Бинонты цард – уарзӕгой Хуыцауы лӕвар

1, 2. а) Адӕймаг искӕй чындзӕхсӕвы хатт цӕуыл ахъуыды кӕны ӕмӕ цӕмӕн? б) Ацы сӕры цавӕр фарстатыл аныхас кӕндзыстӕм?

ЧЫНДЗӔХСӔВТӔМ цӕуын уарзыс? Бирӕтӕ уарзынц, уымӕн ӕмӕ чындзӕхсӕв цины хабар у. Усгур ӕмӕ чындз ахӕм рӕсугъд вӕййынц, ӕмӕ сӕм адӕймаг кӕсынӕй нӕ фефсӕды. Ӕмӕ сӕхӕдӕг дӕр куыд фӕцин кӕнынц ӕмӕ куыд амондджын вӕййынц, уый сӕ цӕсгӕмттыл фӕзыны. Сӕ фидӕн сӕм йӕ мидбылты фӕхуды.

² Фӕлӕ абон бинонты цардӕн бирӕ цӕмӕйдӕрты у тӕссаг. Кӕд нӕ ныфс вӕййы, ног бинонтӕ амондджын кӕй уыдзысты, уымӕй, уӕддӕр иуӕй-иу хатт ахъуыды кӕнӕм: «Цымӕ ӕцӕгдӕр амондджын уыдзысты? Цӕрӕнбонты иумӕ фӕцӕрдзысты?» Ацы фарстатӕн цы дзуапп ӕрцӕудзӕн лӕвӕрд, уый кӕнгӕ у, Хуыцау бинонты царды фӕдыл цы уынаффӕтӕ радта, уыдон лӕг ӕмӕ ус растыл нымайдзысты ӕмӕ сӕм хъусдзысты ӕви нӕ, уымӕй. (Бакӕс Ӕмбисӕндтӕ 3:5, 6.) Афтӕ куы кӕной, уӕд Хуыцауы уарзтӕй ӕнӕхай нӕ фӕуыдзысты. Уӕдӕ аныхас кӕнӕм, Библийы цавӕр дзуапп ис ацы цыппар фарстайӕн: «Адӕймаг бинонтӕ цӕмӕн скӕны? Кӕд дӕ бинонтӕ скӕнын фӕнды, уӕд цардӕмбал куыд хъуамӕ равзарай? Дӕ бон куыд у дӕхи бинонты цардмӕ бацӕттӕ кӕнын? Ӕмӕ лӕг ӕмӕ усӕн цы баххуыс кӕндзӕн, цӕмӕй цӕрӕнбонтӕм иумӕ амондджынӕй цӕрой?»

АДӔЙМАГ БИНОНТӔ ЦӔМӔН СКӔНЫ?

3. Бинонтӕ скӕнын раст кӕд нӕ уаид?

³ Иуӕй-иутӕм афтӕ кӕсы, ӕмӕ сын бинонтӕ куы нӕ уа, уӕд амондджын нӕ уыдзысты, ӕнӕ цардӕмбалӕй цард ницы у, зӕгъгӕ. Фӕлӕ уый афтӕ нӕу. Чырыстийӕн дӕр ус нӕ уыд, ӕмӕ, адӕймаг ус ма ракура кӕнӕ мой ма скӕна, уый нымадта Хуыцауы лӕварыл. Ӕмӕ ма загъта, зӕгъгӕ, дам, афтӕ бакӕнын йӕ бон кӕмӕн у, уый афтӕ бакӕнӕд (Матфейы 19:11, 12). Апостол Павел дӕр дзырдта, бинонтӕ дын куы нӕ уа, уӕд уый хорз цӕмӕй у, ууыл (1 Коринфӕгтӕм 7:32–38). Фӕлӕ Йесо ӕмӕ Павел афтӕ нӕ загътой, ӕмӕ ус курӕн кӕнӕ мой кӕнӕн ӕппындӕр нӕй. Бинонтӕ кӕнӕн нӕй, зӕгъгӕ, уыцы ныхӕстӕ хауынц «хӕйрӕджыты ахуырӕдтӕм» (1 Тимофеймӕ 4:1–3). Фӕлӕ уӕддӕр, бинонтӕ кӕмӕн нӕй, уыдонӕн фылдӕр фадӕттӕ ис Йегъовӕйӕн афтӕ лӕггад кӕнынӕн, цӕмӕй сӕ мацы хъыгдара. Уӕдӕ раст нӕ уаид бинонтӕ ӕрмӕст уый тыххӕй скӕнын, ӕмӕ иууылдӕр афтӕ кӕнынц кӕнӕ дын иннӕтӕ дзурынц, ныр дын афон у, зӕгъгӕ.

4. Лӕг ӕмӕ ус кӕрӕдзи куы фембарынц, уӕд уый сӕ сывӕллӕттыл куыд фӕзыны?

⁴ Уӕдӕ уӕд адӕймаг бинонтӕ цӕмӕн скӕны? Бинонты цард дӕр у уарзӕгой Хуыцауы лӕвар. (Бакӕс Райдиан 2:18.) Уымӕ гӕсгӕ дзы хорзӕй бирӕ цыдӕртӕ ис. Зӕгъӕм, лӕг ӕмӕ ус кӕрӕдзи куы фӕуарзынц ӕмӕ кӕрӕдзи куы фембарынц, уӕд бинонтӕ иууылдӕр вӕййынц амондджын. Сывӕллӕттӕ рӕвдыдцух нӕ вӕййынц, сӕ ныййарджытӕ сын зонд фӕамонынц ӕмӕ сын разамынд фӕдӕттынц (Псалом 127:3; Ефесӕгтӕм 6:1–4). Фӕлӕ адӕймаг бинонтӕ ӕрмӕст сывӕллӕтты тыххӕй не скӕны.

5, 6. а) Екклесиасты 4:9–12 стихтӕм гӕсгӕ, ӕнувыд ӕмбал дын уа, уый хорз цӕмӕн у? б) Бинонты цард ӕртӕ тагӕй быд бӕндӕны хуызӕн кӕд уыдзӕн?

⁵ Нӕ хъус-ма ӕрдарӕм, ацы сӕры сӕйраг стих кӕцӕй ист у, уыцы скъуыддзагмӕ: «Дыууӕ адӕймагӕн, иунӕгӕй чи у, уымӕй хуыздӕр у, уымӕн ӕмӕ сӕ фыдӕбон дзӕгъӕлы нӕу. Сӕ иу куы ахауа, уӕд иннӕ схӕцдзӕн йе ’мбалыл. Фӕлӕ, иунӕг чи у, уый та? Куы ахауа, уӕд ыл чи схӕцдзӕн? Стӕй дыууӕйӕ кӕрӕдзи фарсмӕ куы ’рхуыссой, уӕд схъарм уыдзысты. Иунӕг чи у, уый та куыд схъарм уыдзӕн? Ӕмӕ кӕд, иунӕг чи у, ууыл исчи фӕтых уыдзӕн, уӕд дыууӕйӕ та йӕ ныхмӕ фӕлӕудзысты. Ӕртӕ тагӕй быд бӕндӕн тагъд нӕ аскъуыйдзӕн» (Екклесиаст 4:9–12).

⁶ Ацы скъуыддзаджы сӕйраджыдӕр дзырд цӕуы, хорз ӕмбалӕн аргъ кӕй нӕй, ууыл. Ӕмӕ лӕг ӕмӕ ус кӕрӕдзийӕн хъуамӕ ӕппӕты ӕввахсдӕр ӕмбӕлттӕ уой. Ацы стихты куыд фыст ис, уымӕ гӕсгӕ сӕ бон вӕййы кӕрӕдзийӕн ӕххуыс кӕнын, кӕрӕдзи фидар кӕнын ӕмӕ кӕрӕдзи фарсмӕ балӕууын. Фӕлӕ бинонты амонд ӕрмӕст дыууӕ адӕймагӕй кӕнгӕ нӕу. Ацы стихтӕй ахӕм хатдзӕг скӕнӕн ис, ӕмӕ дыууӕ тагӕй конд бӕндӕн ӕнцон аскъуынӕн у. Фӕлӕ ӕртӕ тагӕй быд бӕндӕн зындӕр аскъуынӕн у. Лӕджы дӕр ӕмӕ усы дӕр сӕйраджыдӕр Йегъовӕйы зӕрдӕ рухс кӕнын куы фӕнда, уӕд сӕ бинонты цард уыдзӕн ӕртӕ тагӕй быд бӕндӕны хуызӕн. Сӕ дыууӕ дӕр Йегъовӕйыл иузӕрдион куы уой, уӕд сӕ кӕрӕдзийӕ ницы ахицӕн кӕндзӕн.

7, 8. а) Йӕ монцтимӕ чи тох кӕны ӕмӕ бинонтӕ кӕмӕн нӕй, уыцы чырыстӕттӕн Павел цавӕр уынаффӕ радта? б) Бинонты царды тыххӕй нын Библи ӕргом цы дзуры?

⁷ Уымӕй уӕлдай, ӕмуат ӕрцӕуыны бар ис ӕрмӕстдӕр лӕг ӕмӕ усӕн, ӕмӕ уый нӕлгоймаг ӕмӕ сылгоймагӕн ӕцӕг ӕхсызгондзинад уӕд фӕхӕссы (Ӕмбисӕндтӕ 5:18). Ӕрыгонӕй адӕймагӕн йӕ монцтӕ тыхджын вӕййынц. Ӕмӕ кӕд фӕстӕдӕр уыцы монцтӕ афтӕ тыхджын нал вӕййынц, уӕддӕр ма, чи зоны, семӕ фӕтох кӕны. Ӕмӕ сын сӕ рохтӕ куы суадза, уӕд ӕй ӕркӕндзысты чъизи ӕмӕ ӕнӕгъдау митӕм. Бинонтӕ кӕмӕн нӕй, уыдонӕн апостол Павел Хуыцауы фӕндӕй радта ахӕм уынаффӕ: «Кӕд исчи йӕхиуыл хӕцын нӕ фӕразы, уӕд ус ракурӕд кӕнӕ мой скӕнӕд – цӕйнӕфӕлтау монцӕй судза, фӕлтау бинонтӕ скӕнӕд» (1 Коринфӕгтӕм 7:9, 36; Иаковы 1:15).

⁸ Адӕймаджы цӕйфӕнды тыххӕй ма фӕнда ус ракурын кӕнӕ мой скӕнын, уӕддӕр хъуамӕ бинонты цардмӕ раст цӕстӕй кӕса. Павел куыд загъта, афтӕмӕй, бинонтӕ чи скӕна, уыдонӕн «сӕ царды фӕзындзӕн ног зындзинӕдтӕ» (1 Коринфӕгтӕм 7:28). Бинонтӕ кӕмӕн ис, уыдон сӕмбӕлынц, бинонтӕ кӕмӕн нӕй, уыдон хызт кӕмӕй сты, ахӕм зындзинӕдтыл. Фӕлӕ кӕд бинонтӕ скӕнынвӕнд кӕныс, уӕд дӕ бон цы у саразын, цӕмӕй уын зындзинӕдтӕ къаддӕр уа, арфӕдзинӕдтӕ та – фылдӕр? Иу уый, ӕмӕ цардӕмбал ӕвзаргӕйӕ ӕмбаргӕ у.

ХОРЗ ЦАРДӔМБАЛ ДЫН ЧИ УЫДЗӔН?

9, 10. а) Ӕнӕуырнӕгимӕ цард баиу кӕнын тӕссаг кӕй у, уый бамбарын кӕнынӕн Павел цавӕр цӕвиттон ӕрхаста? б) Адӕймаг Хуыцауы уынаффӕмӕ кӕй нӕ байхъусы ӕмӕ йӕ цард ӕнӕуырнӕгимӕ кӕй баиу кӕны, уый арӕх цӕмӕ ’ркӕны?

⁹ Цардӕмбал ӕвзаргӕйӕ рох кӕнын нӕ хъӕуы иу ахсджиаг хъуыддаг. Уый тыххӕй ныффыста Павел: «Уӕхи ӕнӕуырнджытимӕ иу ӕфсондзы ма баифтындзут» (2 Коринфӕгтӕм 6:14). Ацы ныхӕстӕ кӕсгӕйӕ цӕстытыл ауайы хъӕууон цард. Зӕгъӕм, галы ӕмӕ хӕрӕджы иумӕ куы баифтындзай, уӕд сӕ дыууӕ дӕр тухӕнӕй амӕлдзысты, уымӕн ӕмӕ дзы иу тыхджындӕр у, иннӕ та – лӕмӕгъдӕр. Афтӕ уырнӕг ӕмӕ ӕнӕуырнӕг сӕ цард куы баиу кӕной, уӕд уыдонӕн дӕр афтӕ зын уыдзӕн, кӕрӕдзи не ’мбардзысты. Иу Йегъовӕйы зӕрдӕхудтӕй куы тӕрса, иннӕмӕ та уый нымады дӕр куы нӕ уа, уӕд иу цӕмӕдӕр нӕ тырндзысты ӕмӕ бирӕ зындзинӕдтыл ӕмбӕлдзысты. Уӕдӕ Павел дзӕгъӕлы нӕ загъта, чырыстон йӕ цард кӕй хъуамӕ сбӕтта, «Чырыстийы фӕдылдзӕуӕг» чи у, ӕрмӕстдӕр ахӕм адӕймагимӕ (1 Коринфӕгтӕм 7:39).

¹⁰ Бинонтӕ кӕмӕн нӕй, уыцы чырыстӕттӕй иуӕй-иутӕ ахӕм хъуыдымӕ ӕрцыдысты, зӕгъгӕ, дӕ цард иунӕгӕй ӕрвитыны бӕсты фӕлтау дӕ цард ӕнӕуырнӕгимӕ баиу кӕн. Чидӕртӕ Библийы уынаффӕ ницӕмӕ ӕрдарынц ӕмӕ цардӕмбалӕн равзарынц, Йегъовӕйӕн чи нӕ лӕггад кӕны, ахӕм адӕймаджы. Фӕлӕ афтӕ чи бакӕны, уыдон арӕх фӕсмойнаг фӕвӕййынц. Сӕ цард баиу кӕнынц, ӕппӕты зынаргъдӕр сын цы у, уыдӕттыл сӕ бон аныхас кӕнын дӕр кӕимӕ нӕ вӕййы, ахӕм адӕймагимӕ. Ӕмӕ кӕд бинонтӕ скӕныны размӕ афтӕ хъуыды кодтой, иунӕг дӕн ӕмӕ никӕй хъӕуын, зӕгъгӕ, уӕд ныр та сӕхимӕ ноджы иунӕгдӕр фӕкӕсынц. Фӕлӕ уӕддӕр тынг бирӕ ис, ацы хъуыддаджы Хуыцауы уынаффӕмӕ чи хъусы, ахӕм чырыстӕттӕ. (Бакӕс Псалом 32:8.) Кӕд сӕ бинонтӕ скӕнын фӕнды, уӕддӕр нӕ тагъд кӕнынц ӕмӕ ӕнхъӕлмӕ кӕсынц, цалынмӕ Йегъовӕйы лӕггадгӕнджыты ’хсӕн, цардӕмбалӕн кӕй саккаг кӕной, ахӕм адӕймагыл нӕ фембӕлой, уӕдмӕ.

11. Хорз цардӕмбал равзарынӕн дын цы баххуыс кӕндзӕн? (Ноджыдӕр кӕс рамкӕ «Мӕ цардӕмбалмӕ цавӕр миниуджытӕ хъуамӕ уа?».)

¹¹ Кӕй зӕгъын ӕй хъӕуы, уый ууыл дзурӕг нӕу, ӕмӕ дын Йегъовӕйы лӕггадгӕнджытӕй чифӕнды дӕр цардӕмбалӕн сбӕздзӕн. Агур, ды цы миниуджытӕн аргъ кӕныс, ахӕм миниуджытӕ кӕмӕ ис, Хуыцауы хъуыддаджы ды цы нысӕнттӕ ӕвӕрыс, йӕ разы ахӕм нысӕнттӕ чи ӕвӕры ӕмӕ, Хуыцауы ды куыд уарзыс, афтӕ йӕ чи уарзы, ахӕм адӕймаджы. Ацы хъуыддаджы фӕдыл ӕууӕнкджын ӕмӕ зондджын цагъар бирӕ ӕрмӕг рауагъта, ӕмӕ хорз уаид, цы уынаффӕтӕ дзы ис, уыдоныл лӕмбынӕг куы ахъуыды кӕнис, Хуыцаумӕ куы кувис ӕмӕ уынаффӕ афтӕмӕй куы рахӕссис. (Бакӕс Псалом 119:105.)a

12. Бирӕ бӕстӕты цавӕр ӕгъдау ис ӕмӕ уыцы хъуыддаджы Библийӕ кӕй ис бафӕзмӕн?

¹² Бирӕ бӕстӕты ахӕм ӕгъдау ис, ӕмӕ ныййарджытӕ сӕ сывӕллонӕн сӕхӕдӕг ссарынц цардӕмбал. Уым ахӕм хъуыдыйыл хӕст сты, зӕгъгӕ, дам, ныййарджытӕ фылдӕр федтой ӕмӕ фылдӕр ӕмбарынц, ӕмӕ, дам, ахӕм ахсджиаг хъуыддаджы уыдон хуыздӕр уынаффӕ рахӕсдзысты. Цардӕмбал ныййарджытӕ кӕмӕн равзарынц, уыдон арӕх вӕййынц амондджын, раджы заманты дӕр-иу куыд уыд, афтӕ. Абон ахӕм уавӕры чи ис, уыцы ныййарджытӕн сӕ бон у Авраамы бафӕзмын. Уый йӕ лӕггадгӕнӕджы арвыста, цӕмӕй Исахъӕн цардӕмбал ссардтаид. Авраамӕн сӕйраг уый нӕ уыд, цӕмӕй йӕ чындз хъӕздыг ӕмӕ кадджын бинонтӕй уыдаид. Уый бирӕ сарӕзта, цӕмӕй Исахъӕн бинойнаг ссардтаид Йегъовӕйы лӕггадгӕнджыты ’хсӕн (Райдиан 24:3, 67)b.

ДӔ БОН КУЫД У ДӔХИ БИНОНТЫ ЦАРДМӔ БАЦӔТТӔ КӔНЫН?

13–15. а) Бинонты хъуыддаг бакӕнын кӕй фӕнды, ахӕм лӕппуйӕн Ӕмбисӕндты 24:27 стихы фыст уагӕвӕрд куыд баххуыс кӕндзӕн? б) Чызгӕн йӕ бон куыд у йӕхи бинонты цардмӕ бацӕттӕ кӕнын?

¹³ Кӕд дӕ зӕрды ис бинонтӕ скӕнын, уӕд хорз уаид, ахӕм фарстайыл куы ахъуыды кӕнис: «Бинонты цардмӕ ӕцӕгдӕр цӕттӕ дӕн?» Цавӕр дзуапп ратдзынӕ, уый, уарзондзинады тыххӕй, лӕг ӕмӕ усы ’хсӕн цы сусӕг ахастдзинӕдтӕ вӕййы, уыдоны тыххӕй, стӕй, кӕрӕдзийӕн куыд хъуамӕ уой ӕмӕ сывӕллӕтты куыд хъуамӕ хъомыл кӕной, уый тыххӕй цы хъуыды кӕныс, ӕрмӕст уыимӕ нӕу баст. Фӕлӕ хъуамӕ ахъуыды кӕнай, лӕгыл ӕмӕ усыл цавӕр хӕстӕ ис, ууыл.

¹⁴ Цардӕмбал чи агуры, уыцы лӕппу хъуамӕ лӕмбынӕг ахъуыды кӕна, Ӕмбисӕндты 24:27 стихы цы фыст ис, ууыл: «Хӕдзары ӕддейӕ дын цы куыстытӕ ис, уыдон бакӕн ӕмӕ дӕ хуымы куыстытӕ кӕронмӕ фӕу. Уый фӕстӕ бинонтӕ дӕр скӕн». Ацы ныхӕстӕ цӕуыл дзурӕг сты? Уыцы заманты-иу нӕлгоймаг бинонтӕ скӕныны размӕ хъуамӕ ахъуыды кодтаид: «Мӕ бон уыдзӕн мӕ бинойнаджы ӕмӕ мӕ сывӕллӕтты дарын?» Фыццаг уал хъуамӕ бафыдӕбон кодтаид: йӕ хуымы куыстытӕ бакодтаид ӕмӕ хор бафснайдтаид. Абон дӕр хабар афтӕ у. Бинонты хъуыддаг бакӕнын кӕй фӕнды, ахӕм нӕлгоймаг хъуамӕ цӕттӕ уа йӕхимӕ хӕдзардарӕджы хӕстӕ райсынмӕ. Кӕд йе ’нӕниздзинад амоны, уӕд хъуамӕ куса. Хуыцауы Ныхасы фыст ис, йӕ бинонтыл чи нӕ тыхсы, уый, уырнындзинад кӕмӕ нӕй, уымӕй фыддӕр кӕй у. Бинонтыл тыхсынмӕ хауы бинонты дарын, сӕ уырнындзинадыл ӕмӕ сын се ’нкъарӕнтыл хъуыды кӕнын ӕмӕ семӕ рӕстӕг ӕрвитын. (Бакӕс 1 Тимофеймӕ 5:8.)

¹⁵ Кӕд сылгоймаг смой кӕнынмӕ хъавы, уӕд уый дӕр ӕвдисы, йӕхимӕ стыр хӕстӕ райсыныл разы кӕй у, уый. Ӕмбисӕндты чиныджы фыст ис, хорз ус цавӕр вӕййы, уый тыххӕй. Уый алцӕмӕ дӕр арӕхсы ӕмӕ йӕм ис бирӕ хорз миниуджытӕ, ӕмӕ уый фӕрцы йӕ бон у йӕ лӕгӕн ӕххуыс кӕнын ӕмӕ йӕ бинонтыл тыхсын (Ӕмбисӕндтӕ 31:10–31). Бинонтӕ скӕныныл чи фӕтагъд кӕны ӕмӕ сыл цы хӕстӕ уыдзӕн, ууыл чи нӕ ахъуыды кӕны, уыцы нӕлгоймӕгтӕ ӕмӕ сылгоймӕгтӕ сты хиуарзон, уымӕн ӕмӕ, сӕхӕдӕг хорз цардӕмбӕлттӕ уыдзысты ӕви нӕ, ууыл нӕ фӕхъуыды кӕнынц. Фӕлӕ нӕлгоймаг ӕмӕ сылгоймаг сӕйраджыдӕр хъуамӕ ахъуыды кӕной, Библийы уагӕвӕрдтӕм гӕсгӕ цӕрын сӕ бон уыдзӕн ӕви нӕ, ууыл.

16, 17. Бинонтӕ скӕныны размӕ Библийӕ цавӕр уагӕвӕрдтыл хъӕуы ахъуыды кӕнын?

¹⁶ Йӕхи бинонты цардмӕ бацӕттӕ кӕнын кӕй фӕнды, уый хъуамӕ ахъуыды кӕна, бинонты ’хсӕн Хуыцау лӕгӕн дӕр ӕмӕ усӕн дӕр цы бынат скодта, ууыл. Нӕлгоймаг хъуамӕ ӕмбара, чырыстон бинонты хистӕр уай, уый цы нысан кӕны. Фӕлӕ бинонты хистӕр кӕй у, уый йын бар нӕ дӕтты, цӕмӕй йӕ бинонты хӕрдмӕ скӕсын ма уадза. Ацы хъуыддаджы хъуамӕ фӕзма Чырыстийы (Ефесӕгтӕм 5:23). Чырыстон сылгоймаг дӕр хъуамӕ ӕмбара, бинонты ’хсӕн усӕн цы кадджын бынат ис, уый. «Йӕ сӕрыхицауы закъонмӕ» гӕсгӕ цӕрын ын уаргъы хуызӕн нӕ уыдзӕн? (Ромӕгтӕм 7:2). Цалынмӕ моймӕдзыд нӕу, уӕдмӕ дӕр ӕй хъӕуы Йегъовӕйы ӕмӕ Чырыстийы закъон ӕххӕст кӕнын (Галатӕгтӕм 6:2). Сӕрыхицауӕн бинонты ’хсӕн цы бартӕ ис, уый та у ӕндӕр закъон. Йӕ бон уыдзӕн ӕнӕххӕст адӕймаджы коммӕ кӕсын ӕмӕ йын ӕххуыс кӕнын? Кӕд уымӕ цӕттӕ нӕу, уӕд фӕлтау ма смой кӕнӕд.

¹⁷ Уымӕй уӕлдай, лӕг ӕмӕ ус хъуамӕ хъуыды кӕной, иннӕмӕн уӕлдай ахсджиаг цы у, ууыл. (Бакӕс Филиппӕгтӕм 2:4.) Павел ныффыста: «Сымахӕй алчи, йӕхи куыд уарзы, афтӕ уарзӕд йӕ усы дӕр. Ус та хъуамӕ йӕ лӕджы нымайа». Павел Хуыцауы фӕрцы ӕмбӕрста, нӕлгоймагӕн уӕлдай ахсджиаг кӕй у, цӕмӕй йын йӕ ус кад кӕна ӕмӕ йӕ нымайа. Сылгоймагӕн та уӕлдай ахсджиаг у, цӕмӕй йӕ йӕ лӕг уарза (Ефесӕгтӕм 5:21–33).

18. Лӕппу ӕмӕ чызг куы ’мбӕлой, уӕд хиуылхӕцгӕ цӕмӕн хъуамӕ уой?

¹⁸ Лӕппу ӕмӕ чызг нырма ӕмбӕлгӕ куы фӕкӕнынц, уӕд уый ӕнӕуи хи аирхӕфсыны рӕстӕг нӕ вӕййы. Уыцы рӕстӕг хъуамӕ кӕрӕдзи хуыздӕр базоной ӕмӕ бамбарой, сӕ цард куы баиу кӕной, уӕд амондджын уыдзысты ӕви нӕ. Уыцы рӕстӕг ма сӕ тынг фӕхъӕуы сӕхиуыл хӕцын дӕр. Фӕфӕнды сӕ, ӕрмӕст лӕг ӕмӕ усӕн куыд ӕмбӕлы, кӕрӕдзи афтӕ барӕвдауын дӕр, уымӕн ӕмӕ афтӕ конд стӕм. Фӕлӕ кӕд лӕппу ӕмӕ чызг кӕрӕдзи ӕцӕгдӕр уарзынц, уӕд, иннӕйы уырнындзинадӕн зиан цы ’рхӕсдзӕн, ахӕмӕй ницы бакӕндзысты (1 Фессалоникӕгтӕм 4:6). Уӕдӕ кӕд искӕимӕ ӕмбӕлыс, уӕд хиуылхӕцгӕ у. Ацы миниуӕг дын ӕххуыс кӕндзӕн царды мидӕг, бинонтӕ скӕнай ӕви ма скӕнай, уӕддӕр.

ЦӔРӔНБОНТӔМ ИУМӔ АМОНДДЖЫНӔЙ ЦӔЙ ФӔРЦЫ ЦӔРДЗЫСТУТ?

19, 20. Чырыстӕттӕ бинонты цардмӕ цы цӕстӕй кӕсынц, уый ацы дунейы цӕстӕнгасӕй куыд хицӕн кӕны? Ӕрхӕсс цӕвиттон.

¹⁹ Кӕд лӕг ӕмӕ усы цӕрӕнбонтӕм иумӕ амондджынӕй цӕрын фӕнды, уӕд сӕ хъуамӕ рох ма уа, кӕрӕдзийӕн цы дзырд радтой, уый. Чингуыты ӕмӕ киноты арӕх хабар чындзӕхсӕвыл ахицӕн вӕййы, ома йын вӕййы, адӕм кӕмӕ фӕбӕллынц, ахӕм хорз кӕрон. Фӕлӕ ӕцӕгӕй та чындзӕхсӕв у бинонты цардӕн йӕ райдиан, уымӕн ӕмӕ Йегъовӕйы фӕндонмӕ гӕсгӕ лӕг ӕмӕ ус хъуамӕ иумӕ уой ӕнустӕм (Райдиан 2:24). Хъыгагӕн, абон бирӕтӕ афтӕ нӕ хъуыды кӕнынц. Иуӕй-иу адӕмтӕм афтӕ фӕдзурынц, зӕгъгӕ, дам, дыууӕ адӕймаджы сӕ цард куы баиу кӕнынц, уӕд, дам, дыууӕ бӕттӕны кӕрӕдзийыл ӕлхынцъбаст бакӕнынц. Чи зоны йӕ ӕмбаргӕ дӕр нӕ кӕнынц, ацы абарст куыд хорз ӕвдисы, бирӕтӕ бинонты цардмӕ цы цӕстӕй кӕсынц, уый. Цӕмӕн ис афтӕ зӕгъӕн? Бӕттӕн хорз куы балхынцъ кӕнай, уӕд хъуамӕ йӕхигъӕдӕй ма райхӕла. Иннӕмӕй та йӕ хъуамӕ афтӕ балхынцъ кӕнай, цӕмӕй, куы бахъӕуа, уӕд ӕй райхалӕн дӕр ӕнцонтӕй уа.

²⁰ Ныртӕккӕ бирӕтӕ ахӕм зондыл хӕст сты, ӕмӕ, дам, ӕнӕмӕнг нӕу, цӕмӕй лӕг ӕмӕ ус иумӕ цӕрӕнбонтӕм цӕрой. Ахӕм адӕм бинонтӕ ӕнцонтӕй скӕнынц, уымӕн ӕмӕ афтӕ фӕхъуыды кӕнынц: ныртӕккӕ мын уый ӕнӕмӕнг хъуыддаг у, стӕй исты зындзинӕдтыл куы сӕмбӕлӕм, уӕд та ахицӕн уыдзыстӕм. Фӕлӕ-ма нӕ зӕрдыл ӕрлӕууын кӕнӕм, Библи бинонты цард бӕндӕнимӕ кӕй бары. Науы бӕндӕнтӕ вӕййынц фидар, нӕ ихсийынц ӕмӕ нӕ райхӕлынц, денджызы цыфӕнды тыхдымгӕ ма сыста, уӕддӕр. Лӕг ӕмӕ ус цы тӕгтӕй баст сты, уыдон дӕр хъуамӕ афтӕ фидар уой. Йесо дӕр загъта: «Хуыцау цы баиу кодта, уый адӕймаг ма ахицӕн кӕнӕд» (Матфейы 19:6). Кӕд бинонтӕ скӕнынвӕнд кӕныс, уӕд ды дӕр хъуамӕ бинонты цардмӕ ахӕм цӕстӕй кӕсай. Цымӕ уӕд бинонты цард адӕймагӕн уаргъы хуызӕн уыдзӕн? Нӕ.

21. Лӕг ӕмӕ ус кӕрӕдзимӕ цы цӕстӕй хъуамӕ кӕсой ӕмӕ сын цы баххуыс кӕндзӕн?

²¹ Лӕг дӕр ӕмӕ ус дӕр хъуамӕ архайой, цӕмӕй кӕрӕдзийы хорз миниуджытӕ уыной ӕмӕ кӕрӕдзийы фыдӕбонӕн аргъ кӕной. Ӕмӕ уӕд уыдзысты амондджын ӕмӕ сӕ бинонты цардӕй райгонд. Цымӕ уый гӕнӕн ис, ӕмӕ ӕнӕххӕст адӕймагӕн фылдӕр йӕ хорз миниуджытӕ уынӕм? Зӕгъӕм, кӕд нын Йегъовӕ нӕ хъӕндзинӕдтӕ уыны, уӕддӕр ӕй зонӕм, нӕ хорз миниуджытӕ дӕр нын кӕй уыны. Псаломзарӕггӕнӕг загъта: «О Йагъ, ды адӕймагӕн йӕ рӕдыдтытӕм лӕмбынӕг куы кӕсис, уӕд чи бафӕразид, о Йегъовӕ?» (Псалом 130:3). Лӕг ӕмӕ ус дӕр кӕрӕдзимӕ хъуамӕ ахӕм цӕстӕй кӕсой ӕмӕ кӕрӕдзийӕн хатыр кӕной. (Бакӕс Колоссӕгтӕм 3:13.)

22, 23. Авраам ӕмӕ Саррӕ абоны бинонтӕн фӕзминаг цӕмӕй сты?

²² Бирӕ бинонтӕн сӕ бон зӕгъын у, иумӕ цас фылдӕр цӕрынц, уыйас амондджындӕр кӕй сты. Библийы фыст ис ацӕргӕ Авраам ӕмӕ Саррӕйы тыххӕй. Сӕ царды бирӕ зындзинӕдтӕ федтой. Ахъуыды-ма кӕн Саррӕйыл. Ӕвӕццӕгӕн ыл 60 азӕй фылдӕр цыд, афтӕ йӕ бахъуыди хъӕздыг горӕт Уры йӕ хорз хӕдзар ныууадзын, ӕмӕ уӕдӕй фӕстӕмӕ хъуамӕ йӕ цард цатырты ӕрвыстаид. Уый йын ӕнцон нӕ уыдаид, фӕлӕ йӕ лӕджы коммӕ бакаст. Саррӕ кад кодта Авраамӕн ӕмӕ йын уыд хорз ӕххуысгӕнӕг. Авраам-иу исты уынаффӕ куы рахаста, уӕд-иу ын ӕххуыс кодта, цӕмӕй-иу ын алцыдӕр рауадаид. Ӕмӕ йӕ лӕджы коммӕ адӕмы цӕстмӕ нӕ касти. Суанг ӕй «йӕхинымӕр» дӕр хуыдта йӕ сӕрыхицау (Райдиан 18:12; 1 Петры 3:6). Саррӕ Авраамӕн кад кодта ӕппӕт зӕрдӕйӕ.

²³ Кӕй зӕгъын ӕй хъӕуы, уый ууыл дзурӕг нӕу, ӕмӕ Авраам ӕмӕ Саррӕ алцӕй тыххӕй дӕр иухуызон хъуыды кодтой. Иухатт Авраамӕн Саррӕйы уынаффӕ «тынг хъыг уыди». Фӕлӕ Авраам сӕрныллӕгдзинад равдыста ӕмӕ йын Йегъовӕ куыд загъта, афтӕ йӕ усмӕ байхъуыста. Ӕмӕ уый сӕ бинонтӕн арфӕдзинӕдтӕ ӕрхаста (Райдиан 21:9–13). Абон лӕгтӕ ӕмӕ устытӕ, суанг бирӕ азты дӕргъы иумӕ чи цӕры, уыдон дӕр, ацы диссаджы бинонтӕй бирӕ цӕуылдӕрты сахуыр уыдзысты.

24. Йегъовӕ Хуыцауӕн цавӕр бинонтӕ хӕссынц кад ӕмӕ цӕмӕн?

²⁴ Чырыстон ӕмбырдты ис тынг бирӕ амондджын бинонтӕ. Амондджын та уымӕн вӕййынц, ӕмӕ ус фӕнымайы йӕ лӕджы, лӕг та фӕуарзы йӕ усы ӕмӕ йын фӕаргъ кӕны, ӕмӕ иумӕ фӕархайынц, цӕмӕй сын Йегъовӕйы фӕндон алы хъуыддаджы дӕр фыццаг бынаты уа. Кӕд дӕ бинонтӕ скӕнын фӕнды, уӕд цардӕмбал ӕвзаргӕйӕ ӕмбаргӕ у ӕмӕ дӕхи бинонты цардмӕ хорз бацӕттӕ кӕн. Ӕмӕ ус куы ракурай кӕнӕ мой куы скӕнай, уӕд архай, цӕмӕй уӕ бинонты ’хсӕн уарзондзинад ӕмӕ фарн уа ӕмӕ Йегъовӕ Хуыцауӕн кад хӕссат. Ӕмӕ дын уӕд дӕ бинонты цард ӕххуыс кӕндзӕн, цӕмӕй алкӕддӕр Хуыцауы уарзтӕй хайджын уай.