Ӕдзухдӕр тӕрсгӕйӕ цӕрын
«Абон цыфӕндыдӕр ма аразай, суанг ма фынӕй дӕр куы кӕнай, уӕддӕр ахӕм уысм нӕй, ӕмӕ дӕ цардӕн тӕссаг ма уа ӕмӕ дын фӕстаг ма разына» (журнал «Discover»).
ЦАРД абон у, минӕтӕ кӕм ис ныгӕд, ахӕм быдыры хуызӕн. Фыдбылыз дӕм кӕцӕй ӕнхъӕлмӕ кӕсы, уый нӕ зоныс, ӕмӕ уый арӕх ӕрцӕуы ӕнӕнхъӕлӕджы. Алы бӕстӕты тӕссаг уавӕртӕ сты алыхуызон. Уыдонмӕ хауынц аваритӕ, граждайнаг хӕстытӕ, ӕххормагдзинад, СПИД, рак, зӕрдӕйы низтӕ ӕмӕ бирӕ ӕндӕр цыдӕртӕ. Зӕгъӕм, Африкӕйы ӕдзӕрӕг быдыр Сахарӕйы хуссарварс цы бӕстӕтӕ ис, уым СПИД сси фыццаг «лӕгмар». Иу журналы куыд дзырдӕуыд, афтӕмӕй фарон «уыцы низӕй амард 2,2 милуан адӕймаджы, уый та у, Африкӕйы граждайнаг хӕстыты цы адӕм фӕцагъды сты, уымӕй 10 хатты фылдӕр» («U. S. News & World Report»).
Уыцы иурӕстӕджы адӕм тынг бирӕ ӕхца хардз кӕнынц, цӕмӕй фылдӕр цӕрой, ма рынчын кӕной ӕмӕ ма фӕсахъат уой. Кӕй зӕгъын ӕй хъӕуы, адӕм кӕй дзурынц, зӕгъгӕ, хъуамӕ алчидӕр хӕрдӕй дӕр ӕмӕ нозтӕй дӕр йӕ бӕрц зона, стӕй ма физикон фӕлтӕрӕнтӕ кӕна, уый арӕх ӕркӕны хорз фӕстиуджытӕм. Фӕлӕ ис ахӕм чиныг, царды алы фадыджы дӕр раст разамынд чи дӕтты ӕмӕ цӕмӕй ӕдас ӕмӕ ӕнӕмастӕй цӕрӕм, уымӕн чи ӕххуыс кӕны. Уый у Библи. Уым ис амындтӕ, нӕ ӕнӕниздзинад ӕмӕ нӕ амондыл ӕвзӕрырдӕм цы ӕндавы, уый аиуварс кӕнӕн куыд ис, уымӕн. Кӕй зӕгъын ӕй хъӕуы, Библи алы уавӕр дӕр лыстӕг не ʹвзары. Фӕлӕ уым цы диссаджы принциптӕ ис, уыдон ӕххуыс кӕнынц алыхуызон фарстаты раст хатдзӕгтӕ кӕнынӕн, зӕгъӕм, куы уой баст хӕрдимӕ, физикон фӕлтӕрӕнтимӕ, зондахаст, ӕрдон ахастытӕ, нозт, тамако ӕмӕ наркотиктимӕ ӕмӕ ма ноджыдӕр бирӕ ӕндӕр цыдӕртимӕ.
Бирӕтӕн ма сӕ цард фӕуӕззаудӕр вӕййы, экономикон уавӕртӕ арӕх кӕй ивынц, уый тыххӕй дӕр. Ӕмӕ та ам дӕр ӕххуыс кӕны Библи. Уый ӕрмӕст ӕхцатӕм раст ахаст дарынмӕ ӕмӕ сӕ ӕмбаргӕйӕ хардз кӕнынмӕ нӕ разӕнгард кӕны, фӕлӕ ма ӕвдисы, куыд ис уӕвӕн хуыздӕр кусджытӕ ӕмӕ куыстуӕтты хицӕуттӕ. Иудзырдӕй, Библи у, раст фӕндаг чи амоны, ахӕм чиныг, ӕмӕ ӕххуыс кӕны, цӕмӕй нӕхицӕн къӕбӕр амал кӕнӕм ӕмӕ ӕнӕнизӕй цӕрӕм, ӕрмӕст уымӕн нӕ, фӕлӕ цардӕн ӕмткӕй райсгӕйӕ. Фӕнды дӕ базонын, абон Библи куыд ӕххуыс кӕны, уый? Уӕд кӕс дарддӕр.