Кад ын кӕнынц Йӕ райгуырды агъоммӕ

ЗӔД Гавриил ӕвзонг сылгоймаг Мариайӕн куы фехъусын кодта, цы лӕппу йын райгуырдзӕн, уый ӕнусон Паддзах кӕй уыдзӕн, уӕд ӕй Мариа фӕрсы: «Куыд уыдзӕнис уый, Ӕз лӕг куы нӕ зонын?»

«Сыгъдӕг Уд ӕрцӕудзӕн Дӕуыл,— ӕмбарын кӕны Гавриил,— ӕмӕ Ӕппӕтбӕрзонды тых ӕраууон кӕндзӕн Дӕу; уымӕ гӕсгӕ Сыгъдӕг гуырд дӕр хуыйндзӕн Хуыцауы Фырт».

Цӕмӕй Мариайӕн баххуыс кӕна уыцы хабарыл баууӕндынӕн, уый тыххӕй Гавриил дарддӕр дзуры: «Мӕнӕ, Елисаветӕ дӕр, Дӕ хӕстӕг, ӕнӕзӕнӕг чи хуыйны, уымӕ дӕр сӕвзӕрд фырт йӕ зӕронды бонты ӕмӕ йыл цӕуы ӕхсӕзӕм мӕй; Уымӕн ӕмӕ Хуыцаумӕ ницавӕр ныхас баззайдзӕн ӕнӕ хъаруйӕ».

Мариа ӕууӕнды Гавриилы ныхӕстыл. Ӕмӕ йын цавӕр ахаст ис? «Мӕнӕ Хицауы цагъар; фӕуӕд Мын дӕ дзырдмӕ гӕсгӕ»,— зӕгъы Мариа.

Гавриилы фӕзындӕй цасдӕры фӕстӕ Мариа йӕхи срӕвдз кодта фӕндагмӕ ӕмӕ араст уазӕгуаты Елисаветӕмӕ, кӕцы йӕ мой Захариимӕ цӕры Иудейы хӕхбӕсты. Мариайы райгуырӕн сахар Назаретӕй уырдӕм у ӕртӕ-цыппар боны цыд.

Ӕппынфӕстаг куы ӕрбахӕццӕ, уӕд Мариа бахызт Захарийы хӕдзармӕ ӕмӕ Елисаветӕйӕн салам ратта. Уайтагъд Елисаветӕ сыгъдӕг удӕй сӕххӕст ӕмӕ дзуры Мариайӕн: «Арфӕгонд Дӕ устыты ӕхсӕн, ӕмӕ арфӕгонд у Дӕ гуыбыны гуырдз! Ӕмӕ кӕцӕй у уый мӕнӕн, кӕй ӕрбацыд мӕ Хицауы Мад мӕнмӕ? Уымӕн ӕмӕ Дӕ арфӕйы ныхас мӕ хъусындзинадмӕ куы бахӕццӕ, уӕд хъӕлдзӕг тӕлфт скодта сывӕллон мӕ гуыбыны».

Уый фехъусгӕйӕ, Мариа зӕрдӕбынӕй арфӕ кӕны: «Мӕ уд бӕрзонд кӕны Хицауы, ӕмӕ сцин кодта Мӕ уд Мӕ Хуыцау, Мӕ Ирвӕзынгӕнӕджы тыххӕй, кӕй ӕркаст уый Йӕ цагъары сабырдзинадмӕ; уымӕн ӕмӕ нырӕй фӕстӕмӕ амондджын хондзысты Мӕн ӕппӕт мыггӕгтӕ; кӕй сбӕрзонд кодта Тыхджын Мӕн». Кӕд Мариа ӕрцыд арфӕгонд, уӕддӕр ӕппӕт кад Хуыцауӕн дӕтты. «Сыгъдӕг у Йӕ ном,— зӕгъы Мариа,— ӕмӕ Йӕ хорзӕх фӕлтӕрӕй-фӕлтӕрмӕ Уымӕй тӕрсджытӕм».

Мариа дарддӕр Хуыцауӕн кад кӕны удцырын пехуымпарадон зарӕджы ныхӕстӕй: «Равдыста Йӕ нуары хъару; ныххӕлиу кодта сӕ зӕрдӕйы хъуыдытӕй ӕнӕрвӕссонты. Раппӕрста тыхджынты бӕрзонд бадӕнтӕй ӕмӕ сбӕрзонд кодта сабырты. Ӕххормӕгты сӕххӕст кодта хорздзинӕдтӕй, хъӕздыггӕнджыты та ауагъта ницӕимӕ; райста Израилы, Йӕ лӕппуйы, ӕрымысгӕйӕ, хорзӕх, куыд дзырдта нӕ фыдӕлтӕн, Аврааммӕ ӕмӕ йӕ мыггагмӕ ӕнусы размӕ».

Мариа ӕртӕ мӕйы бӕрц ис Елисаветӕимӕ, ӕмӕ йын, кӕй зӕгъын ӕй хъӕуы, стыр ӕххуыс у йӕ сывӕрджыны фӕстаг къуыриты. Куыд диссаг у, Хуыцауы ӕххуысӕй цы дыууӕ ӕнувыд сылгоймаджы басывӕрджын сты, уыдонӕн сӕ бон кӕй у сӕ царды уыцы арфӕйаг рӕстӕг иумӕ арвитын!

Фӕхатыдтӕ миййаг, Йесо цалынмӕ нӕ райгуырд, уӕдмӕ йын цы кад скодтой? Елисаветӕ йӕ схуыдта «мӕ Хицау», ӕмӕ йӕ гуыбыны цы сывӕллон уыд, уый та, Мариа куыддӕр бахызт, афтӕ фырцинӕй сызмӕлыд. Куыд фендзыстӕм, афтӕмӕй фӕстӕдӕр иннӕ адӕмӕн ахӕм хорз ахаст нӕ уыдзӕн Мариа ӕмӕ йын чи нӕма райгуырд, уыцы сывӕллонмӕ. Лукайы 1:26—56.

▪ Цы зӕгъы Гавриил Мариайӕн, цӕмӕй йын, цы хуызы басывӕрджын уыдзӕн, уый бамбарынӕн баххуыс кӕна?

▪ Куыд скад кодтой Йесойӕн йӕ райгуырды агъоммӕ?

▪ Цы зӕгъы Мариа Хуыцауӕн пехуымпарадон кады зарӕджы?

▪ Цас рӕстӕг баззад Мариа Елисаветӕмӕ ӕмӕ цӕмӕн уыд ӕмбӕлон уыйбӕрц рӕстӕг баззайын?