, уымӕй дӕр Йегъовӕйӕн лӕггад кодтой. Ӕппӕт уыдӕттӕ уыдысты Йегъовӕйы фӕндӕй ӕмӕ сын сӕ фыдӕбонӕн арфӕ кодта. Абон дӕр Паддзахады залтӕ аразыны хъуыддаг ӕнгом баст у нӕ лӕггадимӕ, уымӕн ӕмӕ Хуыцауӕн кувынӕн уым ӕрӕмбырд вӕййӕм. Алы залы дӕр фембырд кӕнынц Йегъовӕйы Ӕвдисӕнтӕ ӕмӕ Хуыцауы тыххӕй фылдӕр базонын кӕй фӕнды, ахӕм адӕм. Уым сӕ уырнындзинад фидар кӕнынц, кӕрӕдзийы ныфс уадзынц ӕмӕ ахуыр кӕнынц хъусын кӕнын, ӕмӕ сӕ ног дунейы чи бахъӕудзӕн, уыцы миниуджытыл (Пс. 127:1; Матф. 28:19, 20). Алкӕй бон дӕр нӕ куыд у залтӕ аразынӕн ӕххуыс кӕнын? Ӕркӕсӕм ӕртӕ хъуыддагмӕ: барвӕндон кусджыты ӕххуыс, ӕхцайӕ фӕкӕсын ӕмӕ залтӕм зилын.
2. Залтӕ аразынӕн фылдӕр ӕххуысгӕнджытӕ цавӕр дыууӕ хъуыддаджы тыххӕй хъӕуы?
2 Хъӕуы фылдӕр ӕххуысгӕнджытӕ. Фарон-иу Уӕрӕсейы алы мӕй дӕр фӕзынд 13 ног ӕмбырды бӕрц! Ӕмбырдтӕ фылдӕрӕй-фылдӕр кӕй кӕнынц, уымӕ гӕсгӕ ма хъӕуы иу-400 Паддзахады залы ӕмӕ уыцы хъуыддаджы стыр ӕххуыс хъӕуы. Нӕ ныхмӕ кӕй цӕуынц ӕмӕ ӕндӕр зындзинӕдтӕ кӕй ис, уый тыххӕй хъӕуы бирӕ фыдӕбон ӕмӕ хъарутӕ, цӕмӕй арӕзтады хъуыддӕгтӕ ӕмӕ гӕххӕттытӕ арӕзт ӕрцӕуой. Бирӕтӕн у сӕ бон Паддзахады залты арӕзтады ӕххуыс кӕнын, цӕмӕй, уыцы хӕс бирӕ азты дӕргъы кӕуыл ис, уыцы ӕфсымӕртӕн сӕ уаргъ фӕрогдӕр кӕной (Ис. 6:8; Гал. 6:2).
3. Цы цӕстӕй хъуамӕ кӕсӕм арӕзтады архайыны хъуыддагмӕ, ӕмӕ нӕ ацы абзацы стихтӕ цӕмӕ разӕнгард кӕнынц?
3 Паддзахады зал аразынӕн ӕххуыс кӕнын стыр кад у, ӕмӕ уыцы хъуыддаджы чи фӕкӕсы, уыдон раппӕлинаг сты (1 Сам. 3:8; Матф. 4:20). Иу арӕзтады цӕстдарӕг ӕхсызгонӕй радзырдта: «Иу горӕты хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ се ’ппӕт дӕр отпуск райстой, цӕмӕй Паддзахады зал аразынӕн баххуыс кодтаиккой!» Тынг ӕхсызгон вӕййы, чидӕртӕ къуыри мидӕг иу кӕнӕ дыууӕ боны куы рахицӕн кӕны, цӕмӕй арӕзтады баххуыс кӕной. Уӕлдайдӕр хистӕр нӕлгоймӕгтӕн у сӕ бон иннӕты разӕнгард кӕнын, цӕмӕй арӕзтады фылдӕр рӕстӕг фӕкӕсой. Паддзахады залтӕ аразынӕн чи ӕххуыс кӕны, уый у фӕлтӕрдджын чырыстон ӕмӕ ӕмбары, афтӕмӕй Йегъовӕйы кӕй кадджын кӕны ӕмӕ Йесойы фӕдзӕхст кӕй ӕххӕст кӕны, ахуыргӕнинӕгтӕ цӕттӕ кӕнут ӕмӕ сӕ ахуыр кӕнут, зӕгъгӕ. Дӕуӕн та дӕ бон у, тынг ахсджиаг чи нӕу, уыцы хъуыддӕгтӕ фӕуадзын ӕмӕ рӕстӕг рахицӕн кӕнын, цӕмӕй ахӕм хуызы Йегъовӕйӕн балӕггад кӕнай? (Неем. 2:18; Еф. 5:15–17). (Арӕзтады йӕ бон кӕмӕн у архайын ӕмӕ цавӕр куыстыты ис баххуыс кӕнӕн, уый тыххӕй кӕс km 04/2006 статья «Паддзахады залтӕ аразыны хъуыддаг Беларусь ӕмӕ Уӕрӕсейы».)
4. Залты арӕзтады ӕххуыс кӕнын цы арфӕдзинӕдтӕ хӕссы?
4 Паддзахады зал куы фӕаразӕм, уӕд нӕ уырнындзинад дӕр фидар кӕны, уымӕн ӕмӕ иннӕтимӕ иумӕ кусыныл ахуыр кӕнӕм, архайӕм нӕ удыхъӕд ивыныл, стӕй нӕ рӕстӕг ӕмӕ нӕ хъарутӕ хорз хъуыддагыл хардз кӕнӕм. Ныр дыууӕ азӕй фылдӕр залтӕ аразджыты къорды чи кусы, иу ахӕм ӕрыгон ӕфсымӕр загъта: «Ам рӕстӕг тагъд атӕхы, фӕлӕ мӕнӕн ӕхсызгон у, уымӕн ӕмӕ мӕ рӕстӕг ацӕуы Йегъовӕйы хъуыддагыл, уый та ӕнӕпайда хъуыддаг нӕу!» Раздӕр арӕзтадон дӕсниад кӕмӕ нӕ уыд, уыцы ӕрыгӕттӕй бирӕтӕ сахуыр сты хъӕугӕ куыстыл залтӕ аразгӕйӕ. Иннӕты та бафӕнды ӕххӕстрӕстӕг лӕггад кӕнын, аразджыты къордимӕ кӕй фӕкусынц, уый руаджы.
5. Нӕ бон куыд у, «хуыздӕрӕй нӕм цы ис, уымӕй» Йегъовӕйӕн кад кӕнын?
5 Ӕхцайӕ ӕххуыс. Арӕзтадон хъуыддагӕн не ’ппӕты бон дӕр у ӕххуыс кӕнын. Куыд? Кад кӕнӕм Йегъовӕйӕн, «хуыздӕрӕй нӕм цы ис, уый» йын кӕй дӕттӕм, уымӕй (Ӕмб. 3:9). Соломоны рӕстӕг кувӕндоны арӕзтадӕн мысайнӕгтӕ чи лӕвӕрдта, уыдон тынг цин кодтой (1 Аз. 29:9). Абон дӕр нӕ мысайнӕгтӕ сты цины хос нӕхицӕн ӕмӕ Йегъовӕйӕн (Ап. хъ. 20:35).
6. Нӕ бон куыд у не ’хцайӕ ӕмбаргӕйӕ пайда кӕнын?
6 Нӕ бон ма у кусджытӕн хӕринаг кӕнын, дзаумӕттӕ ӕхсын, фатер раттын ӕмӕ афтӕ дарддӕр. Зӕгъӕм, Паддзахады зал аразджыты къорды чи ис, уыдон иу арӕзтадӕй иннӕмӕ кӕй фӕцӕуынц, уымӕ гӕсгӕ сын цӕрӕнбынат нӕ вӕййы ӕмӕ сӕ арӕх бахъӕуы фатер баххуырсын. Фӕлӕ фатерыл ӕхца нӕ бахардз вӕййы, ӕмбырдӕй исчи аразджыты къорды лӕггадгӕнджыты йӕ хӕдзары цӕрын куы бауадзы, йӕхӕдӕг та уыцы рӕстӕг йӕ хӕстӕджытӕм кӕнӕ йе ’мбӕлттӕм куы фӕцӕры, уӕд. Йе та зӕгъӕм, зал куы саразынц ӕмӕ аразджыты къорд куы ацӕуы, уӕд, чи зоны, иуӕй-иуты бафӕнды залмӕ исты зынаргъ дзауматӕ, кондиционер кӕнӕ дивантӕ балхӕнын, срӕсугъд ӕй кӕнын ӕмӕ афтӕ дарддӕр. Фӕлӕ ахӕм цыдӕртӕ ӕлхӕныны размӕ бауынаффӕ кӕнын хъӕуы филиалимӕ. Хотӕ ӕмӕ ’фсымӕртӕ сӕ сӕрныллӕгдзинад равдисдзысты, Паддзахады зал хуымӕтӕг куы уа, ӕмӕ уыдӕттӕ куы нӕ домой, уӕд. Цас хуыздӕр уыдзӕн, алкӕмӕ дӕр алцыдӕр ӕмхуызон куы уа ӕмӕ не ’хцайӕ ӕндӕр ӕмбырдтӕн куы ӕххуыс кӕнӕм, цӕмӕй уыдонӕн дӕр сӕ бон уа Паддзахады зал саразын. (Бакӕс 2 Коринфӕгтӕм 8:14, 15.)
7. Зал аразыны рӕстӕг иуӕй-иутӕ куыд феххуыс кӕнынц?
7 Йегъовӕйы Ӕвдисӕнтимӕ Библи чи ахуыр кодта, ахӕм лӕг куы базыдта, сӕ горӕты Паддзахады зал араздзысты, уӕд мысайнаг ратта 10 мин сомы. Иумӕ чи куыста, ахӕм ӕфсымӕртӕ сӕ куыст афтӕ спълан кодтой, цӕмӕй сӕ иу ӕппынӕдзух ӕххуыс кодтаид, се ’мбырд зал куы арӕзта, уӕд. Ӕфсымӕртӕ йӕ бӕсты дӕр куыстой ӕмӕ йын йӕ мызд дӕр лӕвӕрттой. Уыцы ӕфсымӕрӕн иннӕтӕ афтӕ кӕй ӕххуыс кодтой, уый фӕрцы арӕзтады архайдта йӕ райдианӕй кӕронмӕ. Иу горӕты та Паддзахады зал аразынӕн ӕфсымӕрты хъуыд 20 м3 фӕйнӕг. Цӕмӕй бирӕ ӕхца ма бахардз кодтаиккой, уый тыххӕй сфӕнд кодтой цӕттӕ фӕйнӕджы бӕсты хъӕдтӕ балхӕнын ӕмӕ сӕ алыг кӕнын. Иу куыстуат сын хорз аргъӕй лӕвӕрдта фӕйнӕджытӕ. Фӕлӕ ӕфсымӕртӕ базыдтой, ӕндӕр ран фӕйнӕг цасӕй уӕй кӕнынц, уый. Ӕппынфӕстаг 35 м3 балхӕдтой цӕттӕ фӕйнӕгӕй авд хатты асламдӕрӕй. Кӕд ӕфсымӕртӕ фылдӕр рӕстӕг бахардз кодтой ӕмӕ сӕ рацу-бацу кӕнын бахъуыд, уӕддӕр бирӕ ’хца нӕ бахардз кодтой. Иу тынг рынчын хойы (йӕ лӕг дӕр уӕззау рынчын) фӕндыд баххуыс кӕнын, сӕ горӕты Паддзахады зал куы арӕзтой, уӕд. Хо сфӕнд кодта аразджытӕн дзул фыцын, кӕд ын ӕнцон нӕ уыд, уӕддӕр. Фӕлӕ хотӕ ӕмӕ ӕфсымӕрты цинӕн кӕрон нал уыд – цалынмӕ зал арӕзтой, уӕдмӕ йын йӕ хӕрзад дзул хордтой. Уый сын уыди йе стыр уарзондзинадыл дзурӕг.
8. Паддзахады залы тыххӕй мысайнаг цас дӕтдзысты, уый фӕдыл бирӕ ӕмбырдтӕ ног резолюци цӕмӕн рахӕссынц, ӕмӕ уый цӕуыл дзурӕг у?
8 Уӕрӕсейы ӕмбырдтӕй йӕхи Паддзахады зал кӕмӕн ис, уыдонӕн сӕ фылдӕр залтӕ сарӕзтой ӕгас дунейы хотӕ ӕмӕ ӕфсымӕрты мысайнӕгты руаджы. Уыцы ӕмбырдтӕ резолюци рахастой, сӕ залы тыххӕй алы мӕй дӕр мысайнӕгтӕ кӕй дӕтдзысты. Гӕнӕн ис, уавӕртӕ фӕивой, ӕмбырд ӕхцайӕ кӕй фӕрӕвдздӕр, кӕнӕ хъусынгӕнджыты нымӕц кӕй фӕфылдӕр, йе та залы фылдӕр ӕмбырдтӕ кӕй ӕмбырд кӕны, уый тыххӕй. Стыр бузныг зӕгъӕм уыцы ӕмбырдтӕн, сӕ уавӕртӕм чи ӕркаст ӕмӕ ног резолюци чи рахаста, алы мӕй дӕр филиалмӕ фылдӕр мысайнӕгтӕ кӕй ӕрвитдзысты. Уымӕй сӕ уарзондзинад ӕвдисынц, нырма йӕхи зал кӕмӕн нӕй, уыцы хотӕ ӕмӕ ’фсымӕртӕм (Дзут. 13:16).
9. а) Паддзахады залмӕ зилынмӕ цы хауы? ӕ) Уый ахсджиаг хъуыддаг цӕмӕн у?
9 Паддзахады залмӕ зилын. Рӕсугъд Паддзахады зал саразын иу хъуыддаг у, иннӕ та – зилын ӕм. Цӕмӕй залмӕ зылд уа, уымӕ йӕ хъус фӕдары хистӕр нӕлгоймаг кӕнӕ кӕстӕриуӕггӕнӕг ӕфсымӕр, йе та ӕфсымӕрты комитет, кӕд залы цалдӕр ӕмбырды ӕмбӕлы, уӕд. Уыцы ӕфсымӕртӕ спълан кӕнынц, Паддзахады зал сыгъдӕг ӕмӕ цалцӕггонд куыд цӕуа ӕмӕ залмӕ зилынӕн цы хъӕуы, уый дӕр дзы фаг куыд уа. Залмӕ хъус дарынмӕ ма хауы: документтӕ закъонмӕ гӕсгӕ аразын, куы хъӕуа, уӕд хицауадимӕ ӕмӕ алыхуызон куыстуӕттимӕ ӕмгуыст кӕнын. Уыцы ӕфсымӕртӕ стыр бузныг сты, зал сыгъдӕг дарынмӕ ӕмӕ йӕ цалцӕг кӕнынмӕ ӕнӕзивӕгӕй чи фӕкӕсы, уыцы хотӕ ӕмӕ ӕфсымӕртӕй. Афтӕмӕй хуымӕтӕг, фӕлӕ хӕрззылд зал бирӕ рӕстӕг кад хӕсдзӕн Йегъовӕйӕн.
10. а) Ӕнтыстджын цӕй фӕрцы стӕм? ӕ) Паддзахады залтӕ аразыны хъуыддаг бирӕ рӕстӕг пайда куыд хӕсдзӕн?
10 Кӕронбӕттӕн. Раджы заманты куыд уыд, афтӕ абон дӕр Хуыцауӕн кӕм кувӕм, ахӕм бынӕттӕ аразын у нӕ лӕггады ахсджиаг хай. Кӕд нӕ ныхмӕ фӕцӕуынц, уӕддӕр хъуамӕ нӕ ныфс ма асӕтта, фӕлӕ нӕхи цӕттӕ кӕнӕм, фидӕны нӕм цы куыст ӕнхъӕлмӕ кӕсы, уымӕ, ӕмӕ нӕ зӕрдыл дарӕм, Йегъовӕйы фӕрцы нын алцыдӕр кӕй бантысдзӕн (Пс. 127:1). Хотӕ ӕмӕ йыл ӕфсымӕртӕ сӕ ныфс кӕй дарынц, уый сӕ разӕнгард кӕны сӕ уарзондзинад алыхуызон хъуыддӕгты ӕвдисынмӕ. Йесо Чырысти куыд загъта, афтӕмӕй ахӕм уарзондзинадӕй базонӕн уыдзӕн йе ’цӕг фӕдылдзӕуджыты (Иоан. 13:34, 35). Махӕн дӕр нӕ бон у Йесойау иннӕтыл нӕхицӕй тынгдӕр тыхсын. Чи зоны, абон Йегъовӕйы лӕггадгӕнджытӕн цы зӕрдӕйы уаг ис ӕмӕ цы куыстытыл ахуыр кӕнынц, уый фылдӕр пайда ӕрхӕсса ног дунейы (Ис. 65:21). Уӕдӕ ныр цы аразӕм ӕмӕ цӕуыл ахуыр кӕнӕм, уый ма нӕ бирӕ рӕстӕг хъӕудзӕн. Мах уынӕм, Паддзахады залтӕ аразыны хъуыддагӕн Йегъовӕ куыд арфӕ кӕны, уый. Цӕй уӕдӕ, не ’ппӕт дӕр нӕ рӕстӕгыл ӕмӕ «нӕм хуыздӕрӕй цы ис», ууыл ма ауӕрдӕм ацы хъуыддагӕн! (Еф. 3:20, 21).