Йесо йе ’мбалӕн баххуыс кӕнынмӕ цӕуылнӕ фӕтагъд кодта?

ЙЕСОМӔ Вифанийӕ ӕрбахастой ӕвзӕр хабар: йӕ хорз ӕмбал Лазӕр уыд тынг рынчын. Уыцы хабар ын чи фехъусын кодта, уыцы лӕджы рарвыстой Лазӕры хотӕ Марийӕ ӕмӕ Марфӕ. Уыдоны уырныдта, Йесойӕн йӕ бон кӕй у се ’фсымӕры сдзӕбӕх кӕнын, кӕд сӕм дард уыди, уӕддӕр. Цӕргӕ та кодтой Иорданы цӕугӕдоны иннӕ фарс. Йесо-иу уымӕй размӕ дӕр кӕйдӕрты сдзӕбӕх кодта, сӕ фарсмӕ-иу нӕ уыд, афтӕмӕй, ӕмӕ Лазӕры хотӕ уый зыдтой (Матфейы 8:5–13; Иоанны 11:1–3).

Хабархӕссӕг Йесойӕн, Лазӕр рынчын кӕй у, уый куы фехъусын кодта, уӕд Йесо йе ’мбалӕн баххуыс кӕныны тыххӕй ницы сарӕзта. Библийы фыст ис: «Дыууӕ боны [ма] баззад, кӕм уыди, уым» (Иоанны 11:6). Куыд хъуыды кӕныс, Йесо Лазӕрӕн баххуыс кӕнынмӕ цӕуылнӕ фӕтагъд кодта? ~a Цӕй, ӕмӕ йӕ базонӕм.

Йесо зыдта, Лазӕр кӕй амард. Уымӕ гӕсгӕ йӕ апостолтӕн загъта: «Цомут ногӕй Иудейӕмӕ». Апостолтӕ йӕ нӕ уагътой: «Ӕрӕджы дӕр ма дӕ Иудейӕйы адӕм дуртӕй куы мардтой, уӕд та ногӕй уырдӕм цӕуыс?» Йесо сын бамбарын кодта: «Не ’мбал Лазӕр бафынӕй, фӕлӕ ӕз цӕуын, цӕмӕй йӕ райхъал кӕнон».

Апостолтӕ йын загътой: «Хицау, кӕд бафынӕй, уӕд адзӕбӕх уыдзӕн». Уӕд сын Йесо комкоммӕ загъта: «Лазӕр амард». Стӕй сын загъта, дисы сӕ чи бафтыдта, ахӕм ныхӕстӕ: «Ӕз цин кӕнын, уым кӕй нӕ уыдтӕн, ууыл... Фӕлӕ цомут, ацӕуӕм ӕм».

Фома хъӕбатырӕй загъта: «Цомут мах дӕр, ӕмӕ йемӕ амӕлӕм». Фома зыдта, знӕгтӕ та ногӕй кӕй хъавдзысты Йесойы амарынмӕ, ӕмӕ тӕссаг уыд, апостолты дӕр куы амардтаиккой, уымӕй. Фӕлӕ уӕддӕр иууылдӕр Чырыстиимӕ ацыдысты. Иу-дыууӕ боны фӕстӕ ӕрхӕццӕ сты Лазӕры райгуырӕн горӕт Вифанимӕ. Уырдӕм Иерусалимӕй цӕуын хъуыди ӕртӕ километры (Иоанны 11:7–18).

Зоныс, Йесо цӕмӕн цин кодта, раздӕр кӕй не ’рбацыд? ~ Уымӕй размӕ дӕр Йесо кӕйдӕрты райгас кодта. Фӕлӕ-иу уыдоны мӕлӕтыл цалдӕр сахаты йеддӕмӕ нӕ рацыд (Лукайы 7:11–17, 22; 8:49–56). Лазӕры мӕлӕтыл та рацыд цалдӕр боны. Ӕмӕ ничи дызӕрдыг кодтаид, ӕцӕгдӕр мард кӕй уыд, ууыл.

Лазӕры хо Марфӕ куы фехъуыста, Йесо Вифанимӕ кӕй ӕрбацӕуы, уӕд йӕ размӕ разгъордта ӕмӕ йын загъта: «Хицау, ды ам куы уыдаис, уӕд ме ’фсымӕр нӕ амардаид». Йесо йын зӕрдӕ бавӕрдта: «Де ’фсымӕр райгас уыдзӕн». Марфӕ фӕстӕмӕ азгъордта ӕмӕ Марийӕйӕн сусӕгӕй загъта: «Ахуыргӕнӕг ам ис ӕмӕ дӕм дзуры».

Марийӕ уайтагъд фестад ӕмӕ Йесомӕ ацыд. Адӕм та афтӕ ахъуыды кодтой, ӕмӕ зӕппадзмӕ цӕуы, ӕмӕ уыдон дӕр йӕ фӕстӕ ацыдысты. Йесо Марийӕйы ӕмӕ, йемӕ чи ’рбацыд, уыцы адӕмы кӕугӕ куы федта, уӕд йӕхицӕн дӕр «йӕ цӕссыгтӕ ӕркалдысты». Уалынмӕ бахӕццӕ сты зӕппадзмӕ. Йӕ бахизӕныл уыди фӕлдӕхт дур. Йесо загъта: «Дур-ма иуварс айсут». Фӕлӕ Марфӕйы нӕ фӕндыд: «Хицау, афонмӕ стӕф кодта, ныр ыл цыппар боны рацыд».

Адӕм Чырыстимӕ байхъуыстой ӕмӕ дур айстой. Уый фӕстӕ Йесо Хуыцаумӕ скуывта ӕмӕ йын рагацау бузныг загъта, Лазӕры райгас кӕнынӕн ын тых кӕй ратдзӕн, уый тыххӕй. Стӕй Йесо хъӕрӕй загъта: «Лазӕр, ӕддӕмӕ рацу!» Ӕмӕ Лазӕр рацыд, «хӕцъилтӕй тыхт», афтӕмӕй. Уӕд Йесо загъта: «Райхалут ын йӕ хӕцъилтӕ, цӕмӕй йӕ бон цӕуын уа» (Иоанны 11:19–44).

Ныр ӕй бамбӕрстай, Йесо цӕуылнӕ тагъд кодта, уый? ~ Зыдта йӕ, гыццыл куы бафӕстиат уа, уӕд йӕ Фыд Йегъовӕйы ноджы тынгдӕр кӕй скадджын кӕндзӕн. Чырысти Лазӕры райгас кӕнынӕн хорз рӕстӕг кӕй равзӕрста, уымӕ гӕсгӕ йыл уый фӕрцы бирӕтӕ баууӕндыдысты (Иоанны 11:45). Цымӕ Йесойӕ нӕ бон цӕуыл у сахуыр кӕнын? ~

Уӕдӕ ды дӕр кӕс, ӕмӕ дын хорз фадат куы фӕуа, уӕд, Йегъовӕ цы диссаджы хъуыддӕгтӕ сарӕзта ӕмӕ нырма цы диссӕгтӕ сараздзӕн, уый тыххӕй иннӕтӕн радзур, зӕгъӕм, демӕ чи ахуыр кӕны, уыдонӕн ӕмӕ дӕ ахуыргӕнӕгӕн. Иуӕй-иу сывӕллӕттӕн та фадат куы фӕзыны, уӕд суанг урочы дӕр радзурынц, Хуыцауы Паддзахад адӕмӕн цы хорз цард сараздзӕн, уый тыххӕй. Кӕй зӕгъын ӕй хъӕуы, дӕуӕн дӕ бон мӕрдты ӕгас кӕнын нӕу. Фӕлӕ дӕ бон у иннӕтӕн баххуыс кӕнын, цӕмӕй базоной, мӕрдты райгас кӕнын йӕ бон кӕмӕн у ӕмӕ сӕ фидӕны ӕцӕгдӕр чи райгас кӕндзӕн, уыцы Хуыцауы.

[Фиппаинаг]

ФАРСТАТӔ:

▪ Цымӕ Йесо Лазӕрӕн баххуыс кӕнынмӕ цӕуылнӕ фӕтагъд кодта?

▪ Фома афтӕ цӕмӕн загъта: «Цомут мах дӕр, ӕмӕ йемӕ амӕлӕм»?

▪ Йесо Лазӕры цӕй фӕрцы райгас кодта?

▪ Куыд ис равдисӕн, Йесойӕ цӕуылдӕр кӕй сахуыр дӕ, уый?