Уӕ бинонтӕ ӕнгом ӕмӕ амондджын цӕй фӕрцы уыдзысты?

1–3. Бинонтӕ цавӕр зындзинӕдтыл ӕмбӕлынц? (Кӕс нывмӕ статьяйы райдианы.)

«ДӔ БИНОНТӔ амондджын уой, ууыл зӕрдиагӕй куы архайай, уӕд дын Йегъовӕ ӕнӕмӕнгдӕр арфӕ кӕндзӕн». Ацы ныхӕстӕ загъта, йӕ цардӕмбалимӕ 38 азы амондджынӕй чи цӕры, иу ахӕм нӕлгоймаг. Ӕцӕгдӕр, лӕг ӕмӕ усӕн сӕ бон у иумӕ амондджынӕй цӕрын ӕмӕ зын рӕстӕг кӕрӕдзийӕн ӕххуыс кӕнын (Ӕмб. 18:22).

² Ацы дунейы цӕргӕйӕ бинонтӕн сӕ цард алы хатт ӕнцон нӕ вӕййы. Библийы уый тыххӕй фыст ис: «Бинонтӕ чи скӕна, уыдонӕн сӕ царды фӕзындзӕн ног зындзинӕдтӕ» (1 Кор. 7:28). Цымӕ цавӕр зындзинӕдтӕ сты? Алы боны хъуыддӕгты тыххӕй иуӕй-иу бинонтӕн сӕ царды мӕсыг ӕнкъуысын райдайы. Лӕг дӕр ӕмӕ ус дӕр ӕнӕххӕст кӕй сты, уый тыххӕй иуӕй-иу хатт ныхасӕй кӕрӕдзийы зӕрдӕ фӕриссын кӕнынц ӕмӕ кӕрӕдзи нӕ бамбарынц (Иак. 3:2, 5, 8). Арӕх бинонты фӕхъӕуы бирӕ кусын ӕмӕ ма уыимӕ сӕ сывӕллӕттӕн дӕр рӕстӕг арын. Царды сагъӕсты бын кӕй фӕвӕййынц ӕмӕ кӕй бафӕллайынц, уый тыххӕй бирӕтӕн сӕ кӕрӕдзийӕн рӕстӕг ссарын тынг зын вӕййы. Ӕхцаимӕ баст фарстатӕ, низтӕ кӕнӕ ӕндӕр зындзинӕдты аххосӕй арӕх сӕ уарзт сабыргай ӕруазал вӕййы ӕмӕ кӕрӕдзийӕн нал фӕаргъ кӕнынц. Кӕрӕдзийыл тынг ӕнувыд чи зыны, суанг ахӕм бинонты цард дӕр, гӕнӕн ис, ӕмӕ фехӕла «тӕригъӕдджын буары хъуыддӕгты» тыххӕй. Уыцы хъуыддӕгтӕм хауынц хӕтындзинад ӕмӕ хӕлд митӕ, кӕрӕдзимӕ знаджы цӕстӕй кӕсын кӕнӕ кӕрӕдзийыл ӕнӕууӕнк кӕнын, кӕрӕдзимӕ мӕстӕй фыцын йе та загъд ӕмӕ хыл кӕнын (Гал. 5:19–21).

³ Ацы «фӕстаг бонты» адӕм хиуарзон кӕй сты ӕмӕ Хуыцауы кӕй нӕ нымайынц, уый дӕр бинонты цардыл ӕвзӕрырдӕм фӕзыны (2 Тим. 3:1–4). Уымӕй уӕлдай ма нын ис ӕгъатыр знаг, ӕмӕ йӕ фӕнды, цӕмӕй бинонты цард фехӕла. Апостол Петр дӕр нӕ уымӕн фӕдзӕхсы: «Уе знаг, Хӕйрӕг, богътӕгӕнаг домбайау разил-базил кӕны ӕмӕ агуры, кӕй аныхъуыра, уый» (1 Пет. 5:8; Рарг. 12:12).

4. Бинонтӕн цы баххуыс кӕндзӕн, цӕмӕй ӕнгом ӕмӕ амондджын уой?

⁴ Японийӕ иу нӕлгоймаг радзырдта: «Ӕхцаимӕ баст хъуыддӕгты тыххӕй сагъӕсты бын фӕдӕн. Уый тыххӕй мӕ мӕ цардӕмбалимӕ ныхас кӕнынмӕ дӕр нал ӕвдӕлд, ӕмӕ уый дӕр тынг тыхсти. Уымӕй уӕлдай ма ӕрӕджы йе ’нӕниздзинад тынг фӕцудыдта. Ӕппӕт уыдӕтты тыххӕй-иу хыл дӕр фестӕм». Кӕй зӕгъын ӕй хъӕуы, ацы дунейы цӕргӕйӕ зындзинӕдтыл ма ’мбӕлӕм, уый гӕнӕн нӕй, фӕлӕ нӕ бон у, ӕмӕ сӕ сӕрты хизӕм. Йегъовӕ бинонтӕн ӕххуыс кӕны, цӕмӕй кӕрӕдзиимӕ ӕнгом уой ӕмӕ амондджынӕй цӕрой. (Бакӕс Псалом 127:1.) Цӕй уӕдӕ аныхас кӕнӕм, бинонтӕн сӕ царды мӕсыг фидар кӕй фӕрцы уыдзӕн, фондз ахӕм хъуыддагыл. Стӕй ма аныхас кӕндзыстӕм, бинонты царды уарзондзинад куыд ахсджиаг у, ууыл дӕр.

УӔХИ ЙЕГЪОВӔЙЫЛ БӔТТУТ

5, 6. Лӕг ӕмӕ усӕн сӕ бон цы у аразын, цӕмӕй сӕхи Йегъовӕйыл бӕттой?

⁵ Лӕг ӕмӕ ус Йегъовӕйыл иузӕрдион куы уой ӕмӕ йӕ коммӕ куы кӕсой, уӕд зӕгъӕн уыдзӕн, ӕмӕ сӕ бинонты царды мӕсыгӕн ис фидар бындур. (Бакӕс Екклесиаст 4:12.) Нӕ уарзӕгой Хуыцауы разамындмӕ гӕсгӕ куы архайой, уӕд сӕхи Йегъовӕйыл бӕтдзысты. Библийы фыст ис: «Дӕ фӕндагӕй рахизырдӕм кӕнӕ галиуырдӕм куы фӕзилай, уӕд дӕ фӕстӕ хъусдзынӕ хъӕлӕс: „Мӕнӕ фӕндаг. Цӕут ацы фӕндагыл“» (Ис. 30:20, 21). Бинонтӕ иумӕ Библи куы фӕкӕсынц, уӕд цыма Йегъовӕйы хъӕлӕс «фӕхъусынц», афтӕ вӕййы (Пс. 1:1–3). Алы къуыри дӕр иумӕ Библи куы фӕахуыр кӕнынц ӕмӕ сын уыцы ахуыр цины хос куы вӕййы, стӕй сын сӕ ныфсыл ныфс куы бафтауы, уӕд кӕрӕдзимӕ ӕнгомдӕр фӕкӕнынц. Стӕй алы бон дӕр иумӕ Хуыцаумӕ куы фӕкувынц, уӕд сын ӕнцондӕр вӕййы Хӕйрӕджы дунейы ныхмӕ фидар фӕлӕууын.

⁶ Германийӕ иу ӕфсымӕр, Герхард, зӕгъгӕ, загъта: «Иуӕй-иу хатт цавӕрдӕр зындзинӕдты тыххӕй кӕнӕ, нӕ кӕрӕдзийы кӕй нӕ фембарӕм, уый тыххӕй нӕ циндзинад ӕрмынӕг вӕййы. Фӕлӕ нын Хуыцауы Ныхасы фыст уынаффӕтӕ баххуыс кӕнынц, цӕмӕй фӕразон уӕм ӕмӕ кӕрӕдзийӕн хатыр кӕнӕм». Герхард ма загъта, зӕгъгӕ, бинонтӕм уыцы миниуджытӕ куы нӕ уой, уӕд амондджын нӕ уыдзысты. Лӕг ӕмӕ ус уырнындзинадимӕ баст хъуыддӕгты иумӕ куы архайой, уӕд Йегъовӕмӕ ӕввахсдӕр кӕндзысты ӕмӕ кӕрӕдзиимӕ дӕр уыдзысты ӕнгом.

ЙӔ БИНОНТӔН ХОРЗ ХИСТӔР ЧИ У, АХӔМ ЛӔГ

7. Лӕг йӕ бинойнагӕн куыд хъуамӕ уа?

⁷ Бинонтӕ амондджын уыдзысты ӕви нӕ, уыцы хъуыддаджы бинонты хистӕрӕй бирӕ аразгӕ у. Библийы фыст ис: «Алы нӕлгоймагӕн дӕр йӕ хицау у Чырысти, сылгоймагӕн йӕ сӕрыхицау у нӕлгоймаг» (1 Кор. 11:3). Ацы ныхӕстӕ цӕуыл дзурӕг сты? Лӕг йӕ бинойнагӕн хъуамӕ уа, Йесо йӕ ахуыргӕнинӕгтӕн куыд уыд, афтӕ. Йесо ӕгъатыр ӕмӕ карз никуы уыд. Уый йӕ ахуыргӕнинӕгты уарзта ӕмӕ алкӕддӕр уыди хӕларзӕрдӕ, ӕмбаргӕ, фӕлмӕн ӕмӕ сӕрныллӕг (Матф. 11:28–30).

8. Нӕлгоймаг цы хъуамӕ араза, цӕмӕй йӕ йӕ бинойнаг уарза ӕмӕ йын кад кӕна?

⁸ Чырыстон нӕлгоймӕгтӕ хъуамӕ сӕ бинойнӕгтӕн афтӕ ма дзурой, ды мын хъуамӕ кад кӕнай, зӕгъгӕ. Фӕлӕ хъуамӕ «[сӕ] устытимӕ цӕрой, ӕмбарой сӕ, афтӕмӕй» ӕмӕ, «сылгоймаг лӕмӕгъдӕр кӕй у, уымӕ гӕсгӕ сын кад кӕной» (1 Пет. 3:7). Нӕлгоймаг йӕ бинойнагимӕ хъуамӕ ныхас кӕна уӕзданӕй ӕмӕ фӕлмӕнӕй, фӕнды адӕмы ’хсӕн уой, фӕнды – дыууӕйӕ. Афтӕмӕй бӕрӕг уыдзӕн, кӕй йын аргъ кӕны (Ӕмб. 31:28). Лӕг йӕ бинойнагӕн хорз сӕрыхицау куы уа, уӕд ӕй уый дӕр уарздзӕн ӕмӕ йын кад кӕндзӕн. Ӕмӕ Йегъовӕ дӕр сӕ бинонты цардӕн арфӕ кӕндзӕн.

СӔРНЫЛЛӔГ ӔМӔ КОММӔГӔС БИНОЙНАГ

9. Цӕмӕй уыдзӕн бӕрӕг, сылгоймаг йӕ сӕрыхицауӕн коммӕгӕс кӕй у, уый?

⁹ Йегъовӕйы удуӕлдай уарзтӕй кӕй уарзӕм ӕмӕ, цы уагӕвӕрдтӕ сфидар кодта, уыдонӕн кӕй аргъ кӕнӕм, уый не ’ппӕтӕн дӕр ӕххуыс кӕны, цӕмӕй «хъомысджын Хуыцауы раз [нӕхи] ӕрныллӕг кӕнӕм» (1 Пет. 5:6). Сылгоймаг Йегъовӕйы хицаудзинадӕн кӕй аргъ кӕны, уый равдисдзӕн, йӕ сӕрыхицаумӕ куы хъуса, уӕд. Библийы кӕсӕм: «Устытӕ, уӕ лӕгты коммӕ кӕсут, уымӕн ӕмӕ Чырыстийы фӕдылдзӕуджытӕн афтӕ ӕмбӕлы» (Кол. 3:18). Кӕй зӕгъын ӕй хъӕуы, афтӕ дӕр вӕййы, ӕмӕ усӕн йӕ лӕджы уынаффӕтӕй алкӕцы йӕ зӕрдӕмӕ ма фӕцӕуа. Фӕлӕ уыцы уынаффӕтӕ Хуыцауы закъӕтты ныхмӕ куы нӕ уой, уӕд коммӕгӕс бинойнаг бакӕндзӕн, йӕ лӕг куыд зӕгъы, афтӕ (1 Пет. 3:1).

10. Сылгоймаг йӕ лӕджы коммӕ цӕмӕн хъуамӕ кӕса?

¹⁰ Ус йӕ лӕгӕн у «ӕххуысгӕнӕг», ӕмӕ уый та у кадджын хӕс (Райд. 2:20). Бинонты цавӕрдӕр уынаффӕ рахӕссын куы хъӕуа, уӕд ус йӕ лӕгӕн йӕ хъуыды фӕлмӕнӕй бамбарын кӕндзӕн, фӕлӕ уӕддӕр йӕ коммӕ бакӕсдзӕн. Ӕмбаргӕ нӕлгоймаг та, йӕ бинойнаг цы зӕгъы, уымӕ лӕмбынӕг байхъусдзӕн (Ӕмб. 31:10–31). Сылгоймаг йӕ сӕрыхицауы коммӕ куы кӕса, уӕд се ’хсӕн уыдзӕн фарн ӕмӕ сӕ бинонты цардӕй райгонд уыдзысты. Стӕй ма зондзысты, афтӕмӕй Йегъовӕйы зӕрдӕ кӕй рухс кӕнынц, ӕмӕ сын уый дӕр уыдзӕн стыр цины хос (Еф. 5:22).

КӔРӔДЗИЙӔН ЗӔРДӔЙӔ ХАТЫР КӔНУТ

11. Бинонтӕ кӕрӕдзийӕн цӕмӕн хъуамӕ хатыр кӕной?

¹¹ Цӕмӕй лӕг ӕмӕ усӕн сӕ бинонты цард ма фехӕла, уый тыххӕй хъуамӕ кӕрӕдзийӕн хатыр кӕнын зоной. Бинонтӕ кӕрӕдзийӕн куы барой ӕмӕ зӕрдӕйӕ куы хатыр кӕной, уӕд ӕнгомӕй-ӕнгомдӕр кӕндзысты (Кол. 3:13). Фӕлӕ лӕг ӕмӕ ус кӕрӕдзийы рӕдыдтытӕ куы нӕ рох кӕной ӕмӕ сӕ сӕ кӕрӕдзийы цӕстмӕ куы дарой, уӕд кӕрӕдзийӕ дардӕй-дарддӕр кӕндзысты. Хӕдзары къул куы афӕзтытӕ вӕййы, уӕд раздӕрау фидар нал вӕййы. Ӕмӕ лӕг ӕмӕ ус дӕр кӕрӕдзийы зӕрдӕтӕ куы риссын кӕной, уӕд сын зынӕй-зындӕр уыдзӕн кӕрӕдзийӕн хатыр кӕнын. Фӕлӕ лӕг ӕмӕ ус Йегъовӕйы куы фӕзмой ӕмӕ хатыр кӕнын куы зоной, уӕд бинонтӕ кӕрӕдзийӕн адджындӕр уыдзысты (Мих. 7:18, 19).

12. Куыд ӕмбаргӕ у, уарзондзинад «бирӕ тӕригъӕдтӕ хатыр кӕны», зӕгъгӕ?

¹² Ӕцӕг уарзондзинад, «ӕвзӕрӕй йын чи цы ракодта, уыдон нӕ нымайы» ӕмӕ «бирӕ тӕригъӕдтӕ хатыр кӕны» (1 Кор. 13:4, 5; бакӕс 1 Петры 4:8). Ӕндӕр ныхӕстӕй, искӕй куы уарзай, уӕд ын хатыр кӕндзынӕ, цасфӕнды ма рӕдийа, уӕддӕр. Апостол Петр Йесойы куы бафарста, иннӕтӕн цал хатты хъуамӕ ныххатыр кӕна, уӕд ын уый загъта, «ӕвдай авд хатты», зӕгъгӕ (Матф. 18:21, 22). Цымӕ Йесойы уымӕй цы зӕгъын фӕндыд? Афтӕмӕй йын бамбарын кодта, чырыстон иннӕтӕн кӕй хъуамӕ хатыр кӕна, цасфӕнды ма рӕдийой, уӕддӕр (Ӕмб. 10:12)a.

13. Хатыр кӕнын уын зын куы уа, уӕд уын цы баххуыс кӕндзӕн?

¹³ Иу хо, Аннетт, зӕгъгӕ, загъта: «Бинонтӕ кӕрӕдзийӕн сӕ рӕдыдтытӕ куы нӕ барой, уӕд мӕсты кӕндзысты, стӕй кӕрӕдзийыл дӕр нал ӕууӕнддзысты, ӕмӕ уый та бинонты цардӕн маргӕй уӕлдай нӕу. Лӕг ӕмӕ ус кӕрӕдзийӕн хатыр кӕнын куы зоной, уӕд та ӕнгомӕй-ӕнгомдӕр кӕндзысты ӕмӕ сӕ бинонты цардӕн фехӕлынӕй тӕссаг нӕ уыдзӕн». Цӕмӕй уын кӕрӕдзийӕн хатыр кӕнын ӕнцондӕр уа, уый тыххӕй кӕрӕдзийӕн аргъ кӕнут ӕмӕ бузныг дзурын зонут. Фиппайут-иу, кӕрӕдзийӕ цӕй тыххӕй раппӕлат, уый (Кол. 3:15). Афтӕ куы кӕнат, уӕд «а» ӕмӕ «о»-йӕ цӕрдзыстут ӕмӕ Хуыцауы хорзӕхӕй хайджын уыдзыстут (Ром. 14:19).

ЧЫРЫСТИЙЫ УЫНАФФӔМӔ ГӔСГӔ АРХАЙУТ

14, 15. Лукайы 6:31 стихы цавӕр уагӕвӕрд ис ӕмӕ бинонтӕ уыцы уагӕвӕрдмӕ гӕсгӕ куы архайой, уӕд сын уый куыд баххуыс кӕндзӕн?

¹⁴ Иннӕтӕ дын куы кад кӕной ӕмӕ дӕ куы нымайой, уӕд дын ӕхсызгон куыннӕ уыдзӕн. Стӕй дын ӕхсызгон куыннӕ уыдзӕн, лӕмбынӕг дӕм куы хъусой ӕмӕ дын дӕ хъуыдыйӕн куы аргъ кӕной. Фӕлӕ искуы ахӕм ныхас фехъуыстай, «уый мын куыд у, ӕз дӕр ын афтӕ уыдзынӕн», зӕгъгӕ? Иуӕй-иу хатт, чи зоны, нӕхӕдӕг дӕр нӕхинымӕр афтӕ фӕзӕгъӕм, ӕмӕ уый диссаг дӕр нӕу. Фӕлӕ Ӕмбисӕндты чиныджы фыст ис: «Афтӕ ма дзур: „Уый мын куыд бакодта, ӕз дӕр ын афтӕ бакӕндзынӕн“» (Ӕмб. 24:29). Йесо дӕр адӕмӕн бацамыдта, кӕрӕдзиимӕ хӕларӕй цӕрынӕн сын стыр ӕххуыс чи у, ахӕм уагӕвӕрд. Уый загъта: «Ӕмӕ уӕ куыд фӕнды, цӕмӕй уын адӕм уой, афтӕ сын ут уӕхӕдӕг дӕр» (Лук. 6:31). Йесойы уый зӕгъын фӕндыд, ӕмӕ иннӕтимӕ хъуамӕ уӕм, уыдон немӕ куыд сты, афтӕ нӕ, фӕлӕ нӕ куыд фӕндид, афтӕ. Уый та ууыл дзурӕг у, ӕмӕ хъуамӕ дӕ цардӕмбалӕн дӕттай, дӕхӕдӕг ӕм цӕмӕ ӕнхъӕлмӕ кӕсыс, уый.

¹⁵ Бинонтӕ ма кӕрӕдзиимӕ ӕнгом вӕййынц, лӕг дӕр ӕмӕ ус дӕр куы фӕархайынц, цӕмӕй сӕ цардӕмбалы зӕрдӕ мацӕмӕй фӕриссын кӕной. Лукайы 6:31 стихы цы уагӕвӕрд ис, уый тыххӕй Хуссар Африкӕйӕ иу нӕлгоймаг загъта: «Мӕ бинойнагимӕ ацы уагӕвӕрдмӕ гӕсгӕ фӕархайӕм. Кӕй зӕгъын ӕй хъӕуы, хатгай кӕрӕдзимӕ цӕйдӕр тыххӕй рамӕсты вӕййӕм, фӕлӕ нӕ дыууӕ дӕр фӕархайӕм, цӕмӕй, нӕ иу иннӕмӕ цы зӕрдӕйы ахастмӕ ӕнхъӕлмӕ кӕсы, йӕхӕдӕг дӕр ӕм ахӕм зӕрдӕ дара, ома кӕрӕдзийӕн аргъ кӕнӕм ӕмӕ кӕрӕдзи нымайӕм».

16. Лӕг ӕмӕ ус сӕхи цӕмӕй хъуамӕ хизой?

¹⁶ Дӕ цардӕмбалы хъӕндзинӕдты кой иннӕтӕн ма кӕн ӕмӕ дзы дӕ зӕрдӕмӕ цы миниуджытӕ нӕ цӕуы, уыдоны тыххӕй ма хъаст кӕн, суанг хынджылӕгӕй дӕр. Рох дӕ ма уӕд, лӕг ӕмӕ усы, тыхджындӕр чи у, хъӕрдӕр чи дзуры ӕмӕ зӕрдӕкъахӕн ныхӕстӕ фылдӕр чи зоны, уый фӕдыл ерыс кӕнын кӕй нӕ хъӕуы. Кӕй зӕгъын ӕй хъӕуы, не ’ппӕт дӕр ӕнӕххӕст кӕй стӕм, уый тыххӕй, чи зоны, иуӕй-иу хатт иннӕты фӕхъыг кӕнӕм. Фӕлӕ уый ууыл дзурӕг нӕу, ӕмӕ лӕг ӕмӕ усӕн уый бар ис, цӕмӕй кӕрӕдзи ныхасӕй ӕфхӕрой, кӕрӕдзи адӕмы цӕсты ӕфтауой, ноджы фыддӕр та – кӕрӕдзимӕ сӕ къух исой. (Бакӕс Ӕмбисӕндтӕ 17:27; 31:26.)

17. Нӕлгоймӕгтӕн сӕ бон куыд у, Лукайы 6:31 стихы цы уагӕвӕрд ис, уымӕ гӕсгӕ цӕрын?

¹⁷ Иуӕй-иу адӕмыхӕттытӕм нӕлгоймӕгтӕ сӕ лӕгдзинад равдисыны тыххӕй сӕ устыты фефхӕрынц кӕнӕ та сӕ фӕнӕмынц. Фӕлӕ Библи зӕгъы: «Йӕ маст уромын чи зоны, уый тыхджын адӕймагӕй хуыздӕр у, ӕмӕ йӕхиуыл хӕцын чи зоны, уый хуыздӕр у, горӕт чи басӕтты, уымӕй» (Ӕмб. 16:32). Цӕмӕй адӕймаг Йесо Чырыстийы хуызӕн хиуылхӕцгӕ уа, уый тыххӕй хъуамӕ уа фидар удыхъӕды хицау. Йӕ бинойнаджы ныхасӕй кӕнӕ хъуыддагӕй чи ӕфхӕры, уымӕ та лӕгдзинадӕн йӕ кой дӕр нӕй. Ахӕм адӕймаг Йегъовӕйы ӕмбал дӕр нал уыдзӕн. Псаломзарӕггӕнӕг Давид уыди тыхджын ӕмӕ хъӕбатыр адӕймаг ӕмӕ афтӕ загъта: «Куы смӕсты уат, уӕддӕр-иу тӕригъӕд ма саразут. Уӕ зӕгъинӕгтӕ-иу уӕхицӕн уӕ зӕрдӕты радзурут, уӕ хуыссӕныл хуысгӕйӕ, ӕмӕ-иу мацыуал зӕгъут» (Пс. 4:4).

«УӔ УӔЛӔ СКӔНУТ» УАРЗОНДЗИНАД

18. Бинонты царды уарзондзинад ахсджиаг цӕмӕн у?

¹⁸ Бакӕс 1 Коринфӕгтӕм 13:4–7. Бинонты царды уарзондзинад у ӕппӕты ахсджиагдӕр миниуӕг. Библийы фыст ис: «Уӕ зӕрдӕмӕ арф исут кӕрӕдзийы зын, ут хӕларзӕрдӕ, сӕрныллӕг, фӕлмӕн ӕмӕ бирӕфӕразон. [...] Фӕлӕ ма уӕм уымӕй уӕлдай уӕд [кӕнӕ «уӕ уӕлӕ скӕнут», фип.] уарзондзинад, уымӕн ӕмӕ уый хуызӕн ницы иу кӕны ӕмӕ ницы бӕтты кӕрӕдзийыл» (Кол. 3:12, 14). Лӕг ӕмӕ ус хъуамӕ кӕрӕдзийы удуӕлдай уарзтӕй уарзой ӕмӕ фӕзмой Йесо Чырыстийы – йӕ цард иннӕты тыххӕй раттынмӕ цӕттӕ чи уыд, уый. Бинонты ’хсӕн ахӕм уарзондзинад куы уа, уӕд, сӕ иумӕ цавӕрдӕр ӕвзӕр миниуӕг куы уа, исчи сӕ уӕззау низӕй куы фӕрынчын уа, ӕхца сын куы нӕ фаг кӕна кӕнӕ сӕ исчи йӕ цардӕмбалы хӕстӕджытимӕ куы нӕ фидауа, уӕд дӕр сӕ цард нӕ фехӕлдзӕн.

19, 20. а) Бинонтӕ цы хъуамӕ аразой, цӕмӕй кӕрӕдзиимӕ ӕнгом уой ӕмӕ амондджынӕй цӕрой? ӕ) Иннӕ статьяйӕ цы базондзыстӕм?

¹⁹ Цӕмӕй бинонтӕ амондджын уой, уый тыххӕй хъуамӕ кӕрӕдзи уарзой ӕмӕ кӕрӕдзийыл ӕнувыд уой. Зындзинӕдты рӕстӕг хъуамӕ сӕ бинонты цардыл сӕ къух ма ауигъой, фӕлӕ ӕппӕт тыхтӕй архайой, цӕмӕй кӕрӕдзимӕ ӕнгомдӕр кӕной. Йегъовӕйы ӕмӕ кӕрӕдзийы чи уарзы, уыцы бинонтӕ хъуамӕ цӕттӕ уой алыхуызон зындзинӕдтӕ иумӕ скъуыддзаг кӕнынмӕ, уымӕн ӕмӕ «уарзондзинадӕн алкӕддӕр алцыдӕр бантысы» (1 Кор. 13:8, фип.; Матф. 19:5, 6; Дзут. 13:4).

²⁰ Ацы «уӕззау рӕстӕг» бинонтӕн уӕлдай зындӕр у, цӕмӕй кӕрӕдзиимӕ ӕнгом уой ӕмӕ амондджынӕй цӕрой (2 Тим. 3:1). Фӕлӕ Йегъовӕйы ӕххуысы фӕрцы уымӕн гӕнӕн ис. Кӕй зӕгъын ӕй хъӕуы, бинонтӕ сӕхӕдӕг дӕр хъуамӕ архайой, цӕмӕй ацы дунейы хӕлд зондахастӕй ма фӕхъӕстӕ уой. Иннӕ статьяйӕ базондзыстӕм, нӕлгоймӕгтӕ ӕмӕ сылгоймӕгтӕн сӕ бинонты цард бахъахъхъӕнынӕн цы баххуыс кӕндзӕн, уый.