Доминиканы Республикӕ

Территори. Доминиканы Республикӕ ахсы Эспаньолӕйы сакъадахӕн йӕ фылдӕр хай, йӕ къаддӕр хай та ахсы Республикӕ Гаити. Доминиканы Республикӕйы ис уымӕл тропикон хъӕдтӕ, бӕрзонд хӕхтӕ, мангрӕ бӕлӕстӕ кӕм ис, ахӕм цъымара бынӕттӕ ӕмӕ ӕдзӕрӕг быдыртӕ. Ӕппӕты бӕрзонддӕр хох, Дуарте, у денджызӕй 3 175 метры уӕлдӕр. Доминиканы Республикӕйы былгӕронӕн йӕ фылдӕр хайыл ис ӕмбисонды рӕсугъд урс змис. Сакъадахыл ис, хъӕздыг тыллӕг чи дӕтты, ахӕм зӕххытӕ, зӕгъӕм, Сибаойы дӕлвӕз.

Цӕрджытӕ. Цӕрджытӕн сӕ фылдӕр сты, европӕйӕгтӕй ӕмӕ африкӕйӕгтӕй цы цот рацыд, уыдоны байзӕддӕгтӕ. Цӕры ма дзы цалдӕр гыццыл адӕмыхатты дӕр, ӕмӕ сӕ фылдӕр сты гаитиӕгтӕ.

Ӕвзаг. Бӕстӕйы сӕйраг ӕвзаг у испайнаг.

Хӕдзарад. Бӕстӕмӕ ӕхца цӕуы, хӕхты цы скъахынц, уыдӕттӕ, стӕй сӕкӕр, къофи ӕмӕ тамако кӕй уӕй кӕнынц, уый фӕрцы. Ӕрӕджы экономикӕйы уавӕр зынгӕ фӕхуыздӕр, бирӕ туристтӕ сӕм цӕуын кӕй райдыдта, стӕй змис, чъырдур, мрамӕр, зынаргъ дуртӕ ӕмӕ ӕндӕр ахӕм цыдӕртӕ уӕй кӕнын кӕй райдыдтой, уый фӕрцы.

Климӕт. Сакъадахы климӕт у фӕлмӕн. Афӕдзы дӕргъы температурӕ вӕййы 25 градусы бӕрц хъарм. Цӕгат-скӕсӕнырдыгӕй хӕхты афӕдзы дӕргъы къӕвдатӕ рауары 2 032 миллиметрӕй фылдӕр, хусдӕр рӕтты та – 760 миллиметрӕй къаддӕр. Хатт дзы рацӕуы, сакъадахӕн зиан чи ӕрхӕссы, ахӕм тыхдымгӕтӕ.

Хӕринаг ӕмӕ ӕгъдӕуттӕ. Сакъадахы цӕрджытӕ арӕхдӕр фӕхӕрынц пырындз, хъӕдур ӕмӕ халсартӕ. Тынг ма уарзынц денджызы цӕрӕгойтӕ, тропикон дыргътӕ, цывзы ӕмӕ банантӕ сойыл фыхӕй. Ацы хӕринӕгтӕй кӕцыдӕртӕй фӕкӕнынц уыцы бӕстӕйы ӕппӕты зындгонддӕр хӕринаг бандерӕ доминиканӕ (нысан кӕны «доминикайнаг тырыса»). Доминикайнӕгтӕ тынг уарзынц бейсболӕй хъазын, музыкӕмӕ хъусын ӕмӕ кафын, уӕлдайдӕр та меренге кафт. Бирӕтӕ цӕгъдынц гитарӕйыл, барабаныл, флейтӕйыл ӕмӕ маримбӕйыл.