Иерусалимы къултӕ

Ездрӕйы рӕстӕджы цард иу израилаг лӕг, Нееми. Уый уыд паддзах Артаксерксы лӕггадгӕнӕг ӕмӕ цард Персы, горӕт Сузӕйы. Неемимӕ Иудӕйӕ йе ’фсымӕртӕй иу ӕрцыд ӕмӕ йын ахӕм ӕвзӕр хабар фехъусын кодта: «Иерусалиммӕ чи аздӕхт, уыдон сты тӕссаг уавӕры. Вавилойнӕгтӕ горӕты къултӕ ӕмӕ кулдуар куы ныппырх кодтой, уӕдӕй нырмӕ арӕзт не ’рцыдысты». Нееми тынг ӕрӕнкъард. Фӕндыди йӕ Иерусалиммӕ ацӕуын, цӕмӕй адӕмӕн баххуыс кодтаид. Гъемӕ Йегъовӕмӕ скуывта, цӕмӕй йӕ паддзах уырдӕм ауагътаид.

Иу бон паддзах федта, Нееми ӕнкъард кӕй у, ӕмӕ йын загъта: «Ахӕм ӕнкъардӕй дӕ никуы федтон. Исты ӕрцыд?» Нееми йын загъта: «Куыннӕ хъуамӕ уон ӕнкъард, кӕд ӕмӕ мӕ райгуырӕн горӕт Иерусалим пырхӕй лӕууы?» Паддзах ӕй бафарста: «Мӕ бон дын цӕмӕй у баххуыс кӕнын?» Нееми йӕхинымӕр скуывта ӕмӕ загъта: «Дӕ хорзӕхӕй, ауадз мӕ Иерусалиммӕ, ӕмӕ йын йӕ къултӕ ногӕй самайон». Артаксеркс Неемийӕн ацӕуыны бар радта ӕмӕ ма йын йемӕ фыстӕджытӕ дӕр арвыста, цӕмӕй йӕ фӕндагыл мачи бахъыгдардтаид. Стӕй ма йӕ сӕвӕрдта Иудӕйы хицауӕй ӕмӕ йын хъӕдӕрмӕг радта, цӕмӕй горӕты кулдуӕрттӕ сарӕзтаид.

Нееми Иерусалиммӕ куы ’рхӕццӕ, уӕд горӕты къултӕм лӕмбынӕг ӕркаст. Стӕй ӕрӕмбырд кодта сауджынты ӕмӕ хицӕутты ӕмӕ сын загъта: «Цы ӕвзӕр уавӕры стӕм, уый уӕхӕдӕг уынут. Куыстмӕ бавналын хъӕуы». Адӕм сразы сты, ӕмӕ къултӕ аразын райдыдтой.

Фӕлӕ израилӕгты знӕгтӕ ӕрбацыдысты ӕмӕ сӕ хынджылӕг кӕнын райдыдтой: «Уӕ къулмӕ уын рувас дӕр куы сгӕпп кӕна, уӕд дӕр уын ныппырх уыдзӕн». Фӕлӕ къул чи арӕзта, уыдон уыцы ныхӕстӕ ницӕмӕ дардтой ӕмӕ дарддӕр сӕ куыст кодтой. Къул бӕрзондӕй-бӕрзонддӕр ӕмӕ фидарӕй-фидардӕр кодта.

Уӕд се знӕгтӕ сфӕнд кодтой Иерусалиммӕ алырдыгӕйты ӕвиппайды ӕрбабырсын. Дзуттӕгтӕ сын сӕ фӕнд куы базыдтой, уӕд тынг фӕтарстысты. Фӕлӕ сын Нееми загъта: «Ма тӕрсут. Йегъовӕ немӕ ис». Стӕй сӕвӕрдта хъахъхъӕнджыты, цӕмӕй, мыййаг, знӕгтӕ куы ӕрбабырстаиккой, уӕд кусджытӕм ма бавнӕлдтаиккой.

52 бонмӕ къултӕ ӕмӕ кулдуар арӕзт фесты. Нееми левитты Иерусалимы ӕрӕмбырд кодта, цӕмӕй уыцы хабар сбӕрӕг кодтаиккой. Зарӕггӕнджыты дыууӕ къордыл адих кодта, ӕмӕ къулы сӕрмӕ асинтыл схызтысты. Иу къорд дзы иуырдӕм ацыд, иннӕ къорд та – иннӕрдӕм, ӕмӕ афтӕмӕй горӕтыл ӕрзылдысты. Цыдысты Йегъовӕйӕн заргӕйӕ ӕмӕ уадындзтыл, ӕрхуы тӕбӕгътыл ӕмӕ дыууадӕстӕнон фӕндыртыл цӕгъдгӕйӕ. Ездрӕ цыд иу къордимӕ, Нееми та – иннӕ къордимӕ, цалынмӕ кувӕндоны нӕ сӕмбӕлдысты, уӕдмӕ. Адӕм иууылдӕр – нӕлгоймӕгтӕ, сылгоймӕгтӕ ӕмӕ сывӕллӕттӕ – Йегъовӕйӕн нывӕндтӕ ӕрхастой ӕмӕ бӕрӕгбон сбӕрӕг кодтой. Сӕ цины хъӕр дардмӕ хъуысыд.