Хуыцауы зӕрдӕмӕ чи нӕ цӕуы, ахӕм уырнындзинӕдтӕ ӕмӕ ӕгъдӕуттӕ

Хуыцауы зӕрдӕмӕ цавӕр уырнындзинӕдтӕ ӕмӕ ӕгъдӕуттӕ нӕ цӕуынц? (1)

Хуыцау Троицӕ у, зӕгъгӕ, ууыл чырыстӕттӕ хъуамӕ ӕууӕндой? (2)

Ӕцӕг чырыстӕттӕ цӕуылнӕ бӕрӕг кӕнынц Цыппурс, Куадзӕн кӕнӕ гуырӕнбонтӕ? (3, 4)

Мӕрдтӕн сӕ бон у удӕгӕстӕн исты разиан кӕнын? (5)

Йесо ӕцӕгдӕр дзуарыл амарди? (6)

Хуыцауы зӕрдӕмӕ цы цӕуы, уый аразын ахсджиаг у? (7)

1. Уырнындзинӕдтӕ ӕмӕ ӕгъдӕуттӕ се ’ппӕт ӕвзӕр не сты. Фӕлӕ кӕд мӕнг динӕй равзӕрдысты кӕнӕ Библийы ахуырӕдты ныхмӕ сты, уӕд сӕ Хуыцау разы нӕу (Матфейы 15:6).

2. Троицӕ. Цымӕ Йегъовӕ Троицӕ у, ома иу Хуыцау ӕртӕ цӕсгомимӕ? Нӕу! Йегъовӕ у Фыд ӕмӕ у «иунӕг ӕцӕг Хуыцау» (Иоанны 17:3; Марчы 12:29). Йесо у йӕ фыццаггуырд Фырт ӕмӕ ис йӕ дӕлбар (1 Коринфӕгтӕм 11:3). Фыд Фыртӕй уӕлдӕр у (Иоанны 14:28). Сыгъдӕг уд удгоймаг нӕу; уый у, Хуыцау йӕ фӕндон ӕххӕст кӕнынӕн кӕмӕй архайы, уыцы тых (Райдиан 1:2; Хъуыддӕгтӕ 2:18).

3. Цыппурс (Рождество) ӕмӕ Куадзӕн. Йесо 25 декабры нӕ райгуырди. Уый райгуырди 1 октябрмӕ ’ввахс. Уыцы рӕстӕг фыййӕуттӕ ӕхсӕвыгон сӕ фысты дзугтимӕ нырма уыдысты быдыры (Лукайы 2:8–12). Йесо йӕ ахуыргӕнинӕгтӕн никуы загъта, цӕмӕй йын йӕ гуырӕнбон бӕрӕг кӕной. Фӕлӕ сын загъта, цӕмӕй йын йӕ мӕлӕты бон сӕ зӕрдыл дарой, ома-иу ӕй ӕрымысой (Лукайы 22:19, 20). Цыппурс ӕмӕ йе ’гъдӕуттӕ равзӕрдысты рагон мӕнг динтӕй. Раст афтӕ у сӕ хабар Куадзӕны ӕгъдӕуттӕн дӕр, зӕгъӕм, ӕйчытӕ ахорын. Фыццаг чырыстӕттӕ нӕ бӕрӕг кодтой нӕдӕр Цыппурс, нӕдӕр Куадзӕн, ӕмӕ сӕ ӕцӕг чырыстӕттӕ абон дӕр нӕ бӕрӕг кӕнынц.

4. Гуырӕнбонтӕ. Библийы ӕрмӕстдӕр дыууӕ гуырӕнбоны кой цӕуы, ӕмӕ сӕ бӕрӕг кодтой, Йегъовӕйӕн чи нӕ лӕггад кодта, ахӕм адӕймӕгтӕ (Райдиан 40:20–22; Марчы 6:21, 22, 24–27). Фыццаг чырыстӕттӕ гуырӕнбонтӕ нӕ кодтой. Гуырӕнбон кӕныны ӕгъдау рацыд рагон мӕнг динтӕй. Ӕцӕг чырыстӕттӕ та кӕдфӕнды дӕр кӕрӕдзийӕн лӕвӕрттӕ кӕнынц ӕмӕ иумӕ хъӕлдзӕгӕй сӕ рӕстӕг ӕрвитынц.

5. Мӕрдтӕй тӕрсын. Мӕрдтӕ нӕдӕр ӕмбаргӕ исты кӕнынц, нӕдӕр аразгӕ. Махӕн нӕ бон нӕу уыдонӕн истӕмӕй баххуыс кӕнын, уыдонӕн та сӕ бон нӕу махӕн исты ӕвзӕр ракӕнын (Псалом 145:4; Екклесиаст 9:5, 10). Адӕймагӕн йӕ мӕлӕты фӕстӕ цӕргӕйӕ ницыуал баззайы. Фӕлӕ иуӕй-иу хатт мӕрдты хуызы сӕхи равдисынц ӕвзӕр зӕдтӕ, ома хӕйрӕджытӕ. Мӕрдтӕй тӕрсын кӕнӕ сын табу кӕнын хъӕуы, зӕгъгӕ, цы ӕгъдӕуттӕ амонынц, уыдон сты ӕвзӕр (Исай 8:19).

6. Дзуар (крест). Йесо дзуарыл нӕ амард. Уый амард цӕджындзыл, кӕнӕ хъӕдыл. Бирӕ Библиты «дзуарӕй» тӕлмац цы дзырд у, уый нысан кӕны ӕрмӕст иу хъӕды лыггаг. Дзуары нысан ӕрбафтыд рагон мӕнг динтӕй. Рагон чырыстӕттӕ сӕ хъуырыл дзуар нӕ дардтой ӕмӕ йын табу дӕр нӕ кодтой. Уӕдӕ куыд хъуыды кӕныс, раст уаид дзуар дарын ӕмӕ йын табу кӕнын? (Дыккаг закъон 7:26; 1 Коринфӕгтӕм 10:14).

7. Ацы уырнындзинӕдтӕ ӕмӕ ӕгъдӕуттӕй дын иуӕй-иутӕ, чи зоны, тынг зын ныууадзӕн сты. Дӕ хӕстӕджытӕ ӕмӕ дын де ’мбӕлттӕ, гӕнӕн ис, дзурой, зӕгъгӕ, нырмӕ цӕуыл ӕууӕндыдтӕ, уыдӕттӕ ма ныууадз. Фӕлӕ адӕмы зӕрдӕхудтӕй ма фӕтӕрс. Уымӕй бирӕ ахсджиагдӕр у, Хуыцауы зӕрдӕмӕ цы цӕуы, уый аразын (Ӕмбисӕндтӕ 29:25; Матфейы 10:36, 37).

[Ныв 22 фарсыл]

Хуыцау Троицӕ нӕу

[Ныв 23 фарсыл]

Цыппурс ӕмӕ Куадзӕн равзӕрдысты рагон мӕнг динтӕй

[Ныв 23 фарсыл]

Мӕрдтӕн табу кӕнын кӕнӕ сӕ тӕрсын нӕ хъӕуы