Амындтӕ хицӕн кӕнын ӕмӕ сывӕллӕтты уарзыны тыххӕй

ЙЕСО ӕмӕ йӕ ахуыргӕнинӕгтӕ фӕцӕуынц Иерусалиммӕ н. э. 33 азы Куадзӕн бӕрӕг кӕнынмӕ. Иорданы цӕугӕдоны сӕрты ахызтысты ӕмӕ дарддӕр цӕуынц Перейыл. Йесо ма ам цалдӕр къуырийы размӕ дӕр уыд, фӕлӕ йӕм уӕд йӕ рынчын хӕлар Лазӕры тыххӕй Иудеймӕ фӕсидтысты. Уӕд ам Йесо ныхас кодта фарисейтимӕ хицӕн кӕныны тыххӕй; ӕмӕ та ныр дӕр ууыл цӕуы дзырд.

Фарисейтӕ се ’ппӕт ӕмхуызон нӕ хъуыды кӕнынц хицӕн кӕныны тыххӕй. Моисей загъта, зӕгъгӕ, лӕг йӕ усмӕ «исты ӕвзӕрдзинад» куы ссара, уӕд йӕ бон у, ӕмӕ дзы ахицӕн уа. Иутӕ хъуыды кӕнынц, уый ӕрмӕстдӕр хӕтындзинадмӕ хауы. Иннӕты хъуыдымӕ гӕсгӕ та «ӕвзӕрдзинадмӕ» хауынц хӕрзчысыл рӕдыдтытӕ дӕр. Фарисейтӕ барӕй фӕрсынц Йесойы: «Алцы аххосы тыххӕй дӕр бар ис адӕймагӕн йӕ усӕй ахицӕн уӕвын?» Йесо цыфӕнды ма зӕгъа, уӕддӕр сӕ ныфс ис, ӕндӕрхуызон цы фарисейтӕ хъуыды кӕнынц, уыдон ӕй ӕнӕмӕнг кӕй ӕрцахсдзысты ныхасӕй.

Фӕлӕ сын Йесо дӕтты диссаджы зондджын дзуапп. Уый сӕ иуы хъуыды дӕр нӕ нымайы растыл, фӕлӕ сын амоны, ӕмкъайад иуыл сӕрӕй цавӕр хъуамӕ уыдаид, уымӕ. «Нӕ кастыстут сымах,— фӕрсы сӕ Йесо,— райдайӕны Скӕнӕг нӕлгоймаджы ӕмӕ сылгоймаджы кӕй сфӕлдыста уыдоны? Ӕмӕ загъта: уымӕ гӕсгӕ ныууадздзӕн адӕймаг [йӕ] фыд ӕмӕ [йӕ] мады ӕмӕ баныхӕсдзӕн йӕ усыл, ӕмӕ уыдзысты дыууӕ иу буар, афтӕмӕй уыдон дыууӕ нал сты, фӕлӕ иу буар. Уӕдӕ, Хуыцау цы баиу кодта, уый адӕймаг ма ахицӕн кӕнӕд».

Йесо куыд ӕвдисы, афтӕмӕй Хуыцау ӕмкъайадӕн бындур куы ӕрӕвӕрдта, уӕд йӕ фӕндон уыд, цӕмӕй лӕг ӕмӕ ус кӕддӕриддӕр уыдаиккой иумӕ. Кӕд афтӕ у, дзурынц фарисейтӕ, «уӕд Моисей куыд бафӕдзӕхста хицӕны фыстӕг дӕттын ӕмӕ хицӕн кӕнын усӕй?»

«Моисей уын уӕ хъӕбӕр зӕрдӕтӕм гӕсгӕ бар ратта хицӕн кӕнын уӕ устытимӕ,— дзуапп дӕтты Йесо,— фӕлӕ раздӕр нӕ уыд афтӕ». О, Хуыцау Едемы дыргъдоны ӕмкъайады фӕтк куы сфидар кодта, уӕд дзы хицӕн кӕныны кой бынтондӕр нӕ уыд.

Уый фӕстӕ Йесо фарисейтӕн дзуры: «Фӕлӕ Ӕз зӕгъын сымахӕн: чи ахицӕн уа йӕ усӕй хӕтындзинады тыххӕй йеддӕмӕ [грекъагау: порнея́] ӕмӕ [чи] ракура ӕндӕры, уый хӕты». Уымӕй Йесо равдыста, Хуыцау ӕрмӕстдӕр порнея́-йы, ома ӕвирхъау сексуалон ӕнӕгъдаудзинады тыххӕй кӕй дӕтты хицӕн кӕныны бар.

Ӕмкъайад ахӕм фидар цӕдис кӕй у ӕмӕ хицӕн кӕнынӕн ӕрмӕстдӕр иу аххосаг кӕй ис, уый ӕмбаргӕйӕ, ахуыргӕнинӕгтӕ Йесойӕн дзурынц: «Кӕд ахӕм у адӕймаджы хӕс йӕ усмӕ, уӕд хуыздӕр у ус нӕ ракурын». Бӕгуыдӕр, бинонтӕ скӕнын кӕй фӕнды, уыдонӕй алчидӕр хъуамӕ йӕ зӕрдыл дара, ӕмкъайады бастдзинад цӕрӕнбонтӕм кӕй у.

Дарддӕр та Йесо дзуры, бинонтӕ чи нӕ кӕны, уыдоны тыххӕй. Уый ӕмбарын кӕны, иуӕй-иу лӕппутӕн се ’рдон уӕнгтӕ ӕххӕст кӕй нӕ сырӕзтысты, уый аххосӕй сӕ райгуырдӕй ӕрдызтытӕ кӕй сты ӕмӕ сӕ бон кӕй нӕу ус ракурын. Иннӕтӕн та адӕм фӕсахъат кӕнынц се ’рдон уӕнгтӕ. Фӕлӕ ма ис ахӕмтӕ дӕр, Уӕларвон Паддзахады тыххӕй чи нӕ куры ус ӕмӕ ӕрдон бастдзинадӕй ӕхцондзинад исынӕй йӕхиуыл чи хӕцы. «Чи фӕразы ӕххӕст кӕнын [ома ӕнӕкъайӕ цӕрын], уый йӕ ӕххӕст кӕнӕд» (НФ),— фӕци йӕ ныхас Йесо.

Ныр адӕм сӕ гыццыл сывӕллӕтты кӕнынц Йесомӕ. Фӕлӕ сыл йӕ ахуыргӕнинӕгтӕ хъуыр-хъуыр кӕнынц ӕмӕ сӕ фӕстӕмӕ ӕрвитынц, цӕмӕй Йесойы ӕнӕхъуаджы ма тыхсын кӕной. Йесо та сын дзуры: «Уадзут сывӕллӕтты Мӕнмӕ цӕуын ӕмӕ сӕ ма уромут, уымӕн ӕмӕ ахӕмты у Хуыцауы Паддзахад. Ӕцӕг зӕгъын сымахӕн: чи нӕ райса Хуыцауы Паддзахад сывӕллоны хуызӕн, уый йӕм нӕ бацӕудзӕн».

Ӕвӕдза, диссаджы амындтӕ дӕтты Йесо! Цӕмӕй Хуыцауы Паддзахадмӕ бацӕуӕм, уый тыххӕй хъуамӕ уӕм гыццыл сывӕллӕттау сӕрныллӕг ӕмӕ ахуыр кӕнынмӕ цӕттӕ. Йесойы цӕвиттон ма нын ноджыдӕр ӕвдисы, тынг ахсджиаг кӕй у, цӕмӕй ныййарджытӕ сӕ сывӕллӕттӕн рӕстӕг хицӕн кӕной. Сывӕллӕтты кӕй ӕрбахъӕбыс кодта ӕмӕ сын кӕй арфӕ кӕны, уымӕй сӕм Йесо ӕвдисы йе стыр уарзондзинад. Матфейы 19:1—15; Дыккаг закъон 24:1; Лукайы 16:18; Маркы 10:1—16; Лукайы 18:15—17.

▪ Цы хъуыды кӕнынц фарисейтӕ хицӕн кӕныны тыххӕй ӕмӕ Йесойы куыд фӕлварынц?

▪ Цавӕр дзуапп ратта Йесо фарисейтӕн ӕмӕ йӕ ныхӕстӕм гӕсгӕ хицӕн кӕныны иунӕг аххосаг цы у?

▪ Йесойы ахуыргӕнинӕгтӕ цӕмӕн дзурынц, зӕгъгӕ, хуыздӕр у ӕнӕусӕй цӕрын ӕмӕ сын Йесо цавӕр уынаффӕ ратта?

▪ Йесойӕн сывӕллӕттӕм цы ахаст ис, уый нӕ цӕуыл ахуыр кӕны?