Фӕлмӕнзӕрдӕдзинады цӕвиттон

ЙЕСО нырма дӕр, ӕвӕццӕгӕн, ис Наины, ӕрӕджы идӕдз усы лӕппуйы кӕм райгас кодта, уым кӕнӕ та уырдӕм хӕстӕг сахары. Иу фарисейы, йӕ ном Симон, зӕгъгӕ, фӕнды, ахӕм диссӕгтӕ чи аразы, уыцы адӕймагимӕ базонгӕ уын. Ӕмӕ уый тыххӕй Йесойы фӕхуыдта йӕ хӕдзармӕ сихор бахӕрынмӕ.

Йесойы фӕнды, фадатӕй спайдагӕнгӕйӕ, ӕрӕмбырдуӕвӕг адӕмӕн баххуыс кӕнын ӕмӕ уымӕ гӕсгӕ, амӕй размӕ хъалон ӕмбырдгӕнджытӕ ӕмӕ тӕригъӕдджынтимӕ бахӕрыныл куыд сразы, афтӕ ныр дӕр «нӕ» нӕ загъта. Фӕлӕ Симоны хӕдзары Йесойӕн уазӕджы кад ничи скодта.

Рыг фӕндӕгтыл цӕугӕйӕ дзабырты мидӕг къӕхтӕ кӕй стӕвд ӕмӕ счъизи вӕййынц, уый тыххӕй уазджытӕн уазӕгуарзондзинады нысанӕн сӕ къӕхтӕ уазал донӕй ныхсынц. Фӕлӕ Йесо куы ӕрбацыд, уӕд ын йӕ къӕхтӕ нӕ ныхсадтой. Уазӕгуарзондзинады нысанӕн арӕх куыд фӕкӕнынц, афтӕ йын пъа дӕр ничи акодта, стӕй йын йӕ сӕр зетийӕ дӕр нӕ байсӕрстой.

Уазджытӕ фынджы уӕлхъус сӕхи ӕруагътой ӕмӕ хӕрынц. Уыцы рӕстӕджы уатмӕ сындӕггай бахызт ӕнӕхуынд сылгоймаг. Сахары йӕ иуылдӕр зонынц хъахбай сылгоймагӕй. Ӕвӕццӕгӕн уый фехъуыста Йесойы ахуырӕдты тыххӕй ӕмӕ «ӕппӕт фыдӕбонгӕнджытӕ ӕмӕ уӕззау уаргъхӕсджыты» ӕнцойад ссарынмӕ йӕхимӕ кӕй ӕрхуыдта, уый тыххӕй. Цы федта ӕмӕ цы фехъуыста, уый йӕ зӕрдӕмӕ афтӕ тынг бахъардта, ӕмӕ Йесойы ссардта.

Йесо ма фынджы уӕлхъус куыд бадт, афтӕ йӕм сылгоймаг фӕстӕты бацыд ӕмӕ йӕ къӕхтӕм йӕхи ӕруагъта. Йӕ цӕссыгтӕ кӕлынц Йесойы къӕхтӕм ӕмӕ сӕ уый йӕ дзыккутӕй сӕрфы. Уый фӕстӕ мигӕнӕнӕй хорз тӕфгӕнаг миро рауагъта, Йесойы къӕхтӕ дзы сӕрды ӕмӕ сын фӕлмӕн пъатӕ кӕны. Симон мӕсты каст кӕны. «Уый пехуымпар куы уаид,— хъуыды кӕны йӕхимидӕг,— уӕд зонид, чи ӕмӕ цавӕр сылгоймаг ныдзӕвы Уымӕ, уымӕн ӕмӕ уый у тӕригъӕдджын».

Йесо йын йӕ хъуыдытӕ кӕй базыдта, уымӕ гӕсгӕ йын зӕгъы: «Симон! Мӕнмӕ ис цыдӕр зӕгъинаг дӕуӕн».

«Зӕгъ, Ахуыргӕнӕг»,— дзуапп ратта Симон.

«Иу ӕфстаудӕттӕгӕн уыд дыууӕ хӕсджыны,— дзуры Йесо.— Иу дзы дардта фондз сӕдӕ динары, иннӕ та, фӕндзай; фӕлӕ цӕмӕй бафыстаиккой уый сӕм кӕй нӕ уыд, уымӕ гӕсгӕ уый дыууӕйӕн дӕр бахатыр кодта. Зӕгъ-ма, уыдонӕй кӕцы фылдӕр бауарздзӕн уый?»

«Ӕнхъӕл дӕн, фылдӕр кӕмӕн ныббарста, уый»,— цыма уыцы фарст хъуыддагмӕ нӕ хауы, афтӕ ӕнӕмӕтӕй зӕгъы Симон.

«Раст хъуыды кӕныс»,— загъта йын Йесо. Ӕмӕ йе ’ргом сылгоймагмӕ аздахгӕйӕ, дзуры Симонӕн: «Уыныс ды ацы сылгоймаджы? Ӕз ӕрцыдтӕн дӕ хӕдзармӕ, ӕмӕ ды дон Мӕ къӕхтӕн нӕ раттай; уый та цӕссыгтӕй ныхсадта Мӕ къӕхтӕ ӕмӕ сӕ йӕ дзыккутӕй ныссӕрфта. Ды Мын пъа дӕр нӕ акодтай; уый та, куы ӕрбацыдтӕн, уӕдӕй нырмӕ нӕ ӕнцайы Мӕ къӕхтӕн пъатӕ кӕнынӕй. Ды Мӕ сӕр зетийӕ нӕ байсӕрстай; уый та миройӕ байсӕрста Мӕ къӕхтӕ».

Уымӕй сылгоймаг равдыста, йӕ ивгъуыд тӕригъӕдджын цардыл зӕрдӕбынӕй кӕй фӕсмон кӕны. Уымӕ гӕсгӕ йын фӕстагмӕ Йесо загъта: «Уымӕ гӕсгӕ зӕгъын дӕуӕн: йӕ бирӕ тӕригъӕдтӕ барст сты уымӕн, бирӕ кӕй бауарзта, уый тыххӕй; фӕлӕ гыццыл барст кӕмӕн у, уый гыццыл уарзы».

Уый зӕгъӕн нӕй, ӕмӕ Йесо ӕнӕгъдау хъуыддӕгтӕм куыдфӕндыйы цӕстӕй кӕсы, кӕнӕ сӕ ӕвзӕрыл нӕ нымайы. Нӕ, ацы хабар ӕвдисы, Йесо кӕй ӕмбары, царды чи фӕрӕдийы, фӕлӕ уый фӕстӕ чи ӕрфӕсмон кӕны, уыцы адӕмы. Уымӕ гӕсгӕ ахӕм адӕм Йесомӕ куы ӕрцӕуынц, уӕд ссарынц ӕнцойад. Йесойы ныхӕстӕ: «Хатыргонд сты дӕ тӕригъӕдтӕ... дӕ уырнындзинад дӕ фервӕзын кодта; цу фарнимӕ»,— ӕцӕгдӕр стыр ӕнцойад раттой сылгоймагӕн. Лукайы 7:36—50; Матфейы 11:28—30.

▪ Куыд суазӕг кодта Симон Йесойы?

▪ Чи ссардта Йесойы ӕмӕ цӕмӕн?

▪ Цавӕр цӕстуынгӕ цӕвиттон ӕрхаста Йесо ӕмӕ дзы куыд спайда кодта?