Иаков ацыд Харранмӕ

ИАКОВ кӕимӕ ныхас кӕны, уый зоныс? Ацы адӕмыл Иаков фембӕлд ам, цъайы цур, фӕндагыл бирӕ куы фӕцыд, уый фӕстӕ. Уыдон хизынц сӕ фыстӕ.

– Кӕцӕй стут, хорз адӕм?– бафарста сӕ Иаков.

– Харранӕй,– дзуапп радтой уыдон.

– Мыййаг, Лаваны нӕ зонут?– бафарста та сӕ Иаков.

– Зонӕм,– загътой уыдон.– Уӕртӕ йӕ чызг Рахил ӕрбацӕуы сӕ фысты дзугимӕ.

Уыныс, Рахил дардӕй куыд ӕрбацӕуы?

Иаков Рахилы йӕ мады ӕфсымӕр Лаваны фыстимӕ куы федта, уӕд бацыд ӕмӕ, цъайыл цы дур уыд ӕвӕрд, уый афӕлдӕхта, цӕмӕй фыстӕ дон банызтаиккой. Уый фӕстӕ Иаков Рахилӕн апъа кодта ӕмӕ йын йӕхи бацамыдта. Рахилы цинӕн кӕрон нал уыд, атындзыдта хӕдзармӕ ӕмӕ ӕппӕт дӕр йӕ фыд Лаванӕн радзырдта.

Лаванӕн тынг ӕхсызгон уыд, Иаков ӕм уазӕгуаты кӕй ӕрцыд, уый. Ӕмӕ йӕм Иаков Рахилы тыххӕй куы бахатыд, уӕд ын уый дӕр ӕхсызгон куыннӕ уыди. Ӕрмӕст Иаковӕн загъта, цӕмӕй йӕм Рахилы тыххӕй авд азы бакуыстаид. Иаков Рахилы тынг кӕй бауарзта, уымӕ гӕсгӕ сразы. Фӕлӕ чындзӕхсӕвы афон куы ’рхӕццӕ, уӕд зоныс, цы ’рцыд?

Лаван Рахилы бӕсты Иаковӕн усӕн радта йӕ хистӕр чызг Лиайы. Иаков та ногӕй авд азы бакусыныл куы сразы, уӕд ын Лаван радта Рахилы дӕр. Уӕды заманты Хуыцау адӕмӕн уый бар лӕвӕрдта, цӕмӕй сын цалдӕргай устытӕ уыдаид. Фӕлӕ ныр Библимӕ гӕсгӕ нӕлгоймагӕн хъуамӕ уа ӕрмӕстдӕр иу ус.