Иузӕрдион у ӕмӕ хиуарзон хъуыдытӕн дӕ зӕрдӕйы бынат ма уӕд
«Ӕз цӕудзынӕн дӕ ӕцӕгдзинады. Мӕ зӕрдӕ мын ӕгасӕй дӕр дӕхирдӕм сараз, цӕмӕй тӕрсон дӕ номӕй» (ПС. 86:11).
1, 2. а) Псалом 86:2, 11 гӕсгӕ нын цы баххуыс кӕндзӕн, цӕмӕй фӕлварӕнты Йегъовӕйыл иузӕрдион уӕм? ӕ) Алы хъуыддаджы дӕр Йегъовӕйыл иузӕрдион уӕм, ууыл ахуыр кӕнын кӕд хъӕуы?
БИРӔ азты дӕргъы Хуыцауыл иузӕрдион чи уыд, ахӕстӕтты ӕмӕ ӕндӕр фӕлварӕнты рӕстӕджы дӕр фидар чи фӕлӕууыд, уыцы чырыстӕттӕй иуӕй-иутӕ фӕстӕдӕр ӕхцайы фӕдыл куыд адзӕгъӕл сты? Ацы фарстӕн йӕ дзуапп баст у адӕймагӕн йӕ зӕрдӕимӕ, мидӕгӕй цавӕр у, уыимӕ. 86-ӕм псаломӕй куыд зыны, афтӕмӕй иузӕрдиондзинад у, адӕймагӕн йӕ зӕрдӕ ӕгасӕй дӕр иу цӕмӕдӕр арӕзт куы уа, ома саджилзӕрдӕ куы нӕ уа, уый. Псаломзарӕггӕнӕг Давид куывта: «Хъахъхъӕн мын мӕ уд, уымӕн ӕмӕ дыл ӕз иузӕрдион дӕн. Ды дӕ мӕ Хуыцау. Фервӕзын кӕн дӕ лӕггадгӕнӕджы, дӕуыл дары йӕ зӕрдӕ». Давид дарддӕр куывта: «О Йегъовӕ, сараз мӕ дӕ фӕндагыл, Ӕз цӕудзынӕн дӕ ӕцӕгдзинады. Мӕ зӕрдӕ мын ӕгасӕй дӕр дӕхирдӕм сараз, цӕмӕй тӕрсон дӕ номӕй» (Пс. 86:2, 11).
2 Йегъовӕйыл нӕ зӕрдӕ ӕгасӕй дӕр куы нӕ дарӕм, уӕд нын ӕндӕр цыдӕртӕ кӕнӕ ӕндӕр чидӕртӕ сӕйрагдӕр суыдзысты ӕмӕ Хуыцауыл раздӕрау иузӕрдион нал уыдзыстӕм. Хиуарзон фӕндтӕ минӕтӕй уӕлдай не сты – кӕд сыл ныллӕудзынӕ ӕмӕ кӕд срӕмудздзысты, уый бӕрӕг нӕй. Гӕнӕн ис, ӕмӕ зын уавӕрты Йегъовӕйыл иузӕрдионӕй баззайӕм, фӕлӕ уый фӕстӕ Сайтаны ӕндӕр къӕппӕджыты бахауӕм. Уӕдӕ куыд ахсджиаг у, цӕмӕй алы хъуыддаджы дӕр Йегъовӕйыл иузӕрдион уӕм! Ӕмӕ нӕ ууыл ахуыр кӕнын хъӕуы рагацау, цалынмӕ фӕлварӕнтыл нӕ сӕмбӕлдыстӕм, уӕдмӕ. Библи нын дзуры: «Хъахъхъӕнинаг цы у, уыдӕттӕй ӕппӕты тынгдӕр хъахъхъӕн дӕ зӕрдӕ» (Ӕмб. 4:23). Ацы хъуыддаджы нын хорз зондзонӕн у, Йегъовӕ Иудӕйӕ Израилы паддзах Йеровоаммӕ кӕй арвыста, уыцы пехуымпары хабар.
«Лӕвар дын ракӕнон»
3. Йеровоам Хуыцауы тӕрхон куы фехъуыста, уӕд цы бакодта?
3 Дӕ цӕстытыл ма ауайын кӕн: паддзах Йеровоамӕн, Израилы дӕсмыггаг паддзахад мӕнг хуыцӕуттӕн кувыныл чи бафтыдта, уымӕн, Хуыцауы ’рвыст лӕг фехъусын кодта карз тӕрхон. Паддзах мӕстӕй рафыхт ӕмӕ йӕ адӕмӕн загъта, цӕмӕй пехуымпары ӕрцахсой. Фӕлӕ Йегъовӕ йӕ лӕггадгӕнӕгӕн баххуыс кодта. Паддзах пехуымпармӕ куыддӕр йӕ къухӕй ацамыдта, афтӕ йӕ къух бахуыскъ, мӕнг хуыцӕуттӕн нывӕндтӕ кӕуыл хастой, уыцы нывондхӕссӕн та ныппырх ис. Йеровоамы цыма исчи ивгӕ фӕкодта, афтӕ фӕци. Уайтагъд Хуыцауы ’рвыст лӕгӕн лӕгъстӕ кӕнын райдыдта: «Дӕ хорзӕхӕй, дӕ Хуыцау Йегъовӕйы зӕрдӕ ӕрфӕлмӕн кӕн ӕмӕ йӕм мӕн тыххӕй скув, цӕмӕй мӕ къух сдзӕбӕх уа». Пехуымпар дӕр Хуыцаумӕ скуывта, ӕмӕ уӕд паддзахы къух сдзӕбӕх (1 Пад. 13:1–6).
4. а) Паддзахы ныхас пехуымпары иузӕрдиондзинадӕн фӕлварӕн цӕмӕн уыд? ӕ) Пехуымпар паддзахӕн цы загъта?
4 Уый фӕстӕ Йеровоам Хуыцауы ’рвыст лӕгӕн загъта: «Цом мемӕ мӕ хӕдзармӕ ӕмӕ исты бахӕр, ӕмӕ дын лӕвар ракӕнон» (1 Пад. 13:7). Куыд хъуамӕ бакодтаид пехуымпар? Хуыцауы тӕрхон ын кӕй фехъусын кодта, уымӕ гӕсгӕ йын хъуамӕ «нӕ», зӕгъгӕ, загътаид? (Пс. 119:113). Ӕви, афтӕ кӕй зындис, цыма паддзах зӕрдӕйӕ ӕрфӕсмон кодта, уый тыххӕй йӕм хъуамӕ уазӕгуаты бацыдаид? Йеровоам афтӕ хъӕздыг уыдис, ӕмӕ, кӕй зӕгъын ӕй хъӕуы, йӕ бон уыд йӕ хӕлӕртты зынаргъ лӕвӕрттӕй буц кӕнын. Ӕмӕ кӕд Хуыцауы пехуымпар йӕ мидзӕрдӕйы мулкмӕ бӕллыди, уӕд ын паддзахы ныхас стыр фӕлварӕн уыдаид. Фӕлӕ Йегъовӕ пехуымпарӕн афтӕ загъта: «Мадӕр къӕбӕр бахӕр, мадӕр дон баназ ӕмӕ, цы фӕндагыл ӕрцыдтӕ, ууыл фӕстӕмӕ здӕхгӕ дӕр ма акӕн». Уымӕ гӕсгӕ пехуымпар комкоммӕ ӕмӕ фидарӕй загъта: «Дӕ хӕдзарӕн мын йе ’мбис куы дӕттай, уӕд дӕр ӕз демӕ нӕ ацӕудзынӕн, ӕмӕ ам къӕбӕр дӕр нӕ бахӕрдзынӕн ӕмӕ дон дӕр нӕ баназдзынӕн». Уыцы ныхӕстӕ загъта, ӕмӕ Вефилӕй ӕндӕр фӕндагыл ацыд (1 Пад. 13:8–10). Пехуымпар куыд бакодта, уымӕй иузӕрдиондзинады тыххӕй цы ис базонӕн? (Ром. 15:4).
Цы нын ис, «уый фагыл нымайӕм»
5. Мулк ӕмӕ ӕхца адӕймагӕн йӕ иузӕрдиондзинадыл куыд ӕндавынц?
5 Чи зоны, адӕймаг зӕгъа, зӕгъгӕ, мулк ӕмӕ ӕхца иузӕрдиондзинадмӕ ницы бар дарынц. Фӕлӕ уый афтӕ нӕу. Ахъуыды-ма кӕнӕм: ӕнӕмӕнг нӕ цы хъӕуы, уый нын Йегъовӕ алкӕддӕр кӕй дӕтдзӕн, ууыл ӕппӕт зӕрдӕйӕ ӕууӕндӕм? (Матф. 6:33; Дзут. 13:5). Цард «хуыздӕр» кӕмӕй кӕны, уыдӕттӕ самал кӕныныл систӕм, ӕви ӕнӕ уыцы дзаумӕттӕй дӕр нӕ бон у цӕрын? (Бакӕс Филиппӕгтӕм 4:11–13.) Зӕгъӕм нӕ цыдӕр тынг хъӕуы, уӕд, мыййаг, афтӕ ахъуыды кӕнӕм, зӕгъгӕ, фӕлтау ӕмбырды мӕхимӕ къаддӕр хӕстӕ исдзынӕн, фӕлӕ мӕ цы хъӕуы, уый самал кӕндзынӕн? Царды нын ӕппӕты ахсджиагдӕр уый у, цӕмӕй Йегъовӕйӕн иузӕрдионӕй лӕггад кӕнӕм? Ацы фарстытӕн цы дзуапп ратдзыстӕм, уый сӕйраджыдӕр кӕнгӕ у, Хуыцауӕн ӕппӕт зӕрдӕйӕ лӕггад кӕнӕм ӕви нӕ, уымӕй. Апостол Павел фыста: «Хуыцауыл иузӕрдион уай ӕмӕ дӕм цы ис, уый фагыл нымайай, уый ӕцӕгӕй дӕр стыр пайда у. Уымӕн ӕмӕ мах ацы дунемӕ ницы ӕрбахастам, ӕмӕ дзы хӕсгӕ дӕр ницы акӕндзыстӕм. Уӕдӕ нын хӕрд, уӕлӕдарӕс ӕмӕ, кӕм цӕрӕм, уый куы уа, уӕд уый фагыл нымайӕм» (1 Тим. 6:6–8).
6. Хатт нын зӕрдӕ цӕмӕй февӕрынц ӕмӕ нын цы баххуыс кӕндзӕн раст уынаффӕ рахӕссынӕн?
6 Зӕгъӕм, куысты нын хицау зӕрдӕ бавӕрдта уӕлдӕр бынат ӕмӕ фылдӕр мыздӕй, стӕй ӕндӕр цӕмӕйдӕрты. Кӕнӕ, чи зоны, хъуыды кӕнӕм, зӕгъгӕ, ӕндӕр бӕстӕм куы ацӕуиккам, уӕд фылдӕр ӕхца бакусиккам. Ахӕм фадӕттӕ нын куы фӕзына, уӕд нӕм фыццаг, чи зоны, афтӕ фӕкӕса, ӕмӕ нын уый Йегъовӕ арфӕ кӕны. Фӕлӕ цалынмӕ уынаффӕ рахӕссӕм, уӕдмӕ уал хъуамӕ нӕ зӕрдӕмӕ ныккӕсӕм: цӕмӕн нӕ фӕнды афтӕ бакӕнын? Сӕйраджыдӕр хъуамӕ ахъуыды кӕнӕм: «Цы уынаффӕ рахӕссон, уый мыл куыд фӕзындзӕн? Йегъовӕйӕ нӕ адард уыдзынӕн?»
7. Нӕ зӕрдӕ-иу ӕхцамӕ ӕхсайын куы райдайа, уӕд-иу уыцы хъуыдытӕ нӕ зӕрдӕйӕ ӕдбындзар цӕмӕн хъуамӕ стонӕм?
7 Сайтаны дуне адӕймаджы ӕппынӕдзухдӕр ахӕм зондыл аразы, цӕмӕй йын сӕйрагдӕр уа мулк. (Бакӕс 1 Иоанны 2:15, 16.) Хӕйрӕджы нысан уый у, цӕмӕй нын нӕ зонд сзыгъуыммӕ кӕна. Уымӕ гӕсгӕ хъуамӕ къӕрцхъус уӕм, ӕмӕ куыддӕр фӕхатӕм, нӕ зӕрдӕ ӕхцамӕ ӕхсайын райдыдта, уӕд-иу уыцы хъуыдытӕ уайтагъд нӕ зӕрдӕйӕ ӕдбындзар стонӕм (Рарг. 3:15–17). Йесойӕн зын нӕ уыди Хӕйрӕгӕн «нӕ» зӕгъын, дунейы ӕппӕт паддзахӕдтӕ йын куы лӕвӕрдта, уӕд (Матф. 4:8–10). Чырысти иннӕты дӕр фӕдзӕхста: «Кӕсут, зыд мацӕуыл кӕнут, уымӕн ӕмӕ адӕймагмӕ алцыдӕр парахатӕй куы уа, уӕддӕр йӕ цард, цы йӕм ис, уымӕй аразгӕ нӕу» (Лук. 12:15). Иузӕрдион куы уӕм, уӕд нӕ ныфс дардзыстӕм нӕхиуыл нӕ, фӕлӕ Йегъовӕйыл.
Зӕронд пехуымпар ӕй фӕсайдта
8. Хуыцауы пехуымпары иузӕрдиондзинад фӕлвӕрд куыд ӕрцыд?
8 Ӕркӕсӕм та, кӕй кой кодтам, уыцы пехуымпары хабармӕ. Дарддӕр йӕ фӕндагыл куы цыдаид, уӕд алцыдӕр уыдаид хорз. Фӕлӕ Вефилӕй дард нӕма ацыд, афтӕмӕй сӕмбӕлд ног фӕлварӕныл. Библийы кӕсӕм: «Вефилы цардис иу зӕронд пехуымпар. Йӕ фырттӕ йӕм ӕрбацыдысты ӕмӕ йын радзырдтой, уыцы бон Хуыцауы ’рвыст лӕг Вефилы цы сарӕзта, ӕппӕт уыдӕттӕ». Зӕронд лӕг хабӕрттӕ куы фехъуыста, уӕд загъта, цӕмӕй йын хӕрӕг сифтындзой ӕмӕ Хуыцауы пехуымпары аййафа. Ӕмӕ бирӕ нӕ рацыд, афтӕ йӕ иу стыр бӕласы бын бадгӕ баййӕфта. Зӕронд лӕг ӕй сӕхимӕ фӕхуыдта: «Мӕ хӕдзармӕ рацу ӕмӕ къӕбӕр бахӕр». Хуыцауы ’рвыст лӕг ын куы нӕ сразы, уӕд ын зӕронд лӕг афтӕ: «Ӕз дӕр дӕу хуызӕн пехуымпар дӕн. Зӕд мын Йегъовӕйы номӕй загъта, зӕгъгӕ, дам ӕй дӕ хӕдзармӕ ракӕн, цӕмӕй къӕбӕр бахӕра ӕмӕ дон баназа». Фӕлӕ Фыстад зӕгъы: «Фӕсайдта йӕ» (1 Пад. 13:11–18).
9. Библи мӕнгард адӕмы тыххӕй цы дзуры ӕмӕ ахӕм адӕм зиан кӕмӕн ӕрхӕссынц?
9 Зӕронд пехуымпарӕн йӕ зӕрды цыфӕнды ма уыдаид, бӕлвырд у иу хъуыддаг: уый кодта сайгӕ. Чи зоны, кӕддӕр уыд Йегъовӕйы иузӕрдион пехуымпар. Фӕлӕ ныр хинӕй архайдта. Библи уый тынг ӕвзӕр хъуыддагыл нымайы. (Бакӕс Ӕмбисӕндтӕ 3:32.) Мӕнгард адӕм ӕрмӕст сӕхӕдӕг нӕ цӕуынц Хуыцауы ныхмӕ, фӕлӕ ма рӕдийын кӕнынц иннӕты дӕр.
«Фӕстӕмӕ аздӕхт» зӕронд лӕгимӕ
10. Куыд бакодта Хуыцауы пехуымпар, зӕронд лӕг ӕй куы фӕхуыдта, уӕд ӕмӕ хабар цӕуыл фӕцис?
10 Иудӕйӕ ’рвыст пехуымпар хъуамӕ бамбӕрстаид, зӕронд лӕг ыл хинӕй кӕй цӕуы, уый. Йӕ бон уыд ахъуыды кӕнын: «Кӕд Йегъовӕ йӕ фӕнд аивта, уӕд йӕ зӕды мӕнмӕ нӕ, фӕлӕ ӕндӕр кӕмӕдӕр цӕмӕн рарвыста?» Йӕ бон уыди Йегъовӕйӕн йӕхи бафӕрсын, зӕронд лӕг ын куыд дзуры, ӕцӕгдӕр ӕй афтӕ бакӕнын хъӕуы ӕви нӕ. Фӕлӕ йӕ нӕ бафарста, ӕндӕр Фыстады уый тыххӕй фыст уыдаид. Уӕдӕ куыд бакодта? Дарддӕр куыд кӕсӕм, афтӕмӕй зӕронд лӕгимӕ «фӕстӕмӕ аздӕхт, цӕмӕй йӕ хӕдзары къӕбӕр бахордтаид ӕмӕ дон банызтаид». Уый Йегъовӕйы зӕрдӕмӕ нӕ фӕцыд. Ӕмӕ уый фӕстӕ пехуымпар Иудӕмӕ куы фӕцӕйцыд, уӕд ыл домбай амбӕлд ӕмӕ йӕ амардта. Куыд хорз райдыдта ӕмӕ куыд ӕвзӕр фӕцис йӕ хабар уыцы пехуымпарӕн! (1 Пад. 13:19–25)a.
11. Цавӕр хорз цӕвиттон ныууагъта Ахи?
11 Фӕлӕ-ма ӕркӕсӕм ӕндӕр пехуымпары цӕвиттонмӕ. Уыцы пехуымпар уыд Ахи, Йегъовӕйы ныхасмӕ гӕсгӕ Йеровоамы чи байсӕрста, уый. Ахи йӕ зӕронды бонтӕм дӕр уыд иузӕрдион. Иухатт Йеровоам Ахимӕ йӕ усы арвыста, цӕмӕй йӕ бафарстаид, сӕ рынчын фырт цы бауыдзӕн, уымӕй. Ахи уӕд уыди тынг зӕронд ӕмӕ цӕстӕй дӕр нал уыдта. Ахи Йеровоамы усӕн комкоммӕ загъта, сӕ лӕппу кӕй амӕлдзӕн (1 Пад. 14:1–18). Пехуымпар Ахи йӕ иузӕрдиондзинады тыххӕй бирӕ хорздзинӕдтӕй хайджын ӕрцыд, зӕгъӕм, йӕ ныхӕстӕ фыст ӕрцыдысты Хуыцауы Ныхасы. Куыд? Ахи цы ныффыста, уымӕй фӕстӕдӕр спайда кодта сауджын Ездрӕ, йӕ чингуытӕ куы фыста, уӕд (2 Аз. 9:29).
12–14. а) Цӕуыл ахуыр кӕнӕм Хуыцауы ’рвыст пехуымпары хабарӕй? ӕ) Хистӕр нӕлгоймӕгтӕ нын уынаффӕ куы раттынц, уӕд ӕнӕмӕнг цӕмӕн фӕхъӕуы Хуыцаумӕ скувын ӕмӕ уыцы уынаффӕйыл лӕмбынӕг ахъуыды кӕнын? Ӕрхӕсс цӕвиттон.
12 Фыццаг цы пехуымпары кой кодтам, уый зӕронд лӕгимӕ ацӕуыны размӕ Йегъовӕйӕ разамынд цӕуылнӕ бацагуырдта, уый тыххӕй Библийы ницы ис фыст. Чи зоны йын зӕронд лӕг цы загъта, йӕхи дӕр раст уый фӕндыд фехъусын. Цӕуыл ахуыр кӕнӕм мах уымӕй? Хъуамӕ ӕппындӕр ма дызӕрдыг кӕнӕм, Йегъовӕ нын цы дзуры, уый раст кӕй у ӕмӕ йын йӕ ныхасмӕ цыфӕндыйӕ дӕр хъусӕм.
13 Иуӕй-иутӕн уынаффӕ куы фӕдӕттынц, уӕд дзы фехъусынц ӕрмӕстдӕр, сӕхи цы фӕнды фехъусын, уый. Зӕгъӕм, ӕфсымӕрӕн зӕрдӕ ӕвӕрынц цавӕрдӕр куыстӕй, фӕлӕ йын уыцы куысты тыххӕй йӕ бинонтӕн ӕмӕ Хуыцауы хъуыддӕгтӕн фаг рӕстӕг нал уыдзӕн. Чи зоны, ӕфсымӕр хистӕр нӕлгоймагмӕ бацӕуа ӕмӕ дзы уынаффӕ ракура. Хистӕр нӕлгоймаг йӕ ныхас, гӕнӕн ис, райдайа афтӕ, зӕгъгӕ, мӕнӕн уыцы бар нӕй, ӕмӕ дын дзурон, дӕ бинонты куыд хъуамӕ дарай. Фӕлӕ йын стӕй, ӕвӕццӕгӕн, йӕ хъус ӕрдардзӕн, уыцы куыстмӕ бацӕуын ын йӕ уырнындзинадӕн тӕссаг цӕмӕй уыдзӕн, уымӕ. Цымӕ ӕфсымӕр хистӕр нӕлгоймагӕн ӕрмӕст йӕ фыццаг ныхӕстӕ бахъуыды кӕндзӕн? Ӕви лӕмбынӕг ахъуыды кӕндзӕн, уый фӕстӕ цы дзырдта, ууыл? Бӕлвырд у, ӕфсымӕры фыццаджыдӕр хъӕуы йӕ уырнындзинадыл ахъуыды кӕнын, ӕмӕ уымӕ гӕсгӕ рахӕссын уынаффӕ.
14 Кӕнӕ райсӕм ӕндӕр цӕвиттон: хо бацыд хистӕр нӕлгоймагмӕ ӕмӕ йӕ фӕрсы, йӕ ӕнӕуырнӕг лӕгӕй ацӕуа ӕви нӕ. Хистӕр нӕлгоймаг ын, кӕй зӕгъын ӕй хъӕуы, бамбарын кӕндзӕн, уыцы хъуыддаг йӕхӕдӕг кӕй хъуамӕ аскъуыддзаг кӕна. Уый фӕстӕ йын бакӕсдзӕн, уыцы фарстайы фӕдыл Библийы цы уынаффӕтӕ ис, уыдон (1 Кор. 7:10–16). Хистӕр нӕлгоймаджы ныхӕстыл хо, куыд ӕмбӕлы, афтӕ ахъуыды кӕндзӕн? Ӕви уымӕй размӕ дӕр йӕхимидӕг аскъуыддзаг кодта, йӕ лӕгӕй кӕй ацӕудзӕн? Хъуыддаг лыггӕнгӕйӕ хо хъуамӕ Хуыцаумӕ скува ӕмӕ лӕмбынӕг ахъуыды кӕна, Библийӕ йын цы уынаффӕ радтой, ууыл.
Бонзонгӕ у
15. Хуыцауы пехуымпары рӕдыдӕй цӕуыл ахуыр кӕнӕм?
15 Цӕуыл ма ахуыр кӕнӕм, Иудӕйӕ ’рвыст пехуымпарыл цы рӕдыд ӕрцыд, уымӕй? Ӕмбисӕндты 3:5 кӕсӕм: «Дӕ зӕрдӕ ӕгасӕй дӕр дар Йегъовӕйыл ӕмӕ дӕхи зондӕй ныфсджын ма у». Иудӕйӕ ’рвыст пехуымпар кӕд раздӕр йӕ зӕрдӕ Йегъовӕйыл дардта, уӕд ныр та йӕхи зонды фӕдыл ацыд. Ӕмӕ йын йӕ рӕдыд тынг зынаргъ слӕууыд: фесӕфта йӕ цард дӕр ӕмӕ Хуыцауы раз йӕ хорз ном дӕр. Куыд ирдӕй ӕвдисы йӕ хабар, Йегъовӕйӕн иузӕрдионӕй кӕй хъуамӕ лӕггад кӕнӕм ӕмӕ бонзонгӕ кӕй хъуамӕ уӕм, уый!
16, 17. Цы нын баххуыс кӕндзӕн, цӕмӕй Йегъовӕйыл алкӕддӕр иузӕрдион уӕм?
16 Зӕрдӕмӕ хиуарзон хъуыдытӕ ӕмхиц сты, ӕмӕ нӕ уымӕ гӕсгӕ нӕ зӕрдӕ арӕх фӕрӕдийын кӕны. «Адӕймаджы зӕрдӕйӕ мӕнгарддӕр ӕмӕ хӕлддӕр ницы ис» (Йер. 17:9). Раздӕр, чи зоны, нӕ ныфс дардтам нӕхиуыл, нӕхицӕй растдӕр нӕм ничи каст. Фӕлӕ цӕмӕй Йегъовӕйыл алкӕддӕр иузӕрдион уӕм, уый тыххӕй хъуамӕ ӕппынӕдзух нӕхиуыл кусӕм ӕмӕ нӕ зӕронд удыхъӕд ивӕм ногмӕ – «уыцы удыхъӕд та конд у Хуыцауы фӕндонмӕ гӕсгӕ ӕмӕ ӕцӕг рӕстдзинад ӕмӕ иузӕрдиондзинадмӕ гӕсгӕ». (Бакӕс Ефесӕгтӕм 4:22–24.)
17 «Зонд... ис бонзонгӕтӕм»,– фыст ис Ӕмбисӕндты 11:2. Бонзонгӕ куы уӕм ӕмӕ нӕ ныфс Йегъовӕйыл куы дарӕм, уӕд нӕхи бахиздзыстӕм стыр рӕдыдтытӕй. Гӕнӕн ис, хъуыддӕгтӕм раст цӕстӕй нал кӕсӕм, нӕ ныфс кӕй асаст, уый тыххӕй (Ӕмб. 24:10). Чи зоны, ӕмӕ ныл Хуыцауы хъуыддаджы цы хӕстӕ ис, уыдонӕй кӕцыдӕртӕй бафӕлладыстӕм ӕмӕ афтӕ хъуыды кӕнын райдыдтам, зӕгъгӕ, ӕз бирӕ азты дӕргъы фӕлӕггад кодтон, ӕмӕ ныр та иннӕтӕ фыдӕбон кӕнӕнт. Йе та, чи зоны, хъуыды кӕнӕм, зӕгъгӕ, иннӕ адӕм куыд цӕрынц, афтӕ ацӕрон. Фӕлӕ «нӕ тых нӕ бонӕй куы архайӕм» ӕмӕ «ӕдзухдӕр бирӕ [куы] фыдӕбон кӕнӕм Хицауы хъуыддаджы», уӕд нӕ зӕрдӕтӕ бахъахъхъӕндзыстӕм (Лук. 13:24; 1 Кор. 15:58).
18. Цавӕр уынаффӕ рахӕссӕм, уый куы нӕ зонӕм, уӕд куыд хъуамӕ бакӕнӕм?
18 Хатт нӕ фӕхъӕуы зын фарстатӕ лыг кӕнын, ӕмӕ арӕх бӕлвырд нӕ фӕзонӕм, хуыздӕр куыд уыдзӕн, уый. Куыд бакӕндзыстӕм уӕд? Нӕхимӕ растдӕр куыд кӕсы, афтӕ? Ахӕм уавӕры раст уаид Йегъовӕйӕ ӕххуыс курын. Иаковы 1:5 фыст ис: «Кӕд искӕмӕ зонд фаг нӕй, уӕд курӕд Хуыцауӕй,– уымӕн ӕмӕ уый алкӕмӕн дӕр дӕтты рӕдауӕй». Раст уынаффӕтӕ хӕссынӕн нӕ хъӕуы Хуыцауы сыгъдӕг уд, ӕмӕ нын ӕй нӕ уӕларвон Фыд ӕнӕмӕнгӕй ратдзӕн. (Бакӕс Лукайы 11:9, 13.)
Алкӕддӕр иузӕрдион у
19, 20. Фидарӕй цы хъуамӕ аскъуыддзаг кӕнӕм?
19 Соломон раст динӕй куы аздӕхт, уӕд Израилы скодта тынг хӕццӕ рӕстӕг. Ӕмӕ Хуыцауы лӕггадгӕнджыты иузӕрдиондзинад, зӕгъӕн куыд нӕй, афтӕ фӕлвӕрд цыди. Бирӕтӕ сӕ цавӕрдӕр хъуыддӕгты Хуыцауы зӕрдӕхудты бацыдысты. Фӕлӕ уӕддӕр уыд ахӕмтӕ, Йегъовӕйыл иузӕрдионӕй чи баззад.
20 Алы бон дӕр нӕ фӕхъӕуы хъуыды кӕнын: куыд бакӕнӕм? цавӕр уынаффӕ рахӕссӕм? Ӕмӕ уымӕй фӕлвӕрд цӕуы нӕ иузӕрдиондзинад. Фӕлӕ махӕн дӕр нӕ бон у фидар фӕлӕууын. Цӕй ӕмӕ алы хъуыддаджы дӕр Йегъовӕйыл иузӕрдион уӕм, ӕмӕ ӕппындӕр ма дызӕрдыг кӕнӕм, иузӕрдион ыл чи у, уыдонӕн дарддӕр дӕр кӕй арфӕ кӕндзӕн! (2 Сам. 22:26).
[Фиппаинаг]
a Зӕронд пехуымпарӕн Йегъовӕ йӕ мӕнгард мийы тыххӕй мӕлӕты тӕрхон рахаста ӕви нӕ, уый фӕдыл Библийы ницы фыст ис.
Цавӕр дзуапп ратдзынӕ?
• Нӕ зӕрдӕ-иу ӕхцамӕ ӕхсайын куы райдайа, уӕд-иу уыцы хъуыдытӕ нӕ зӕрдӕйӕ ӕдбындзар цӕмӕн хъуамӕ стонӕм?
• Цы нын баххуыс кӕндзӕн, цӕмӕй Йегъовӕйыл иузӕрдион уӕм?
• Бонзонгӕ куы уӕм, уӕд нын уый куыд баххуыс кӕндзӕн, цӕмӕй Хуыцауыл алкӕддӕр иузӕрдион уӕм?
[Нывтӕ 9 фарсыл]
Фӕлварӕн дын цы у, уымӕн «нӕ» зӕгъай, уый дын зын у?
[Нывтӕ 10 фарсыл]
Библийӕ дын уынаффӕ куы раттой, уӕд скувдзынӕ ӕмӕ йыл лӕмбынӕг ахъуыды кӕндзынӕ?