Уыдон кӕронӕй нал тӕрсынц
ГЭРИ ӕмӕ Ка́рены 1970-ӕм азты кӕрон фидарӕй уырныдта, тагъд бӕстысӕфт, кӕнӕ дунейӕн йӕ кӕрон, кӕй ӕрцӕудзӕн. Гъемӕ горӕтӕй хъӕумӕ ралыгъдысты ӕмӕ аскъуыддзаг кодтой, зӕгъгӕ, афтӕ цӕрдзыстӕм, цӕмӕй алцыдӕр нӕхӕдӕг амал кӕнӕм ӕмӕ нӕ ӕппындӕр макӕй ӕмӕ мацӕй ӕххуыс хъӕуа. Фӕндыди сӕ, кӕрон куы ’рцӕуа, уӕд аирвӕзын.
Цӕмӕй алыхуызон куыстытӕ кӕнын сахуыр уыдаиккой, уый тыххӕй балхӕдтой чингуытӕ, цыдысты алыхуызон курсытӕм ӕмӕ семинартӕм. Стӕй, кӕимӕ нӕ фӕныхас кодтой, ахӕм нал баззад. Уый фӕстӕ скодтой цӕхӕрадон ӕмӕ ныссагътой 50 карлик дыргъбӕласы. Самал кодтой мыггӕгтӕ ӕмӕ кусӕнгӕрзтӕ, сахуыр сты цӕхӕрадоны куыст кӕнын ӕмӕ тыллӕг ӕфснайын. Се ’мбӕлттӕй сӕ иу сахуыр кодта фос ӕргӕвдын ӕмӕ дзидза цӕхджын кӕнын ӕмӕ дзы консервтӕ аразын. Ка́рен базыдта, хъӕды цы кӕрдӕджытӕ зайы, уыдонӕй, стӕй сӕ уидӕгтӕй хӕрынӕн кӕцытӕ бӕззынц, уый, цӕмӕй сӕм куы ницыуал баззадаид, уӕд сын бахӕринаг исты уыдаид. Гэри та сахуыр хорӕй артаг аразын, скодта, сугӕй арт кӕм кодтой, ахӕм ӕфсӕйнаг пец ӕмӕ сарӕзта, алцыдӕр йӕхи мидӕг кӕмӕн уыди, ахӕм хӕдзар.
Ка́рен афтӕ зӕгъы: «Уыцы рӕстӕг дунейы уавӕр афтӕ ӕвзӕр уыд, ӕмӕ мӕм афтӕ касти, ӕмӕ тагъд рӕстӕджы зӕххыл адӕмӕн сӕ кой дӕр нал уыдзӕн». Гэри та зӕгъы: «Иннӕ ӕрыгӕттау ӕз дӕр тох кодтон расизмы ныхмӕ, Вьетнамы хӕст кӕй цыди, уый ныхмӕ ӕмӕ мӕнгард, гӕртамхор адӕмы ныхмӕ. Фӕлӕ, митӕй цы мӕсгуытӕ амадтон, уыдон тагъд атадысты. Мӕнмӕ афтӕ каст, ӕмӕ адӕм сӕхи къухӕй сӕхи фесафдзысты».
Гэри дарддӕр дзуры: «Иу изӕр мын уыди сӕрибар рӕстӕг, ӕмӕ Библи райстон ӕмӕ йӕ Матфейы чиныгӕй суанг Раргомады онг бакастӕн. Уый фӕстӕ та йӕ ногӕй кӕсын райдыдтон ӕмӕ йӕ бакастӕн иннӕ цыппар изӕрмӕ. Фӕндзӕм бон райсомӕй Ка́ренӕн афтӕ зӕгъын: „Мах цӕрӕм фӕстаг бонты. Тагъд рӕстӕджы Хуыцау зӕхх ӕвзӕрдзинадӕй ссыгъдӕг кӕндзӕн. Чи аирвӕздзӕн, уыцы адӕмы нӕ ссарын хъӕуы“». Гъемӕ Гэри ӕмӕ Ка́рен алы динтыл зилын райдыдтой ӕмӕ агуырдтой, кӕроны бонмӕ йӕхи чи цӕттӕ кодта, уыцы адӕмы.
Бирӕ нӕ рацыд, афтӕ сӕм ӕрбацыд иу Йегъовӕйы Ӕвдисӕн ӕмӕ семӕ Библи ахуыр кӕнын райдыдта. «Мӕ цинӕн кӕрон нал уыди,– дзуры Ка́рен,– уымӕн ӕмӕ, Библи цы дзуры, уый ӕцӕгдӕр ӕмбарын райдыдтон. Мӕн рагӕй фӕндыди базонын, кӕроны хабар ӕцӕгӕй куыд у, уый, ӕмӕ йӕ кӕдӕй-уӕдӕй базыдтон. Фидӕнӕй мӕ фӕзынди ныфс ӕмӕ нал тарстӕн. Фӕлӕ ноджы хуыздӕр та уый уыди, ӕмӕ ӕввахс кӕнын райдыдтон мӕ уӕларвон Фыдмӕ – Дунесфӕлдисӕг Стыр Хуыцаумӕ. Уый сси мӕ Хӕлар».
Мӕнӕ цы зӕгъы Гэри та: «Ӕз бамбӕрстон, мӕ цард дзӕгъӕлы кӕй нал у. Библи ахуыр кӕнынӕй нал ӕфсӕстӕн. Кастӕн Библийы пехуымпарӕдтӕ ӕмӕ, кӕй ӕххӕст кӕнынц, уымӕн бӕлвырдгӕнӕнтӕ иртӕстон, ӕмӕ мӕ фидарӕй бауырныдта, Хуыцау тагъд рӕстӕджы хъуыддагмӕ кӕй ӕрӕвналдзӕн. Ӕз ахъуыды кодтон, зӕгъгӕ, адӕм сӕхи хъуамӕ бӕллӕхмӕ ма цӕттӕ кӕной, фӕлӕ нын Хуыцау цы цард ӕрцӕттӕ кодта, уымӕ». Гэри ӕмӕ Ка́рен фидӕнмӕ ӕндӕр цӕстӕй кӕсын райдыдтой, цы уыдзӕн, уымӕй нал тарстысты. Дунейӕн кӕрон кӕй ӕрцӕудзӕн, уыцы хъуыды сӕ мӕты нал ӕфтыдта. Уыдоны фидарӕй бауырныдта, адӕмы цард хъизӕмайраг цы зындзинӕдты тыххӕй у, уыдонӕн Хуыцау кӕрон кӕй скӕндзӕн ӕмӕ зӕххӕй фӕстӕмӕ дзӕнӕт кӕй сараздзӕн.
Ныр та, 25 азы фӕстӕ, Гэри ӕмӕ Ка́рен цы кусынц? Ка́рен зӕгъы: «Ӕз архайын, цӕмӕй Йегъовӕ Хуыцауы ноджы тынгдӕр уарзон ӕмӕ йыл ноджы тынгдӕр ӕууӕндон. Ӕмӕ уыцы хъуыддаджы иннӕтӕн дӕр ӕххуыс кӕнын. Гариимӕ кӕрӕдзийӕн ӕххуыс кӕнӕм, цӕмӕй ӕнгом бинонтӕ уӕм ӕмӕ Хуыцауӕн иумӕ ӕмвӕнд-ӕмзондӕй лӕггад кӕнӕм. Мах нӕ хъуыддӕгтӕ рагацау пълан кӕнӕм ӕмӕ архайӕм, цӕмӕй кӕнӕм хуымӕтӕг цард. Афтӕмӕй нӕ бон у фылдӕр иннӕтыл хъуыды кӕнын ӕмӕ сын ӕххуыс кӕнын».
Гэри ма уыцы ныхӕстӕм бафтыдта: «Ӕз ӕдзухдӕр кувын, цӕмӕй Хуыцауы Паддзахад ӕрцӕуа ӕмӕ милуангай адӕмы сӕ зындзинӕдтӕй фервӕзын кӕна. Адӕмӕн уыцы Паддзахады тыххӕй хорз хабар цал хатты фӕдзурын, уал хатты фӕкувын, цӕмӕй Библийы фӕрцы иу адӕймаджы уӕддӕр бауадзон ныфс. Ӕмӕ мын Йегъовӕ уыцы куывдӕн ныр 25 азӕй фылдӕр дӕтты дзуапп. Мӕн дӕр ӕмӕ Ка́рены дӕр уырны, тагъд рӕстӕджы Йегъовӕ зӕххыл стыр ивындзинӕдтӕ кӕй скӕндзӕн. Фӕлӕ мах кӕронӕй нал тӕрсӕм» (Матфейы 6:9, 10; 2 Петры 3:11, 12).
[Ныв 9 фарсыл]
Гэри ӕмӕ Ка́рен Библийы фӕрцы иннӕты ныфс уадзынц ӕмӕ сын уый хӕссы циндзинад