Чырыстийы кадджын бацыд Иерусалиммӕ

ДЫККАГ райсом, хуыцаубоны, 9 нисаны, Йесо йӕ ахуыргӕнинӕгтимӕ, Елеоны хохыл ахизгӕйӕ, араст Вифанийӕ Иерусалиммӕ. Гыццыл фӕстӕдӕр бахӕццӕ сты, Елеоны хохрӕбын чи ис, уыцы хъӕу Виффагимӕ. Ам Йесо йӕ ахуыргӕнинӕгтӕй дыууӕйӕн дзуры:

«Ацӕут уӕ размӕ комкоммӕ цы хъӕу ис уырдӕм; ӕмӕ уыцы сахат ссардзыстут хӕрӕг бастӕй ӕмӕ йемӕ ӕрыгон къӕлӕу; райхалут ӕмӕ сӕ ӕрбакӕнут Мӕнмӕ; ӕмӕ исчи куы зӕгъа сымахӕн исты, дзуапп дӕттут, уыдон хъӕуынц Хицауы; ӕмӕ сӕ уыцы сахат арвитдзӕн».

Райдианы ахуыргӕнинӕгтӕ не ’мбӕрстой, уыцы бардзырд библион пехуымпарады сӕххӕстыл баст кӕй у, фӕлӕ йӕ фӕстӕдӕр бамбӕрстой. Пехуымпар Захари срагзагъд кодта, Хуыцауы зӕрдӕвӕрд Паддзах Иерусалиммӕ кӕй бацӕудзӕн «бадгӕйӕ хӕрӕгыл ӕмӕ ӕрыгон къӕлӕуыл, ӕфсондзы бын уӕвӕджы фыртыл». Паддзах Соломон дӕр, паддзахӕй сӕрст куы хъуамӕ ӕрцыдаид, уӕд къӕлӕуыл цыд.

Ахуыргӕнинӕгтӕ Виффагимӕ куы бацыдысты ӕмӕ къӕлӕу ӕмӕ хӕрӕджы куы ракодтой, уӕд сӕ, уым цы адӕм лӕууыд, уыдонӕй чидӕртӕ бафарстой: «Цы кусут?» Фӕлӕ сын куы бамбарын кодтой, уыцы фос Хицауы хъӕуынц, зӕгъгӕ, уӕд ахуыргӕнинӕгтӕн уӕлдай ницыуал загътой. Ахуыргӕнинӕгтӕ хӕрӕгыл дӕр ӕмӕ къӕлӕуыл дӕр сӕвӕрдтой сӕ дарӕстӕ, фӕлӕ Йесо сбадт къӕлӕуыл.

Йесо Иерусалиммӕ куыд хӕстӕг кӕны, афтӕ адӕм дӕр фылдӕрӕй-фылдӕр кӕнынц. Уыдонӕй бирӕтӕ сӕ дарӕстӕ тауынц фӕндагыл, иннӕтӕ та сӕттынц бӕлӕсты къалиутӕ, фӕндагыл сӕ ӕвӕрынц ӕмӕ цингӕнгӕйӕ дзурынц: «Арфӕгонд у Паддзах Хицауы [«Иегъовӕйы», НД] номӕй ӕрцӕуӕг! Фарн ӕрвтыл ӕмӕ кад бӕрзӕндты!»

Уыцы ныхӕстӕ хъусгӕйӕ, адӕмы ’хсӕн фарисейтӕ сӕхицӕн бынат нал арынц ӕмӕ Йесойӕн дзурынц: «Ахуыргӕнӕг! банцайын кӕн Дӕ ахуыргӕнинӕгты». Фӕлӕ сын Йесо дзуапп дӕтты: «Зӕгъын сымахӕн, уыдон куы банцайой, уӕд дуртӕ сдзыназдзысты».

Иерусалиммӕ куы ӕрбахӕццӕ сты, уӕд Йесо сахарыл йӕ цӕст ахаста ӕмӕ йӕ цӕссыгтӕ калгӕйӕ дзуры: «О, ды, дӕ ацы бон уӕддӕр куы базонис дӕ сабырдзинадӕн цы у! фӕлӕ уый ӕмбӕхст у ныр дӕ цӕстытӕй». Йесо куыд дзуры, афтӕмӕй Иерусалимӕн йӕ ӕгоммӕгӕсдзинад тынг зынаргъ слӕудзӕн:

«Де знӕгтӕ [ромӕгтӕ инӕлар Титы сӕргълӕудӕй] дӕ алыварс фидӕрттӕ скӕндзысты ӕмӕ дыл ӕртыхсдзысты, ӕмӕ дӕ алырдыгӕй суынгӕг кӕндзысты, ӕмӕ ныххӕлӕттаг кӕндзысты дӕу, ӕмӕ дӕ мидӕг дӕ сывӕллӕтты фӕцӕгъддзысты, ӕмӕ дӕм дур дурыл нӕ ныууадздзысты». Йесойы рагзагъд сӕххӕст 37 азы фӕстӕ, н. э. 70 азы Иерусалим пырхгонд куы ӕрцыд, уӕд.

Дыууӕ къуырийы размӕ уыцы адӕмӕй бирӕтӕ сӕхи цӕстытӕй федтой, Йесо Лазӕры куыд райгас кодта. Ӕмӕ ныр уый тыххӕй дзурынц иннӕтӕн. Уымӕ гӕсгӕ Йесо Иерусалиммӕ куы бацыд, уӕд адӕм иуылдӕр сызмӕлыдысты. «Уый чи у?» — фӕрсынц иутӕ. Адӕм та сын дзуапп дӕттынц: «Уый у Йесо, Пехуымпар Галилейаг Назаретӕй». Уыцы цаутӕм кӕсгӕйӕ, фарисейтӕн сӕ бон кӕй ницы у саразын, уымӕ гӕсгӕ тыхсынц ӕмӕ дзурынц: «Ӕппӕт дуне цӕуы Йӕ фӕстӕ».

Йесо алыхатт куыд кодта, афтӕ та ныр дӕр бацыд кувӕндонмӕ адӕмы ахуыр кӕнынмӕ. Уырдӕм ӕм цӕуынц куырмытӕ ӕмӕ къуылыхтӕ, ӕмӕ сӕ уый дзӕбӕх кӕны! Йесойы диссаджы хъуыддӕгтӕ уынгӕйӕ ӕмӕ, кувӕндоны сывӕллӕттӕ фырцинӕй «Осаннӕ Давиды Фыртӕн!», зӕгъгӕ, куыд хъӕр кӕнынц, уый хъусгӕйӕ, хистӕр сауджынтӕн ӕмӕ чиныджы дӕснытӕн сӕ дӕндӕгты къӕс-къӕс цӕуы. «Хъусыс, цы дзурынц уыдон?» — фӕрсынц ӕй мӕстыйӕ.

«О! — дзуапп дӕтты Йесо.— Мыййаг сымах никуы кастыстут: „гыццыл ӕмӕ дзидзидай сывӕллӕтты дзыхӕй Ды сарӕзтай кад“?»

Йесо дарддӕр ахуыр кӕны ӕмӕ кувӕндоныл лӕмбынӕг йӕ цӕст хӕссы. Уӕдмӕ ӕризӕр, ӕмӕ Йесо йӕ дыууадӕс апостолимӕ фӕстӕмӕ Вифанимӕ араст. Цӕуын сӕ хъӕуы ӕртӕ километры бӕрц. Хуыцаубоны йе ’хсӕв арвыста уым, ӕвӕццӕгӕн йӕ хӕлар Лазӕры хӕдзары. Матфейы 21:1—11, 14—17; Маркы 11:1—11; Лукайы 19:29—44; Иоанны 12:12—19; Захари 9:9.

▪ Йесо Иерусалиммӕ Паддзахы цыдӕй кӕд ӕмӕ куыд бацыд?

▪ Адӕм Йесойы кӕй кадджын кӕнынц, уый цас ахсджиаг у?

▪ Цы ӕнкъардта Йесо Иерусалиммӕ кӕсгӕйӕ ӕмӕ цы срагзагъд кодта?

▪ Йесо кувӕндонмӕ куы бацыд, уӕд цы ’рцыд?