Лӕгтӕ, Чырыстийы нымайут уӕ хицауыл
«Алы нӕлгоймагӕн дӕр йӕ хицау у Чырысти» (1 КОРИНФӔГТӔМ 11:3).
1, 2. а) Лӕджы хорз хӕдзары хицау схонӕн кӕд вӕййы? ӕ) Бинонты царды бындурӕвӕрӕгыл Хуыцауы цӕмӕн хъуамӕ нымайӕм?
КУЫД дӕм кӕсы, лӕджы хорз хӕдзары хицау схонӕн кӕд вӕййы? Цыргъзонд кӕнӕ хъаруджын куы уа? Йӕ бон ӕхца бакусын куы уа? Ӕви сӕйрагдӕр у, йӕ бинойнаг ӕмӕ йӕ сывӕллӕттӕн куыд у, куыд сӕ уарзы ӕмӕ сыл куыд ауды, уый? Хъыгагӕн, фӕстагмӕ цы миниуджытӕ ранымадтам, уыдон не сты лӕгтӕй бирӕтӕм, уымӕн ӕмӕ сыл ацы дунейы зондахаст ӕмӕ адӕмы ’гъдӕуттӕ ӕндавынц. Цӕмӕн? Тынгдӕр уымӕн, ӕмӕ лӕгтӕ ницӕмӕ дарынц, бинонты царды Бындурӕвӕрӕг цы закъон радта, уый. Нӕ хъусынц Хуыцаумӕ, Библи афтӕ кӕмӕй зӕгъы, зӕгъгӕ, «адӕймагӕй систа фӕрск, скодта дзы сылгоймаджы, ӕмӕ йӕм ӕй ӕрбакодта» (Райдиан 2:21–24).
2 Йесо Чырысти дӕр фарисейтимӕ куы ныхас кодта, уӕд загъта, бинонты цардӕн бындур Хуыцау кӕй ӕрӕвӕрдта: «Ау, нӕ кастыстут, райдианы сӕ чи сфӕлдыста, уый сӕ нӕлгоймаг ӕмӕ сылгоймагӕй кӕй сфӕлдыста, ӕмӕ кӕй загъта: „Уый тыххӕй адӕймаг ныууадздзӕн йӕ фыд ӕмӕ йӕ мады ӕмӕ баиу уыдзӕн йӕ усимӕ, ӕмӕ дыууӕйӕ уыдзысты иу буар“? Гъемӕ дыууӕ нал сты, фӕлӕ – иу буар. Уӕдӕ Хуыцау цы [лӕг ӕмӕ усы] баиу кодта, уый адӕймаг ма ахицӕн кӕнӕд» (Матфейы 19:4–6). Цӕмӕй бинонтӕ амондджын уой, уый тыххӕй хъуамӕ ӕмбарой, бинонты цардӕн бындур Хуыцау кӕй ӕрӕвӕрдта, ӕмӕ сӕ ӕнӕмӕнг кӕй хъӕуы, Хуыцауы Ныхас Библи цы дзуры, уый ӕххӕст кӕнын.
Лӕг йӕ хӕстӕ хорз кӕд ӕххӕст кӕндзӕн
3, 4. а) Йесо бинонты цард хорз цӕмӕн зоны? ӕ) Чи у Йесойы «усаг» ӕмӕ лӕгтӕ сӕ устытӕм цы зӕрдӕ хъуамӕ дарой?
3 Лӕг йӕ хӕстӕ хорз ӕххӕст кӕндзӕн, Йесо Чырысти цы дзырдта, уый куы ахуыр кӕна ӕмӕ уый куыд кодта, афтӕ куы кӕна. Йесо хорз зоны бинонты цард цы у, уый. Уымӕн ӕмӕ Хуыцау фыццаг дыууӕ адӕймаджы куы сфӕлдыста ӕмӕ сӕ куы баиу кодта, уӕд Йегъовӕ Йесойӕн загъта: «Сфӕлдисӕм адӕймаджы нӕхи фӕлгонцмӕ гӕсгӕ, нӕхи хуызӕн» (Райдиан 1:26). Ам Хуыцау дзуры, ӕппындӕр куы ничи ӕмӕ куы ницы ма уыд, уӕд кӕй сфӕлдыста, ӕмӕ йын чи ӕххуыс кодта, уымӕ (Ӕмбисӕндтӕ 8:22–30). Йесо уыд, «Хуыцау кӕй сфӕлдыста, уыдонӕй фыццаг», суанг дун-дуне сфӕлдисыны размӕ дӕр кӕй скодта, уый (Колоссӕгтӕм 1:15; Раргомад 3:14).
4 Библи Йесойы хоны «Хуыцауы Уӕрыкк» ӕмӕ фӕсномыгӕй ӕвдыст у сиахсӕй. Зӕд загъта: «Рацу, ӕмӕ дын равдисон чындзы, Уӕрыччы усаджы» (Иоанны 1:29; Раргомад 21:9). Уӕдӕ чи у уыцы чындзаг, кӕнӕ усаг? «Уӕрыччы усаг» сты Чырыстийы иузӕрдион фӕдылдзӕуджытӕ, сыгъдӕг удӕй сӕрст чи у ӕмӕ йемӕ уӕлӕрвты паддзӕхтӕй чи лӕггад кӕндзӕн, уыдон (Раргомад 14:1, 3). Уымӕ гӕсгӕ, лӕгтӕ дӕр хъуамӕ сӕ устытӕн уой, Йесо зӕххыл йӕ ахуыргӕнинӕгтӕн куыд уыд ӕмӕ сӕм цы зӕрдӕ дардта, афтӕ.
5. Йесо фӕзминаг кӕмӕн у?
5 Ӕцӕгдӕр, Библи зӕгъы, зӕгъгӕ, Йесо йе ’ппӕт фӕдылдзӕуджытӕн дӕр у фӕзминаг. «Чырысти дӕр сымах тыххӕй фӕхъизӕмар кодта ӕмӕ уын равдыста, куыд цӕрын хъӕуы, уый, цӕмӕй йӕ къахвӕдтыл цӕуат» (1 Петры 2:21). Фӕлӕ сӕйраджыдӕр фӕзминаг у лӕгтӕн. Библи дзуры: «Алы нӕлгоймагӕн дӕр йӕ хицау у Чырысти, сылгоймагӕн йӕ сӕрыхицау у нӕлгоймаг, Чырыстийӕн та йӕ хицау у Хуыцау» (1 Коринфӕгтӕм 11:3). Чырысти нӕлгоймӕгтӕн сӕ хицау кӕй у, уымӕ гӕсгӕ йӕ хъуамӕ фӕзмой. Уӕдӕ цӕмӕй бинонтӕ кӕрӕдзиимӕ адджынӕй цӕрой, уый тыххӕй, хистӕр чи у, уый фӕдыл Библи цы дзуры, уый хъӕуы ӕххӕст кӕнын. Лӕгтӕ сӕ устыты хъуамӕ уарзой, Йесо йӕ «усаджы», йӕ сӕрст ахуыргӕнинӕгты куыд уарзы, афтӕ, гъе уӕд сӕ цард уыдзӕн зӕрдӕзӕгъгӕ.
Бинонтӕн зындзинӕдты рӕстӕг цы баххуыс уыдзӕн
6. Лӕгтӕ сӕ устытӕн куыд хъуамӕ уой?
6 Абоны змӕст дунейы лӕгты уӕлдай тынгдӕр хъӕуы Йесойы фӕзмын. Уый куыд фӕразон уыд, куыд уарзта ӕмӕ Хуыцауы уагӕвӕрдтыл фидарӕй куыд хӕцыд, афтӕ хъуамӕ уой уыдон дӕр (2 Тимофеймӕ 3:1–5). Йесо фӕзминаг цӕмӕй у, уый тыххӕй кӕсӕм Библийы: «Сымах дӕр, лӕгтӕ, уӕ устытимӕ цӕрут, цы зонут, уымӕ гӕсгӕ» (1 Петры 3:7). Зындзинӕдты рӕстӕг лӕгтӕ дӕр хъуамӕ Йесойау архайой, цы зонынц, уымӕ гӕсгӕ. Чырысти цы хъизӕмӕртӕ бавзӕрста, ахӕмтӕ иу адӕймаг дӕр нӕ бавзӕрста, фӕлӕ уый зыдта, йӕ фӕлварӕнтӕ Сайтаны, дӕлимонты ӕмӕ ацы фыддунейы аххосӕй кӕй уыдысты (Иоанны 14:30; Ефесӕгтӕм 6:12). Стӕй йын йӕ фӕлварӕнтӕ ӕнӕнхъӕлӕджы нӕ уыдысты. Афтӕ лӕг ӕмӕ усмӕ дӕр хъуамӕ диссаг ма кӕса, царды сын бирӕ мӕт кӕй ис, уый. Библи фӕдзӕхсы, бинонтӕ цӕттӕ кӕй хъуамӕ уой ахӕм зындзинӕдтӕм (1 Коринфӕгтӕм 7:28).
7, 8. а) Лӕгтӕ сӕ устытимӕ, «цы зонынц, уымӕ гӕсгӕ» цӕрой, зӕгъгӕ, уый куыд ӕмбаргӕ у? ӕ) Сылгоймӕгтӕ кады аккаг цӕмӕн сты?
7 Библи дзуры, зӕгъгӕ, лӕгтӕ хъуамӕ сӕ устытимӕ цӕрой, «цы зонынц, уымӕ гӕсгӕ ӕмӕ, сылгоймӕгтӕ лӕмӕгъдӕр кӕй сты, уымӕ гӕсгӕ сын кад кӕной» (1 Петры 3:7). Фыстад ма дзуры, лӕгтӕ сӕ устытӕм тызмӕг кӕй уыдзысты, фӕлӕ Хуыцауы хорзӕх ссарын цы нӕлгоймаджы фӕнды, уый йӕ усӕн кад кӕны (Райдиан 3:16). Кӕд лӕг тыхджындӕр у, уӕддӕр хъуамӕ йӕ бинойнаджы зынаргъ хӕзнайыл нымайа ӕмӕ йӕм йӕ къух макуы сиса, йӕ хъуыдытӕм, йе ’нкъарӕнтӕм ын куыдфӕндыйы цӕстӕй ма кӕса ӕмӕ йын кӕддӕриддӕр аргъ кӕна.
8 Лӕгтӕ сӕ устытӕн цӕмӕн хъуамӕ кад кӕной? Библи дзуры: «Уымӕн ӕмӕ сымах дӕр уыдонимӕ райсдзыстут Хуыцауы стыр хорзӕх – цард. Науӕд уын Хуыцау уӕ куывдтытӕ нӕ хъусдзӕн» (1 Петры 3:7). Лӕгтӕ хъуамӕ ӕмбарой: Йегъовӕ нӕлгоймӕгты сылгоймӕгтӕй уӕлдӕр не ’вӕры. Хуыцауы хорзӕхы аккаг сылгоймӕгтӕ дӕр нӕлгоймагтимӕ райсдзысты уыцы иу лӕвар – ӕнусон цард. Бирӕтӕн дзы суанг уӕлӕрвты цӕрыны ныфс дӕр ис, уым та «нӕдӕр нӕлгоймаг, нӕдӕр сылгоймаг» ис (Галатӕгтӕм 3:28). Уӕдӕ нӕлгоймӕгтӕ хъуамӕ сӕ зӕрдыл дарой: Хуыцауы цӕсты зынаргъ у иузӕрдион адӕймаг, фӕнды лӕг уа, фӕнды ус, фӕнды сывӕллон (1 Коринфӕгтӕм 4:2).
9. а) Петры ныхӕстӕм гӕсгӕ, лӕгтӕ сӕ устытӕн цӕмӕн хъуамӕ кад кӕной? ӕ) Йесо куыд кад кодта сылгоймӕгтӕн?
9 Лӕгтӕ сӕ устытӕн цӕмӕн хъуамӕ кад кӕной, уый тыххӕй апостол Петр загъта, зӕгъгӕ, «науӕд уын Хуыцау уӕ куывдтытӕ нӕ хъусдзӕн». Уымӕй бӕллӕхдӕр ма цы хъуамӕ уа! Лӕг йӕ усӕн куы нӕ кад кӕна, уӕд ын Хуыцау йӕ куывдтытӕм нӕ хъусдзӕн, раджы заманты иуӕй-иу ӕгоммӕгӕс лӕггадгӕнджытӕм куыд нӕ хъуыста, афтӕ (Йеремийы хъарӕг 3:43, 44). Зондыл дзурӕг уыдзӕн, чырыстон нӕлгоймӕгтӕ – бинонджынтӕ ӕмӕ бинонты хъуыддаг бакӕнын кӕй зӕрды ис, уыдон дӕр – куы иртасой, Чырысти сылгоймӕгтӕм цы цӕстӕй каст, куыд сын кад кодта, уый. Йесо сылгоймӕгтӕн бар радта, цӕмӕй йӕ лӕггады рӕстӕг йӕ фарсмӕ уыдаиккой, уымӕй уӕлдай, семӕ уыд зӕрдӕхӕлар ӕмӕ сын аргъ кодта. Иухатт та Йесо диссаджы хабар раздӕр сылгоймӕгтӕн радзырдта ӕмӕ сын бахӕс кодта, цӕмӕй йӕ нӕлгоймӕгтӕн дӕр фехъусын кодтаиккой (Матфейы 28:1, 8–10; Лукайы 8:1–3).
Фӕзминаг – уӕлдайдӕр лӕгтӕн
10, 11. а) Йесойы цӕвиттоныл уӕлдайдӕр лӕгтӕ цӕмӕн хъуамӕ хъуыды кӕной? ӕ) Лӕгтӕ сӕ устыты кӕй уарзынц, уый куыд хъуамӕ ӕвдисой?
10 Уӕлдӕр куыд загътам, афтӕмӕй, лӕг усӕн куыд у, уый Библи абарста, Йесо йӕ «чындзаг», йӕ сӕрст фӕдылдзӕуджытӕн куыд у, уыимӕ. Библи дзуры: «Усӕн лӕг йӕ сӕрыхицау у, Чырысти ӕмбырды сӕр куыд у, афтӕ» (Ефесӕгтӕм 5:23). Ацы ныхӕстӕ лӕгты хъуамӕ разӕнгард кӕной, Йесо цавӕр хицау кӕнӕ разамонӕг уыд, ууыл хъуыды кӕнынмӕ. Ӕрмӕстдӕр уӕд уыдзӕн сӕ бон Йесойау сӕ устытӕн разамынд дӕттын, уарзын сӕ ӕмӕ сыл аудын.
11 «Лӕгтӕ, уарзут уӕ устыты,– разӕнгард кӕны чырыстӕтты Библи,– Чырысти дӕр ӕмбырд куыд бауарзта ӕмӕ йӕхи йӕ сӕрвӕлтау куыд радта, афтӕ» (Ефесӕгтӕм 5:25). Ефесӕгтӕм 4 сӕры «ӕмбырд» у «Чырыстийы буар». Уыцы «буар» арӕзт у нӕлгоймӕгтӕ ӕмӕ сылгоймӕгтӕй, уыдон се ’ппӕт дӕр ӕххуыс кӕнынц, цӕмӕй буар куыд ӕмбӕлы афтӕ куса. Кӕй зӕгъын ӕй хъӕуы, «буары, ома ӕмбырды, сӕр» у Чырысти (Ефесӕгтӕм 4:12; Колоссӕгтӕм 1:18; 1 Коринфӕгтӕм 12:12, 13, 27).
12. Йесо йӕ «буар» кӕй уарзта, уый цӕмӕй бӕрӕг уыд?
12 Йесо йӕ «буар» кӕй уарзта, уый сӕйраджыдӕр бӕрӕг уыд, зӕрдиагӕй йыл кӕй тыхсти, уымӕй. Зӕгъӕм, йӕ ахуыргӕнинӕгтӕ куы бафӕлладысты, уӕд сын загъта: «Ацӕуӕм хибар ранмӕ, цӕмӕй уым иу гыццыл уӕ фӕллад суадзат» (Марчы 6:31). Йесойы царды фӕстаг сахӕтты тыххӕй йӕ апостолтӕй иу ныффыста, зӕгъгӕ, Йесо «бауарзта йӕ хиуӕтты [йӕ «буары» уӕнгты]... бауарзта сӕ кӕронмӕ» (Иоанны 13:1). Диссаджы цӕвиттон, лӕгтӕ сӕ устытӕн куыд хъуамӕ уой, уымӕн!
13. Лӕгтӕ сӕ устыты куыд хъуамӕ уарзой?
13 Лӕгтӕ Йесойы кӕй хъуамӕ фӕзмой, уымӕ разӕнгард кӕнгӕйӕ, апостол Павел фыста: «Раст афтӕ лӕгтӕ дӕр, сӕхи буар куыд уарзынц, афтӕ хъуамӕ уарзой сӕ устыты. Йӕ усы чи уарзы, уый уарзы йӕхи дӕр, уымӕн ӕмӕ йӕ буарӕй йе сӕфт никуы ничи уыдта, фӕлӕ йӕм алчидӕр зилы ӕмӕ йӕ хъахъхъӕны, Чырысти дӕр ӕмбырдмӕ куыд зилы ӕмӕ йӕ куыд хъахъхъӕны, афтӕ». Стӕй загъта: «Сымахӕй дӕр алчи, йӕхи куыд уарзы, афтӕ уарзӕд йӕ усы дӕр» (Ефесӕгтӕм 5:28, 29, 33).
14. Лӕгӕн йе ’нӕххӕст буар цас зынаргъ у, ӕмӕ уымӕ гӕсгӕ йӕ усӕн куыд хъуамӕ уа?
14 Ахъуыды-ма кӕнӕм Павелы ныхӕстыл. Зондджын лӕг йӕхицӕн барӕй разнаггад кӕндзӕн? Йӕ къах куы скъуыра, уӕд ма йӕ стӕй цӕвдзӕн? Кӕй зӕгъын ӕй хъӕуы, нӕ! Кӕнӕ йе ’мбӕлтты цӕсты йӕхи ӕфтаудзӕн, йе та алкӕмӕн йӕ лӕмӕгъдзинӕдты тыххӕй дзурдзӕн? Нӕ! Уӕдӕ уӕд цӕмӕн хъуамӕ ’фхӕра йӕ усы кӕнӕ йӕм йӕ къух цӕмӕн хъуамӕ иса, кӕй фӕрӕдыд, уый тыххӕй? Лӕгтӕ ӕрмӕст сӕхи мӕт хъуамӕ ма кӕной, фӕлӕ сӕ устыты мӕт дӕр (1 Коринфӕгтӕм 10:24; 13:5).
15. а) Йесо куыд бакодта, йӕ ахуыргӕнинӕгтӕ лӕмӕгъ куы разындысты, уӕд? ӕ) Уый нӕ цӕуыл ахуыр кӕны?
15 Ӕркӕсӕм, Йесо йӕ мӕлӕты размӕ ’хсӕв, йӕ ахуыргӕнинӕгтӕ лӕмӕгъ куы разындысты, уӕд сыл куыд батыхст, уымӕ. Кӕд сын Гефсиманы дыргъдоны цалдӕр хатты загъта, кувут, зӕгъгӕ, уӕддӕр ӕртӕ хатты бафынӕй сты. Ӕнӕнхъӕлӕджы сыл гӕрзифтонг ӕфсӕддонтӕ амбырд сты. Йесо сӕ бафарста: «Кӕй агурут?» Уыдон ын дзуапп куы радтой «назаретаг Йесойы», зӕгъгӕ, уӕд сын загъта: «Уый ӕз дӕн». Йӕ мӕлӕты сахат кӕй ралӕууыд, уый зонгӕйӕ сын Йесо загъта: «Кӕд мӕн агурут, уӕд адоны ауадзут». Йесо алкӕддӕр тыхст йӕ ахуыргӕнинӕгтыл, йӕ «чындзагыл», ӕмӕ сӕ куыд фервӕзын кӕна, уымӕн ныр дӕр мадзал ссардта. Йесо йӕ ахуыргӕнинӕгтӕм цы зӕрдӕ дардта, ууыл арф хъуыды кӕнгӕйӕ, лӕгтӕ бирӕ цӕуылдӕрты сахуыр уыдзысты, сӕ устытӕн куыд хъуамӕ уой, уыцы хъуыддаджы (Иоанны 18:1–9; Марчы 14:34–37, 41).
Йесойы йӕ уарзт никуы бакуырм кодта
16. Йесо Марфӕмӕ цы зӕрдӕ дардта, фӕлӕ йӕ уӕддӕр куыд бараст кодта?
16 Библийы кӕсӕм: «Йесо тынг уарзта Марфӕйы, йӕ хойы ӕмӕ Лазӕры» (Иоанны 11:5). Фӕлӕ уӕддӕр Йесо уынаффӕ радта Марфӕйӕн, уымӕн ӕмӕ ӕгӕр тыхсти, фынгыл цы ӕрӕвӕра, ууыл, ӕмӕ йын рӕстӕг нал уыд, цӕмӕй йӕм байхъуыстаид. Йесо загъта: «Ехх, Марфӕ, Марфӕ, цас цӕуылдӕртыл мӕт кӕныс ӕмӕ тыхсыс. Афтӕмӕй та бирӕ ницы хъӕуы, йе та иу цыдӕр дӕр фаг у» (Лукайы 10:41, 42). Марфӕ зыдта, Йесо йӕм цы зӕрдӕ дардта, уый, ӕмӕ йын уымӕ гӕсгӕ йӕ уынаффӕмӕ байхъусын зын нӕ уыд. Афтӕ лӕгтӕ дӕр хъуамӕ уой хӕларзӕрдӕ, алцыдӕр аразой уарзондзинадимӕ ӕмӕ цы дзурынц, ууыл лӕмбынӕг хъуыды кӕной. Фӕлӕ усы бараст кӕнын куы хъӕуа, уӕд ын ӕй Йесойау хъӕуы ӕргом зӕгъын.
17, 18. а) Петр куыд бауайдзӕф кодта Йесойӕн ӕмӕ Петры бараст кӕнын цӕмӕн хъуыд? ӕ) Цы хӕс ис лӕгыл?
17 Ӕндӕр хабар та уыд ахӕм. Йесо йӕ апостолтӕн бамбарын кодта, кӕй хъуамӕ ацӕуа Иерусалиммӕ, «ӕмӕ уым хистӕр лӕгтӕ, сауджынты хистӕртӕ ӕмӕ чиныджыдӕсныты къухӕй бирӕ хъизӕмӕрттӕ кӕй бавзардзӕн, стӕй йӕ кӕй амардзысты, ӕмӕ ӕртыккаг бон кӕй райгас уыдзӕн». Уӕд Петр Йесойы иуварс акодта ӕмӕ йын бауайдзӕф кодта: «Дӕхицӕн фӕтӕригъӕд кӕн, Хицау. Ахӕм ми дыл макуы ӕрцӕуӕд». Бӕрӕг у, Петр цы дзырдта, ууыл кӕй нӕ ахъуыды кодта. Петры хъуыди бараст кӕнын ӕмӕ йын Йесо загъта: «Ацу ардыгӕй, Сайтан! Ды мын мӕ разы цӕлхдур ӕвӕрыс, уымӕн ӕмӕ дӕ хъуыдытӕ Хуыцауы хъуыдытӕ не сты, фӕлӕ адӕймаджы» (Матфейы 16:21–23).
18 Йесо йӕ апостолтӕн нырма гыццыл раздӕр загъта Хуыцауы фӕндоны тыххӕй: хъуамӕ бирӕ фӕхъизӕмар кӕна ӕмӕ йӕ хъуамӕ амарой (Псалом 15:10; Исай 53:12). Уӕдӕ Петр Йесойӕн цы загъта, уый раст нӕ уыд. О, Петры хъуыд фидарӕй бараст кӕнын, не ’ппӕты дӕр куыд бахъӕуы иуӕй-иу хатт раст кӕнын, афтӕ. Лӕг хӕдзары хистӕр кӕй у, уымӕ гӕсгӕ йын бар ис ӕмӕ уый йӕ хӕс дӕр у, цӕмӕй йӕ бинонты, уыимӕ йӕ усы дӕр раст кӕна. Кӕд ын фидарӕй уайдзӕф кӕнын бахъӕуа, уӕд дӕр уый хъуамӕ кӕна хӕларзӕрдӕйӕ ӕмӕ уарзондзинадимӕ. Йесо Петрӕн хъуыддагмӕ раст цӕстӕй ракӕсынӕн куыд баххуыс кодта, афтӕ хатт лӕгты дӕр бахъӕуы сӕ устыты бараст кӕнын. Зӕгъӕм, лӕджы фӕлмӕнӕй бахъӕуа йӕ бинойнаджы хъус ӕрдарын, Библи хӕрзӕгъдау ӕддаг бакасты тыххӕй цы дзуры, уымӕ: чи зоны йӕ цыдӕр фӕивын хъӕуы йӕ уӕлӕдарӕсы, кӕнӕ сызгъӕринтӕ ӕмӕ ахорӕнтӕй куыд пайда кӕны, уыцы хъуыддаджы (1 Петры 3:3–5).
Лӕгты тынг хъӕуы фӕразондзинад
19, 20. а) Цавӕр хъуыддаджы хъуыд апостолты сраст кӕнын, ӕмӕ сын Йесо куыд баххуыс кодта? ӕ) Йесойӕн йӕ къухы цы бафтыд?
19 Цавӕрдӕр хъуыддагмӕ хъус ӕрдарын куы хъӕуа, уӕд лӕгтӕ хъуамӕ ма ӕнхъӕлмӕ кӕсой, сӕ уынаффӕтӕм сын уайтагъддӕр кӕй байхъусдзысты ӕмӕ уавӕр кӕй фӕивдзӕн. Йесойы иу ӕмӕ дыууӕ хатты нӕ бахъуыд бацархайын, цӕмӕй йӕ апостолтӕ сӕ зондахаст фӕивтаиккой. Зӕгъӕм, Йесойы лӕггады кӕрон апостолтӕ ногӕй быцӕу кӕнын райдыдтой, уӕлдӕр сӕ чи у, ууыл (Марчы 9:33–37; 10:35–45). Дыккаг хатт куы фӕбыцӕу сты, уымӕй бирӕ нӕ рацыд, афтӕ сӕ Йесо ӕрӕмбырд кодта, цӕмӕй фӕстаг хатт Куадзӕн иумӕ сбӕрӕг кодтаиккой. Уыцы изӕр сӕ иуы дӕр нӕ бафӕндыд ӕгъдаумӕ гӕсгӕ иннӕтӕн балӕггад кӕнын, сӕ чъизи къӕхтӕ сын ныхсын. Уый бакодта Йесо йӕхӕдӕг. Стӕй сын загъта: «Ӕз уын равдыстон, куыд кӕнын хъӕуы, уый» (Иоанны 13:2–15).
20 Лӕгтӕ Йесойау сӕрныллӕг куы уой, уӕд сӕ устытӕн ӕнцондӕр уыдзӕн сӕ лӕгтӕм хъусын ӕмӕ сын ӕххуыс кӕнын. Фӕлӕ уӕддӕр хъӕуы фӕразондзинад. Куадзӕны ’хсӕв та апостолтӕ ногӕй быцӕу кодтой, чи сӕ уӕлдӕр у, ууыл (Лукайы 22:24). Зондахаст ӕмӕ хъуыддӕгтӕ фӕивынӕн фӕхъӕуы рӕстӕг, ӕмӕ уый уайтагъд нӕ вӕййы. Фӕлӕ куыд ӕхсызгон вӕййы, уавӕр хорзырдӕм куы фӕивы, уӕд! Уый бӕрӕг у апостолты хабарӕй.
21. Абоны зын рӕстӕг, лӕгтӕ сӕ зӕрдыл цы хъуамӕ дарой ӕмӕ цы хъуамӕ аразой?
21 Бинонтӕн абон цас зындзинӕдтӕ ис, уыйбӕрц никуы ма уыд. Бирӕтӕ сӕ цардӕмбалӕн цы дзырд радтой, уымӕн нал аргъ кӕнынц. Уымӕ гӕсгӕ, лӕгтӕ, арф хъуыды кӕнут, бинонты цардӕн бындур чи ӕрӕвӕрдта, ууыл. Уӕ зӕрдыл дарут, йӕ бындурӕвӕрӕг Йегъовӕ кӕй у, ӕмӕ нын ахӕм лӕвар йе стыр уарзтӕй кӕй скодта. Хуыцау йӕ Фырты ӕрмӕст нӕ тӕригъӕдтӕ балхӕнынӕн ӕмӕ нӕ фервӕзын кӕнынӕн нӕ радта, фӕлӕ-ма цӕмӕй лӕгтӕн фӕзминаг уа, уый тыххӕй дӕр (Матфейы 20:28; Иоанны 3:29; 1 Петры 2:21).
Цавӕр дзуапп ратдзынӕ?
• Бинонты царды бындурӕвӕрӕгыл Хуыцауы цӕмӕн хъуамӕ нымайӕм?
• Лӕгтӕ сӕ устыты куыд хъуамӕ уарзой?
• Йесо йӕ ахуыргӕнинӕгтӕм цы зӕрдӕ дардта, уый куыд ӕвдисы, лӕгтӕ Йесойау цавӕр хистӕртӕ хъуамӕ уой, уый?
[Ныв 9 фарсыл]
Ахуыргӕнинӕгтӕ куы бафӕлладысты, уӕд сыл Йесо батыхст
[Ныв 10 фарсыл]
Уынаффӕ хӕларзӕрдӕйӕ дӕтт ӕмӕ дӕ ныхӕстыл лӕмбынӕг хъуыды кӕн
[Ныв 12 фарсыл]
Лӕгтӕ арф цӕмӕн хъуамӕ хъуыды кӕной, Йесо сылгоймӕгтӕм цы зӕрдӕ дардта, ууыл?