Адӕймаджы Фырты фӕзынд

ЙЕСО нырма ис цӕгаты (Самарийы кӕнӕ Галилейы), ӕмӕ йӕ ам фарисейтӕ фӕрсынц Паддзахады ӕрцыдӕй. Уыдон ӕнхъӕлынц, Паддзахады ӕрцыд стыр цыт ӕмӕ кадимӕ кӕй уыдзӕн, фӕлӕ сын Йесо дзуры: «Хуыцауы Паддзахад не ’рцӕудзӕн зынгӕ хуызы, ӕмӕ нӕ зӕгъдзысты: „мӕнӕ ам ис Уый“, кӕнӕ: „уӕртӕ уым“. Уымӕн ӕмӕ, мӕнӕ Хуыцауы паддзахад уӕ мидӕг ис [«уе ’хсӕн ис», НД]».

Йесойы ныхӕстӕ «уе ’хсӕн ис», зӕгъгӕ, хаттӕй-хатт ратӕлмац кӕнынц куыд «уӕ мидӕг ис». Уымӕ гӕсгӕ иуӕй-иутӕм афтӕ кӕсы, цыма Хуыцауы Паддзахад Хуыцауы лӕггадгӕнджыты зӕрдӕты ис. Фӕлӕ, кӕй зӕгъын ӕй хъӕуы, Хуыцауы Паддзахад, Йесо кӕимӕ ныхас кӕны, уыцы ӕнӕуырнӕг фарисейты зӕрдӕты нӕй. Нӕ, уый се ’хсӕн ис, уымӕн ӕмӕ Хуыцауы Паддзахады Паддзах Йесо Чырысти ис се ’хсӕн.

Фарисейты ацыды фӕстӕ Йесо йӕ ахуыргӕнинӕгтимӕ дарддӕр ныхас кӕны Паддзахады ӕрцыдыл, сӕйраджыдӕр та куыд Паддзах, афтӕ фидӕны адӕмы ’хсӕн кӕй уыдзӕн, ууыл, ӕмӕ сӕ фӕдзӕхсы: «Зӕгъдзысты сымахӕн: „мӕнӕ, ам“, кӕнӕ: „мӕнӕ, уым“,— ма цӕут ӕмӕ макӕйы фӕдыл згъорут [мӕнг мессиаты фӕдыл ма згъорут]; уымӕн ӕмӕ арвырттывд, цӕхӕркалгӕ арвы иу кӕронӕй куыд ӕрттивы, арвы иннӕ кӕронмӕ, афтӕ уыдзӕн Адӕймаджы Фырт Йӕ боны». Уымӕй Йесо ӕвдисы, арвӕрттывд дардмӕ куыд фӕзыны, афтӕ Паддзахы бартӕ йӕхимӕ кӕй райста ӕмӕ адӕмы ’хсӕн кӕй ис, уый бӕлвырдгӕнӕнтӕм дӕр йӕ хъус чи дара, уыдон сӕ ӕнӕмӕнг кӕй фендзысты.

Уый фӕстӕ, фидӕны адӕмы ’хсӕн куы уа, уӕд адӕм сӕхи куыд дардзысты, уый равдисынӕн цӕвиттон ӕрхаста ивгъуыд цаутӕй. Уый дзуры: «Нойы бонты куыд уыд, афтӕ уыдзӕн Адӕймаджы Фырты бонты дӕр... Лоты бонты дӕр куыд уыд: хордтой, нуӕзтой, ӕлхӕдтой, уӕй кодтой, сагътой, арӕзтой; фӕлӕ Лот цы бон рацыд Содомӕй, ӕркалд арвӕй цӕхӕр ӕмӕ сондоны арт ӕмӕ сеппӕты дӕр ныццагъта: афтӕ уыдзӕн Адӕймаджы Фырт куы фӕзына, уыцы бон дӕр».

Уымӕй Йесойы уый зӕгъын нӕ фӕнды, Ной ӕмӕ Лоты бонты адӕм ӕрвылбоны хъуыддӕгтӕ кӕй кодтой, ома кӕй хордтой ӕмӕ кӕй нуӕзтой, кӕй ӕлхӕдтой ӕмӕ кӕй уӕй кодтой, кӕй сагътой ӕмӕ кӕй амадтой, ӕрмӕст уый тыххӕй кӕй фесӕфтысты. Уыцы хъуыддӕгтӕ Ной, Лот ӕмӕ сӕ бинонтӕ дӕр кодтой. Фӕлӕ иннӕ адӕм ӕрмӕстдӕр уыцы хъуыддӕгтыл кӕй мӕт кодтой ӕмӕ Хуыцауы фӕндон кӕй ницӕмӕ дардтой, уый тыххӕй фесӕфтысты. Уӕдӕ Чырысти стыр уынгӕгдзинады ацы цардыуагон системӕ скуынӕг кӕнынмӕ куы фӕзына, уӕддӕр адӕм уый тыххӕй фесӕфдзысты.

Фидӕны куыд Паддзах, афтӕ адӕмы ’хсӕн куы уа, уӕд фӕстиатгӕнӕн кӕй нал уыдзӕн, уый равдисыны тыххӕй Йесо бафтыдта: «Уыцы бон хӕдзары сӕр чи уа, йӕ дзаумӕттӕ та хӕдзары, уый мауал ӕрхизӕд уыдон райсынмӕ; ӕмӕ чи уа быдыры, уый дӕр фӕстӕмӕ мауал раздӕх: уӕ зӕрдыл дарут Лоты усы».

Адӕм, Чырысти се ’хсӕн кӕй ис, уый нысан куы феной, уӕд сӕ мулкуарзондзинад хъуамӕ ма бакъуылымпы кӕна. Лот йӕ бинонтимӕ Содомӕй куы ралыгъд, уӕд йӕ ус, ӕвӕццӕгӕн, цы исбон ныууагъта, ууыл фӕсмонгӕнгӕйӕ, фӕстӕмӕ фӕкаст, ӕмӕ цӕххы дур фестад.

Фидӕны адӕмы ’хсӕн куы уа, уӕд цы уавӕр уыдзӕн, уый тыххӕй Йесо йӕ ахуыргӕнинӕгтӕн дарддӕр дзуры: «Уыцы ӕхсӕв дыууӕйӕ иу хуыссӕны уыдзысты: иу ист уыдзӕн иннӕ та баззайдзӕн; дыууӕйӕ куырой сдзысты иумӕ: иу ист уыдзӕн, иннӕ та баззайдзӕн».

Ист ӕрцӕуын абарӕн ис, Ной ӕмӕ йӕ бинонтӕ ковчегмӕ кӕй бацыдысты, Лоты та йӕ бинонтимӕ зӕдтӕ Содомӕй кӕй ракодтой, уыимӕ. Уый нысан кӕны ирвӕзындзинад; баззайын та — куынӕгдзинад.

Ныр ӕй йӕ ахуыргӕнинӕгтӕ фӕрсынц: «Кӕм, Хицау?»

«Мардыбуар [«буар», НД] кӕм уа, уым ӕрӕмбырд уыдзысты цӕргӕстӕ дӕр»,— дзуапп ратта Йесо. Ирвӕзындзинадӕн «ист» чи ӕрцӕудзӕн, уыдон сты дардмӕуынӕг цӕргӕсты хуызӕн, уымӕн ӕмӕ ӕмбырд кӕнынц «буармӕ». Буар та у ӕцӕг Чырысти, адӕмы ’хсӕн Паддзахӕй куы уа, уыцы рӕстӕджы ӕмӕ Иегъовӕйы цӕттӕгонд духовон хӕринаг. Лукайы 17:20—37; Уӕвынад 19:26.

▪ Паддзахад фарисейты ’хсӕн цы хуызы уыд?

▪ Чырысти адӕмы ’хсӕн куы уа, уый цӕмӕн ис абарӕн арвӕрттывдимӕ?

▪ Чырысти адӕмы ’хсӕн куы уа, уӕд адӕм цӕй тыххӕй фесӕфдзысты?

▪ Цы нысан кӕны ист ӕрцӕуын ӕмӕ баззайын?