Равдисут уӕ фӕразондзинады Хуыцауы ӕфсарм
«Равдисут уӕ уырнындзинады... фӕразондзинад, фӕразондзинады хорз намыс [«Хуыцауы ӕфсарм», НФ]» (2 ПЕТРЫ 1:5, 6).
1, 2. а) Сывӕллон куыд хъуамӕ рӕза? ӕ) Уырнындзинады цӕмӕн хъуамӕ рӕзӕм?
АЛЫ сывӕллон дӕр хъуамӕ рӕза, фӕлӕ канд асӕй нӕ. Куыд рӕзы, афтӕ ма хъуамӕ ӕмбаргӕдӕр кӕна. Азтӕ куы рацӕуынц, уӕд кӕддӕры гыццыл лӕппу слӕг вӕййы, кӕддӕры гыццыл чызг та чындздзон чызг свӕййы, ӕмӕ сӕ сывӕллоны митӕ ныууадзынц. Апостол Павел уый тыххӕй фыста: «Ӕз ма сывӕллон куы уыдтӕн, уӕд сывӕллонау дзырдтон, сывӕллонау хъуыдытӕ ӕмӕ сывӕллонау тӕрхӕттӕ кодтон, фӕлӕ лӕг куы сдӕн, уӕд сывӕллоны митӕ ныууагътон» (1 Коринфӕгтӕм 13:11, НФ).
2 Павелы ныхӕстӕй бӕрӕг у, адӕймаг уырнындзинады кӕй хъуамӕ рӕза. Чырыстӕттӕ хъуамӕ уырнындзинады рӕзой, цӕмӕй сывӕллӕттӕ ма уой, фӕлӕ «зондӕй [суой] хъомылтӕ» (1 Коринфӕгтӕм 14:20, НФ). Уыдон хъуамӕ цӕуой размӕ ӕмӕ архайой, цӕмӕй «Чырыстийы ӕххӕст цахъхъӕнтӕ» суой. Афтӕ куы кӕной, уӕд нӕ уыдзысты «дызӕрдыггӕнджытӕ ӕмӕ алыхуызон дымгӕйон ахуырады фӕдыл» чи цӕуы, ахӕм сывӕллӕтты хуызӕн (Ефесӕгтӕм 4:13, 14).
3, 4. а) Цӕмӕй уырнындзинады хъомылтӕ суӕм, уый тыххӕй нӕ цы кӕнын хъӕуы? ӕ) Цавӕр миниуджытӕ нӕм хъуамӕ уа ӕмӕ нӕ ӕнӕмӕнгдӕр цӕмӕн хъӕуынц?
3 Цӕмӕй уырнындзинады сывӕллӕттӕ нӕ, фӕлӕ хъомылтӕ уӕм, уый тыххӕй нӕ цы кӕнын хъӕуы? Сывӕллон рӕзы йӕхигъӕдӕй, никӕй ӕххуыс ӕй хъӕуы. Фӕлӕ уырнындзинады рӕзынӕн та хъӕуы архайын: Библи лӕмбынӕг ахуыр кӕнын ӕмӕ йын йӕ уынаффӕтӕй царды пайда кӕнын (Дзуттытӕм 5:14; 2 Петры 1:3). Афтӕмӕй адӕймагмӕ фӕзыны Хуыцауӕн зӕрдӕмӕдзӕугӕ миниуджытӕ. Уӕдӕ сывӕллон куыд рӕзы, куыд ӕмбаргӕдӕр кӕны ӕмӕ йӕ удыхъӕды хорз миниуджытӕ куыд фидар кӕнынц, афтӕ адӕймаджы удыхъӕды дӕр уыцыиу рӕстӕджы фидар кӕнынц Хуыцауӕн зӕрдӕмӕдзӕугӕ миниуджытӕ. Уый фӕдыл апостол Петр фыста: «Бафтаугӕйӕ ауыл ӕппӕт тырнындзинад, равдисут уӕ уырнындзинады хӕрзуагдзинад, хӕрзуагдзинады ахъуыдыгӕнындзинад, ахъуыдыгӕнындзинады хиуылхӕцын, хиуылхӕцыны фӕразондзинад, фӕразондзинады хорз намыс [«Хуыцауы ӕфсарм», НФ], хорз намысы [«Хуыцауы ӕфсармы», НФ] ӕфсымӕруарзондзинад, ӕфсымӕруарзондзинады уарзондзинад» (2 Петры 1:5—7).
4 Петр цы миниуджытӕ ранымадта, уыдон нӕ иууылдӕр ӕнӕмӕнгдӕр хъӕуынц. Уый ма ноджыдӕр загъта: «Кӕд адӕттӕ сты уӕ мидзӕрдӕйы ӕмӕ стыхджындӕр уой, уӕд, нӕ Хицау Йесо Чырыстийы базоныны, сымах ӕнӕ фесгуыхгӕ ӕмӕ ӕнӕ дыргъӕй нӕ баззайдзыстут» (2 Петры 1:8, НФ). Ӕркӕсӕм, фӕразондзинады Хуыцауы ӕфсарм ӕвдисын цӕмӕн хъӕуы, уымӕ.
Хъуамӕ нӕм уа фӕразондзинад
5. Цӕмӕн нӕм хъуамӕ уа фӕразондзинад?
5 Петр ӕмӕ Павел Хуыцауы ӕфсарм ӕмӕ фӕразондзинад иу ӕмрӕнхъ ӕрӕвӕрдтой (1 Тимофеймӕ 6:11). Адӕймагмӕ фӕразондзинад ис, зӕгъгӕ, уый ӕрмӕст ууыл дзурӕг нӕу, ӕмӕ зындзинӕдтӕн фӕразон у. Фӕлӕ фӕлварӕнтыл, цӕлхдуртыл ӕмӕ фӕдылзылдыл куы сӕмбӕлы, уӕд фӕбыхсы, вӕййы хъӕддых, равдисы лӕгдзинад ӕмӕ йӕ ныфс дӕр нӕ фесафы. Хуыцауы ӕфсармимӕ «Йесо Чырыстийы мидӕг» цӕрын нӕ кӕй фӕнды, уымӕ гӕсгӕ нӕ иу ран нӕ уадздзысты (2 Тимофеймӕ 3:12). Уӕдӕ Иегъовӕйы кӕй уарзӕм, уый цӕмӕй нӕ хъуыддӕгтӕй бӕрӕг уа ӕмӕ нӕ ирвӕзындзинадӕн цы миниуджытӕ хъӕуы, уыдон нӕм цӕмӕй уой, уый тыххӕй хъуамӕ алцӕмӕндӕр фӕразӕм (Ромӕгтӕм 5:3—5; 2 Тимофеймӕ 4:7, 8; Иаковы 1:3, 4, 12). Фӕразондзинад нӕм куы нӕ уа, уӕд нӕ райсдзыстӕм мыггагмӕйы цард (Ромӕгтӕм 2:6, 7; Дзуттытӕм 10:36).
6. Цӕмӕй кӕронмӕ бафӕразӕм, уый тыххӕй нӕ цы кӕнын хъӕуы?
6 Кӕд ӕцӕгады фӕндагыл фидарӕй слӕууыдыстӕм, уӕд тынг ахсджиаг у, цӕмӕй йыл кӕронмӕ фидарӕй баззайӕм. Уый фӕдыл Йесо загъта: «Кӕронмӕ ныффӕразӕг... фервӕздзӕн» (Матфейы 24:13). О, хъуамӕ кӕронмӕ бафӕразӕм — нӕ цардыбонты кӕронмӕ уа ӕви ацы фыддунейы кӕронмӕ. Куыдфӕнды ма уа, уӕддӕр нын Хуыцауыл иузӕрдионӕй ӕнӕ баззайгӕ нӕй. Фӕлӕ фӕразондзинады Хуыцауы ӕфсарм куы нӕ ӕвдисӕм, уӕд Иегъовӕйы зӕрдӕ не ссардзыстӕм ӕмӕ ӕнусон цардӕй ӕнӕхай фӕуыдзыстӕм. Цы у Хуыцауы ӕфсарм та?
Цы у Хуыцауы ӕфсарм
7. Цы у Хуыцауы ӕфсарм ӕмӕ нӕ цӕмӕ разӕнгард кӕны?
7 Хуыцауы ӕфсарм у Иегъовӕ Хуыцауӕн стыр кад кӕнын, Дунедарӕг кӕй у, уый тыххӕй йын кувын ӕмӕ лӕггад кӕнын. Уӕдӕ нӕм цӕмӕй Иегъовӕ Хуыцауы ӕфсарм уа, уый тыххӕй нӕ хорз базонын хъӕуы Иегъовӕйы ӕмӕ йӕ фӕндты тыххӕй. Хуыцауы хуыздӕр куы базонӕм, уӕд ыл уыдзыстӕм зӕрдӕйӕ, ӕмӕ уый бӕрӕг уыдзӕн нӕ хъуыддӕгтӕ ӕмӕ нӕ цардӕй. Хъуамӕ нӕ фӕнда, цӕмӕй Иегъовӕйы хуызӕн тынгдӕр уӕм: йӕ зондыл цӕуӕм ӕмӕ йын йӕ миниуджытӕ нӕ удыхъӕды фидар кӕнӕм (Ефесӕгтӕм 5:1). Ӕцӕгӕйдӕр нӕм Хуыцауы ӕфсарм куы уа, уӕд алы хъуыддагӕй дӕр Хуыцауы зӕрдӕ рухс кӕндзыстӕм (1 Коринфӕгтӕм 10:31).
8. Хуыцауы ӕфсарм ӕмӕ ӕрмӕстдӕр Иегъовӕйӕн кувын кӕй хъӕуы, уыдон кӕрӕдзиуыл куыд баст сты?
8 Цӕмӕй нӕм Хуыцауы ӕфсарм уа, уый тыххӕй хъуамӕ ӕрмӕстдӕр Иегъовӕ Хуыцауӕн кувӕм. Ӕмӕ нӕ зӕрдӕйы цы бынат ахсы, уый ӕндӕр мацы хъуамӕ бацахса. Не Сфӕлдисӕг кӕй у, уымӕ гӕсгӕ йӕ хъуамӕ уарзгӕ дӕр кӕнӕм ӕмӕ лӕггад дӕр ӕрмӕстдӕр уымӕн кӕнӕм (Дыккаг закъон 4:24; Исай 42:8). Фӕлӕ нӕ уӕддӕр йӕхицӕн тыхӕй нӕ кувын кӕны. Иегъовӕйы фӕнды, цӕмӕй йын нӕ зӕрдӕ барвӕндӕй радтӕм. Хуыцауы хорз кӕй базыдтам, уый тыххӕй йӕ бауарзтам. Ӕмӕ нӕ уыцы уарзты сӕраппонд бафӕндыд не ’взӕр митӕ ныууадзын, нӕхи йын ӕнустӕм снывонд кӕнын ӕмӕ нӕ нывонддзырдмӕ гӕсгӕ цӕрын.
Ӕнгомдӕр кӕнут Хуыцаумӕ
9, 10. Хуыцаумӕ ӕнгомдӕр кӕнӕн куыд ис?
9 Нӕхи Хуыцауӕн куы снывонд кӕнӕм ӕмӕ донаргъуыд куы райсӕм, уӕд ӕм уый фӕстӕ дӕр хъуамӕ ӕнгомдӕр кӕнӕм. Иегъовӕмӕ ӕнгомдӕр кӕнынӕн ӕмӕ йын зӕрдиагӕй лӕггад кӕнынӕн мах хъӕуы дарддӕр дӕр йӕ Ныхас ахуыр кӕнын ӕмӕ цы базонӕм, ууыл хъуыды кӕнын. Хуыцауы сыгъдӕг уд нӕ зонд ӕмӕ нӕ зӕрдӕмӕ кӕй уадзӕм, уымӕ гӕсгӕ нӕ уарзондзинад Иегъовӕмӕ тыхджынӕй-тыхджындӕр кӕны. Царды нын нӕ хӕлардзинадӕй зынаргъдӕр ницы ис. Иегъовӕ нӕ хуыздӕр Хӕлар кӕй у, уымӕ гӕсгӕ кӕддӕриддӕр аразӕм, йӕ зӕрдӕмӕ цы цӕуы, уый (1 Иоанны 5:3). Хуыцауимӕ хӕлӕрттӕ кӕй стӕм, уымӕй ӕхсызгондӕр нын ницы ис, ӕмӕ дзы бузныг стӕм, кӕй нӕ ахуыр кӕны ӕмӕ нӕ, кӕм фӕхъӕуы, уым кӕй бараст кӕны, уый тыххӕй (Дыккаг закъон 8:5).
10 Нӕхи Иегъовӕйыл ӕдзух куы нӕ бӕттӕм, уӕд дзы адард уыдзыстӕм. Кӕд ныл ахӕм хабар ӕрцыд, уӕд уым Хуыцау аххосджын нӕу, фӕлӕ нӕхӕдӕг, уымӕн ӕмӕ «Уый дард нӕу махӕй алкӕмӕй дӕр» (Куыстытӕ 17:27). Ӕвӕдза, куыд амондджын стӕм, Иегъовӕ нын йӕ зӕрдӕмӕ фӕндаг ӕдзухдӕр гомӕй кӕй дары! (1 Иоанны 5:14, 15). Кӕй зӕгъын ӕй хъӕуы, хъуамӕ дарддӕр дӕр архайӕм, цӕмӕй Иегъовӕмӕ ӕнгомдӕр кӕнӕм. Фӕлӕ нын йӕхӕдӕг дӕр ӕххуыс кӕны уыцы хъуыддаджы. Куыд? Цӕмӕй нӕм Хуыцауы ӕфсарм уа, уымӕн ӕнӕмӕнгдӕр цы хъӕуы, уый нын дӕтты (Иаковы 4:8). Уӕдӕ нын Иегъовӕ рӕдауӕй цы дӕтты, уыдонӕй куыд ис пайда кӕнӕн?
Уырнындзинады фидар ут
11. Хуыцауы ӕфсарм нӕм кӕй ис, уый цавӕр хъуыддӕгтӕй бӕрӕг кӕны?
11 Хуыцауы бирӕ куы уарзӕм, уӕд нӕ Хуыцауы ӕфсарм кӕддӕриддӕр бӕрӕг уыдзӕн хъуыддӕгтӕй. Павел нӕм сиды: «Архай дӕхи равдисын Хуыцауӕн аккагӕй, ӕнӕуайдзӕф кусӕгӕй, ӕцӕгады дзырд раст ахуыргӕнӕгӕй» (2 Тимофеймӕ 2:15). Уый тыххӕй хъуамӕ ӕдзухдӕр Библи кӕсӕм, ӕмбырдтӕм ӕмӕ уацамынды цӕуӕм. Стӕй ма нӕ Иегъовӕимӕ ӕнгомдӕр кӕнынӕн хъӕуы «ӕнӕрынцойӕ кувын» дӕр (1 Фессалоникӕгтӕм 5:17). Ахӕм хъуыддӕгтӕй бӕрӕг уыдзӕн нӕ Хуыцауы ӕфсарм. Уыдонӕй иу дӕр куы ферох кӕнӕм, уӕд нӕ уырнындзинад ӕрлӕмӕгъ уыдзӕн ӕмӕ Сайтаны хызы бахаудзыстӕм (1 Петры 5:8).
12. Куыд ис ӕнтыстджынӕй фӕлварӕнты сӕрты хизӕн?
12 Нӕ уырнындзинад фидар куы уа ӕмӕ ӕдзухдӕр Хуыцауы хъуыддаджы лӕуд куы уӕм, уӕд нын цыфӕнды фӕлварӕны ныхмӕ дӕр ӕнцон уыдзӕн фӕлӕууын. Гӕнӕн ис, ӕмӕ бахауӕм уӕззау фӕлварӕнты дӕр. Куыд зын нын вӕййы, нӕ бинонтӕм, нӕ хӕстӕджытӕм ӕмӕ нӕ сыхӕгтӕм нӕ ныхӕстӕ нымады дӕр куы нӕ вӕййынц, нӕ ныхмӕ куы рацӕуынц ӕмӕ нӕ куы фӕхъыгдарынц, уӕд. Куысты кӕнӕ нӕ скъолайы, чи зоны, амидин кӕной Библийы уагӕвӕрдты сӕрты ахизынмӕ. Нӕ ныфс истӕмӕй куы асӕтта, куы фӕрынчын уӕм, нӕхимӕ куы ныхъхъусӕм, уӕд нын уый, гӕнӕн ис, не онг амара, ӕмӕ афтӕмӕй та зын уыдзӕн фӕлварӕнты ныхмӕ фидар лӕууын. Фӕлӕ кӕд фидар стӕм «сыгъдӕг царды ӕмӕ Хуыцауы ӕфсармы», нӕ зӕрдыл дарӕм ӕмӕ ӕнхъӕлмӕ кӕсӕм Иегъовӕйы «боны ӕрцыдмӕ», уӕд цыфӕнды фӕлварӕны сӕрты дӕр ахиздзыстӕм (2 Петры 3:11, 12, НФ). Афтӕмӕй нӕ циныл цин ӕфтдзӕн ӕмӕ нын Хуыцау кӕй ӕххуыс кӕны, ууыл ӕппындӕр нӕ дызӕрдыг кӕндзыстӕм (Ӕмбисӕндтӕ 10:22).
13. Цӕмӕй нӕм дарддӕр дӕр Хуыцауы ӕфсарм уа, уый тыххӕй нӕ цы кӕнын хъӕуы?
13 Хуыцауы ӕфсарм кӕмӕ ис, уыдоны кӕд Сайтан йӕ ныхтӕ ныссадзы, уӕддӕр дзы тӕрсын нӕ хъӕуы. Цӕуылнӕ? Уымӕн ӕмӕ «Хуыцау, бӕгуыдӕр, зоны, фыдӕвзарӕнтӕй, Хуыцауӕй чи тӕрсы, ахӕмты фервӕзын кӕнын» (2 Петры 2:9, НФ). Цӕмӕй фӕлварӕнты фидар лӕууӕм ӕмӕ нӕ Иегъовӕ ирвӕзын кӕна, уый тыххӕй хъуамӕ «бавдисӕн кӕнӕм ӕнӕхуыцауадыл ӕмӕ дунейон цыбӕлтыл, ӕмӕ цӕрӕм ацы дуджы хӕрззӕндджынӕй, рӕстӕй ӕмӕ Хуыцауы ӕфсармы мидӕг» (Титмӕ 2:12, НФ). Мах, чырыстӕттӕ, хъуамӕ нӕхимӕ кӕсӕм, цӕмӕй нӕ нӕ зӕрдӕйы монцтӕ ӕмӕ ӕнӕфсарм митӕ сӕ фӕдыл ма асайой, ӕмӕ афтӕмӕй нӕ Хуыцауы ӕфсарм ма фесафӕм. Ӕркӕсӕм, тӕссаг нын цӕмӕй у, уымӕ.
Хуыцауы ӕфсарм фесафӕн цӕмӕй ис, уымӕй уӕхи хизут
14. Цӕмӕй мулчы къӕппӕджы ма бахауӕм, уый тыххӕй нӕ зӕрдыл цы хъуамӕ дарӕм?
14 Мулк бирӕтӕн у къӕппӕг. «Хуыцауы ӕфсарм ӕфтиаг скӕнынӕн бӕззы», зӕгъгӕ, ахӕм хъуыды раст нӕу. Уый аххосӕй, гӕнӕн ис, не ’муырнджыты зӕрдӕхудты бацӕуӕм (1 Тимофеймӕ 6:5, НФ). Стӕй ма, чи зоны, ахӕм ӕвзӕр хъуыдымӕ дӕр ӕрцӕуӕм, зӕгъгӕ, мӕ хъӕздыг ӕфсымӕр кӕнӕ хойӕн куы ныллӕгъстӕ кӕнон ӕфстау раттыны тыххӕй, уӕд уым уадиссагӕй ницы ис. Афтӕмӕй та уыцы хӕс нӕ бон фӕстӕмӕ бафидын дӕр ма уа (Псалом 36:21). Ӕцӕгӕй та «ацы ӕмӕ фидӕны царды зӕрдӕвӕрӕн» мулкӕй аразгӕ нӕу, фӕлӕ Хуыцауы ӕфсармӕй (1 Тимофеймӕ 4:8, НФ). «Мах ацы дунемӕ [кӕй] ницы ӕрхастам» ӕмӕ «нӕ бон кӕй нӕу ардыгӕй исты ахӕссын» дӕр, уымӕ гӕсгӕ хъуамӕ архайӕм, цӕмӕй нӕм уа «Хуыцауы ӕфсарм ӕмӕ бонзонгӕ цард» кӕнӕм. Стӕй нын «хӕринаг... куы уа ӕмӕ дарӕс, уӕд хъуамӕ уымӕй разы уӕм» (1 Тимофеймӕ 6:6—11, НФ).
15. Цы хъуамӕ бакӕнӕм, адджын цард агургӕйӕ Хуыцауы ӕфсарм фесафынӕн тӕссаг куы уа, уӕд?
15 Адджын цард агургӕйӕ дӕр ис Хуыцауы ӕфсарм фесафӕн. Ацы хъуыддаджы нӕ фӕивын ницы хъӕуы? Раст у, буар хъӕуы фӕлтӕрын, стӕй улӕфын дӕр хъӕуы. Фӕлӕ сӕ, ӕнусон цардимӕ абаргӕйӕ, стыр пайда нӕй (1 Иоанны 2:25). Абон бирӕтӕ сты, «Хуыцауӕй фылдӕр адджын цард чи уарзы» ӕмӕ «ӕрмӕст ӕддейӕ бакастӕй Хуыцауы ӕфсарм кӕмӕ ис, фӕлӕ йӕ тыхыл ӕвдисӕн чи бакодта, ахӕмтӕ». Мах хъуамӕ нӕхи хизӕм ахӕм адӕмӕй (2 Тимофеймӕ 3:4, 5, НФ). Уӕдӕ Хуыцауы ӕфсарм кӕмӕ ис, уыдон ӕмбырд кӕнынц «сӕхицӕн хӕзна, хорз бындур фидӕнмӕ, цӕмӕй фӕхӕццӕ уой мыггагмӕйы цардмӕ» (1 Тимофеймӕ 6:19).
16. Иуӕй-иуты цавӕр монцтӕ нӕ уадзынц, Хуыцауы уагӕвӕрдтӕ ӕххӕст кӕнын ӕмӕ ахӕм монцтӕ куыд ис марӕн?
16 Нозты, наркотикты, ӕнӕфсарм миты ӕмӕ зӕрдӕйы монцты тыххӕй дӕр ис Хуыцауы ӕфсарм фесафӕн. Ацы хъуыддӕгты фӕдыл цӕугӕйӕ, нӕ бон нӕ бауыдзӕн, Хуыцауы уагӕвӕрдтӕ ӕххӕст кӕнын (1 Коринфӕгтӕм 6:9, 10; 2 Коринфӕгтӕм 7:1). Суанг ма Павел дӕр ӕппынӕдзух тох кодта йӕ тӕригъӕдджын буаримӕ (Ромӕгтӕм 7:21—25). Нӕ зӕрдӕйы цы ӕвзӕр фӕндтӕ ис, уыдон хъӕуы ӕд уидӕгтӕ тонын. Хъуамӕ не ’фсарм ма фесафӕм. Павел нын дзуры: «Амарут уӕ зӕххон уӕнгтӕ: хӕтындзинад, ӕнӕсыгъдӕгдзинад, монцтӕ, ӕвзӕр фӕндтӕ ӕмӕ зыддзинад, кӕцы у гуымирыйӕн кусын» (Колосӕгтӕм 3:5). Мах хъуамӕ уӕм фидар, цӕмӕй нӕ «зӕххон уӕнгты» ахӕм тӕригъӕдтӕ амарӕм, афтӕ ӕмӕ сӕ мацыуал баззайа. Хуыцаумӕ зӕрдиагӕй куы кувӕм ӕмӕ дзы ӕххуыс куы курӕм, уӕд уый руаджы нӕ зӕрдӕйы чъизи монцтӕ мардзыстӕм, ацы дунейы рӕстӕй цӕрдзыстӕм ӕмӕ нӕм уыдзӕн Хуыцауы ӕфсарм.
17. Цы цӕстӕй хъуамӕ кӕсӕм зондамындмӕ?
17 Адӕймагӕн йӕ ныфс куы асӕтта, уӕд уый тыххӕй, гӕнӕн ис, йӕ фӕразондзинад ӕмӕ йӕ Хуыцауы ӕфсарм фесафа. Иегъовӕйы лӕггадгӕнджытӕй-иу бирӕтӕн асаст сӕ ныфс (Нымӕцтӕ 11:11—15; Ездрӕ 4:4; Ионӕ 4:3). Уӕлдай тынгдӕр та, гӕнӕн ис, нӕ зӕрдӕ фӕрисса, исчи нӕ куы фӕхъыг кӕна кӕнӕ нын куы бауайдзӕф кӕна, йе та нын зонд куы амона. Фӕлӕ нын кӕд исчи бауайдзӕф кодта ӕмӕ нын зонд бацамыдта, уӕд уый ууыл дзурӕг у, ӕмӕ ныл Хуыцау тыхсы, нӕ хорз ӕй фӕнды (Дзуттытӕм 12:5—7, 10, 11). Зондамонӕджы ӕфхӕрӕгыл нымайӕн нӕй, фӕлӕ раст фӕндагыл аразӕгыл. Сӕрныллӕг куы уӕм, уӕд цыфӕнды уынаффӕйӕн дӕр аргъ кӕндзыстӕм ӕмӕ йӕм хъусдзыстӕм, уымӕн ӕмӕ «зондамынд у царды фӕндаг» (Ӕмбисӕндтӕ 6:23). Афтӕмӕй уырнындзинады фӕлтӕрдджындӕр кӕндзыстӕм ӕмӕ нӕм ӕцӕгӕйдӕр уыдзӕн Хуыцауы ӕфсарм.
18. Искӕимӕ кӕрӕдзи куы нӕ бамбарӕм, уӕд цы хъуамӕ бакӕнӕм?
18 Искӕимӕ кӕрӕдзи кӕй нӕ бамбӕрстам кӕнӕ искӕмӕ кӕй фӕхӕрам стӕм, уый тыххӕй дӕр ис Хуыцауы ӕфсарм фесафӕн. Уый аххосӕй адӕймаджы, чи зоны, йӕ уд ӕхсынын райдайа кӕнӕ йӕхи фӕхицӕн кӕна йӕ чырыстон ӕфсымӕртӕ ӕмӕ хотӕй (Ӕмбисӕндтӕ 18:1). Кӕддӕриддӕр хъуамӕ нӕ зӕрдыл дарӕм, искӕмӕ куы мӕсты кӕнӕм ӕмӕ йӕм зӕрдӕ куы хӕссӕм, уӕд Иегъовӕйӕ кӕй адард уыдзыстӕм (Левит 19:18). Уымӕй уӕлдай ма, «уынгӕ цы ӕфсымӕры кӕны, уый чи нӕ уарзы, уымӕн куыд у йӕ бон Хуыцауы уарзын, Кӕцыйы нӕ уыны?» (1 Иоанны 4:20). Йесо Уӕлхох уацамынды загъта, зӕгъгӕ, дыууӕ адӕймаджы ’хсӕн исты куы рауайа, уӕд ӕй уыцы тӕккӕ хъӕуы равзарын. Чи йӕм хъуыста, уыдонӕн загъта: «Куы ӕрбахӕссай дӕ лӕвар нывондхӕссӕнмӕ, ӕмӕ уым дӕ зӕрдыл куы ӕрлӕууа де ’фсымӕр цӕмӕндӕр дӕ ныхмӕ у, ныууадз уым дӕ лӕвар нывондхӕссӕны раз, ӕмӕ ацу, раздӕр уал бафидау де ’фсымӕримӕ, ӕмӕ уӕд ӕрцу ӕмӕ ӕрхӕсс дӕ лӕвар» (Матфейы 5:23, 24). Кӕд искӕй зӕрдӕ ныхасӕй кӕнӕ хъуыддагӕй скъахтам, уӕд ын йӕ зӕрдӕйы хъӕдгом байгас кӕндзыстӕм, хатыр дзы куы ракурӕм, уӕд. Афтӕ куы бакӕнӕм ӕмӕ нӕ рӕдыдыл куы басӕттӕм, уӕд кӕрӕдзимӕ фыдӕх нал уыдзыстӕм, фӕлӕ фӕрнӕй цӕрдзыстӕм. Зындзинӕдтӕ лыг кӕнынӕн ма Йесо радта ноджыдӕр иу уынаффӕ (Матфейы 18:15—17). Ӕвӕдза, цӕй ӕхсызгон вӕййы, исты зындзинад куы аскъуыддзаг кӕнӕм, уӕд! (Ромӕгтӕм 12:18; Ефесӕгтӕм 4:26, 27).
Йесойы фӕзмут
19. Цӕмӕн хъӕуы Йесойы фӕзмын?
19 Фӕлварӕнтӕй бамбӕхсӕн нӕй, фӕлӕ уыдоны тыххӕй, ӕнусон цардмӕ кӕнӕг фӕндагӕй хъуамӕ ма ахизӕм. Дӕ зӕрдыл дар, Иегъовӕйӕн йӕ бон у мах фӕлварӕнтӕй фервӕзын кӕнын. Кӕд ӕмӕ «нӕхицӕй аппӕрстам алы уаргъ» ӕмӕ фӕразонӕй згъорӕм, нӕ разы цы фӕндаг ис, ууыл, уӕд «кӕсӕм Йесомӕ, уырниады райдайӕгмӕ ӕмӕ сӕххӕстгӕнӕгмӕ» (НФ) (Дзуттытӕм 12:1—3). Йесойы цард лӕмбынӕг куы ӕвзарӕм, куы йӕ фӕзмӕм ныхасӕй дӕр ӕмӕ хъуыддӕгтӕй дӕр, уӕд тынгдӕр бӕрӕг уыдзӕн нӕ Хуыцауы ӕфсарм.
20. Фӕразондзинад ӕмӕ нӕм Хуыцауы ӕфсарм кӕй ис, уый нын цы хорздзинӕдтӕ хӕссы?
20 Фӕразондзинад ӕмӕ Хуыцауы ӕфсармы руаджы ис фервӕзӕн. Уӕдӕ нӕм Хуыцауӕн зӕрдӕмӕдзӕугӕ миниуджытӕ куы уа, уӕд ын дарддӕр дӕр нӕ бон уыдзӕн сыгъдӕгзӕрдӕйӕ лӕггад кӕнын. Фӕлварӕнты рӕстӕджы дӕр нӕ цин нӕ фӕкъаддӕр уыдзӕн, уымӕн ӕмӕ нӕ Иегъовӕ, нӕ фӕразондзинад ӕмӕ нӕ Хуыцауы ӕфсармы тыххӕй, бирӕ уарздзӕн ӕмӕ нын ӕххуыс кӕндзӕн (Иаковы 5:11). Стӕй Йесо йӕхӕдӕг загъта: «Уӕ фӕразондзинадӕй уӕ удты ирвӕзын кӕнут» (Лукайы 21:19).
Цавӕр дзуапп ратдзынӕ?
• Фӕразондзинад нӕ ӕнӕмӕнг цӕмӕн хъӕуы?
• Цы у Хуыцауы ӕфсарм ӕмӕ цавӕр хъуыддӕгтӕй бӕрӕг кӕны?
• Цы хъуамӕ аразӕм, цӕмӕй Хуыцаумӕ ӕнгомдӕр кӕнӕм?
• Нӕ Хуыцауы ӕфсармӕн тӕссаг цӕмӕй у ӕмӕ уыдонӕй куыд ис хи хъахъхъӕнӕн?
[Нывтӕ 8, 9 фӕрстыл]
Хуыцауы ӕфсарм бӕрӕг кӕны бирӕ хъуыддӕгтӕй.
[Нывтӕ 10 фарсыл]
Хуыцауы ӕфсарм цы хъуыддӕгты тыххӕй ис фесафӕн, уыдонӕй дӕхи хиз.