Йесо адӕмы куыд ахуыр кӕны

ИУ ХАТТ Йесо иу лӕгӕн загъта, зӕгъгӕ, уарз дӕ хионы. Ӕмӕ йӕ уый бафарста: «Чи у мӕ хион?»

Кӕй зӕгъын ӕй хъӕуы, Йесо зыдта, уыцы лӕджы цы зӕгъын фӕндыд, уый. Уымӕ афтӕ кӕсы, ӕмӕ йӕ адӕмӕй чи у ӕмӕ йӕ диныл хӕст чи у, ӕрмӕстдӕр уыдон сты йӕ хиуӕттӕ. Уымӕ гӕсгӕ базонӕм, Йесо йын цы загъта, уый.

Хаттӕй-хатт Йесо адӕмӕн зонд бацамоны, исты ӕцӕг хабар сын кӕй радзуры, уый фӕрцы. Афтӕ бакодта ныр дӕр. Уый радзырдта иу иудей ӕмӕ иу самариаджы хабар. Раздӕр мах базыдтам, иудейтӕн сӕ фылдӕр самариӕгты кӕй нӕ уарзынц. Уӕдӕ Йесо ракодта ахӕм хабар.

Иу бон хӕххон фӕндагыл иу иудей фӕцӕйцыд Иерихонмӕ. Фӕлӕ абырджытӕ йӕ размӕ фесты. Йе ’хцатӕ йын байстой, йӕхи та йын тынг фӕнадтой, ӕмӕ йӕ ӕрдӕгмардӕй ныууагътой.

Фӕстӕдӕр уыцы фӕндагыл фӕцӕйцыд иудейаг сауджын. Фӕндаджы был федта хаудӕй уыцы лӕджы. Дӕумӕ гӕсгӕ цы сарӕзта? Куыд?! Уый ахызт иннӕ фарсмӕ ӕмӕ дарддӕр ацыд йӕ фӕндагыл. Уый фӕстӕ та ууылты фӕцӕйцыд ӕндӕр адӕймаг, уый дӕр тынг кувӕг лӕг – левит. Цымӕ ӕрлӕууыди? Нӕ, уый дӕр не ’рлӕууыди уыцы фыднад адӕймагӕн баххуыс кӕнынмӕ. Уыныс, сауджын ӕмӕ левит куыд адард сты.

Фӕлӕ ма ӕркӕс, фыднад лӕджы уӕлхъус чи лӕууы? Самариаг. Уый ӕххуыс кӕны иудейӕн. Йӕ цӕфтӕ йын бӕтты. Уый фӕстӕ йӕ аласта, кӕм баулӕфдзӕн ӕмӕ фӕдзӕбӕхдӕр уыдзӕн, ахӕм бынатмӕ.

Йесо уыцы хабар куы радзырдта, уӕд ӕй чи бафарста, уымӕн загъта: «Уыцы ӕртӕйӕ цӕф адӕймагӕн хионы ӕххуыс чи бакодта? Сауджын, левит ӕви самариаг?»

– Самариаг. Уый хорздзинад ракодта фыднад адӕймагӕн.

– Раст зӕгъыс,– загъта йын Йесо.– Уӕдӕ цу ӕмӕ ды дӕр афтӕ кӕн иннӕтӕн.

Йесо адӕмы куыд ахуыр кӕны, уый дӕ зӕрдӕмӕ цӕуы? Йесо нын Библийы уылты цы дзуры, уымӕ куы хъусӕм, уӕд тынг бирӕ хорз хъуыддӕгтыл сахуыр уыдзыстӕм, афтӕ нӕу?