Библи чи ахуыр кӕны, уыдоны хорз цӕттӕ кӕнӕм
1. а) Ӕмбырды алкӕуыл дӕр цавӕр хӕс ис? ӕ) Адӕмы ахуыр кӕнын цӕмӕн хъӕуы?
1 Рӕстдзинад базонын кӕй фӕнды ӕмӕ Библи чи ахуыр кӕны, уыдоны ахуыр кӕнын у ӕгас ӕмбырды хъуыддаг. Зӕгъӕм, кӕд Аполлосӕн Чырыстийы тыххӕй фыццаг Акилӕ ӕмӕ Прискиллӕ нӕ радзырдтой, уӕддӕр ын баххуыс кодтой, цӕмӕй, цы нӕ зыдта, уый бӕлвырддӕр базыдтаид ӕмӕ ноджы хуыздӕр ахуыргӕнӕг суыдаид (Хъуыд. 18:26). Мах дӕр фӕнды, цӕмӕй не ’мбырды Библи чи ахуыр кӕны, уыдонмӕ раст зонындзинӕдтӕ уа, Йегъовӕмӕ баввахс уой, ӕнӕмӕнг сӕ цы хъӕуы фӕивын, уый фӕивой ӕмӕ сӕхӕдӕг дӕр ахуыргӕнджытӕ суой.
2. а) Цӕуылнӕ хъуамӕ ӕфсӕрмы кӕнӕм нӕ ахуыргӕнинӕгтӕм фӕлтӕрдджын ахуыргӕнджыты хонын? ӕ) Бонзонгӕ куы уӕм, уӕд фӕлтӕрдджын ахуыргӕнджытӕй куыд ахуыр кӕндзыстӕм?
2 Павел Тимофейӕн дзырдта, цӕмӕй хуыздӕр ахуыргӕнӕг суыдаид (1 Тим. 4:16). Хорз уаид, мах дӕр фыццаг ӕнусы чырыстӕттау ӕдзух фӕлтӕрд хъусынгӕнджытимӕ куы хъусын кӕниккам, цӕмӕй-иу сӕ истӕуыл сахуыр уӕм ӕмӕ-иу сӕ уынаффӕ дӕр ракурӕм. Стыр ӕххуыс сты хистӕр нӕлгоймӕгтӕ, пионертӕ, адӕмы хорз чи ахуыр кӕны, ахӕм фӕлтӕрдджын хъусынгӕнджытӕ, стӕй ма цӕуӕг цӕстдарджытӕ ӕмӕ сӕ устытӕ. Библи кӕимӕ ахуыр кӕныс, уымӕ ахӕм хъусынгӕнджыты хонын ма ӕфсӕрмы кӕн. Зӕгъӕм, дӕ бон уаид дӕ хъуыддӕгтӕ афтӕ спълан кӕнын, цӕмӕй дӕ Библийы ахуырмӕ фӕхонай районон цӕстдарӕджы кӕнӕ йӕ усы, уе ’мбырд уын куы бӕрӕг кӕной, уӕд? Уый стыр арфӕдзинад уыдзӕн дӕ ахуыргӕнинагӕн дӕр ӕмӕ дӕхицӕн дӕр (Кол. 4:11). Бонзонгӕ куы уӕм, уӕд ӕмбардзыстӕм, ногты ахуыр кӕныны ӕгас ӕмбырд дӕр кӕй архайы.
3. Фӕлтӕрдджын хъусынгӕнӕгимӕ уацамынды куы уай, уӕд дӕ хъус цӕмӕ хъуамӕ дарай?
3 Фӕлтӕрдджын хъусынгӕнӕг рагацау йӕхи хорз куы бацӕттӕ кӕна, уӕд йӕхи бон уыдзӕн ахуыр ауадзын. Дӕ хъус ӕм лӕмбынӕг дар. Куыд ис Фыстадмӕ гӕсгӕ ныхас кӕнӕн? (Хъуыд. 17:2). Куыд ис Библийы сӕйраг ахуырӕдтӕ хуымӕтӕгӕй амонӕн ӕмӕ ахсджиаг чи нӕу, ахӕм лыстӕг хабӕртты кой нӕ кӕнын? Ахуыргӕнинаджы цавӕр фарстатӕ сразӕнгард кӕндзысты, цӕмӕй хъуыды кӕна йӕ фӕндтӕ ӕмӕ йе ’нкъарӕнтыл, стӕй ма Библийы уагӕвӕрдтӕй йӕ царды пайда кӕна? Кӕд Библийы ахуыр дӕхӕдӕг уадзай, уӕд уый фӕстӕ, демӕ чи уа, уый бафӕрс, фӕхуыздӕр кӕнын дӕ цы хъӕуы, уымӕй (w02-U 15/7 27 ф.).
4. Хорз ахуыргӕнджытӕ цӕй фӕрцы суыдзыстӕм?
4 2004 ӕмӕ 2005 азты «Нӕ хъусын кӕныны хъуыддаджы» мыхуыр ӕрцыд 12 статьяйы, сӕ иумӕйаг ном, «Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн», зӕгъгӕ. Уыдис дзы тынг бирӕ хорз уынаффӕтӕ. Уыцы уынаффӕтӕ куы иртасӕм ӕмӕ сӕ куы пайда кӕнӕм, уӕд бирӕ дыргъ хӕсдзыстӕм ӕмӕ Йегъовӕйы кадджын кӕндзыстӕм (Иоан. 15:8).