Уе ’хцатӕ цӕуыл хардз кӕнут?

Ӕнӕ ӕхцайӕ бинонты фӕдарӕн нӕй (Ӕмбисӕндтӕ 30:8). Куыд зонӕм, афтӕмӕй, ӕхца адӕймаджы бирӕ хъуыддӕгты «хъахъхъӕны» (Екклесиаст 7:12). Чи зоны, лӕг ӕмӕ усӕн зын вӕййы ӕхцаимӕ баст хъуыддӕгтыл дзурын, фӕлӕ хъуамӕ архайой, цӕмӕй сын ӕхцайы тыххӕй зындзинӕдтӕ ма фӕзына (Ефесӕгтӕм 4:32). Лӕг ӕмӕ ус хъуамӕ кӕрӕдзийыл ӕууӕндой ӕмӕ, се ’хцатӕ цӕуыл хардз кӕндзысты, уый фӕдыл-иу кӕрӕдзиимӕ уынаффӕ кӕной.

1 УӔ ХӔРДЗТӔ ПЪЛАН КӔНУТ

БИБЛИЙЫ ЦЫ ФЫСТ ИС? «Сымахӕй исчи мӕсыг самайын куы сфӕнд кӕна, уӕд уал раздӕр не ’рбаддзӕн ӕмӕ, йӕ саразынӕн цас бахъӕудзӕн, уый нӕ банымайдзӕн, цӕмӕй йӕ зона, йӕ саразыны фаг ӕм ис ӕви нӕ?» (Лукайы 14:28). Тынг ахсджиаг у, уе ’хцатӕ цӕуыл хардз кӕндзыстут, уый иумӕ пълан кӕнын (Амос 3:3). Аныхас-иу кӕнут, цы уӕ хъӕуы балхӕнын ӕмӕ уӕ бон бахардз кӕнын цас у, ууыл (Ӕмбисӕндтӕ 31:16). Исты балхӕнынӕн уӕм ӕхца куы уа, уӕддӕр уый ууыл дзурӕг нӕу, ӕмӕ йӕ хъуамӕ ӕнӕмӕнгӕй балхӕнат. Архайут, цӕмӕй-иу уӕ хӕс райсын ма бахъӕуа. Уӕ къух цас амоны, уымӕй фылдӕр ма хардз кӕнут (Ӕмбисӕндтӕ 21:5; 22:7).

ЦЫ ИС САРАЗӔН?

• Мӕйы кӕрон ма уӕм ӕхца куы баззайа, уӕд-иу аныхас кӕнут, хуыздӕр сӕ куыд ис спайда кӕнӕн, ууыл.

• Ӕхца уӕм фаг куы нӕ уа, уӕд-иу баныхас кӕнут, цӕмӕй уӕ хӕрдзтӕ фӕкъаддӕр кӕнат. Зӕгъӕм, цӕттӕ хӕринаг ӕлхӕныны бӕсты хӕринаг уӕхӕдӕг кӕнут.

2 ӔРГОМ НЫХАС КӔНУТ ӔМӔ БОНЗОНГӔ УТ

БИБЛИЙЫ ЦЫ ФЫСТ ИС? «Архайут ӕппӕт дӕр ӕнӕзӕрдӕхудтӕй аразыныл, ӕмӕ ӕрмӕст Йегъовӕйы раз нӕ, фӕлӕ адӕмы раз дӕр» (2 Коринфӕгтӕм 8:21). Дӕ цардӕмбалӕн-иу ӕргом дзур, ӕхца дӕм цас ӕфты ӕмӕ цас бахардз кӕныс, уый.

Стыр хӕрдзтӕ кӕнын дӕ куы хъӕуа, уӕд-иу ӕнӕмӕнгӕй дӕ цардӕмбалимӕ аныхас кӕн (Ӕмбисӕндтӕ 13:10). Ӕхцайы тыххӕй ӕргом куы дзурат, уӕд уӕ бинонты ’хсӕн уыдзӕн фарн. Рох дӕ ма уӕд, цы ӕхцатӕ уӕм ӕфты, уыдон ӕрмӕст дӕу не сты, фӕлӕ уӕ дыууӕйы дӕр (1 Тимофеймӕ 5:8).

ЦЫ ИС САРАЗӔН?

• Баныхас кӕнут, ӕнӕ кӕрӕдзи фӕрсгӕйӕ уӕ алкӕмӕн дӕр йӕ бон цас ӕхца хардз кӕнын у, ууыл.

• Цӕмӕй уӕхи, ӕхцаимӕ баст зындзинӕдтӕй бахизат, уый тыххӕй-иу уе ’хцаты тыххӕй рагацау аныхас кӕнут.