12 РАДЗЫРД
Хъӕбатыр лӕппу
Йӕ мады ӕфсымӕры чи фервӕзын кодта, уыцы лӕппуйы тыххӕй-ма фылдӕр базонӕм. Уыцы лӕппуйы мады ӕфсымӕр уыд апостол Павел. Йӕ ном куыд хуынди, уый нӕ зонӕм, фӕлӕ зонӕм, тынг хъӕбатыр кӕй уыд. Цы сарӕзта, уый базонын дӕ фӕнды? ~
Павел уыд Иерусалимы ахӕстоны. Ахӕстоны йӕ уымӕн сбадын кодтой, ӕмӕ иннӕтӕн Йесойы тыххӕй дзырдта. Ӕвзӕр адӕм Павелы нӕ уарзтой, ӕмӕ баныхас кодтой: «Ӕфсады хистӕрӕн зӕгъӕм, цӕмӕй ӕфсӕддонтӕ Павелы тӕрхондонмӕ ӕрбакӕной. Мах та фӕндаджы был бамбӕхсдзыстӕм, ӕмӕ Павел нӕ рӕзты куы фӕцӕйцӕуа, уӕд ӕй амардзыстӕм».
Павелы марынмӕ кӕй хъавыдысты, уый Павелӕн йӕ хойы лӕппу радзырдта йӕхицӕн дӕр ӕмӕ ӕфсӕддонты хистӕрӕн дӕр
Павелӕн йӕ хойы лӕппу фехъуыста, Павелы марынмӕ кӕй хъавынц. Цымӕ куыд бакодта? Павелмӕ ахӕстонмӕ бацыд, ӕмӕ йын хабар радзырдта. Павел ын загъта, цӕмӕй ӕфсӕддонты хистӕрӕн алцыдӕр радзырдтаид. Куыд хъуыды кӕныс, уыцы лӕппу ӕфсӕддонты хистӕримӕ ныхас кӕнын нӕ тарст? ~ Ӕвӕццӕгӕн, тарст, уымӕн ӕмӕ уыцы лӕг стыр бынат ахста. Фӕлӕ Павелы хойы лӕппу уыд хъӕбатыр ӕмӕ йӕм бацыд.
Уыцы лӕг зыдта, куыд бакӕнын хъуыд, уый. Павелимӕ арвыста 500 ӕфсӕддоны бӕрц, цӕмӕй йӕ хъахъхъӕдтаиккой! Загъта сын, цӕмӕй уыцы ӕхсӕв Павелы Кесаримӕ акодтаиккой. Цымӕ Павелы амардтой? ~ Нӕ. Уыцы ӕвзӕр адӕмӕн сӕ фӕндӕй ницы рауад.
Ацы хабарӕй цӕуыл ахуыр кӕныс? ~ Дӕуӕн дӕр дӕ бон у, цӕмӕй Павелы хойы лӕппуйы хуызӕн хъӕбатыр уай. Иннӕтӕн Йегъовӕйы тыххӕй куы фӕдзурӕм, уӕд мах дӕр фӕхъӕуы хъӕбатырдзинад. Йегъовӕйы тыххӕй иннӕтӕн хъӕбатырӕй дзурдзынӕ? ~ Афтӕ куы кӕнай, уӕд, чи зоны, искӕй мӕлӕтӕй фервӕзын кӕнай.