Архайдта ӕмбаргӕйӕ

1–3. а) Авигейӕйы хӕдзаронтӕм цавӕр фыдбылыз ӕнхъӕлмӕ каст? ӕ) Уыцы диссаджы сылгоймаджы тыххӕй цы базондзыстӕм?

АВИГЕЙӔЙЫ раз лӕууы ӕрыгон лӕппу, лӕггадгӕнджытӕй сӕ иу. Бӕрӕг у, цӕмӕйдӕр тынг кӕй фӕтарст. Фыдбылыз ис къӕсӕрыл. Ӕрбалӕбуры сӕм 400 хӕстоны бӕрц. Хъуамӕ ныццӕгъдой, Навалы хӕдзары цыдӕриддӕр нӕлгоймӕгтӕ ис, уыдоны. Цымӕ цӕмӕн?

² Уыцы хабар ӕрцыд Навалы аххосӕй. Навал у дурзӕрдӕ адӕймаг, никӕй ницӕмӕ дары, ӕмӕ та ныр дӕр йӕхи ахӕмӕй равдыста. Фӕлӕ ацы хатт бафхӕрдта ӕнаххос адӕймаджы – хӕстонты хистӕры. Уыцы адӕймаджы, йемӕ цы фӕлтӕрд хӕстонтӕ ис, уыдон бирӕ уарзынц ӕмӕ йыл иузӕрдион сты. Гъемӕ Навалы лӕггадгӕнджытӕй сӕ иу, ӕвӕццӕгӕн, фыййау, Авигейӕмӕ ӕрбалыгъд ӕмӕ йын хабар радзырдта. Ныфс ӕй ис, уый исты кӕй ӕрхъуыды кӕндзӕн ӕмӕ сӕ фыдбылызӕй кӕй бахиздзӕн. Фӕлӕ иу сылгоймаг ӕнӕхъӕн ӕфсадӕн цы хъуамӕ бакӕна?

³ Фыццаг уал фылдӕр базонӕм ацы диссаджы сылгоймаджы тыххӕй. Чи уыди Авигейӕ? Йӕ хӕдзаронтӕ ахӕм тӕссаг уавӕры куыд бахаудысты? Ӕмӕ нын Авигейӕ йӕ уырнындзинадӕй фӕзминаг куыд у?

«Тынг ӕмбаргӕ ӕмӕ рӕсугъд сылгоймаг»

4. Навал цавӕр адӕймаг уыди?

⁴ Авигейӕ ӕмӕ Навалы тыххӕй уый зӕгъӕн нӕй, ӕмӕ кӕрӕдзийы аккаг уыдысты. Навал уымӕй хуыздӕр бинойнаг не ссардтаид. Фӕлӕ Авигейӕ та чындзыцыд уыд, йӕхицӕй ӕвзӕрдӕр скӕнӕн кӕмӕн нӕ уыд, ахӕм адӕймагмӕ. Ӕхца йӕм бирӕ уыди, ӕмӕ уымӕ гӕсгӕ йӕхицӕй цыдӕр ӕнхъӕл уыд. Фӕлӕ йӕм иннӕтӕ та цы цӕстӕй кастысты? Адӕймаг Библийы Навалы тыххӕй куы кӕса, уӕд ӕцӕгдӕр зӕгъдзӕн, ӕмӕ уымӕй ницӕйагдӕр нӕ уыд. Йӕ ном дӕр нысан кӕны «ӕнӕзонд» кӕнӕ «ӕдылы». Бӕрӕг нӕу, уыцы ном ын йӕ ныййарджытӕ, куы райгуырд, уӕд радтой ӕви йыл ахӕм ном фӕстӕдӕр сбадт. Куыдфӕнды ма уыдаид,– йӕ номы аккаг уыди. Навал уыд «тызмӕг адӕймаг, фыдлӕг». Уыди хылгӕнаг ӕмӕ расыггӕнаг, ӕмӕ дзы се ’ппӕт дӕр тарстысты, ничи йӕ уарзта (1 Сам. 25:2, 3, 17, 21, 25).

5, 6. а) Дӕумӕ гӕсгӕ, Авигейӕйы рӕсугъддӕр миниуджытӕ цавӕртӕ уыдысты? ӕ) Авигейӕ ахӕм ницӕйаг адӕймагмӕ цӕмӕн смой кодтаид?

⁵ Авигейӕ та бынтон ӕндӕрхуызон адӕймаг уыд. Йӕ ном нысан кӕны «мӕ фыды цинӕн кӕрон нал уыд». Фыдӕн рӕсугъд чызг куы вӕййы, уӕд дзы, кӕй зӕгъын ӕй хъӕуы, сӕрыстыр вӕййы. Фӕлӕ зондджын фыд та тынгдӕр фӕцин кӕны, йӕ хъӕбул зӕрдӕйӕ рӕсугъд куы вӕййы, ууыл. Бакастӕй рӕсугъд чи вӕййы, уыдон арӕх нӕ фембарынц, кӕй сӕ хъӕуы, зӕгъӕм, ӕмбаргӕдзинад, зонд, хъӕбатырдзинад ӕмӕ уырнындзинад сӕ удыхъӕды фидар кӕнын. Фӕлӕ Авигейӕйӕ уый зӕгъӕн нӕ уыд. Библи нын ӕрмӕст йӕ рӕсугъддзинады кой нӕ кӕны, фӕлӕ йе ’мбаргӕдзинады кой дӕр. (Бакӕс 1 Самуилы 25:3.)

⁶ Бирӕтӕм диссаг фӕкӕсы, ахӕм зондджын сылгоймаг ахӕм ницӕйаг лӕгмӕ куыд смой кодта. Зӕгъын хъӕуы уый, ӕмӕ-иу раджы заманты арӕх ныййарджытӕ ссардтой сӕ цотӕн цардӕмбал. Лӕппу кӕнӕ-иу чызг цардӕмбал йӕхӕдӕг куы равзӕрста, уӕддӕр, ныййарджытӕ разы куы нӕ уыдаиккой, уӕд сӕ ныхасы сӕрты ахизын сӕ бон нӕ уыд. Чи зоны, Авигейӕйӕн дӕр йӕ ныййарджыты фӕндыди, цӕмӕй Навалмӕ смой кодтаид, йе та йын ӕй, чи зоны, сӕхӕдӕг равзӕрстой, уымӕн ӕмӕ хъӕздыг ӕмӕ кадджын лӕг уыди. Кӕнӕ та, чи зоны, мӕгуыр уыдысты, ӕмӕ афтӕ уый тыххӕй бакодтой. Уыцы хабӕрттӕ мах бӕлвырд нӕ зонӕм, фӕлӕ бӕрӕг у, Навалӕй йе ’хцатӕ хорз сӕрыхицау кӕй нӕ сарӕзтой.

7. а) Кӕд ныййарджыты фӕнды, цӕмӕй сӕ сывӕллӕттӕ бинонты цардмӕ раст цӕстӕй кӕсой, уӕд сӕхи цӕмӕй хъуамӕ хизой? ӕ) Авигейӕ уыцы зын уавӕры цы арӕзта?

⁷ Ӕмбаргӕ ныййарджытӕ архайынц, цӕмӕй сӕ сывӕллӕттӕн баххуыс кӕной бинонты цардмӕ раст цӕстӕй кӕсынӕн. Ахӕм зондыл сӕ нӕ аразынц, цӕмӕй бинонтӕ скӕной ӕхцайы тыххӕй. Стӕй цалынмӕ ӕгӕр ӕрыгон сты ӕмӕ, бинонты цард алкӕуыл дӕр цы хӕстӕ ӕвӕры, уыдон ӕххӕст кӕнынмӕ цӕттӕ не сты, уӕдмӕ сын афтӕ дӕр нӕ фӕдзурынц, дӕхицӕн уарзон ссар, зӕгъгӕ (1 Кор. 7:36). Фӕлӕ ма Авигейӕйӕн уыдӕттыл хъуыды кӕнын цы пайда уыд? Ныр уыди моймӕдзыд, ӕмӕ уыцы зын уавӕры, йӕ бон цы уыд, уый арӕзта, цӕмӕй хорз бинойнаг уыдаид.

Навал сын «алывыдтӕ фӕкалдта»

8. Навал кӕй бафхӕрдта? Цӕмӕн ис зӕгъӕн, ӕмӕ уый тынг ӕнӕзонд ми уыди?

⁸ Ӕмӕ ныр Навал Авигейӕйы уавӕр ноджы фӕфыддӕр кодта. Кӕй бафхӕрдта, уый уыди Давид, Йегъовӕйы иузӕрдион лӕггадгӕнӕг. Пехуымпар Самуил ӕй сойӕ байсӕрста ӕмӕ афтӕмӕй равдыста, Давиды Хуыцау Саулы бӕсты паддзахӕй кӕй равзӕрста (1 Сам. 16:1, 2, 11–13). Фӕлӕ йӕм паддзах Саул хӕлӕг кодта ӕмӕ йӕ марынмӕ дӕр хъавыд. Гъемӕ Давид йе ’нувыд хӕстонтимӕ, 600 лӕгимӕ, ӕдзӕрӕг быдырмӕ алыгъд.

9, 10. а) Давид ӕмӕ йӕ адӕм фыдбонтӕ цавӕр уавӕрты ӕрвыстой? ӕ) Навал Давидӕй ӕмӕ йӕ адӕмӕй бузныг цӕй тыххӕй хъуамӕ уыдаид? (Кӕс ма 10 абзацмӕ фиппаинаг дӕр.)

⁹ Навал цард Маоны, кусгӕ та кодта уырдӕм хӕстӕг Кармилы, ӕмӕ йын уым, ӕвӕццӕгӕн, зӕххытӕ дӕр уыдиa. Уыцы горӕтты алыварс уыди хӕххон кӕрдӕгджын хизӕнтӕ ӕмӕ фыстӕ дарынӕн хорз бынат уыд. Навалмӕ уыд 3 000 фысы. Фӕлӕ уыцы зӕххыты алыварс уыди ӕнӕзылд зӕххытӕ. Хуссары ’рдӕм куы акастаис, уӕд Фараны ӕдзӕрӕг быдырыл цӕст не ’ххӕссыд. Скӕсӕны ’рдыгӕй та фӕндаг цыди Цӕхджын денджызмӕ (абон ӕй хонынц Мард денджыз). Уым уыд бирӕ кӕмттӕ ӕмӕ лӕгӕттӕ. Ӕмӕ Давид йӕ адӕмимӕ уыцы рӕтты фыдбонтӕ ӕрвыста. Хӕринаг амал кӕнын сын ӕнцон кӕм уыдаид. Стӕй ӕвзӕрстой бирӕ ӕндӕр зындзинӕдтӕ дӕр. Ӕмӕ-иу уым арӕх сӕмбӕлдысты хъӕздыг Навалы фыййӕуттыл.

¹⁰ Цымӕ Давиды хӕстонтӕ уыцы фыййӕуттӕн куыд уыдысты? Исты сӕ бон нӕ уыди, цӕмӕй сын сӕ фыстӕй адавтаиккой ӕмӕ дзы сӕхи дзӕбӕх федтаиккой? Куыннӕ уыди. Фӕлӕ уыдон афтӕ никуы бакодтой. Уый бӕсты Навалӕн йӕ дзугтӕ дӕр ӕмӕ йӕ лӕггадгӕнджыты дӕр хъахъхъӕдтой. (Бакӕс 1 Самуилы 25:15, 16.) Фыстӕн дӕр ӕмӕ фыййӕуттӕн дӕр ӕдзух цӕмӕйдӕр уыди тӕссаг. Хъӕддаг сырдтӕ дзы бирӕ уыд. Стӕй Израилы хуссар арӕн уырдӕм хӕстӕг уыди, ӕмӕ-иу ӕндӕрбӕстаг абырджытӕ арӕх ӕрбабырстойb.

11, 12. а) Давид Навалӕн кӕй кад кодта, уый куыд равдыста? ӕ) Давиды ныхӕстӕн Навал цавӕр дзуапп радта, уый раст цӕуылнӕ уыди?

¹¹ Утӕппӕт адӕмӕн ӕдзӕрӕг быдыры къӕбӕр амал кӕнын ӕнцон кӕцӕй уыдаид. Гъемӕ иу бон Давид дӕс адӕймаджы Навалмӕ арвыста, дӕ къух цы амоны, уымӕй-ма нӕм фӕкӕс, зӕгъгӕ. Давид ӕппӕты хуыздӕр рӕстӕг равзӕрста, уымӕн ӕмӕ уӕд Навал йӕ фыстӕ ӕлвыдта. Ӕмӕ-иу уыцы рӕстӕг та адӕм скодтой бӕрӕгбон, фынгтӕ-иу ӕрӕвӕрдтой ӕмӕ-иу тынг рӕдау уыдысты. Стӕй ма Давид лӕмбынӕг ахъуыды кодта, Навалӕн цы хъуамӕ загътаиккой, ууыл дӕр. Йӕ ныхас уыди уӕздан. Йӕхицӕй ма афтӕ дӕр загъта, «дӕ фырт Давид», зӕгъгӕ. Ӕвӕццӕгӕн, уымӕй равдыста, Навал дзы хистӕр кӕй у ӕмӕ йын кӕй кад кӕны, уый. Цымӕ йын Навал цавӕр дзуапп радта? (1 Сам. 25:5–8).

¹² Мӕстӕй рафыхт ӕмӕ, Авигейӕйӕн ӕрыгон лӕггадгӕнӕг хабар куыд бамбарын кодта, афтӕмӕй Давиды ӕрвыст адӕмӕн «алывыдтӕ фӕкалдта»! Навалӕн йӕ фырчъындыйӕ йӕ цӕст нӕ бауарзта, цӕмӕй сын йӕ дзулӕй, йӕ донӕй ӕмӕ фысты дзидзайӕ фӕхай кодтаид, ӕмӕ сӕ йӕ хъӕлӕсы ахаста. Давиды та ницӕйаджы бынаты сӕвӕрдта ӕмӕ йӕ абарста, йӕ хицауӕй чи алыгъд, ахӕм цагъаримӕ. Навал дӕр ӕм каст Саулы цӕстӕй, уый дӕр дзы йе сӕфт уыдта. Сӕ иу дӕр Давидмӕ Йегъовӕйы цӕстӕй нӕ касти. Йегъовӕ уарзта Давиды, ӕмӕ йӕ ӕгоммӕгӕс цагъарыл нӕ нымадта, фӕлӕ Израилы фидӕны паддзахыл (1 Сам. 25:10, 11, 14).

13. а) Давидӕн Навалы ӕфхӕрӕн ныхӕстӕ куы ракодтой, уӕд куыд бакодта? ӕ) Давид куыд бакӕнынмӕ хъавыд, уый Иаковы 1:20 фыст ныхӕстӕм гӕсгӕ раст цӕуылнӕ уыд?

¹³ Давидмӕ йӕ адӕм фӕстӕмӕ куы ’рбаздӕхтысты ӕмӕ йын хабар куы радзырдтой, уӕд афтӕ рамӕсты, ӕмӕ бардзырд радта: «Уӕ хъаматӕ уӕ астӕутыл ӕрбабӕттут!» Стӕй йӕхӕдӕг дӕр йӕ хъама йӕ астӕуыл ӕрбабаста ӕмӕ 400 хӕстонимӕ араст. Давид расомы кодта, Навалы хӕдзары нӕлгоймаджы мыггагӕй иуы дӕр кӕй нал ныууадздзӕн (1 Сам. 25:12, 13, 21, 22). Афтӕ тынг кӕй смӕсты, уый диссаг дӕр нӕу. Фӕлӕ йӕ масты фӕдыл кӕй ацыд, уымӕй раст нӕ бакодта. Библийы афтӕ фыст ис: «Адӕймагӕн мӕстыйӕ йӕ бон нӕу, Хуыцауы цӕсты раст цы у, уый аразын» (Иак. 1:20). Фӕлӕ Авигейӕ йӕ хӕдзаронты куыд хъуамӕ фервӕзын кодтаид?

«Де ’рхъуыдыдзинад домбай уӕд»

14. а) Цӕмӕн ис зӕгъӕн, ӕмӕ Авигейӕ уӕдмӕ дӕр цыдӕр сарӕзта Навалы рӕдыд сраст кӕнынӕн? ӕ) Навал ӕмӕ Авигейӕ кӕрӕдзийӕ куыд хицӕн кодтой, уымӕй цы ис зондӕн райсӕн? (Кӕс ма фиппаинаг дӕр.)

¹⁴ Зӕгъӕн ис, ӕмӕ Авигейӕ уӕдмӕ дӕр цыдӕр сарӕзта, Навал цы стыр рӕдыд ӕруагъта, уый сраст кӕнынӕн. Йӕ лӕгӕй уӕлдай Авигейӕ цӕттӕ уыд байхъусынмӕ. Лӕггадгӕнӕг хабар Навалӕн цӕуылнӕ радзырдта, уый афтӕ бамбарын кодта, «уыцы ницӕйаг адӕймагӕн та фӕнды дзур, фӕнды ма дзур», зӕгъгӕc (1 Сам. 25:17). Хъыгагӕн, Навал йӕхицӕй цыдӕр ӕнхъӕл уыди, ӕмӕ уымӕ гӕсгӕ хъусгӕ дӕр никӕмӕ кодта. Абон дӕр ахӕм адӕм бирӕ ис. Фӕлӕ лӕггадгӕнӕг зыдта, Авигейӕ ахӕм кӕй нӕу, ӕндӕр хабар уымӕн нӕ радзырдтаид.

15, 16. а) Авигейӕ, Ӕмбисӕндты чиныджы цы сӕрӕн усы кой цӕуы, уый хуызӕн цӕмӕй уыди? ӕ) Авигейӕ цы сарӕзта, уый ууыл дзурӕг цӕуылнӕ у, ӕмӕ йӕ сӕрыхицауы ницӕмӕ дардта?

¹⁵ Авигейӕ уайтагъд ахъуыды кодта, цы бакӕнын хъӕуы, ууыл ӕмӕ фӕстиат нал кодта. Библийы ацы сӕры цалдӕр хатты дзырд цӕуы, Авигейӕ ӕвӕстиатӕй кӕй архайдта. Давидӕн ӕмӕ йӕ адӕмӕн рӕдау лӕвӕрттӕ ацӕттӕ кодта: дзул, сӕн, фысы дзидза, цӕкуытӕ, тъӕпӕн гуылтӕ чисмисӕй ӕмӕ легъуитӕй. Бӕрӕг у, Авигейӕ хорз кӕй зыдта, хӕдзары сӕм цы уыд, уый ӕмӕ, йӕ хӕдзаронтӕй кӕуыл цы хӕс уыди, уыдӕттӕ йӕ бар кӕй уыдысты. Авигейӕ уыди, фӕстӕдӕр Ӕмбисӕндты чиныджы цы сӕрӕн усы кой цӕуы, уый хуызӕн (Ӕмб. 31:10–31). Лӕвӕрттӕ йӕ разӕй лӕггадгӕнджытӕн арвыста, стӕй йӕхӕдӕг дӕр сӕ фӕдыл араст. «Йӕ лӕгӕн та,– кӕсӕм Библийы,– ницы загъта» (1 Сам. 25:18, 19).

¹⁶ Цымӕ Авигейӕ афтӕ кӕй бакодта, уый ууыл дзурӕг у, ӕмӕ йӕ сӕрыхицауы ницӕмӕ дардта? Уый афтӕ нӕу. Хъуыддаг уый мидӕг ис, ӕмӕ Навал бафхӕрдта Йегъовӕйы сӕрст лӕггадгӕнӕджы ӕмӕ афтӕмӕй йӕ хӕдзаронты, бирӕ ӕнаххос адӕмы, стыр фыдбылызы баппӕрста. Ӕмӕ Авигейӕ йӕхицӕн ӕнцад куы бадтаид, уӕд Навалы тӕригъӕд ууыл дӕр нӕ уыдаид? Уӕдӕ йӕ ацы уавӕры хъуыди Хуыцауы коммӕ бакӕсын, йӕ лӕджы коммӕ нӕ, фӕлӕ.

17, 18. а) Авигейӕ Давиды куы ауыдта, уӕд куыд бакодта ӕмӕ йын цы загъта? ӕ) Авигейӕйы ныхӕстӕн стыр тых цӕй фӕрцы уыди?

¹⁷ Авигейӕ иуцасдӕр куы ауад, уӕд Давид ӕмӕ йӕ адӕм йӕ размӕ фесты. Ӕмӕ та ацы хатт дӕр Авигейӕ архайдта ӕвӕстиатӕй. Куыддӕр Давиды ауыдта, афтӕ хӕрӕгӕй ӕрхызт, Давиды раз йӕ зонгуытыл ӕрхауд ӕмӕ йын йӕ сӕрӕй зӕххы онг ныллӕг акуывта (1 Сам. 25:20, 23). Стӕй йын радзырдта, цы зӕрдӕ йӕм дардта, уый тыххӕй ӕмӕ йын ныллӕгъстӕ кодта, цӕмӕй йын йӕ сӕрыхицауӕн ӕмӕ йӕ хӕдзаронтӕн фӕтӕригъӕд кодтаид. Йӕ ныхӕстӕн стыр тых цӕй фӕрцы уыд?

¹⁸ Авигейӕ аххос йӕхимӕ райста ӕмӕ Давидӕй куырдта, цӕмӕй йын ныххатыр кодтаид. Стӕй йӕ лӕгӕй ӕргом загъта, зӕгъгӕ, йӕ ном йӕ уӕлӕ ис, ома ӕнӕзонд у. Уымӕй йӕ, ӕвӕццӕгӕн, зӕгъын фӕндыд, ӕмӕ Давид ахӕм адӕймагмӕ йӕ къух сисын хъуамӕ йӕ сӕрмӕ дӕр ма ӕрхӕсса. Авигейӕ ма загъта, Давид «Йегъовӕйы хӕстыты» кӕй хӕцыд, ӕмӕ уымӕй равдыста, Давид Йегъовӕйы номӕй кӕй архайы, уый йӕ фидарӕй кӕй уырныдта. Стӕй бамбарын кодта, Йегъовӕ Давиды тыххӕй ӕмӕ паддзахы барты тыххӕй цы загъта, уый дӕр кӕй зоны. Давидӕн загъта: «Йегъовӕ... дӕ Израилӕн разамонӕгӕй сӕвӕрдзӕн». Ӕмӕ йын уый фӕстӕ ныллӕгъстӕ кодта, зӕгъгӕ, туг ма ныккал, «цӕмӕй стӕй дӕхи фӕсмонӕй ма хӕрай». (Бакӕс 1 Самуилы 25:24–31.) Диссаджы фӕлмӕн ӕмӕ зӕрдӕмӕхъаргӕ ныхӕстӕ!

19. Авигейӕйы ныхӕсты фӕстӕ Давид куыд бакодта ӕмӕ дзы цӕй тыххӕй раппӕлыд?

¹⁹ Уыцы ныхӕсты фӕстӕ Давид куыд бакодта? Авигейӕйы лӕвӕрттӕ райста ӕмӕ загъта: «Табу Израилы Хуыцау Йегъовӕйӕн, абон дӕу мӕ размӕ чи рарвыста! Де ’рхъуыдыдзинад домбай уӕд. Арфӕгонд у, абон мӕ туг ныккалын... кӕй нӕ бауагътай, уый тыххӕй». Давид Авигейӕйӕ раппӕлыд, хъӕбатырдзинад кӕй равдыста ӕмӕ йӕ размӕ кӕй ратагъд кодта, уый тыххӕй. Ӕмӕ йын ӕргом загъта, куы нӕ йӕ баурӕдтаид, уӕд ӕнаххос адӕмы туг кӕй ныккалдтаид. Фӕстагмӕ йын загъта: «Фарнимӕ цу дӕ хӕдзармӕ». Ӕмӕ ма йӕ ныхӕстӕм сӕрныллӕгӕй бафтыдта: «Дӕ ныхасмӕ дын байхъуыстон» (1 Сам. 25:32–35).

«Дӕ цагъар дын ӕнӕзивӕгӕй лӕггад кӕндзӕн»

20, 21. а) Авигейӕ йӕ лӕгмӕ кӕй ӕрбаздӕхт, уымӕй нын фӕзминаг куыд у? ӕ) Авигейӕ Навалимӕ йӕ ныхас райсоммӕ кӕй аргъӕвта, уымӕй хъӕбатырдзинад ӕмӕ ӕмбаргӕдзинад куыд равдыста?

²⁰ Авигейӕ куы ацыд, уый фӕстӕ дӕр, ӕвӕццӕгӕн, хъуыды кодта уыцы фембӕлдыл. Цы бафиппайын ӕй хъуыди, уыцы иузӕрдион ӕмӕ хӕларзӕрдӕ адӕймаг йӕ ӕгъатыр лӕджы хуызӕн кӕй нӕ уыд. Фӕлӕ Авигейӕ уыцы хъуыдытӕн йӕ зӕрдӕйы бынат не скодта. Библийы кӕсӕм: «Авигейӕ Навалмӕ... ’рбаздӕхт». Уый ӕрбаздӕхт йӕ сӕрыхицаумӕ ӕмӕ дарддӕр дӕр архайдта, цӕмӕй хорз бинойнаг уыдаид. Йӕ лӕгӕн ӕнӕмӕнгӕй хъуамӕ радзырдтаид, Давидӕн ӕмӕ йӕ адӕмӕн цы лӕвӕрттӕ скодта, уый тыххӕй. Навал хӕдзары хицау уыди, ӕмӕ йӕ хъуамӕ зыдтаид. Стӕй се ’ппӕты дӕр цы бӕллӕхӕй бахызта, уый тыххӕй дӕр ын хъуамӕ радзырдтаид, цалынмӕ йӕ ӕндӕр искӕмӕй нӕ фехъуыста ӕмӕ ноджы тынгдӕр нӕ фӕхудинаг, уӕдмӕ. Фӕлӕ ныртӕккӕ йӕ бон йемӕ аныхас кӕнын нӕ уыди, уымӕн ӕмӕ минас кодта ӕмӕ фыррасыгӕй йӕхи дӕр нал ӕмбӕрста (1 Сам. 25:36).

²¹ Авигейӕ та ацы уавӕры дӕр равдыста хъӕбатырдзинад ӕмӕ ӕмбаргӕдзинад. Райсоммӕ йӕм банхъӕлмӕ каст, йӕхимӕ уал ӕрцӕуа, зӕгъгӕ. Ӕрвонгӕй хуыздӕр бамбӕрстаид, цы зӕгъинаг ын уыд, уый. Фӕлӕ фыдзонд кӕй уыд, уымӕ гӕсгӕ йын ӕрвонгӕй тӕссагдӕр уыди уыцы хабӕрттӕ дзурын. Фӕлӕ йӕм Авигейӕ уӕддӕр бацыд ӕмӕ йын алцыдӕр радзырдта. Хӕрзаг та хъуыды кодта, ныртӕккӕ та мыл йӕ пырх акалдзӕн ӕмӕ ма мӕ цӕвгӕ дӕр ныккӕндзӕн, зӕгъгӕ. Фӕлӕ Навалӕн йӕ дзыхӕй иу ныхас дӕр не схауд, змӕлгӕ дӕр нал кодта (1 Сам. 25:37).

22. Навалыл цы ’рцыд? Йӕ бинонты фыдудӕй чи мары ӕмӕ сӕ ӕгъатырӕй чи ӕфхӕры, уыдоны тыххӕй цы ис зӕгъӕн?

²² Цымӕ Навалыл цы ’рцыд? «Йӕ зӕрдӕ ныллӕууыд ӕмӕ цавддурау аззад». Ӕвӕццӕгӕн ӕй паралич ныццавта. Иу-дӕс боны фӕстӕ та мӕлгӕ акодта. Ӕцӕг, йӕ мӕлӕты аххосаг ӕрмӕст низ нӕ уыди. Библийы куыд кӕсӕм, афтӕмӕй йӕ «Йегъовӕ ӕрцавта, ӕмӕ Навал амард» (1 Сам. 25:38). Навалы баййӕфта Хуыцауы раст тӕрхон, ӕмӕ Авигейӕ йӕ фыдцардӕй сулӕфыд, адӕймаг фыдфынтӕ уынгӕйӕ куыд фехъал вӕййы ӕмӕ куыд сулӕфы, афтӕ. Кӕд Йегъовӕ абон никӕй ӕрцӕвы, уӕддӕр Навалы хабар хорз ӕвдисы, йӕ бинонты фыдудӕй чи мары ӕмӕ сӕ ӕгъатырӕй чи ӕфхӕры, уыдоны кӕй уыны. Ӕмӕ йӕ рӕстӕджы алы хъуыддаг дӕр рӕстӕй равзардзӕн. (Бакӕс Лукайы 8:17.)

23. Авигейӕ ма ноджыдӕр цавӕр арфӕдзинадӕй схайджын? Цӕмӕй бӕрӕг у, йӕхиуыл кӕй нӕ фервӕссыд?

²³ Авигейӕ ӕрмӕст йӕ ӕгъатыр ӕмӕ фыдзонд лӕгӕй нӕ фервӕзт. Ӕндӕр арфӕдзинад дӕр ма йӕм ӕнхъӕлмӕ каст. Давид Навалы мӕлӕты тыххӕй куы фехъуыста, уӕд Авигейӕмӕ минӕвӕрттӕ арвыста. Сылгоймаг ын дзуапп радта: «Дӕ цагъар дын ӕнӕзивӕгӕй лӕггад кӕндзӕн ӕмӕ мӕ буц хицауы лӕггадгӕнджытӕн сӕ къӕхтӕ ӕхсдзӕн». Авигейӕ, ахӕм адӕймаг ӕй йӕхицӕн кӕй саккаг кодта, уый тыххӕй йӕхиуыл нӕ фервӕссыд. Суанг ма афтӕ дӕр загъта, йӕ лӕггадгӕнджытӕн ын цагъары лӕггад кӕй кӕндзӕн! Ӕмӕ та ам ногӕй кӕсӕм, Авигейӕ ӕвӕстиатӕй кӕй архайдта – йӕхи уайтагъд арӕвдз кодта ӕмӕ Давиды минӕвӕрттимӕ араст (1 Сам. 25:39–42).

24. Авигейӕ йӕ ног уавӕрты цавӕр зындзинӕдтыл сӕмбӕлд, фӕлӕ йӕм йӕ лӕг ӕмӕ йӕ Хуыцау цы цӕстӕй кастысты?

²⁴ Уый зӕгъӕн нӕй, ӕмӕ ныр Авигейӕйӕн йӕ цард, аргъӕутты куыд вӕййы, афтӕ ӕнӕмаст уыди. Давидимӕ цӕргӕйӕ дӕр ын алкӕд ӕнцон нӕ уыд. Авигейӕ Давидӕн уыди йӕ дыккаг ус, уӕдмӕ ма ракуырдта Ахиноамӕйы. Ӕмӕ кӕд уӕды заманты Хуыцау бар лӕвӕрдта, цӕмӕй лӕгӕн иу усӕй фылдӕр уыдаид, уӕддӕр Хуыцауыл иузӕрдион сылгоймӕгтӕ ахӕм бинонты ’хсӕн бирӕ мӕстытӕ ӕвзӕрстой. Стӕй Давид паддзах нӕма уыди, ӕмӕ цалынмӕ Йегъовӕйӕн ахӕм хуызы нӕ райдыдта лӕггад кӕнын, уӕдмӕ сӕ бирӕ зындзинӕдты сӕрты хъуыд ахизын. Фӕлӕ Авигейӕ Давидӕн цӕрӕнбонты уыд ӕцӕг ӕмбал, ӕцӕг ӕххуысгӕнӕг. Фӕстӕдӕр ын фырт дӕр ныййардта. Ӕмӕ Авигейӕ йӕхиуыл бавзӕрста, чи дын аргъ кӕны ӕмӕ дӕ чи хъахъхъӕны, ахӕм цардӕмбал дын куы уа, уӕд уый цӕй стыр арфӕдзинад у. Иухатт ӕй абырджыты къухӕй дӕр байста! (1 Сам. 30:1–19). Давид фӕзмыдта Йегъовӕйы, уымӕн ӕмӕ Йегъовӕ дӕр уарзы ахӕм ӕмбаргӕ, хъӕбатыр ӕмӕ иузӕрдион сылгоймӕгты ӕмӕ сын тынг аргъ кӕны.