СӔЙРАГ ТЕМӔ | НӔ ДӔ ФӔНДЫ БИБЛИ АХУЫР КӔНЫН?

Алкӕмӕн дӕр йӕ бон у Библи ахуыр кӕнын

Йегъовӕйы Ӕвдисӕнты иууылдӕр зонынц, хорз хабар кӕй хъусын кӕнынц, уымӕй. Ӕгас дунейы дӕр ма адӕмимӕ Библи дӕр кӕй фӕахуыр кӕнынц, уый зоныс?

Нӕлгоймагимӕ Библи ахуыр кӕнынц йӕ куысты

2014 азы 8 милуанӕй фылдӕр Йегъовӕйы Ӕвдисӕны 240 бӕстӕйы алы мӕй дӕр Библи ахуыр кодтой иу-9 500 000 адӕймагимӕa. Ахъуыды-ма кӕн, немӕ Библи чи ахуыр кӕны, уыдоны нымӕц у бирӕ бӕстӕты цӕрджыты нымӕцӕй фылдӕр, ӕмӕ ахӕм бӕстӕтӕ сты иу-140 бӕрц!

Цӕмӕй адӕм Библи ахуыр кӕной, уый тыххӕй Йегъовӕйы Ӕвдисӕнтӕ алы аз дӕр ныммыхуыр кӕнынц иу миллиард ӕмӕ ӕрдӕг Библитӕ, чингуытӕ, журналтӕ ӕмӕ ӕндӕр публикацитӕ. Ныммыхуыр сӕ кӕнынц иу-700 ӕвзагыл! Ахӕм куыст никуы ничи кодта! Ӕмӕ уыцы куысты фӕрцы алкӕмӕн дӕр йӕ бон у Библи ахуыр кӕнын, цы ӕвзагыл ӕй фӕнды, ууыл.

«Скъолайы ахуыр кӕнын нӕ уарзтон. Фӕлӕ ацы ахуыр мӕ зӕрдӕмӕ тынг цыди. Цы-иу базыдтон, уый-иу мын ӕрхаста ӕцӕг удӕнцой!» (Катлего, Хуссар Африкӕ).

«Библи кӕй ахуыр кодтон, уый фӕрцы ме ’ппӕт фарстатӕн дӕр дзуапп ссардтон, мӕ зӕрдӕ тынг барад» (Бертӕ, Мексикӕ).

«Библи ахуыр кодтон хӕдзары, мӕхи кӕд фӕндыд, уыцы рӕстӕг. Уымӕй хуыздӕр ма цы хъуамӕ уа!» (Эсекьель, Бразили).

«Арӕхдӕр-иу ахуыр кодтон 15–30 минуты, иуӕй-иу хатт та фылдӕр, куыд мын-иу уади, уымӕ гӕсгӕ» (Винианӕ, Австрали).

«Библи ахуыр кӕныны тыххӕй мӕ ӕхца фидын нӕ хъуыди. Уый диссаг нӕу?!» (Эйми, Бенин).

«Библи мемӕ чи ахуыр кодта, уымӕ цас фӕразондзинад уыди ӕмӕ куыд хӕларзӕрдӕ адӕймаг уыди, уый диссаг у. Хорз ӕмбӕлттӕ систӕм» (Карен, Цӕгат Ирланди).

«Библи чи фӕахуыр кӕны, уыдон се ’ппӕт Йегъовӕйы Ӕвдисӕнтӕ не свӕййынц» (Дентон, Англи).

БИБЛИ АХУЫР КӔНЫНЫ ФӔДЫЛ НӔМ АРӔХДӔР КӔЙ ФӔДӔТТЫНЦ, УЫЦЫ ФАРСТАТӔ

Библи куыд фӕахуыр кӕнут?

Библийӕ цавӕрдӕр темӕ райсӕм ӕмӕ йӕм цы стихтӕ хауынц, уыдоныл аныхас кӕнӕм. Зӕгъӕм, Библийӕ ис базонӕн дзуапп ахӕм фарстатӕн: чи у Хуыцау? Цыхуызӕн у? Ном ын ис? Кӕм цӕры? Уый гӕнӕн ис, ӕмӕ йӕм баввахс уӕм? Фӕлӕ ацы фарстатӕн Библийы дзуапп кӕм ис, уый адӕймаг куыд хъуамӕ базона?

Цӕмӕй адӕм сӕ фарстатӕн дзуапп базоной, уый тыххӕй фӕпайда кӕнӕм, Йегъовӕйы Ӕвдисӕнтӕ Библи ахуыр кӕнынӕн цы публикацитӕ рауагътой, уыдонӕй. Уыдон фыст ӕрцыдысты, цӕмӕй адӕймаг Библийы сӕйраг ахуырӕдтӕ бамбара. Ӕвзӕрст дзы цӕуынц бирӕ алыхуызон темӕтӕ, зӕгъӕм, Хуыцау, Йесо Чырысти, адӕм цӕмӕн хъизӕмар кӕнынц, мӕрдты райгасдзинад, куывд ӕмӕ ма бирӕ ӕндӕртӕ.

Кӕд ӕмӕ кӕм фӕахуыр кӕнут?

Адӕймагимӕ фӕахуыр кӕнӕм, кӕд ӕмӕ йӕ кӕм фӕфӕнды, уым.

Ахуыр цас фӕцӕуы?

Бирӕтӕ Библи ахуыр кӕнынӕн алы къуыри дӕр рахицӕн кӕнынц иу сахаты бӕрц. Фӕлӕ уый ӕнӕмӕнг нӕу. Демӕ ахуыр кӕндзысты, дӕхи цас фӕнды, уыйбӕрц. Иуӕй-иутӕ ахуыр кӕнынц къуыри ӕрмӕстдӕр 10–15 минуты.

Библи ахуыр кӕныны тыххӕй цас хъӕуы бафидын?

Библи ахуыр кӕныны тыххӕй ӕмӕ йӕ кӕй фӕрцы фӕахуыр кӕнынц, уыцы публикациты тыххӕй ӕхца фидын нӕ хъӕуы. Мах кӕнӕм, Йесо йӕ ахуыргӕнинӕгтӕн куыд загъта, афтӕ: «Лӕвар райстат – лӕвар дӕттут» (Матфейы 10:8).

Библи цас рӕстӕгмӕ ис сахуыр кӕнӕн?

Дӕ бон Библи ахуыр кӕнын у, цас дӕ фӕнды, уыйбӕрц рӕстӕг. Иу хаттӕн-иу цас ӕрмӕгыл аныхас кӕндзыстут, уый дӕхицӕй кӕнгӕ у.

Хъуамӕ ӕнӕмӕнгӕй Йегъовӕйы Ӕвдисӕн суон?

Нӕ. Алы адӕймаг дӕр йӕхӕдӕг ӕвзары, цӕуыл ӕууӕнддзӕн, уый, ӕмӕ мах уымӕн аргъ кӕнӕм. Фӕлӕ Библийы сӕйраг ахуырӕдтӕ куы базонай, уӕд уынаффӕ зонгӕ-зонын рахӕсдзынӕ.

Фылдӕр информаци кӕм ссарон?

Йегъовӕйы Ӕвдисӕнтӕ цӕуыл ӕууӕндынц ӕмӕ цы куыст кӕнынц, уый тыххӕй бӕлвырд информаци ис сӕ публикациты.

Библи ахуыр кӕныны тыххӕй кӕмӕн зӕгъон?

Ныффысс, ацы брошюрӕйы дыккаг фарсыл цы адристӕ ис, уыдонӕй иуыл.
Зӕгъ, хӕстӕг дӕм чи цӕры, уыцы Йегъовӕйы Ӕвдисӕнтӕн.

a Библи арӕхдӕр фӕахуыр кӕнынц иу адӕймагимӕ хицӕнӕй кӕнӕ цалдӕр адӕймагимӕ иумӕ.

ӔХХУЫС БИНОНТӔН

«Мӕ бинойнаг Библи ахуыр кӕнын куы райдыдта, уӕд тынг аивта. Уый нӕ бинонты цардыл хуыздӕрырдӕм фӕзынд. Тынг мӕ бацымыдис кодта, цы ахуыр кӕны, уый, ӕмӕ ӕз дӕр ахуыр кӕнын райдыдтон. Цы базыдтон, уый фӕрцы ӕз дӕр хуыздӕрырдӕм аивтон. Библийы ахуыр нын тынг баххуыс кодта, ӕмӕ абон „а“ ӕмӕ „о“-йӕ цӕрӕм» (Эсекьель).

«Библи ахуыр кӕнын куы райдыдтон, уӕд мӕ наркотиктӕ ӕмӕ мӕ нозт ныууагътон ӕмӕ мӕ маст уромын сахуыр дӕн. Мӕ хӕдзар фӕсыгъдӕгдӕр ӕмӕ фӕаивдӕр. Мӕ бинонтӕн фылдӕр аргъ кӕнын райдыдтон ӕмӕ мӕм ныр уымӕй хуыздӕр ницы кӕсы, цӕмӕй сын хорзӕй исты саразон. Абон бирӕ амондджындӕр дӕн» (Карен).

«Библи кӕй ахуыр кодтон, уый тыххӕй мыл иуӕй-иутӕ худтысты. Фӕлӕ мӕ лӕг мӕ фарс рахӕцыд. Загъта мын: „Адӕм цы дзурынц, уый мӕнмӕ нымады дӕр нӕу. Ӕз ӕй уынын, хуыздӕрырдӕм кӕй аивтай. Мӕн ӕндӕр ницы хъӕуы. Макӕмӕ хъус! Дӕ ахуыры кой кӕн!“. Афтӕ амондджын никуы уыдыстӕм!» (Винианӕ).