Ног хӕринаг

ИЗРАИЛӔГТӔ зӕххӕй цы ӕмбырд кӕнынц, уый зоныс? Уый у халасы хуызӕн. Урс, лыстӕг ӕмӕ згъӕлгӕ чи кӕны, ахӕм цыдӕр. Фӕлӕ халас нӕу; уый бӕззы хӕрынӕн.

Израилӕгтӕ Египетӕй куы рацыдысты, уымӕй иу мӕй йеддӕмӕ нӕ рацыд. Ныр уыдон сты ӕдзӕрӕг быдыры. Ам бирӕ нӕ зайы, хӕрынӕн чи бӕззы, ахӕм зайӕгойтӕ ӕмӕ уымӕ гӕсгӕ адӕм хъуыр-хъуыр кӕнынц: «Фӕлтау нӕ Египеты куы амардтаид Иегъовӕ. Кӕд ӕппын ницы, уӕддӕр-иу уым, нӕ зӕрдӕ цы загътаид, уый хордтам». Уымӕ гӕсгӕ сын Иегъовӕ загъта: «Ӕз уын ратдзынӕн хӕринаг уӕларвӕй». Ӕмӕ йӕ ныхас сӕххӕст кодта. Иннӕ райсом израилӕгтӕ кӕсынц, ӕмӕ сӕ алыварс зӕхх урс-урсид адардта.

– Цы у уый?– дис кӕнынц адӕм.

– Уый у, Иегъовӕ уын кӕй дӕтты, уыцы хӕринаг,– загъта сын Моисей. Адӕм ӕй схуыдтой МАННӔ. Адӕй у мыдамӕсты хуызӕн.

– Алчидӕр уӕ ӕмбырд кӕнӕд, цас бахӕрдзӕн, уыйбӕрц,– дзуры Моисей адӕмӕн. Ӕмӕ йӕ уыдон дӕр ӕмбырд кӕнынц алы райсом. Фӕстӕдӕр хур куы ӕрӕндавы, уӕд маннӕйӕ зӕххыл цы баззайы, уый батайы.

– Маннӕ иннӕ бонмӕ ма уадзут,– фӕдзӕхсы ма сӕ Моисей. Фӕлӕ йӕм иуӕй-иутӕ нӕ хъусынц. Ӕмӕ зоныс, цы ’рцыд? Маннӕйӕ иннӕ бонмӕ цы баззад, уый скӕлм и ӕмӕ смаг кӕнын райдыдта!

Фӕлӕ Иегъовӕ адӕмӕн дзуры, цӕмӕй къуырийы мидӕг иу бон маннӕ ӕмбырд кӕной дыууӕ хатты фылдӕр. Уый у къуырийы ӕхсӕзӕм бон. Маннӕйӕ иннӕ бонмӕ дӕр хъуамӕ ныууадзой, уымӕн ӕмӕ сын Иегъовӕ куыд дзуры, афтӕмӕй ӕвдӕм бон уӕларвӕй маннӕ нӕ кӕлдзӕн. Маннӕйӕ-иу ӕвдӕм бонмӕ цы баззад, уый-иу не скӕлм и ӕмӕ-иу не смаг кодта! Уый уыд ноджы иу диссаг!

Израилӕгтӕ цалынмӕ ӕдзӕрӕг быдыры сты, уӕдмӕ сӕ Иегъовӕ цух нӕ уадзы маннӕйӕ.