«Ӕппӕт дӕр аразгӕ у, чи йӕ рӕзын кӕны, уымӕй, Хуыцауӕй»!
«Садзгӕ чи кӕны, уый дӕр ницы у, ӕмӕ дон чи кӕны, уый дӕр – ӕппӕт дӕр аразгӕ у, чи йӕ рӕзын кӕны, уымӕй, Хуыцауӕй» (1 КОР. 3:7).
1. Цавӕр хъуыддаджы «кусӕм Хуыцауимӕ»?
«МАХ кусӕм Хуыцауимӕ». Афтӕ загъта апостол Павел, не ’ппӕт дӕр цы кадджын куыст кӕнӕм, уый тыххӕй. (Бакӕс 1 Коринфӕгтӕм 3:5–9.) Павел цы куысты кой кӕны, уый у ахуыргӕнинӕгтӕ цӕттӕ кӕныны хъуыддаг. Апостол ӕй абарста тауын ӕмӕ дон кӕнынимӕ. Цӕмӕй ацы ахсджиаг куысты ӕнтыстджын уӕм, уый тыххӕй нӕ ӕнӕмӕнгӕй хъӕуы Йегъовӕйы ’ххуыс. Павел нын нӕ зӕрдыл лӕууын кӕны, «ӕппӕт дӕр аразгӕ [кӕй] у, чи йӕ рӕзын кӕны, уымӕй, Хуыцауӕй».
2. «Рӕзын Хуыцау кӕй кӕны», уый нын куыд ӕххуыс кӕны нӕ лӕггадмӕ раст цӕстӕй кӕсынӕн?
2 Хъуыддаг афтӕ кӕй у, уый нын ӕххуыс кӕны, цӕмӕй нӕ лӕггадмӕ раст цӕстӕй кӕсӕм. Нӕ бон у, ӕмӕ зӕрдиагӕй хъусын кӕнӕм ӕмӕ ахуыргӕнинӕгтӕ цӕттӕ кӕнӕм. Фӕлӕ исчи ахуыргӕнинаг куы свӕййы, уӕд ӕппӕт кады аккаг дӕр вӕййы Йегъовӕ. Цӕмӕн? Уымӕн ӕмӕ цыфӕнды куы архайӕм, уӕддӕр, адӕймаг Хуыцаумӕ куыд баввахс вӕййы, уый махӕй йӕ бон кӕронмӕ бамбарын никӕмӕн у, ӕмӕ ууыл йӕ бар дӕр никӕмӕн цӕуы. Паддзах Соломон уыцы хабар раст бамбарын кодта: «Нӕ зоныс, ӕппӕт дӕр чи аразы, уыцы ӕцӕг Хуыцауы хъуыддӕгтӕ» (Еккл. 11:5).
3. Тауыны куыст ӕмӕ ахуыргӕнинӕгтӕ цӕттӕ кӕныны хъуыддаг ӕмхуызон цӕмӕй сты?
3 Адӕймаг ахуыргӕнинаг куыд свӕййы, уый нӕ бон кӕронмӕ бамбарын кӕй нӕу, уый тыххӕй цымӕ нӕ куыст дзӕгъӕлы у? Ӕппындӕр нӕ! Уый фӕрцы у ноджы диссагдӕр ӕмӕ цымыдисагдӕр. Паддзах Соломон загъта: «Райсомӕй райдай тауын ӕмӕ изӕрмӕ дӕр дӕ къухӕн улӕфт ма дӕтт; уымӕн ӕмӕ йӕ нӕ зоныс, кӕм сзайдзӕн – фыццаг хуыздӕр уыдзӕн ӕви дыккаг, ӕви дыууӕ дӕр иухуызон хорз уыдзысты» (Еккл. 11:6). Ӕнӕуи исты куы фӕтауӕм, уӕд ӕй нӕ фӕзонӕм, кӕм ссайдзӕн, кӕнӕ зайгӕ дӕр скӕндзӕн ӕви нӕ. Бирӕ цӕуылдӕрты нӕ бар ӕппындӕр нӕ цӕуы. Афтӕ зӕгъӕн ис ахуыргӕнинӕгтӕ цӕттӕ кӕныны хъуыддагӕй дӕр. Йесо уый тыххӕй ӕрхаста дыууӕ фӕсномыг ныхасы. Фыст сты Марчы Евангелийы 4-ӕм сӕры. Цы дзы ис зондӕн райсӕн?
Алыхуызон зӕхх
4, 5. Дӕхи ныхӕстӕй радзур Марчы 4:1–9 фыст фӕсномыг ныхас.
4 Марчы 4:1–9 фыст ис, Йесойы фӕсномыг ныхас тауӕджы тыххӕй. Тауӕг нӕмгуытӕ пырх кӕны ӕмӕ хауынц алы рӕтты. Йесо дзуры: «Байхъусут ахӕм фӕсномыг ныхасмӕ. Иу бон тауӕг рацыд тауынмӕ. Таугӕ-тауын ын нӕмгуытӕй иутӕ ӕрхаудысты фӕндаггӕрон, ӕмӕ цъиутӕ ӕртахтысты ӕмӕ сӕ рауыгътой. Иннӕтӕ ӕрхаудысты дурджын ран, сыджыт та дзы, кӕй зӕгъын ӕй хъӕуы, бирӕ нӕ уыд. Ӕмӕ дзы иугӕр сыджыт арф нӕ уыди, уӕд уайтагъд сгӕпп ластой. Фӕлӕ хур куы ӕрӕндӕвта, уӕд сӕ асыгъта, ӕмӕ бахус сты, уымӕн ӕмӕ сын уидӕгтӕ нӕ уыд. Иуӕй-иутӕ та дзы ӕрхаудысты сындзыты ’хсӕн. Сындзытӕ куы ссыдысты, уӕд сӕ рӕзын нал суагътой, ӕмӕ тыллӕг дӕр нал радтой. Фӕлӕ нӕмгуытӕй ӕрхауди хорз зӕххыл дӕр. Ӕмӕ уыдон сӕхиуыл куы схӕцыдысты ӕмӕ куы сырӕзтысты, уӕд радтой тыллӕг: чи ӕртын хатты фылдӕр, чи ӕхсай хатты фылдӕр, чи та сӕдӕ хатты фылдӕр».
5 Рагзаманты-иу тауӕг хоры нӕмгуытӕ ныккодта йӕ фӕдджийы счъилы кӕнӕ та хызыны мидӕг ӕмӕ-иу сӕ фӕйнӕрдӕм пырх кодта. Ацы фӕсномыг ныхасӕй бӕрӕг у, тауӕг нӕмгуытӕ алыхуызон зӕххыл барӕй кӕй нӕ тауы: нӕмгуытӕ фӕйнӕрдӕм куыд калы, афтӕ алы рӕтты хауынц.
6. Йесо куыд бамбарын кодта, тауӕджы тыххӕй цы фӕсномыг ныхас радзырдта, уый?
6 Ацы фӕсномыг ныхас цы нысан кӕны, ууыл нӕ бирӕ хъуыды кӕнын нӕ хъӕуы, уымӕн ӕмӕ йӕ Йесо бамбарын кодта. Йӕ ныхӕстӕ фыст сты Марчы 4:14–20: «Тауӕг цы тауы, уый у дзырд. Фӕндаггӕрон цы нӕмгуытӕ ӕрхауд, уыдон сты, дзырд кӕй зӕрдӕйы байтыдтой, ахӕм адӕймӕгтӕ: куыддӕр ӕй фехъусынц, афтӕ Сайтан ӕрбацӕуы ӕмӕ сын сӕ зӕрдӕйы цы дзырд байтыдтой, уый ахӕссы. Дурджын рӕтты кӕй байтыдтой, уыдон дӕр афтӕ: дзырд куыддӕр фехъусынц, афтӕ йӕ сӕ зӕрдӕмӕ цингӕнгӕ айсынц. Фӕлӕ вӕййынц ӕнӕуидаг. Ӕмӕ кӕд иу цасдӕр ахӕссынц, уӕддӕр, фыдӕвзарӕнты куыддӕр бахауынц ӕмӕ сӕ Хуыцауы паддзахады дзырды тыххӕй ӕфхӕрын куыддӕр райдайынц, афтӕ фӕцудынц. Ис ма ахӕмтӕ дӕр, сындзыты ’хсӕн кӕй байтыдтой. Уыдон дӕр дзырд фехъусынц, фӕлӕ царды сагъӕстыл свӕййынц, хъӕздыгдзинад сӕ йӕ фӕдыл асайы, сӕ зӕрдӕйы ӕндӕр бӕллицтӕ бынат скӕнынц, ӕмӕ дзырд нал сырӕзы. Гъемӕ тыллӕг нӕ раттынц. Хорз зӕххы кӕй байтыдтой, уыдон та ахӕм адӕм сты, ӕмӕ дзырдмӕ чи байхъусы, йӕ зӕрдӕмӕ йӕ чи айсы ӕмӕ тыллӕг чи ратты – чи ӕртын хатты фылдӕр, чи ӕхсай хатты фылдӕр, чи та сӕдӕ хатты фылдӕр».
7. Цы у нӕмыг ӕмӕ цӕмӕ амоны алыхуызон зӕхх?
7 Зӕгъын хъӕуы уый, ӕмӕ Йесо алыхуызон нӕмгуыты кой нӕ кодта. Уый дзырдта, нӕмгуытӕ кӕй хауынц алыхуызон зӕххыл ӕмӕ сӕ тыллӕг дӕр иухуызон уымӕ гӕсгӕ кӕй нӕу. Фыццаг цы зӕххы кой ракодта, уый у хъӕбӕр, над, дыккаг арф нӕу, ӕртыккаг у сындзджын, цыппӕрӕм та у хорз, ӕмӕ уый фӕрцы нӕмыг бирӕ тыллӕг ратты (Лук. 8:8). Цы у нӕмыг? Библийы Хуыцауы Паддзахады тыххӕй цы хорз хабар фыст ис, уый (Матф. 13:19). Цӕмӕ амоны алыхуызон зӕхх та? Адӕмы зӕрдӕтӕм. (Бакӕс Лукайы 8:12, 15.)
8. а) Кӕмӕ амоны тауӕг? ӕ) Хуыцауы Паддзахады хабармӕ адӕм алыхуызон цӕстӕй цӕмӕн кӕсынц?
8 Кӕмӕ амоны тауӕг та? Уый амоны, Хуыцауимӕ чи кусы, уыдонмӕ. Уыдон хъусын кӕнынц Паддзахады тыххӕй хорз хабар. Павел ӕмӕ Аполлосау уыдон дӕр тауынц ӕмӕ дон кӕнынц. Фӕлӕ кӕд бирӕ фыдӕбон кӕнынц, уӕддӕр иухуызон тыллӕг нӕ райсынц. Цӕуылнӕ? Уымӕн ӕмӕ хорз хабар кӕмӕн хъусын кӕнынц, уыдонӕн сӕ зӕрдӕтӕ сты алыхуызон. Фӕсномыг ныхасӕй зыны, тауӕг нӕмгуытӕ куы байтауы, уӕд сыл йӕ бар кӕй нал фӕцӕуы. Уыцы хъуыды ныфс дӕтты не ’ппӕтӕн дӕр, уӕлдайдӕр та, бирӕ азты дӕргъы чи хъусын кӕны, фӕлӕ афтӕ кӕмӕ кӕсы, ӕмӕ сӕ фыдӕбон дзӕгъӕлы у, уыцы иузӕрдион хотӕ ӕмӕ ’фсымӕртӕнa. Ӕмӕ нын цӕмӕн дӕтты уый ныфс?
9. Апостол Павел ӕмӕ Йесо цавӕр зӕрдӕфидаргӕнӕн хъуыдытӕ загътой?
9 Тауӕг куыд иузӕрдион у, уый, йӕ тыллӕг цас у, уымӕй баргӕ нӕу. Павел дӕр уымӕн афтӕ загъта: «Алчидӕр райсдзӕн йӕхи хӕрзиуӕг, куыд бафыдӕбон кӕна, уымӕ гӕсгӕ» (1 Кор. 3:8). Хӕрзиуӕг лӕвӕрд цӕуы фыдӕбонмӕ гӕсгӕ, «тыллӕгмӕ» гӕсгӕ нӕ, фӕлӕ. Йесойӕн йӕ ахуыргӕнинӕгтӕ уацамындӕй куы ’рбаздӕхтысты, уӕд сын уый дӕр уый кой кодта. Ахуыргӕнинӕгтӕ тынг цин кодтой, Йесойы ном-иу куы сдзырдтой, уӕд-иу хӕйрӕджытӕ дӕр сӕ коммӕ кӕй бакастысты, ууыл. Кӕд сын уый тынг ӕхсызгон уыд, уӕддӕр Йесо загъта: «Дӕлимонтӕ уӕ коммӕ кӕй кӕсынц, ууыл ма цин кӕнут – цин кӕнут, уӕ нӕмттӕ уӕлӕрвты фыст кӕй сты, ууыл» (Лук. 10:17–20). Тауӕг куы уына, ӕмӕ йӕ куыст тыллӕг нӕ хӕссы, уӕддӕр уый ууыл дзурӕг нӕу, ӕмӕ иннӕтау зӕрдиагӕй нӕ архайы. Тыллӕг цас уыдзӕн, уый тынгдӕр уымӕй кӕнгӕ у, ӕмӕ кӕмӕн хъусын кӕнӕм, уыдонӕн сӕ зӕрдӕтӕ цавӕр сты. Фӕлӕ ӕппӕт дӕр аразгӕ у, нӕмыг чи рӕзын кӕны, уымӕй, Хуыцауӕй!
Цы кӕнгӕ у, дзырд чи хъусы, уыдонӕй
10. Дзырд чи хъусы, уый хорз «зӕхх» разындзӕн ӕви нӕ, уый цӕмӕй кӕнгӕ у?
10 Цы зӕгъӕн ис, дзырд чи хъусы, уыдонӕй та? Байхъусдзысты ӕви нӕ, уый сын Хуыцау сӕ ныхыл ныффыста? Нӕ. Сӕхицӕй кӕнгӕ у, сӕ зӕрдӕ «хорз зӕхх» разындзӕн ӕви нӕ. Ӕцӕгдӕр, адӕймагӕн йӕ зӕрдӕйы уаг, гӕнӕн ис, ӕмӕ фӕива кӕнӕ хуыздӕрырдӕм, кӕнӕ ӕвзӕрырдӕм (Ром. 6:17). Ацы фӕсномыг ныхасы Йесо загъта, зӕгъгӕ, адӕймаг дзырд «куыддӕр фехъусы», афтӕ Сайтан ӕрбацӕуы ӕмӕ уыцы дзырд ахӕссы. Фӕлӕ хъуыддаг ӕндӕрхуызон дӕр рауайы. Иаковы 4:7 чырыстӕттӕн фыст ис, цӕмӕй «Хӕйрӕгӕн... йӕ ныхмӕ слӕууой», ӕмӕ сӕ уӕд алиддзӕн. Йесо ма ахӕмты кой дӕр кӕны, дзырд чи фехъусы ӕмӕ йӕ фыццаг цингӕнгӕ чи айсы, фӕлӕ стӕй, ӕнӕуидаг кӕй вӕййынц, уымӕ гӕсгӕ чи фӕцуды. Фӕлӕ Библи Хуыцауы лӕггадгӕнджытӕн дзуры, цӕмӕй «уидӕгтӕ... ауадзой ӕмӕ бындурыл... ныффидар уой». Уӕд сӕ бон уыдзӕн бамбарын, «цы у ӕцӕгдзинадӕн йӕ уӕрх ӕмӕ йӕ дӕргъ, йӕ бӕрзӕнд ӕмӕ йӕ арф, ӕмӕ базондзысты Чырыстийы уарзт, цыфӕнды зонындзинӕдтӕй дӕр уӕлдӕр чи у», уый (Еф. 3:17–19; Кол. 2:6, 7).
11. Адӕймагӕн йӕ бон цы у саразын, цӕмӕй царды сагъӕстӕ ӕмӕ хъӕздыгдзинад дзырд сырӕзын ма бахъыгдарой?
11 Ис ма ахӕмтӕ дӕр, ӕмӕ дзырд фехъусынц, фӕлӕ «царды сагъӕстыл свӕййынц, хъӕздыгдзинад сӕ йӕ фӕдыл асайы», ӕмӕ дзырд нал сырӕзы (1 Тим. 6:9, 10). Сӕ бон цы у саразын, цӕмӕй афтӕ ма рауайа? Мӕнӕ цы дзуры апостол Павел: «Царды мидӕг ӕхцауарзаг ма ут, цы уын ис, уый фагыл нымайут, уымӕн ӕмӕ Хуыцау йӕхӕдӕг афтӕ загъта: „Никуы дӕ ныууадздзынӕн ӕмӕ дӕ никуы ферох кӕндзынӕн“» (Дзут. 13:5).
12. Хорз зӕххимӕ барст чи цӕуы, уыдон иухуызон тыллӕг цӕуылнӕ хӕссынц?
12 Фӕстагмӕ Йесо загъта, зӕгъгӕ, хорз зӕххыл кӕй байтыдтой, уыдон «тыллӕг раттынц – чи ӕртын хатты фылдӕр, чи ӕхсай хатты фылдӕр, чи та сӕдӕ хатты фылдӕр». Дзырдмӕ чи байхъусы, уыдонӕй кӕмӕндӕр кӕд йӕ зӕрдӕ хорз у ӕмӕ тыллӕг хӕссы, уӕддӕр, хорз хабар хъусын кӕныны хъуыддаджы йӕ бон цас у кӕнын, уый баст у йӕ уавӕртыл. Зӕгъӕм, иуӕй-иутӕ сты ацӕргӕ кӕнӕ уӕззау рынчын, уымӕ гӕсгӕ сӕ бон бирӕ хъусын кӕнын нӕу. (Абар Марчы 12:43, 44.) Ӕмӕ та ногӕй, тауӕгӕй бирӕ аразгӕ нӕу. Стӕй ма уавӕрыл дӕр йӕ бар нӕ цӕуы. Фӕлӕ, Йегъовӕ нӕмыг кӕй рӕзын кӕны, уый уыны ӕмӕ цин кӕны. (Бакӕс Псалом 126:5, 6.)
Фынӕй чи кӕны, уыцы тауӕг
13, 14. а) Дӕхи ныхӕстӕй радзур Марчы 4:26–29 фыст фӕсномыг ныхас. ӕ) Кӕмӕ амоны тауӕг ӕмӕ цы у мыггаг?
13 Марчы 4:26–29 ма тауӕджы тыххӕй ис ноджыдӕр иу фӕсномыг ныхас: «Хуыцауы паддзахад у, зӕххы мыггаг чи ныппӕрста, ахӕм адӕймаджы хуызӕн. Уый ӕхсӕвы фынӕй фӕкӕны, бонӕй сысты. Уӕдмӕ мыггаг ӕвзар суадзы, сырӕзы – куыд, уый та адӕймаг зонгӕ дӕр нӕ кӕны. Афтӕ зӕхх йӕхӕдӕг сабыргай ратты тыллӕг: фыццаг мӕнӕу ссӕуы, уый фӕстӕ скӕны ӕфсир, стӕй уӕд ӕфсиры нӕмыг ныннӕрсы. Куыддӕр сцӕттӕ вӕййы, афтӕ та йыл ӕхсырф рауадзы, уымӕн ӕмӕ ӕрцыд йӕ кӕрдын афон».
14 Чи у уыцы тауӕг? Чырыстон аргъуантӕй иуӕй-иутӕ амонынц, уый Йесо йӕхӕдӕг кӕй у. Фӕлӕ куыд ис афтӕ зӕгъӕн, ӕмӕ Йесо фынӕй кӕны ӕмӕ нӕ зоны, нӕмыг куыд рӕзы, уый? Кӕй зӕгъын ӕй хъӕуы, уымӕн гӕнӕн нӕй! Уӕдӕ уыцы тауӕг, фыццаг кӕй кой кодтам, уыцы тауӕгау, ӕвдисы Хуыцауы Паддзахады хабар хъусынгӕнджыты – Паддзахады мыггаг зынгзӕрдӕйӕ чи тауы, уыдоны. Зӕххы цы мыггаг ныппарынц, уый у, кӕй хъусын кӕнынц, уыцы дзырдb.
15, 16. Йесо тауӕджы тыххӕй цы фӕсномыг ныхас радзырдта, уым цы загъта, хоры нӕмыг куыд рӕзы ӕмӕ ахуыргӕнинаг куыд рӕзы, уый тыххӕй?
15 Йесо загъта, зӕгъгӕ, «тауӕг ӕхсӕвы фынӕй фӕкӕны, бонӕй сысты». Уый ууыл дзурӕг нӕу, ӕмӕ тауӕг цыдӕр раст нӕ аразы. Йесо ам дзуры, адӕмӕн сӕ фылдӕр куыд цӕрынц, уый тыххӕй. Ацы стихы цы ныхӕстӕ ис, уыдонӕй бӕрӕг у: адӕймаг боныгон кусгӕ кӕны, ӕхсӕвыгон та – фынӕй. Дарддӕр Йесо бамбарын кодта, уыцы рӕстӕджы дӕргъы цы цӕуы, уый: «Мыггаг ӕвзар суадзы, сырӕзы». Стӕй ма загъта: «Куыд, уый та адӕймаг зонгӕ дӕр нӕ кӕны». Ам хъуыддаг уый мидӕг ис, ӕмӕ мыггаг йӕхӕдӕг зайы – «зӕхх йӕхӕдӕг сабыргай ратты тыллӕг»c.
16 Йесо ам цы ’мбарын кӕны? Уый кӕны, хоры нӕмыг куыд рӕзы, уый кой. «Афтӕ зӕхх йӕхӕдӕг сабыргай ратты тыллӕг: фыццаг мӕнӕу ссӕуы, уый фӕстӕ скӕны ӕфсир, стӕй уӕд ӕфсиры нӕмыг ныннӕрсы» (Марчы 4:28). Рӕзгӕ кӕны сабыргай. Нӕй йӕ тыххӕй сырӕзын кӕнӕн кӕнӕ афтӕ бакӕнӕн, цӕмӕй тагъддӕр сырӕза. Уый зӕгъӕн ис, ахуыргӕнинаг куыд рӕзы, уымӕй дӕр. «Йӕ зӕрдӕ ӕнусон цардмӕ здӕхт кӕмӕн у», ахӕм адӕймаджы зӕрдӕйы Йегъовӕ ӕцӕгдзинад сындӕггай рӕзын кӕны (Ап. хъ. 13:48; Дзут. 6:1).
17. Паддзахады тыллӕг чи фембырд кӕны ӕмӕ тыллӕгыл чи фӕцин кӕны?
17 Хор «куыддӕр сцӕттӕ вӕййы, афтӕ» ралӕууы хуымгӕрдӕн. Куыд дзы фӕархайы тауӕг? Йегъовӕ ног ахуыргӕнинӕгты зӕрдӕты йӕ Паддзахады ӕцӕгдзинады мыггаг куы сырӕзын кӕны, уӕд сӕ уырнындзинад сфидар вӕййы, Хуыцауы бауарзынц ӕмӕ сӕ бафӕнды, цӕмӕй йын сӕ цард снывонд кӕной. Уый фӕстӕ та райсынц донаргъуыд. Фӕлтӕрдджындӕр чи кӕны, уыцы ’фсымӕртӕн сӕ бон бавӕййы ӕмбырды фылдӕр хӕстӕ ӕххӕст кӕнын. Паддзахады тыллӕг фембырд кӕнынц, мыггаг чи байтыдта, уый дӕр ӕмӕ иннӕ хъусынгӕнджытӕ дӕр (кӕд уыдон, ахуыргӕнинаг кӕмӕй сырӕзт, уыцы мыггаг сӕхӕдӕг нӕ байтыдтой, уӕддӕр). (Бакӕс Иоанны 4:36–38.) Уӕдӕ «тауӕг дӕр ӕмӕ хуымгӕрдӕг дӕр иумӕ цин кӕнынц».
Цӕуыл сахуыр стӕм
18, 19. а) Йесойы фӕсномыг ныхӕстӕ дӕу куыд бафидар кодтой? ӕ) Иннӕ статьяйы нӕ ныхас цӕуыл уыдзӕн?
18 Мах равзӕрстам дыууӕ фӕсномыг ныхасы Марчы 4-ӕм сӕрӕй. Цӕуыл нӕ ахуыр кӕнынц? Мах федтам, кӕй нын ис ахсджиаг куыст – тауын. Уыцы куыст кӕнын нӕ хъуамӕ ӕппындӕр мацы къуылымпы кӕна (Еккл. 11:4). Зонӕм ӕй, афтӕмӕй кӕй кусӕм Хуыцауимӕ, ӕмӕ уый кӕй у диссаджы кад. Адӕймаг ахуыргӕнинаг свӕййы Йегъовӕйы фӕрцы – Йегъовӕ арфӕ кӕны нӕ фыдӕбонӕн ӕмӕ, дзырд йӕ зӕрдӕмӕ чи айсы, уыдонӕн. Мах искӕмӕй ахуыргӕнинаг тыххӕй нӕ рауайын кӕндзыстӕм. Ӕмӕ адӕймагӕн йӕ уырнындзинад сабыргай куы рӕза, кӕнӕ та йын ӕппындӕр куы нӕ рӕза, уӕд-иу нӕ ныфс хъуамӕ ма асӕтта ӕмӕ-иу нӕхимӕ дӕр хъуамӕ ма ныхъхъусӕм. Хуыцау нын бахӕс кодта «паддзахады тыххӕй ацы хорз хабар... ӕппӕт адӕмтӕн дӕр» хъусын кӕнын. Ӕмӕ кӕд уыцы куыст ӕнувыдӕй кӕнӕм ӕмӕ Йегъовӕйыл иузӕрдион стӕм, уӕд стӕм ӕнтыстджын, цасфӕнды тыллӕг ма исӕм, уӕддӕр. Куыд ӕхсызгон у уый зонын! (Матф. 24:14).
19 Ног ахуыргӕнинӕгтӕ куыд рӕзынц ӕмӕ Паддзахады куыст куыд цӕуы, уый фӕдыл ма Йесо цы дзырдта? Ацы фарстӕн дзуапп ис йӕ иннӕ фӕсномыг ныхӕсты. Цалдӕрыл дзы аныхас кӕндзыстӕм иннӕ статьяйы.
[Фиппаинӕгтӕ]
a Бакӕс, ӕфсымӕр Георг Фьельнир Линдал Исландийы куыд хъусын кодта, уый тыххӕй «Йегъовӕйы Ӕвдисӕнты ӕрвылазон чиныджы 2005 азӕн», 210, 211 фӕрстӕ (уыр.) ӕмӕ, Хуыцауы иузӕрдион лӕггадгӕнджытӕн Ирландийы бирӕ азты дӕргъы сӕ фыдӕбонӕй куыд ницы зынди, уый тыххӕй «Йегъовӕйы Ӕвдисӕнты ӕрвылазон чиныджы 1988 азӕн», 82–99 фӕрстӕ (англ.).
b Раздӕр «Хъахъхъӕнӕн мӕсыг» ӕмбарын кодта, зӕгъгӕ, уыцы мыггаг амоны адӕймаджы миниуджытӕм ӕмӕ уыдон фӕзынынц бӕрӕг уавӕрты. Фӕлӕ банысан кӕнын хъӕуы уый, ӕмӕ Йесойы фӕсномыг ныхасы мыггаг нӕ бамбыд ӕмӕ ’взӕр тыллӕг дӕр не ’рхаста. Уый рӕзыд, цалынмӕ не сцӕттӕ ис, уӕдмӕ. (Кӕс 1980 азы 15 июны «Хъахъхъӕнӕн мӕсыг», 17–19 фӕрстӕ, англ.)
c Номивӕг «йӕхӕдӕг»-ӕй тӕлмац грекъаг дзырд ма Библийы ’мбӕлы ноджыдӕр иу ран – Хъуыддӕгты 12:10. Уым фыст ис, ӕфсӕн кулдуар кӕй байгом «йӕхи ӕгъдауӕй», ома йӕхӕдӕг.
Бахъуыды кодтай?
• Тауыны куыст ӕмӕ Паддзахады хабар хъусын кӕныны хъуыддаг ӕмхуызон цӕмӕй сты?
• Паддзахады хъусынгӕнӕг иузӕрдион у ӕви нӕ, уый Йегъовӕ цӕмӕ гӕсгӕ бары?
• Йесо тауӕджы тыххӕй цы фӕсномыг ныхас радзырдта, уым цы загъта, хоры нӕмыг куыд рӕзы ӕмӕ ахуыргӕнинаг куыд рӕзы, уый тыххӕй?
• «Тауӕг дӕр ӕмӕ хуымгӕрдӕг дӕр иумӕ» куыд фӕцин кӕнынц?
[Нывтӕ 13 фарсыл]
Хуыцауы Паддзахады хъусынгӕнджыты Йесо тауӕгимӕ цӕмӕн абарста?
[Нывтӕ 15 фарсыл]
Хорз зӕхх кӕмӕ амоны, уыдон Паддзахады хабар хъусын кӕнынц сӕ уавӕртӕм гӕсгӕ
[Ныв 16 фарсыл]
Ӕппӕт дӕр аразгӕ у, нӕмыг чи рӕзын кӕны, уымӕй, Хуыцауӕй