100 сӕр
Фӕсномыг ныхас минаты тыххӕй
ӔВӔЦЦӔГӔН Йесо нырма ис Закхейы хӕдзары. Йӕ ахуыргӕнинӕгтӕ ӕнхъӕлынц, Иерусалимы Йесо йӕхи Мессиайӕ кӕй расиддзӕн ӕмӕ йӕ Паддзахад кӕй ӕрӕвӕрдзӕн. Цӕмӕй уыцы ӕнӕраст цӕстӕнгас сраст кӕна ӕмӕ сын, Паддзахад тагъд кӕй не ’рцӕудзӕн, уый бамбарын кӕна, уый тыххӕй сын Йесо дзуры фӕсномыг ныхас:
«Иу чидӕр адӕймаг бӕрзонд [номдзыд] мыггагӕй цыд дард бӕстӕм, цӕмӕй райса йӕхицӕн паддзахад ӕмӕ раздӕха». «Адӕймаг номдзыд мыггагӕй» у Йесо, «дард бӕстӕ» та — уӕлӕрвтӕ. Йесо уырдӕм куы ссӕуа, уӕд ын йӕ Фыд ратдзӕн паддзахы бынат.
Фӕлӕ уал уӕдмӕ адӕймаг номдзыд мыггагӕй ӕрсидт йӕ дӕс цагъармӕ, алкӕмӕндӕр дзы ратта фӕйнӕ ӕвзист минайы ӕмӕ сын дзуры: «Спайда сӕ кӕнут, цалынмӕ ӕз раздӕхон, уӕдмӕ». Фыццаг сӕххӕсты дӕс цагъары сты Йесойы фыццаг ахуыргӕнинӕгтӕ. Стырдӕр масштабы та уыдон ӕвдисынц, фидӕны уӕларвон Паддзахады йемӕ чи паддзахиуӕг кӕндзӕн, ӕппӕт уыдоны.
Ӕвзист минатӕ сты стыр ӕхцатӕ; алкӕцы мина дӕр у зӕхкусӕджы ӕртӕ мӕйы мызды бӕрц. Фӕлӕ ацы фӕсномыг ныхасы та цы нысан кӕнынц? Ӕмӕ сӕ цагъартӕ цы хъуамӕ фӕкӕной?
Минаты хуызы ӕвдыст цӕуы, зӕрдӕвӕрд Паддзахы, Йесойы, ӕрцыдмӕ Паддзахады иннӕ бындарты цӕттӕ кӕнынӕн сыгъдӕг удӕй сӕрст чырыстӕттӕ цӕмӕй хъуамӕ пайда кӕной, ахӕм зынаргъ цыдӕр. Йесо куы райгас ӕмӕ йӕ ахуыргӕнинӕгтӕм куы фӕзынд, уӕд сын ратта символикон минатӕ, цӕмӕй фылдӕр ахуыргӕнинӕгты цӕттӕ кӕной ӕмӕ афтӕмӕй уӕларвон Паддзахады бындарты нымӕц фылдӕр кӕна.
«Фӕлӕ йӕ [номдзыд мыггагӕй цы адӕймаг уыд, уый] адӕм нӕ уарзтой ӕмӕ йын йӕ фӕстӕ арвыстой минӕвӕрттӕ, зӕгъгӕйӕ: нӕ фӕнды мах, цӕмӕй ныл уый паддзахиуӕг кӕна»,— адарддӕр кодта йӕ ныхас Йесо. «Адӕм» сты израилӕгтӕ кӕнӕ иудейтӕ, Йесойы ахуыргӕнинӕгтӕй фӕстӕмӕ. Йесо уӕларвмӕ куы ссыд, уый фӕстӕ йын иудейтӕ йӕ ахуыргӕнинӕгты кӕй ӕфхӕрдтой, уымӕй равдыстой, кӕй сӕ нӕ фӕндыд, цӕмӕй уый сӕ паддзах уыдаид. Ӕмӕ уымӕй уыдысты, фӕстейӕ минӕвӕрттӕ чи арвыста, уыцы адӕмы хуызӕн.
Куыд спайда кодтой дӕс цагъары уыцы минатӕй? Йесо дзуры: «Паддзахад райсгӕйӕ куы раздӕхт, уӕд фӕдзурын кодта йӕхимӕ уыцы цагъартӕм, кӕцытӕн ратта ӕвзист, цӕмӕй базона, чи дзы цы пайда скодта. Ӕрцыд фыццаг ӕмӕ загъта: ӕлдар! дӕ мина ӕрхаста дӕс минайы. Ӕмӕ загъта уымӕн: хорз, хӕларзӕрдӕ цагъар! гыццылыл ӕууӕнкджын кӕй уыдтӕ, уый тыххӕй дын дӕ бар кӕнын дӕс сахары. Ӕрцыд дыккаг ӕмӕ загъта: ӕлдар! дӕ мина спайда кодта фондз минайы. Загъта уымӕн дӕр: ды дӕр у фондз сахары сӕргъыл».
Дӕс минайы чи ӕрхаста, уыцы цагъар ӕвдисы, н. э. 33 азы Фӕндзайӕм бон цы ахуыргӕнинӕгты къорд сӕвзӕрд, уый; уырдӕм хауынц апостолтӕ дӕр. Фондз минайӕ цы цагъар спайда кодта, уый дӕр ӕвдисы, уыцы рӕстӕджы цы ахуыргӕнинӕгты къорд уыд, уый, уымӕн ӕмӕ уый дӕр гӕнӕн ӕмӕ амал уӕвгӕйӕ фылдӕр кодта йӕ паддзахы мулк зӕххыл. Дыууӕ къорды дӕр зӕрдӕбынӕй хъусын кӕнынц хорз уацхъуыд, ӕмӕ уый фӕстиуӕгӕн бирӕтӕ свӕййынц чырыстӕттӕ. Иудзырдӕй, фараст цагъары зӕрдӕбынӕй куыстой ӕмӕ сӕ мулк фылдӕр кодтой.
Фӕлӕ Йесо дарддӕр дзуры: «Ӕрцыд ӕртыккаг ӕмӕ загъта: ӕлдар! мӕнӕ дӕ мина, кӕцыйы ӕз кӕлмӕрзӕны батухгӕйӕ, хъахъхъӕдтон; уымӕн ӕмӕ ӕз дӕуӕй тарстӕн, ӕнӕхатыр адӕймаг кӕй дӕ уый тыххӕй: исыс, цы нӕ сӕвӕрдтай, ӕмӕ кӕрдыс, цы нӕ байтыдтай. Ӕлдар загъта уымӕн: дӕхи дзыхӕй тӕрхон кӕндзынӕн дӕуӕн, хинӕйдзаг цагъар! ды зыдтай, ӕз кӕй дӕн ӕнӕхатыр адӕймаг, исын, цы нӕ сӕвӕрдтон, ӕмӕ кӕрдын, цы нӕ байтыдтон; цӕй тыххӕй ды нӕ раттай мӕ ӕвзист пайда кӕнынмӕ, цӕмӕй, ӕз ӕрцӕугӕйӕ райстаин уый ӕфтиагимӕ? Ӕмӕ загъта йӕ разы лӕуджытӕн: райсут уымӕй мина ӕмӕ йӕ раттут дӕс минайы кӕмӕ ис, уымӕн».
Символикон мина фесафын нысан кӕны, хинӕйдзаг цагъарӕн уӕларвон Паддзахады бынат кӕй нӕй. Фӕсномыг ныхасӕй зӕгъгӕйӕ уый фесӕфта дӕс кӕнӕ фондз сахарыл хицауиуӕг кӕныны кадджын бар. Бафиппаинаг ма у уый дӕр, ӕмӕ цагъар ӕвзӕр хъуыддаджы тыххӕй кӕй нӕ хуыйны хинӕйдзаг, фӕлӕ йӕ хицауы хъӕздыгдзинӕдтӕ фӕфылдӕр кӕныны тыххӕй йӕ къух уазал доны дӕр кӕй нӕ атылдта.
Ӕлдар хинӕйдзаг цагъары мина фыццаг цагъарӕн куы ратта, уӕд ын иу чидӕр афтӕ зӕгъы: «Ӕлдар! уымӕ ис дӕс минайы». Фӕлӕ Йесо дзуапп дӕтты: «Кӕмӕн ис, уымӕн лӕвӕрд уыдзӕн, кӕмӕ нӕй, уымӕй та ист уыдзӕн цы йӕм ис, уый дӕр; мӕ уыцы знӕгты та, кӕцыты нӕ фӕндыд, цӕмӕй ӕз уыдоныл паддзахиуӕг кӕнон, ӕрбакӕнут ардӕм ӕмӕ сӕ мӕ разы ныццӕгъдут». Лукайы 19:11—27; Матфейы 28:19, 20.
▪ Йесо минаты тыххӕй фӕсномыг ныхас цӕмӕн радзырдта?
▪ Чи у адӕймаг номдзыд мыггагӕй ӕмӕ цавӕр бӕстӕм ацыд?
▪ Чи сты цагъартӕ ӕмӕ цы нысан кӕнынц минатӕ?
▪ Чи сты адӕм ӕмӕ сӕ фыдӕхдзинад куыд равдыстой?
▪ Цагъартӕй иу хинӕйдзаг цӕмӕн хуыйны ӕмӕ йын мина фесафын цы нысан кӕны?