«Мӕ зӕрдӕйы фӕндиаг фыййӕуттӕ»

1, 2. а) Фыййау йӕ дзуг куы нӕ фӕхъахъхъӕны, уӕд цы ’рцӕуы? ӕ) Раджы заманты фыййауы куыстмӕ цы хауди?

ХИРОЯСУ цӕры Японийы. Гыццыл ма куы уыд, уӕд йӕ мад балхӕдта иу фыр ӕмӕ иу фыс. Хироясу сӕм зылди, ӕмӕ-иу фыс алы аз дӕр ныззад дыууӕ уӕрыччы. Афтӕмӕй дзуг стырӕй-стырдӕр кодта. Лӕппуйыл 12 азы куы цыд, уӕд сӕ фыстӕ 13 баисты. «Иубон райсомӕй раджы, нырма хуысгӕ кодтон, афтӕмӕй айхъуыстон фысты уасын,– дзуры Хироясу.– Фӕлӕ уайтагъд нӕ фестадтӕн. Ӕппынфӕстаг ӕддӕмӕ куы рахызтӕн, уӕд ма ауыдтон, нӕ кӕртӕй хъӕддаг куыйтӕ куыд фӕцӕйлыгъдысты, уый. Мӕ уӕрыччыты та баййӕфтон ӕргӕвстӕй. Ӕмӕ сын сӕ мады агурынмӕ фӕдӕн. Уый дӕр хуыссыди туджы ӕвдылдӕй ӕмӕ ма тыххӕйты улӕфыд. Ӕмӕ ма уый дӕр куы федтон, уӕд фӕцӕйӕрра кодтон. Ӕрмӕстдӕр ма фыр аирвӕзт. Ӕз мӕхи хордтон, сӕ уасын сын куыддӕр фехъуыстон, афтӕ цӕуылнӕ рацыдтӕн, зӕгъгӕ. Хъӕддаг куыйты ныхмӕ фыстӕ цы бакодтаиккой?!»

² Раджы заманты, ӕвӕццӕгӕн, алчидӕр зыдта, фыййауы куыст цы уыд, уый. Фыййау-иу дзуг хизынмӕ атардта ӕмӕ йӕ хъус дардта, цӕмӕй-иу фыстӕ ӕххормагӕй ма баззадаиккой. Стӕй-иу сӕ тугдзых сырдтӕй дӕр хъахъхъӕдта. Фыс-иу куы адзӕгъӕл, уӕд та-иу йӕ агурӕг ацыди (1 Сам. 17:34–36). Уымӕй уӕлдай ма-иу йӕ фысты ривӕд кӕнынмӕ дӕр акодта. Ӕмӕ-иу сын сӕ зайыны афон та ӕххуыс кодта ӕмӕ-иу ногзад уӕрыччытӕм зылди. Хуыцауы адӕмӕн разамынд чи лӕвӕрдта, уыдоны Библийы фысджытӕй бирӕтӕ, уыимӕ Йереми дӕр, хуыдтой фыййӕуттӕ. Афтӕ хуыдтой паддзӕхты ӕмӕ, адӕмы уырнындзинадыл чи тыхсти, уыцы цӕстдарджыты дӕр.

3. Йереми дзырдтӕ «фыййау» ӕмӕ «хизын»-ӕй куыд пайда кодта, уымӕй цы у бӕрӕг?

³ Хистӕр нӕлгоймӕгтӕ фыййӕуттӕ сты, зӕгъгӕ, куы фехъусыс, уӕд цӕуыл ахъуыды кӕныс? Чи зоны, дӕ зӕрдыл ӕрлӕууы хоты ӕмӕ ӕфсымӕрты кӕй бабӕрӕг кӕнынц ӕмӕ сӕ кӕй бафидар кӕнынц, уый. Фӕлӕ Йереми дзырдтӕ «фыййау» ӕмӕ «хизын»-ӕй куыд пайда кодта, уымӕй бӕрӕг у, уыцы дзырдтӕ ӕрмӕст уымӕ кӕй нӕ амонынц. Йереми дзырдта, Иудӕйы цӕстдарджытыл сӕ адӕмы раз цыдӕриддӕр хӕстӕ уыд, уыдоны тыххӕй. Хуыцау иу ӕмӕ дыууӕ хатты нӕ бауайдзӕф кодта Иудӕйы кънйӕзтӕн, пехуымпартӕн ӕмӕ сауджынтӕн, ӕвзӕр фыййӕуттӕ кӕй уыдысты, уый тыххӕй. Уыдон адӕмыл ӕппындӕр нӕ хъуыды кодтой (Йер. 2:8). Уыцы фыййӕуттӕ сӕ «фысты» ӕфхӕрдтой, сайдӕй сыл цыдысты ӕмӕ сӕм нымады дӕр нӕ уыдысты. Уыдон ӕрмӕстдӕр сӕхи мӕт кодтой. Ӕмӕ уый тыххӕй адӕм Хуыцауӕй адард сты. Йегъовӕ уыцы ӕвзӕр фыййӕутты тыххӕй загъта, зӕгъгӕ, «додой сӕ къона». Йӕ адӕмӕн та зӕрдӕ бавӕрдта, кӕй сын ратдзӕн, зӕрдиагӕй сыл чи тыхсдзӕн ӕмӕ сӕ ӕцӕгдӕр чи хъахъхъӕндзӕн, ахӕм фыййӕуттӕ. (Бакӕс Йеремийы 3:15; 23:1–4.)

4. Абон Хуыцауы дзугыл чи тыхсы ӕмӕ уый цавӕр зӕрдӕйӕ кӕнынц?

⁴ Хуыцау зӕрдӕ цӕмӕй бавӕрдта, уый сӕйраджыдӕр сӕххӕст Йесо Чырыстийыл. Уый у Хистӕр Фыййау ӕмӕ ӕмбырды Сӕр. Йесо йӕхи схуыдта «хорз фыййау», уымӕн ӕмӕ йын Хуыцау йӕ бар кӕй бакодта, уыдоныл зӕрдиагӕй тыхсы ӕмӕ сын сӕ зын ӕмбары (Иоан. 10:11–15). Абон Йегъовӕ сӕрст чырыстӕттӕй дӕр ӕмӕ «тынг бирӕ адӕмӕй» дӕр ӕфсымӕрты снысан кӕны хистӕр нӕлгоймӕгтӕй, цӕмӕй йын зӕххыл цы дзуг ис, уый хизой ӕмӕ афтӕмӕй Чырыстийӕн ӕххуыс кӕной (Рарг. 7:9). Уыцы фыййӕуттӕ дӕр Йесойау удуӕлдайӕ лӕггад кӕнынц. Уыдон хотыл ӕмӕ ӕфсымӕртыл зӕрдӕйӕ тыхсынц ӕмӕ сӕ ӕфсадынц, ома сын сӕ уырнындзинад фидар кӕнынц. Фӕлӕ «додой сӕ къона», йе ’фсымӕрты чи ницӕмӕ дары, йӕхи сын хицау чи кӕны, семӕ тызмӕг чи у кӕнӕ сӕм уӕлейӕ дӕлӕмӕ чи кӕсы, уыдонӕн! (Матф. 20:25–27; 1 Пет. 5:2, 3). Абон Йегъовӕ ӕмбырды фыййӕуттӕй кӕй сӕвӕрдта, уыдонмӕ цӕмӕ ӕнхъӕлмӕ кӕсы? Цӕстдарджытӕ сӕ хӕстӕм цы цӕстӕй хъуамӕ кӕсой ӕмӕ сӕ цавӕр зӕрдӕйӕ хъуамӕ ӕххӕст кӕной, уый тыххӕй Йереми цы ныффыста, уымӕй цӕуыл ахуыр кӕнӕм? Ацы сӕры аныхас кӕндзыстӕм, хотӕн ӕмӕ ӕфсымӕртӕн куыд хъуамӕ ӕххуыс кӕной ӕмӕ сӕ куыд хъуамӕ хъахъхъӕной, ууыл. Стӕй ма ӕркӕсдзыстӕм, ӕмбырды дӕр ӕмӕ сӕ уацамынды дӕр куыд хъуамӕ ахуыр кӕной ӕмӕ сын куыд хъуамӕ тӕрхон кӕной, уымӕ дӕр.

ФЫСТЫЛ ТЫХСЫНЦ ӔМӔ СӔ ХЪАХЪХЪӔНЫНЦ

5–7. а) Йегъовӕ йӕ фысты кӕй бар бакодта, уыцы фыййӕуттӕм цӕмӕ ӕнхъӕлмӕ кӕсы ӕмӕ цӕмӕн? ӕ) Хистӕр нӕлгоймӕгтӕ хоты ӕмӕ ӕфсымӕрты, стӕй дзугӕй чи адзӕгъӕл вӕййы, уыдоны дӕр, кӕй уарзынц, уый сӕ бон куыд у ӕвдисын?

⁵ Апостол Петр Йегъовӕйы схуыдта, нӕ удтӕ нын чи хъахъхъӕны, уыцы «фыййау ӕмӕ цӕстдарӕг» (1 Пет. 2:25, фип.). Хуыцау йӕ «фыстӕм» цы цӕстӕй кӕсы? Ацы фарстайӕн дзуапп базондзыстӕм Йеремийы чиныгӕй. Йегъовӕ ӕвзӕр фыййӕуттӕн, йӕ фысты йын кӕй ныххӕлиу кодтой ӕмӕ сӕм сӕ хъус кӕй нӕ дардтой, уый тыххӕй куы бауайдзӕф кодта, уӕд загъта, йӕ фысты кӕй ӕрӕмбырд кӕндзӕн ӕмӕ сӕ фӕстӕмӕ кӕй ӕркӕндзӕн сӕ хизӕнтӕм, ома сӕ райгуырӕн бӕстӕмӕ. Стӕй йӕ адӕмӕн зӕрдӕ бавӕрдта, хорз фыййӕуттӕ сын кӕй сӕвӕрдзӕн ӕмӕ сӕ уыдон кӕй «хиздзысты» ӕмӕ сӕ кӕй хъахъхъӕндзысты, бирӕгътау сӕ аныхъуырынмӕ чи хъавы, уыцы знӕгтӕй (Йер. 23:3, 4). Куыд уынӕм, афтӕмӕй уӕды заман Йегъовӕйӕн йӕ фыстӕ тынг зынаргъ уыдысты. Ӕмӕ йын абон дӕр афтӕ зынаргъ сты. Хуыцау уыдоны тыххӕй стыр аргъ бафыста, цӕмӕй ӕнустӕм цӕрой (1 Пет. 1:18, 19).

⁶ Фыййау йӕ дзугыл куыд фӕтыхсы, афтӕ ӕмбырды цӕстдарджытӕ дӕр, сӕ бар чи ис, уыдоныл хъуамӕ зӕрдӕйӕ тыхсой. Хистӕр нӕлгоймӕгтӕ, уе ’мбырды хо кӕнӕ ӕфсымӕр истӕуыл куы фӕтыхсы, уӕд ӕй уайтагъд бафиппайут ӕмӕ йын баххуыс кӕнынмӕ цӕттӕ вӕййут? Зондджын паддзах Соломон ныффыста: «Дӕ фысты хъуамӕ хорз зонай. Дӕ дзугтӕм зӕрдиагӕй кӕс» (Ӕмб. 27:23). Ам дзырд цӕуы, фыййау фыстӕм кӕсгӕйӕ йӕхиуыл кӕй хъуамӕ ма ауӕрда, ууыл. Фӕлӕ ма ацы ныхӕстӕ ахӕссӕн ис, чырыстӕтты уырнындзинадыл чи тыхсы, уыцы фыййӕуттӕм дӕр. Кӕд ды дӕр хистӕр нӕлгоймаг дӕ, уӕд ӕппӕт тыхтӕй архайыс, цӕмӕй дӕхи иннӕтӕн хицау ма кӕнай? Петр хистӕр нӕлгоймӕгты афтӕ кӕй фӕдзӕхста, зӕгъгӕ, «Хуыцауы бынтӕн уӕхи хицау ма кӕнут», уый ууыл дзурӕг у, ӕмӕ сӕ уыцы хъуыддагӕй хызт ничи у. Дӕ бон цы у аразын, цӕмӕй, Йеремийы 33:12 цы ныхӕстӕ ис фыст, уыдон сӕххӕст уой? (Бакӕс сӕ.) Ӕмбырды уӕлдай тынгдӕр ӕххуыс фӕхъӕуы идӕдзты, ацӕргӕты ӕмӕ ӕрыгӕтты, стӕй, йӕ сывӕллӕтты иунӕгӕй чи хъомыл кӕны, уыцы ныййарджыты ӕмӕ, фыццаг лӕгӕй кӕнӕ фыццаг усӕй сывӕллӕттӕ кӕмӕн ис, ахӕм чырыстӕтты дӕр.

⁷ Фыййауӕн йӕ фыстӕй искӕцы куы адзӕгъӕл вӕййы, уӕд йӕ агурӕг ацӕуы. Раст афтӕ, Хуыцауы дзуг чи хизы, уыцы фыййӕутты дӕр хатт бахъӕуы, дзугӕй чи адзӕгъӕл вӕййы, уыдоны ссарын ӕмӕ сын баххуыс кӕнын. Уый тыххӕй сӕ фӕхъӕуы удуӕлдайӕ ӕмӕ сӕрныллӕгӕй, стӕй фӕразонӕй архайын. Уыцы фыййӕуттӕ, Хуыцау сын сӕ бар кӕй бакодта, уыдонӕн сӕ рӕстӕг не ’вгъау кӕнынц ӕмӕ бахъуаджы сахат сӕ фарсмӕ балӕууынц. Хорз уаид, хистӕр нӕлгоймӕгтӕй алчидӕр йӕхимӕ ахӕм фарста куы раттид: «Хотӕн ӕмӕ ӕфсымӕртӕн арӕхдӕр сӕ ныфсыл ныфс бафтауын ӕви сын уайдзӕфтӕ фӕкӕнын? Мӕхиуыл кусын, цӕмӕй хорз фыййау суон?» Вӕййы афтӕ, ӕмӕ цӕмӕй адӕймаг цавӕрдӕр хъуыддагмӕ Хуыцауы цӕстӕй ракӕса, уый тыххӕй йемӕ цалдӕр хатты дӕр бахъӕуы аныхас кӕнын. Ӕфсымӕр кӕнӕ хойӕн Библийӕ (дӕхи зондӕй нӕ, фӕлӕ) цы уынаффӕ раттай, уымӕ уайтагъд куы нӕ байхъуса, уӕд-иу дӕ зӕрдыл дар Йегъовӕйы, Сӕйраг Фыййауы ӕмӕ Цӕстдарӕджы. Уый йӕ хивӕнд адӕммӕ бирӕ хӕттыты фӕразонӕй дзырдта ӕмӕ, гӕнӕн цыдӕриддӕр уыд, уый арӕзта, цӕмӕй сын баххуыс кодтаид (Йер. 25:3–6). Абон Хуыцауы адӕмӕн сӕ фылдӕр хивӕнд не сты, фӕлӕ дзы уӕддӕр кӕмӕндӕрты хатт фӕхъӕуы уынаффӕ раттын. Ӕмӕ уӕд хистӕр нӕлгоймӕгтӕ хъуамӕ фӕзмой Йегъовӕйы ӕмӕ-иу чырыстонӕн ӕвӕстиатӕй уынаффӕ раттой.

8. Ӕмбырды цӕстдарджытӕн сӕ бон куыд у Йеремийы фӕзмын?

⁸ Цалынмӕ Йеремийы уый ныфс уыди, ӕмӕ дзуттӕгтӕ Йегъовӕмӕ раздӕхдзысты, уӕдмӕ уыдоны тыххӕй куывта. Хуыцауӕн афтӕ загъта: «Ӕрхъуыды-ма йӕ кӕн, дӕ разы-иу куыд лӕууыдтӕн ӕмӕ сӕ хорзы кой куыд кодтон, цӕмӕй-иу сӕм дӕ маст ӕрсабыр уыдаид» (Йер. 18:20). Ацы ныхӕстӕй бӕрӕг у, Йереми йӕ адӕмыл йӕ къух кӕй нӕ ауыгъта, фӕлӕ сӕм хорзӕй цы уыд, уый кӕй уыдта. Абон дӕр ӕмбырды цӕстдарджытӕ хъуамӕ Йеремийы фӕзмой. Цалынмӕ уый ныфс ис, ӕмӕ адӕймаг йӕ рӕдыд бамбардзӕн ӕмӕ ӕрфӕсмон кӕндзӕн, уӕдмӕ йыл сӕ къух хъуамӕ ма ауигъой. Уӕдӕ хорз уаид, хистӕр нӕлгоймӕгтӕ хотӕй ӕмӕ ӕфсымӕртӕй куы ’ппӕликкой, хорзӕй цы аразынц, уый тыххӕй. Стӕй хъуамӕ уыдоны тыххӕй кувой семӕ дӕр ӕмӕ иунӕгӕй дӕр (Матф. 25:21).

ФЫСТЫ ӔФСАДЫНЦ

9, 10. Цӕмӕн ис зӕгъӕн, ӕмӕ хорз фыййау (ома хистӕр нӕлгоймаг) хъуамӕ уа ахуыргӕнӕг дӕр?

⁹ Йеремийы 3:15 ныхӕстӕм гӕсгӕ, фыййӕуттӕ хъуамӕ Хуыцауы дзуг ӕфсадой «зонындзинӕдтӕй ӕмӕ ӕмбаргӕдзинадӕй», ома сӕ хъуамӕ ахуыр кӕной (1 Тим. 3:2; 5:17). Йегъовӕ йӕ адӕмӕн зӕрдӕ бавӕрдта, хорз фыййӕуттӕ афтӕ кӕй кӕндзысты. Ӕмӕ сын бафӕдзӕхста, цӕмӕй йын йӕ пехуымпармӕ байхъуыстаиккой ӕмӕ сӕ зонд аивтаиккой. (Бакӕс Йеремийы 6:8.) Цӕмӕй фыстӕ ӕнӕниз уой, уый тыххӕй хъуамӕ хӕринагхъуаг ма ӕййафой. Раст афтӕ, цӕмӕй Хуыцауы лӕггадгӕнджытӕ дӕр ӕнӕниз уой, ома сӕ уырнындзинад фидар уа, уый тыххӕй сӕ хъӕуы Хуыцауы Ныхасӕй ӕфсадын ӕмӕ сын разамынд дӕттын.

¹⁰ Хистӕр нӕлгоймӕгтӕ хъуамӕ ахуыр кӕной, ӕмбырды чи ис, уыдоны дӕр ӕмӕ, чырыстон фӕндагыл чи нӕма слӕууыд, уыдоны дӕр. Чырыстон ӕмбырд сӕйраджыдӕр уый тыххӕй ис, цӕмӕй Хуыцауы Паддзахады тыххӕй хорз хабар хъуыстгонд цӕуа. Уымӕ гӕсгӕ хистӕр нӕлгоймӕгтӕ хъуамӕ уой зынгзӕрдӕ хъусынгӕнджытӕ (Йер. 1:7–10). Афтӕмӕй, Хуыцауы раз сыл цы хӕс ис, уый дӕр ӕххӕст кӕндзысты ӕмӕ ма иннӕтӕн дӕр фӕзминаг уыдзысты. Кӕд хистӕр нӕлгоймаг дӕ, уӕд ӕй, ӕвӕццӕгӕн, дӕхицӕй зоныс, уацамынды алыхуызон ӕфсымӕртимӕ ӕмӕ хотимӕ куы цӕуай, уӕд уый хорз фадат кӕй у, цӕмӕй сын баххуыс кӕнай арӕхстджындӕрӕй хъусын кӕнынӕн. Ӕмӕ афтӕмӕй дӕхӕдӕг дӕр сфӕлтӕрдзынӕ. Хъусын кӕныны хъуыддаджы фӕзминаг куы уай, уӕд уымӕй иннӕтӕн сӕ ныфсыл ныфс ӕфтаудзынӕ. Ӕмӕ уый фӕрцы ӕнӕхъӕн ӕмбырд дӕр зӕрдиагдӕрӕй ӕмӕ арӕхстджындӕрӕй хъусын кӕндзӕн.

11, 12. Кӕд хистӕр нӕлгоймаджы фӕнды, ӕмӕ хорз фыййау уа, уӕд ӕй цы хъӕуы аразын?

¹¹ Хистӕр нӕлгоймӕгтӕ хъуамӕ иннӕты ахуыр кӕной, Библийы цы фыст ис, уымӕ гӕсгӕ. Ӕрмӕстдӕр уӕд уыдзӕн зӕгъӕн, ӕмӕ сӕ, уырнындзинад чи фидар кӕны, ахӕм хӕрзхъӕд хӕринагӕй ӕфсадынц. Уӕдӕ цӕмӕй Хуыцауы дзуджы фыййӕуттӕ хорз ахуыргӕнджытӕ уой, уый тыххӕй хъуамӕ сӕхӕдӕг Хуыцауы Ныхас лӕмбынӕг иртасой. Йеремийы рӕстӕджы цӕрӕг разамонджытӕ адӕмӕн хорз разамынд нӕ лӕвӕрдтой. Афтӕ цӕмӕн уыд, уый Йереми бамбарын кодта: «Фыййӕуттӕ кодтой ӕнӕзонд митӕ, Йегъовӕйы нӕ агуырдтой. Ӕмӕ ӕмбаргӕйӕ дӕр уый тыххӕй нӕ архайдтой. Ӕмӕ сӕ дзугтӕ иууылдӕр ныххӕлиу сты» (Йер. 10:21). Адӕмы чи хъуамӕ ахуыр кодтаид, уыдон Хуыцауы нӕ агуырдтой ӕмӕ, Фыстады цы уагӕвӕрдтӕ уыд, уыдонмӕ гӕсгӕ нӕ архайдтой. Йегъовӕ уыцы мӕнг пехуымпартӕн карз тӕрхон рахаста ӕмӕ сын ӕй Йеремийы уылты фехъусын кодта. (Бакӕс Йеремийы 14:14, 15.)

¹² Уыцы ӕвзӕр фыййӕуттӕй уӕлдай ӕмбырды цӕстдарджытӕ Фыстад бӕстон иртасынц. Уыдон Йесойы цӕвиттоныл лӕмбынӕг хъуыды кӕнынц ӕмӕ йӕ фӕзмынц. Ӕмӕ уый фӕрцы ӕмбаргӕйӕ архайынц ӕмӕ дзуг, куыд ӕмбӕлы, афтӕ хизынц. Чи зоны сын Библи алы бон иртасын ӕнцон нӕ вӕййы, уымӕн ӕмӕ сӕ бирӕ хъуыддӕгтыл аххӕссын фӕхъӕуы. Фӕлӕ хистӕр нӕлгоймаг иннӕтӕн цы амоны, уый раст ӕрмӕстдӕр уӕд уыдзӕн ӕмӕ сын пайда ӕрмӕстдӕр уӕд хӕсдзӕн, кӕд ӕмӕ сӕ Хуыцауы Ныхасмӕ гӕсгӕ ӕмӕ ӕууӕнкджын цагъары разамындмӕ гӕсгӕ ахуыр кӕна. Кӕд, мыййаг, Библи раздӕрау бӕстон нал фӕиртасыс, уӕд дӕ цы хъӕуы аразын, цӕмӕй, Йеремийы рӕстӕджы чи цард, уыцы ӕвзӕр фыййӕутты хуызӕн ма суай?

13. Йереми хорз ахуыргӕнӕг цӕй фӕрцы уыд? Йӕ цӕвиттонӕй хистӕр нӕлгоймӕгтӕ цӕуыл ахуыр кӕнынц?

¹³ Йереми хорз ахуыргӕнӕг уӕлдайдӕр уый тыххӕй уыди, ӕмӕ пайда кодта цӕстуынгӕ цӕвиттонтӕй. Кӕй зӕгъын ӕй хъӕуы, цавӕр цӕвиттонӕй-иу спайда кодтаид, уый-иу ын Йегъовӕ бацамыдта. Зӕгъӕм, иухатт ӕлыг дурын зӕххыл ныппырх кодта ӕмӕ загъта, Иерусалим дӕр афтӕ пырхгонд кӕй ӕрцӕудзӕн. Уыцы хабар чи федта, уыдонӕй, ӕвӕццӕгӕн, уый никуыуал ферох (Йер. 19:1, 10, 11). Иннӕ хатт та Йереми хъӕдын ӕфсондз скодта ӕмӕ йӕ йӕ бӕрзӕйыл бакодта, цӕмӕй равдыстаид, израилӕгтӕ Вавилоны ӕфсондзы бын куыд хъизӕмар кӕндзысты, уый (Йер., 27, 28 сӕртӕ). Кӕй зӕгъын ӕй хъӕуы, абон Хуыцау хистӕр нӕлгоймӕгтӕн ахӕм цӕстуынгӕ цӕвиттонтӕ не ’вдисын кӕны. Фӕлӕ нӕ куы фӕахуыр кӕнынц, уӕд цы цӕвиттонтӕ ӕрхӕссынц ӕмӕ цы цаутӕ радзурынц, уыдоны фӕрцы хуыздӕр бамбарӕм, цы зӕгъинаг вӕййынц, уый. Хистӕр нӕлгоймӕгтӕ цӕвиттонтыл дзӕбӕх куы ахъуыды кӕнынц ӕмӕ, кӕм фидауынц, уым сӕ куы спайда кӕнынц, уӕд ӕмбырды хотӕн ӕмӕ ӕфсымӕртӕн сӕ зӕрдӕ бацагайынц ӕмӕ сӕ хорз хъуыддӕгтӕм сразӕнгард кӕнынц. Уый тыххӕй сӕ бузныг нӕ дӕ?

14. а) Йереми «Галаады бальзамы» кой куы скодта, уӕд ӕй цы зӕгъын фӕндыд? ӕ) Абон хистӕр нӕлгоймӕгтӕн сӕ бон куыд у хоты ӕмӕ ӕфсымӕрты уырнындзинадыл тыхсын?

¹⁴ Мах тынг бузныг стӕм, хистӕр нӕлгоймӕгтӕ нӕ кӕй ахуыр кӕнынц, уый тыххӕй. Йереми ӕмбӕрста, йӕ рӕстӕджы цӕрӕг дзуттӕгтӕн сӕ уырнындзинад хорз уавӕры кӕй нӕ уыд ӕмӕ сӕ сдзӕбӕх кӕнын кӕй хъуыди. Уый загъта: «Ау, Галаады бальзам нӕй? Иу дохтыр дзы нӕй?» (Йер. 8:22). Галаад уыди Израилы зӕххыл, Иорданӕй скӕсӕнырдӕм, ӕмӕ дзы, зайӕгойтӕй кӕй истой, ахӕм бальзам уыди. Уый уыд хӕрздӕф сой ӕмӕ-иу дзы пайда кодтой адӕмӕн хос кӕнынӕн, зӕгъӕм, хъӕдгӕмттӕ дзӕбӕх кӕнынӕн. Фӕлӕ Галаады нӕ уыди, адӕм сӕ уырнындзинад кӕмӕй сдзӕбӕх кодтаиккой, ахӕм бальзам. Цӕуылнӕ? Йереми загъта: «Пехуымпартӕ кӕнынц мӕнг ныхӕстӕ, сауджынтӕ адӕмы ссӕндынц, сӕхи цы фӕнды, уый аразынц. Ӕмӕ уый мӕ адӕмы зӕрдӕмӕ цӕуы» (Йер. 5:31). Абон та хабар куыд у? Фидарӕй зӕгъӕн ис, ӕмӕ ахӕм «бальзам» ис чырыстон ӕмбырдты. Ӕмбырды фыййӕуттӕ ныл куыд тыхсынц, уый абарӕн ис, рыст-иу кӕмӕй ӕрсабыр, уыцы бальзамимӕ. Уыдон нын нӕ хъус ӕрдарынц Библийы уагӕвӕрдтӕм ӕмӕ нын фӕлмӕнӕй зонд бацамонынц. Стӕй нын нӕ ныфсыл ныфс бафтауынц ӕмӕ мах тыххӕй фӕкувынц иунӕгӕй дӕр ӕмӕ немӕ дӕр (Иак. 5:14, 15).

«АФТӔ ЗӔГЪЫ ЙЕГЪОВӔ»

15, 16. Фыййӕутты цӕмӕн фӕхъӕуы дзугмӕ кӕсын? Чырыстон цӕстдарджыты та Хуыцауы дзугмӕ сӕ хъус дарын цӕмӕн хъӕуы?

¹⁵ Фыййауӕн йӕ дзуджы ӕнӕниз уӕрыччытӕ куы райгуыры, уӕд дзы фырцинӕй йӕ фыдӕбӕттӕ ферох вӕййынц. Фӕлӕ фыййау уый дӕр зоны, ӕмӕ цӕмӕй уӕрыччытӕ дзӕбӕх рӕзой, уый тыххӕй сӕм дарддӕр хъӕуы зилын. Стӕй ма йӕ йӕ хъус дарын фӕхъӕуы, цы хӕрынц, уымӕ дӕр. Иуӕй-иу бӕстӕты уӕрыччытӕ райгуырынц даргъ къӕдзилтимӕ, ӕмӕ сӕ цъыфы кӕнӕ фаджысы сӕвдулынц. Ӕмӕ цӕмӕй сыгъдӕг уой ӕмӕ сыл мацы низ бахӕца, уый тыххӕй сын фыййау сӕ къӕдзилтӕ фӕцыбырдӕр кӕны. Фӕлӕ уыцы куыст фӕкӕны арӕхстгай, цӕмӕй сӕ тынг ма фӕриссын кӕна. Чырыстон фыййӕуттӕ дӕр афтӕ тыхсынц Хуыцауы дзугыл, се ’мбырды хотыл ӕмӕ ӕфсымӕртыл (Иоан. 21:16, 17). Стӕй тынг фӕцин кӕнынц, Библи чи ахуыр кӕны, уыдон ӕмбырдтӕм цӕуын ӕмӕ сӕ цард ивын куы райдайынц, уӕд. Хистӕр нӕлгоймӕгты фӕнды, цӕмӕй, сӕ бар чи ис, уыцы чырыстӕттӕ иууылдӕр, ацӕргӕтӕ дӕр ӕмӕ ӕрыгӕттӕ дӕр, уой ӕфсӕст ӕмӕ ӕнӕниз, ома сӕ уырнындзинад фидар уа. Уымӕ гӕсгӕ сӕм ӕдзух сӕ хъус дарынц ӕмӕ, куы фӕхъӕуы, уӕд сын зонд дӕр бацамонынц. Уыдон хотӕн ӕмӕ ӕфсымӕртӕн сӕ зӕрдыл ӕрлӕууын кӕнынц, Йегъовӕ Библийы уылты цы дзуры, уый (Йер. 2:2, 5; 7:5–7; 10:2; Тит. 1:9).

¹⁶ Цӕмӕй Йереми Хуыцауы ныхас хъусын кодтаид, уый тыххӕй йӕ хъуыди хъӕбатырдзинад. Ӕмӕ чырыстон цӕстдарджыты дӕр фӕхъӕуы хъӕбатырдзинад, уӕлдайдӕр та, хо кӕнӕ ӕфсымӕрӕн цӕмӕйдӕр тӕссаг куы вӕййы ӕмӕ уый тыххӕй йемӕ аныхас кӕнын куы фӕхъӕуы, уӕд. Зӕгъӕм, хатт сӕ фӕхъӕуы «ноггуырд уӕрыччыты» кӕнӕ, чырыстон фӕндагыл рагӕй чи цӕуы, уыцы «фысты» дӕр бафӕдзӕхсын, цӕмӕй сӕхи Хӕйрӕджы дунейӕ ма счъизи кӕной. Чырыстон ӕй, чи зоны, ӕмбаргӕ дӕр ма кӕна, тӕссаг фӕндагыл кӕй лӕууы ӕмӕ йӕ ӕххуыс кӕй хъӕуы. Цымӕ хорз фыййау фӕрсырдыгӕй кӕсдзӕн, йӕ дзугӕй чидӕр йӕхи фыдбылызы куыд ӕппары, уымӕ? Ницы хуызы! Чырыстонӕн тӕссаг куы уа, уӕд хистӕр нӕлгоймаг хабармӕ уӕлӕнгай цӕстӕй нӕ кӕсдзӕн ӕмӕ йӕхи афтӕ нӕ дардзӕн, цыма алцыдӕр хорз у. Йӕ бон цыдӕриддӕр у, уый сараздзӕн, цӕмӕй уыцы адӕймаг йӕхи Йегъовӕйы хорзӕхӕй ӕнӕхай ма фӕкӕна (Йер. 8:11).

17. Фыстӕн ӕххуыс кӕнын уӕлдай тынгдӕр кӕд фӕхъӕуы ӕмӕ фыййӕуттӕн сӕ бон куыд у уыцы фыстӕн баххуыс кӕнын?

¹⁷ Фыс хизгӕ-хизын куы адзӕгъӕл вӕййы, уӕд ӕй къӕрцхъус фыййау уайтагъд фӕстӕмӕ дзугмӕ ӕрбаздахы. (Бакӕс Йеремийы 50:6, 7.) Раст афтӕ хистӕр нӕлгоймаджы дӕр хатт фӕхъӕуы, чырыстон фӕндагӕй чи адзӕгъӕл ӕмӕ йӕхи фыдбылызы чи ӕппары, уыцы адӕймагимӕ аныхас кӕнын. Кӕд ӕй ахӕм уавӕры фидарӕй фӕхъӕуы дзурын, уӕддӕр хъуамӕ бӕрӕг уа, уыцы адӕймаджы кӕй уарзы. Зӕгъӕм, хистӕр нӕлгоймаг бафиппайдта, сӕ цард баиу кӕнынмӕ чи хъавы ӕмӕ чи бафидыдта, уыцы ӕфсымӕр ӕмӕ хо арӕх дыууӕйӕ кӕй вӕййынц, адӕм кӕм нӕй, ахӕм рӕтты. Ӕмӕ ахӕм уавӕры та тӕссаг у, сӕ буары монцтӕ сыл куы фӕтых уой ӕмӕ исты рӕдыд куы саразой, уымӕй. Ӕмбаргӕ хистӕр нӕлгоймаг семӕ фӕлмӕнӕй аныхас кӕндзӕн. Уый сын уайдзӕфтӕ нӕ кӕндзӕн, фӕлӕ сын бамбарын кӕндзӕн, къӕрцхъус куы нӕ уой, уӕд тӕссаг кӕй у, Йегъовӕ йе сӕфт кӕмӕй уыны, ахӕм хъуыддаг саразынӕй. Иузӕрдион хистӕр нӕлгоймӕгтӕ дӕр Йеремийау нӕ быхсынц, Йегъовӕ кӕмӕн нӕ быхсы, ахӕм хъуыддӕгтӕн. Фӕлӕ Йегъовӕ тызмӕг Хуыцау нӕу. Уый йӕ адӕмӕн лӕгъстӕ кодта: «Курын уӕ, ме сӕфт кӕмӕй уынын, уыцы ӕлгъаг хъуыддӕгтӕ ма кӕнут» (Йер. 5:7; 25:4, 5; 35:15; 44:4). Ӕмбырды фыййӕуттӕ дӕр Йегъовӕйы кӕй фӕзмынц ӕмӕ йын йӕ дзугыл кӕй тыхсынц, уымӕн аргъ кӕныс?

18. Хистӕр нӕлгоймӕгты фыдӕбон цавӕр пайда ӕрхӕссы?

¹⁸ Кӕй зӕгъын ӕй хъӕуы, Йереми-иу уынаффӕ кӕмӕн радта, уыдонӕй-иу ӕм алчи нӕ байхъуыста. Фӕлӕ уыди ахӕмтӕ дӕр, ӕмӕ-иу йын йӕ ныхӕстӕ йӕ зӕрдӕмӕ чи айста. Ӕрхъуыды-ма кӕн Варухы, Йеремийӕн йе ’мбалы ӕмӕ йӕ писыры. Иуафон йӕхицӕн ӕгӕр бирӕ цыдӕртӕ домын куы райдыдта, уӕд ын Йереми комкоммӕ уынаффӕ радта (Йер. 45:5). Варух ӕм байхъуыста, ӕмӕ уый фӕрцы Хуыцауы хорзӕхӕй ӕнӕхай нӕ фӕци ӕмӕ, Иерусалим пырхгонд куы ’рцыд, уӕд удӕгасӕй баззад. Абон дӕр хотӕ ӕмӕ ӕфсымӕртӕ уынаффӕмӕ куы байхъусынц, уӕд сын уый ӕрхӕссы стыр пайда. Ӕмӕ уый уынгӕйӕ хистӕр нӕлгоймӕгтӕ ноджы зӕрдиагдӕрӕй фӕархайынц, цӕмӕй хоты ӕмӕ ӕфсымӕрты фӕдзӕхсой ӕмӕ сӕ ахуыр кӕной, уымӕн ӕмӕ уымӕй кӕнгӕ у сӕ цард (1 Тим. 4:13, 16).

ӔМБАРГӔ ТӔРХОНГӔНДЖЫТӔ

19, 20. Ӕмбырды исчи тӕригъӕд куы саразы, уӕд хистӕр нӕлгоймӕгты цы фӕхъӕуы бакӕнын?

¹⁹ Ӕмбырды цӕстдарджытӕ ма сты тӕрхонгӕнджытӕ дӕр. Хатт сӕ фӕхъӕуы, зонгӕ-зонын тӕригъӕд чи сарӕзта, ахӕм адӕймаджы хъуыддаг равзарын. Сӕ нысан у уыцы адӕймагӕн баххуыс кӕнын, цӕмӕй йӕ рӕдыдыл басӕтта ӕмӕ ӕрфӕсмон кӕна. Тӕригъӕд чи арӕзта, уыдонӕн Йегъовӕ фӕлмӕнӕй, фӕлӕ комкоммӕ дзырдта, цӕмӕй се ’взӕр хъуыддӕгтӕ ныууагътаиккой (Йер. 4:14). Фӕлӕ адӕймаг йӕ тӕригъӕдджын хъуыддӕгтӕ куы нӕ уадза, уӕд цӕстдарджытӕ хъуамӕ дзуг бахъахъхъӕной. Хъуамӕ уыцы адӕймаджы, Фыстад куыд зӕгъы, уымӕ гӕсгӕ ӕмбырдӕй ацух кӕной, цӕмӕй иннӕтӕ дӕр йӕ зондыл ма ацӕуой. Йегъовӕ ӕнхъӕлмӕ кӕсы, ахӕм уавӕрты хистӕр нӕлгоймӕгтӕ йӕ раст уагӕвӕрдтӕм гӕсгӕ кӕй архайдзысты, уымӕ. Уыцы хъуыддаджы паддзах Иоси у фӕзминаг. Уый рӕстдзинад уарзта, Хуыцау куыд уарзы рӕстдзинад, афтӕ. Иоси-иу «ӕфхӕрд ӕмӕ мӕгуыр адӕймаджы хъаст равзӕрста». Ӕмӕ дзы Йегъовӕ афтӕ дӕр уымӕн загъта: «Мӕн кӕй зыдта, уый тыххӕй нӕ кодта афтӕ?» Иоси рӕстӕй кӕй архайдта, «йӕ цард уый тыххӕй уыд фӕрнӕйдзаг». Хистӕр нӕлгоймӕгтӕ дӕр рӕстӕй куы фӕархайынц, уӕд ӕмбырды алкӕмӕн дӕр вӕййы ӕдас, ӕмӕ уый, ӕвӕццӕгӕн, дӕхӕдӕг дӕр бафиппайдтай (Йер. 22:11, 15, 16).

²⁰ Тӕригъд чи саразы, уыдонӕн Йегъовӕ зонд бацамоны, «куыд... ӕмбӕлы, уымӕ гӕсгӕ», ома сӕ, цас хъӕуы, уымӕй фылдӕр нӕ бафхӕры (Йер. 46:28). Ӕмӕ хистӕр нӕлгоймӕгтӕ дӕр фӕархайынц уавӕртӕм гӕсгӕ, стӕй адӕймаг цы зӕрдӕйы уаг равдисы, уымӕ гӕсгӕ дӕр. Ӕмӕ йын кӕнӕ уынаффӕ раттынц, кӕнӕ йӕ бафӕдзӕхсынц, кӕнӕ та йын уайдзӕф бакӕнынц. Хатт та адӕймаджы ӕмбырдӕй ацух кӕнын дӕр бахъӕуы. Хистӕр нӕлгоймӕгтӕ, йӕ тӕригъӕдыл чи нӕ фӕсмон кӕны, ахӕм адӕймаджы тыххӕй ӕмбырды нӕ кувдзысты, уымӕн ӕмӕ уый раст нӕуa (Йер. 7:9, 16). Фӕлӕ уӕддӕр уыдон Хуыцауы бафӕзмдзысты ӕмӕ, тӕригъӕд чи сарӕзта, уыцы адӕймагӕн ӕххуыс кӕндзысты, цӕмӕй та Хуыцауы хорзӕх ссара. (Бакӕс Йеремийы 33:6–8.) Адӕймаджы ӕмбырдӕй куы ацух кӕнынц, уӕд уый ӕнцон никӕмӕн вӕййы. Фӕлӕ дӕ рох ма уӕд, Хуыцауы уагӕвӕрдтӕ раст кӕй сты ӕмӕ алкӕмӕн дӕр пайда кӕй хӕссынц (Йер. хъ. 1:18).

21. Фыййӕуттӕ Хуыцауы дзуг куыд хъуамӕ хизой? Дӕ бон цы у аразын, цӕмӕй сын уыцы хъуыддаг хорз уайа?

²¹ Хуыцауы дзуг чи хизы, уыцы фыййӕуттӕ Библийы уагӕвӕрдтӕ хорз куы ’мбарой ӕмӕ уыдонмӕ гӕсгӕ куы архайой, уӕд фыстӕ алкӕддӕр уыдзысты ӕфсӕст ӕмӕ ӕнӕниз, ома сӕ уырнындзинад уыдзӕн фидар, ӕмӕ сын тӕссаг ницӕмӕй уыдзӕн (Пс. 23:1–6). Куыд базыдтам, афтӕмӕй Йереми дзырдта, йӕ хӕстӕм раст цӕстӕй чи каст ӕмӕ, йӕ куыст зӕрдӕйӕ чи кодта, ахӕм цӕстдарджыты тыххӕй дӕр ӕмӕ, уыцы хъуыддагмӕ куыдфӕндыйы цӕстӕй чи каст, ахӕм цӕстдарджыты тыххӕй дӕр. Ӕмӕ Йереми цӕстдарджыты тыххӕй цы загъта, уый стыр ӕххуыс у, абон Хуыцауы дзуг чи хизы, уыдонӕн. Йегъовӕ йӕ адӕмы хистӕр нӕлгоймӕгты уылты ахуыр кӕны, разамынд сын дӕтты ӕмӕ сӕ хъахъхъӕны. Уӕдӕ хорз уаид, алчидӕр нӕ куы ахъуыды кӕнид: «Хуыцауы дзуг чи хизы ӕмӕ фысты зонындзинӕдтӕй ӕмӕ ӕмбаргӕдзинадӕй чи ӕфсады, уыдонмӕ дарддӕр дӕр хъусдзынӕн ӕмӕ афтӕмӕй ӕвдисдзынӕн, Йегъовӕйӕ уыцы фыййӕутты тыххӕй бузныг кӕй дӕн?» (Йер. 3:15; 23:4).