Кувын тынг ахсджиаг у
1. Цӕй фӕрцы у нӕ бон хъусын кӕнын?
1 Ӕрмӕст нӕхи хъаруты фӕрцы нӕ бон хорз хабар хъусын кӕнын нӕу. Уыцы хъуыддаджы нын ӕххуыс кӕны Йегъовӕ (Фил. 4:13). Йӕ зӕдты нӕм ӕрвиты, цӕмӕй сӕрныллӕг адӕмы агурӕм (Рарг. 14:6, 7). Мах адӕмы зӕрдӕты рӕстдзинады нӕмгуытӕ ӕрмӕст таугӕ кӕнӕм ӕмӕ сыл дон кӕнӕм, рӕзын та сӕ Йегъовӕ кӕны (1 Кор. 3:6, 9). Уӕдӕ тынг ахсджиаг у, цӕмӕй нӕ уӕларвон Фыдыл нӕ ныфс дарӕм ӕмӕ йӕм кувӕм!
2. Цӕй тыххӕй ис кувӕн?
2 Нӕхи тыххӕй-иу кувӕм. Нӕ бон алцӕй тыххӕй дӕр у кувын (Еф. 6:18). Зӕгъӕм, цӕмӕй уацамынды ма тӕрсӕм ӕмӕ адӕммӕ нӕ фидӕны хотӕ ӕмӕ ’фсымӕрты цӕстӕй кӕсӕм (Ап. хъ. 4:29). Йегъовӕмӕ ма ис кувӕн, цӕмӕй сыгъдӕгзӕрдӕ адӕмимӕ Библи ахуыр кӕнын райдайӕм. Адӕймаг нӕм уацамынды фарста куы ратта, уӕд-иу нӕхинымӕр цыбыртӕй скувӕм, цӕмӕй нын Йегъовӕ баххуыс кӕна раст дзуапп раттынӕн (Неем. 2:4). Кувӕм-иу зонды тыххӕй дӕр, ӕмӕ уӕд нӕ бон уыдзӕн нӕ хъуыддӕгтӕ афтӕ пълан кӕнын, цӕмӕй нын царды сӕйрагдӕр уа хъусын кӕнын (Иак. 1:5). Йегъовӕйӕн ма ӕхсызгон вӕййы, йӕ лӕггадгӕнджытӕ кӕй стӕм, уыцы стыр кады тыххӕй йын бузныг куы фӕдзурӕм, уӕд (Кол. 3:15).
3. Иннӕты тыххӕй кӕй фӕкувӕм, уый уацамындыл хорзырдӕм куыд фӕзыны?
3 Иннӕты тыххӕй-иу кувӕм. «Кӕрӕдзийы тыххӕй» кувын дӕр тынг ахсджиаг у. Чи зоны, нӕ куывды хорз уаид нӕ хо кӕнӕ не ’фсымӕры ном дӕр зӕгъын (Иак. 5:16; Ап. хъ. 12:5). Кӕд де ’нӕниздзинады тыххӕй дӕ бон бирӕ хъусын кӕнын нӕу, уӕд та кув, ӕнӕниз чи у, уыдоны тыххӕй. Макуы-иу дызӕрдыг кӕнӕм, рӕстгӕнӕджы куывдӕн стыр тых кӕй ис. Раст ма уаид хицӕутты тыххӕй дӕр кувын, цӕмӕй нын нӕ уацамынды хъуыддаг ма къуылымпы кӕной ӕмӕ «нӕ бон уа нӕхицӕн ӕнцад ӕмӕ сабырӕй цӕрын» (1 Тим. 2:1, 2).
4. Ӕппынӕдзух цӕмӕн хъуамӕ кувӕм?
4 Ӕнӕхъӕн зӕххы цъарыл хорз хабар фехъусын кӕнын ӕнцон хъуыддаг нӕу. Фӕлӕ «ӕппынӕдзух» куы кувӕм, уӕд ӕй Йегъовӕйы фӕрцы кӕронмӕ ахӕццӕ кӕндзыстӕм (Ром. 12:12).