Коррупци афтӕ парахат кӕм у, уыцы дунейы ӕнӕзӕрдӕхудтӕй цӕрӕн ис?

КӔД нӕ нӕ тӕригъӕдджын буар, ацы дуне ӕмӕ Хӕйрӕг рӕдийын кӕнынц, уӕддӕр сӕ ныхмӕ фӕлӕууын нӕ бон у. Цӕй фӕрцы? Уый тыххӕй хъуамӕ Хуыцауимӕ ӕнгом уӕм ӕмӕ Библийы цы закъӕттӕ ӕмӕ уагӕвӕрдтӕ ис, уыдон ӕххӕст кӕнӕм. Ӕркӕсӕм дыууӕ хабармӕ.

БИБЛИЙЫ ЦЫ ФЫСТ ИС? «Ацы дуне мауал фӕзмут» (Ромӕгтӕм 12:2).

Ӕцӕг хабар. Гильерми цӕры Бразилийы, у бизнесмен ӕмӕ йӕ куыст хорз цӕуы. Гильерми разы у, ӕнӕзӕрдӕхудтӕй цӕрын зын кӕй у, уыимӕ. «Адӕймаг бизнесмен куы уа, уӕд цӕмӕй йӕ пълӕнттӕй исты рауайа кӕнӕ ӕнӕ куыстӕй ма баззайа, уый тыххӕй ӕнцонтӕй райдайы сайын,– загъта Гильерми.– Бирӕтӕм гӕртӕмттӕ дӕттын кӕнӕ гӕртӕмттӕ исын ӕппындӕр ницы кӕсы. Ӕдзух ӕхцаимӕ кусай ӕмӕ ӕнӕзӕрдӕхудтӕй баззайай, уый тынг зын у».

Фӕлӕ Гильерми архайы, цӕмӕй алы хъуыддаджы дӕр ӕнӕзӕрдӕхудт уа. Уый загъта: «Кӕимӕ кусын, уыдонмӕ кӕд сайын тӕригъӕдыл нымад нӕу, уӕддӕр уымӕн гӕнӕн ис, цӕмӕй адӕймаг уыдоны хуызӕн ма суа. Раст цы у, ууыл хъуамӕ фидар хӕцай. Библийы фӕрцы бамбӕрстон, ӕнӕзӕрдӕхудт уай, уый стыр пайда кӕй хӕссы. Адӕймаг куы нӕ сайа, уӕд йӕ цӕсгом уыдзӕн сыгъдӕг, йӕ зӕрдӕйы уыдзӕн фарн ӕмӕ йӕхицӕн аргъ кӕндзӕн. Уымӕй уӕлдай ма ӕнӕзӕрдӕхудт адӕймаг, чи зоны, иннӕтыл дӕр хуыздӕрырдӕм фӕзына».

БИБЛИЙЫ ЦЫ ФЫСТ ИС? «Схъӕздыг уа, уымӕ чи тырны, уыдон та бахауынц фӕлварӕны ӕмӕ къӕппӕджы, ӕмӕ сӕм фӕзыны, адӕймаджы сӕфтмӕ ӕмӕ мӕлӕтмӕ чи кӕны, бирӕ ахӕм ӕнӕзонд ӕмӕ фыдбылыз фӕндтӕ. Уымӕн ӕмӕ адӕймаг ӕхцауарзаг куы уа, уӕд уымӕй цӕуы алыхуызон фыдбылызтӕ» (1 Тимофеймӕ 6:9, 10).

Ӕцӕг хабар. Андрейӕн ис, хъахъхъӕнӕн системӕтӕ чи ’вӕры, ахӕм фирмӕ. Уыцы систӕмӕтӕ кӕмӕн ӕвӕры, уыдонӕй иу у футболистты клуб. Иухатт иу хъазты фӕстӕ Андре бацыд клубы администрацимӕ, цӕмӕй йын йӕ фирмӕйӕн сӕ куысты тыххӕй ӕхца бафыстаиккой. Бухгалтертӕ билетты ӕхца нымадтой ӕмӕ уыдысты тынг ӕнӕвдӕлон. Ӕрӕгмӕ кӕй уыд, уымӕ гӕсгӕ хицау тагъд кодта, ӕмӕ Андрейӕн ӕмӕ иннӕ фирмӕты кусджытӕн се ’хца тагъд-тагъд айуӕрста.

Андре радзырдта, дарддӕр цы уыд, уый: «Хӕдзармӕ куы фӕцӕйцыдтӕн, уӕд ме ’хцатӕм ӕркастӕн, ӕмӕ уайтагъд бамбӕрстон, хицау мын, цы ’мбӕлд, уымӕй фылдӕр кӕй радта. Ӕвӕццӕгӕн ӕй зонгӕ дӕр ӕй никуы бакодтаид, уӕлдай кӕмӕн радта, уый. Фӕлӕ йӕ зыдтон, йӕхи дзыппӕй йын кӕй уыдзысты фидинаг. Фӕстӕмӕ аздӕхтӕн, футболы фанатты ’хсӕнты тыххӕй-фыдӕй ахызтӕн, стӕй хицаумӕ бацыдтӕн ӕмӕ мын уӕлдай цы ӕхца радта, уыдон ын фӕстӕмӕ радтон. Фырдисӕй мӕм кӕсгӕйӕ баззад – йе ’хца йын фӕстӕмӕ никуыма ничи ӕрбахаста».

Андре дарддӕр радзырдта: «Уыцы хабары фӕстӕ мӕм клубы хицау ноджы хуыздӕр цӕстӕй кӕсын райдыдта. Уӕдӕй нырмӕ бирӕ рӕстӕг рацыд. Уыцы клуб цы фирмӕтимӕ куыста, уыдонӕй иуимӕ дӕр нал кусы. Махимӕ та кусы абоны онг дӕр. Библийы уагӕвӕрдтӕм гӕсгӕ кӕй цӕрын, уый фӕрцы мын иннӕты ’хсӕн ис хорз ном, ӕмӕ уый тыххӕй Хуыцауӕй бузныг дӕн».

Хуыцауы ӕххуысӕй ӕвзӕрдзинады ныхмӕ нӕ бон фӕлӕууын кӕй у, уый нын нӕ ныфсыл ныфс ӕфтауы. Фӕлӕ адӕймагӕн иунӕгӕй коррупци фесафын йӕ бон никуы бауыдзӕн. Уый тынг зын у, афтӕ зын у, ӕмӕ ӕнӕххӕст адӕмӕн уый сӕ къухы никуы бафтдзӕн. Фӕлӕ, цымӕ, уый ууыл дзурӕг у, ӕмӕ коррупцийӕн кӕрон никуы уыдзӕн? Уый базондзынӕ иннӕ статьяйӕ.