Цӕмӕй ӕнустӕм цӕрӕм, уый тыххӕй цы хъӕуы

АЦЫ гыццыл чызг йе ’мбӕлттимӕ цы кӕсы, уый зоныс? Раст зӕгъыс, ныртӕккӕ дӕ къухы цы чиныг ис, уый – «Мӕ библион радзырдты чиныг». Уыдон дӕр кӕсынц, ды цы радзырд кӕсыс, уый – «Цӕмӕй ӕнустӕм цӕрӕм, уый тыххӕй цы хъӕуы».

Ӕмӕ дзы цы базыдтой, уый зоныс? Цӕмӕй ӕнустӕм цӕрӕм, уый тыххӕй, фыццаджыдӕр, хъуамӕ базонӕм Иегъовӕ ӕмӕ йӕ Фырт Йесойы тыххӕй. Библи нын дзуры: «Цӕмӕй ӕнустӕм цӕрӕм, уый тыххӕй нӕ хъӕуы иунӕг ӕцӕг Хуыцау ӕмӕ, зӕхмӕ кӕй рарвыста, йӕ уыцы Фырт Йесо Чырыстийы тыххӕй базонын».

Фӕлӕ куыд ис базонӕн Иегъовӕ Хуыцау ӕмӕ йӕ Фырт Йесойы тыххӕй? Уымӕн дын баххуыс кӕндзӕн, «Мӕ библион радзырдты чиныг» сӕрӕй кӕронмӕ куы бакӕсай, уый. Ӕццӕй, ацы чиныг нын бирӕ цыдӕртӕ нӕ дзуры Иегъовӕ ӕмӕ Йесойы тыххӕй? Ноджыдӕр ма нӕ зонгӕ кӕны, Хуыцау ӕмӕ йӕ Фырт цы сарӕзтой ӕмӕ ма цы сараздзысты, уыимӕ дӕр. Фӕлӕ ӕрмӕст ацы чиныг кӕсын фаг нӕу.

Уыныс, сывӕллӕтты фарсмӕ ма пъолыл ноджыдӕр иу чиныг ис? Уый у Библи. Ацы чиныджы радзырдтӕ Библийӕ кӕцӕй ист сты, уыцы скъуыддзӕгтӕ дын исчи куы бакӕсид, уӕд уый тынг хорз уаид. Библи нын амоны ӕппӕтдӕр, цӕмӕй Иегъовӕйӕн раст лӕггад кӕнӕм ӕмӕ ӕнустӕм цӕрӕм. Уымӕ гӕсгӕ хъуамӕ сахуыр уӕм Библи арӕх кӕсын.

Фӕлӕ Иегъовӕ ӕмӕ Йесойы тыххӕй кӕй зонӕм, ӕрмӕст уый фаг нӕу. Гӕнӕн ис, чи сты ӕмӕ нын цы амонынц, уый тыххӕй тынг бирӕ цыдӕртӕ зонӕм, фӕлӕ уӕддӕр ӕнусон цард ма фенӕм. Ноджыдӕр ма цы хъӕуы, уый зоныс?

Цы базонӕм, уымӕ гӕсгӕ цӕрын дӕр. Хъуыды ма кӕныс Искариотаг Иудӕйы? Уый уыд Йесойы дыууадӕс апостолтӕй сӕ иу. Иудӕ Иегъовӕ ӕмӕ Йесойы тыххӕй тынг бирӕ зыдта. Фӕлӕ йыл цы ’рцыд? Уый сси тынг хиуарзон, ӕмӕ Йесойы йе знӕгтӕн 30 ӕвзист ӕхцайыл ауӕй кодта. Уымӕ гӕсгӕ Иудӕ нӕ цӕрдзӕн дзӕнӕты зӕххыл.

Хъуыды ма кӕныс Гиезийы, 69-ӕм радзырды йӕ кой куы кодтам? Уый фӕндыд кӕйдӕр дарӕстӕ ӕмӕ ӕхцатӕ йӕхи бакӕнын. Цӕмӕй уыдон йӕ къухы бафтыдаиккой, уый тыххӕй гӕдыныхас ракодта. Фӕлӕ йӕ Иегъовӕ бафхӕрдта. Уӕдӕ нын Иегъовӕ цы дзуры, уымӕ куы нӕ хъусӕм, уӕд мах дӕр бафхӕрдзӕн.

Иегъовӕйӕн алкӕддӕр иузӕрдионӕй чи лӕггад кодта, ахӕм адӕймӕгтӕ дӕр бирӕ уыдис. Цымӕ мах дӕр уыдоны хуызӕн уӕм, уый нӕ нӕ фӕнды? Хорз дӕнцӕг нын у гыццыл Самуил. 55-ӕм радзырдӕй ма, ӕвӕццӕгӕн, хъуыды кӕныс, Самуил цыппар-фондзаздзыдӕй кӕй райдыдта Иегъовӕйы цатыры лӕггад кӕнын. Уымӕ гӕсгӕ, цыфӕнды гыццыл ма уай, уӕддӕр Иегъовӕйӕн лӕггад кӕнын раджы никуы у.

Кӕй зӕгъын ӕй хъӕуы, алкӕйдӕр нӕ ӕппӕты тынгдӕр та фӕнды Йесо Чырыстийы фӕзмын. 87-ӕм радзырдӕй мах базыдтам, Йесо ма гыццыл лӕппу куы уыд, уӕд дӕр кувӕндоны адӕмимӕ йӕ уӕларвон Фыды тыххӕй кӕй ныхас кодта. Цӕй уӕдӕ мах дӕр, уый куыд кодта, афтӕ кӕнӕм. Гӕнӕн уӕвгӕйӕ, фылдӕр адӕмӕн дзурӕм нӕ диссаджы Хуыцау Иегъовӕ ӕмӕ йӕ Фырт Йесо Чырыстийы тыххӕй. Кӕд ӕмӕ абон афтӕ кӕнӕм, уӕд фидӕны нӕ бон уыдзӕн Хуыцауы сконд дзӕнӕты зӕххыл ӕнустӕм цӕрын.