Де ’фсарм дын хорз уынаффӕгӕнӕг у?

1, 2. Ӕфсармӕй нӕ чи схайджын кодта ӕмӕ нын ӕфсарм кӕй ис, уый тыххӕй бузныг цӕмӕн хъуамӕ уӕм?

ЙЕГЪОВӔ ХУЫЦАУ адӕмы ахӕм сӕрибардзинадӕй схайджын кодта, ӕмӕ сӕхи бон у уынаффӕтӕ хӕссын. Ӕмӕ цӕмӕй раст уынаффӕтӕ хӕссӕм, уый тыххӕй нын Йегъовӕ радта ӕххуысгӕнӕг – ӕфсарм. Ӕфсарм у, раст цы у ӕмӕ цы нӕу, уый ӕвзарын нӕ бон кӕй фӕрцы у, уыцы миниуӕг. Не ’фсарм нын, раст цы у, уый куы амона, уӕд хорз хъуыддӕгтӕ араздзыстӕм ӕмӕ нӕхи ӕвзӕрдзинадӕй хиздзыстӕм. Ӕфсарм нӕм кӕй ис, уымӕй бӕрӕг у, Йегъовӕ нӕ кӕй уарзы ӕмӕ йӕ кӕй фӕнды, цӕмӕй хорздзинад аразӕм.

² Абон иуӕй-иутӕ, кӕд Библийы уагӕвӕрдтӕ нӕ зонынц, уӕддӕр хорз хъуыддӕгтӕ аразынц ӕмӕ ӕвзӕрдзинадӕй се сӕфт уынынц. (Бакӕс Ромӕгтӕм 2:14, 15.) Цымӕ цӕмӕн? Уымӕн ӕмӕ сӕм ӕфсарм ис. Ӕфсарм бирӕты уромы алыхуызон ӕвзӕр хъуыддӕгтӕй. Ахъуыды-ма кӕн, адӕммӕ ӕфсарм куы нӕ уыдаид, уӕд дуне цы уавӕры уыдаид! Ӕвӕццӕгӕн, ноджы фылдӕр фыдхъуыддӕгты тыххӕй хъуыстаиккам. Ӕмӕ Йегъовӕйӕ бузныг куыннӕ стӕм, адӕмы ӕфсармӕй кӕй схайджын кодта, уый тыххӕй!

3. Не ’фсарм нын ӕмбырды куыд ӕххуыс кӕны?

³ Ӕфсарм ахуыр кӕнын кӕй хъӕуы, ууыл адӕмӕн сӕ фылдӕр хъуыды дӕр нӕ кӕнынц. Фӕлӕ Йегъовӕйы лӕггадгӕнджыты фӕнды, цӕмӕй сын се ’фсарм, раст цы у, уый амона, уымӕн ӕмӕ сын уӕд ӕмбырды иудзинад бахъахъхъӕнын ӕнцондӕр уыдзӕн. Мах фӕнды, цӕмӕй-иу нын не ’фсарм нӕ зӕрдыл ӕрлӕууын кӕна, хорз ӕмӕ ӕвзӕр цы у, уый тыххӕй Библийы цы уагӕвӕрдтӕ ис, уыдон. Фӕлӕ цӕмӕй не ’фсарм ахуыр кӕнӕм ӕмӕ нын, раст цы у, уый амона, уый тыххӕй, Библи цы дзуры, уый ӕрмӕст зонын фаг нӕу. Хъуамӕ Хуыцауы уагӕвӕрдтӕ уарзӕм ӕмӕ, нӕ пайдайӕн кӕй сты, уый ӕмбарӕм. Павел ныффыста: «Ацы фӕдзӕхстӕн... йӕ нысан уый у, цӕмӕй нӕм уа, сыгъдӕг зӕрдӕйӕ, сыгъдӕг цӕсгомӕй ӕмӕ ӕнӕхин уырнындзинадӕй чи цӕуы, ахӕм уарзондзинад» (1 Тим. 1:5). Не ’фсарм куы ахуыр кӕнӕм ӕмӕ нын цы дзуры, уымӕ куы хъусӕм, уӕд Йегъовӕйы тынгдӕр уарздзыстӕм ӕмӕ йыл тынгдӕр ӕууӕнддзыстӕм. Стӕй ма уӕд бӕрӕг уыдзӕн, Йегъовӕимӕ тынг ӕнгом кӕй стӕм ӕмӕ нӕ йӕ зӕрдӕ рухс кӕнын тынг кӕй фӕнды. Не ’фсарм нын цы фӕдзуры, уымӕй бӕрӕг вӕййы, ӕцӕгӕй цавӕр адӕймӕгтӕ стӕм, уый.

4. Нӕ бон куыд у не ’фсарм ахуыр кӕнын?

⁴ Фӕлӕ нӕ бон куыд у не ’фсарм ахуыр кӕнын? Хъуамӕ ӕдзухдӕр Библи кӕсӕм, цы бакӕсӕм, ууыл лӕмбынӕг хъуыды кӕнӕм ӕмӕ Йегъовӕмӕ кувӕм, цӕмӕй нын ӕххуыс кӕна, цы базонӕм, уымӕ гӕсгӕ цӕрынӕн. Уӕдӕ Библийы фыст хабӕрттӕ ӕмӕ закъӕттӕ зонын фаг нӕу. Библи куы фӕахуыр кӕнӕм, уӕд нӕ нысан хъуамӕ уа Йегъовӕйы хуыздӕр базонын. Хъуамӕ базонӕм, цавӕр Хуыцау у, цы уарзы ӕмӕ цы нӕ уарзы. Ӕмӕ нын уый фӕрцы бирӕ ӕнцондӕр уыдзӕн, Йегъовӕйы цӕсты хорз ӕмӕ ӕвзӕр цы у, уый бамбарын. Не ’фсарм цас фылдӕр ахуыр кӕнӕм, уыйас нын хуыздӕр уайдзӕн, Йегъовӕ куыд хъуыды кӕны, афтӕ хъуыды кӕнын.

5. Ацы статьяйы цӕмӕ ӕркӕсдзыстӕм?

⁵ Фӕлӕ-ма ахъуыды кӕнӕм: не ’фсарм нын раст уынаффӕтӕ хӕссынӕн куыд ӕххуыс кӕндзӕн? Нӕ бон куыд у, не ’мчырыстӕттӕн се ’фсарм цы дзуры, уымӕн аргъ кӕнын? Ӕмӕ нӕ не ’фсарм хорз хъуыддӕгтӕм куыд разӕнгард кӕндзӕн? Ӕркӕсӕм, не ’фсарм нын кӕм ӕххуыс кӕндзӕн, ӕртӕ ахӕм хъуыддагмӕ: 1) ӕнӕниздзинад, 2) ирхӕфсӕнтӕ ӕмӕ 3) уацамынд.

ӔМБАРГӔ У

6. Не ’нӕниздзинадимӕ баст фарстаты нӕ цавӕр уынаффӕтӕ рахӕссын фӕхъӕуы?

⁶ Библи нӕ фӕдзӕхсы, цӕмӕй нӕхи хизӕм, зиан нын чи ӕрхӕсдзӕн, ахӕм хъуыддӕгтӕй ӕмӕ алцӕмӕй дӕр бӕрц зонӕм, зӕгъӕм, хӕрд ӕмӕ нозтӕй (Ӕмб. 23:20; 2 Кор. 7:1). Библийы уынаффӕтӕм куы фӕхъусӕм, уӕд уый не ’нӕниздзинадыл хорзырдӕм фӕзыны. Фӕлӕ уӕддӕр абон рынчын дӕр кӕнӕм ӕмӕ зӕронд дӕр. Иуӕй-иу бӕстӕты адӕмӕн сӕ бон у сӕхи кӕнӕ дохтыртӕм дзӕбӕх кӕнын кӕнӕ та ӕндӕр хосгӕнджытӕм. Ӕмӕ филиалтӕ арӕх райсынц, хотӕ ӕмӕ ’фсымӕртӕ алыхуызон хос кӕныны мадзӕлтты тыххӕй кӕм фӕфӕрсынц, ахӕм писмотӕ. Бирӕтӕ сӕ фӕфӕрсынц: «Йегъовӕйы лӕггадгӕнӕгӕн йӕ бон у ахӕм ӕмӕ ахӕм мадзалы фӕрцы йӕхи дзӕбӕх кӕнын?»

7. Нӕхи куыд дзӕбӕх кӕндзыстӕм, уый фӕдыл нын уынаффӕ рахӕссынӕн цы баххуыс кӕндзӕн?

⁷ Нӕдӕр филиалӕн, нӕдӕр хистӕр нӕлгоймӕгтӕн ис уый бар, цӕмӕй искӕмӕн дзурой, йӕхи куыд хъуамӕ дзӕбӕх кӕна, уый, адӕймаг сӕ фӕрсгӕ куы кӕна, уӕд дӕр (Гал. 6:5). Фӕлӕ хистӕр нӕлгоймӕгтӕн сӕ бон у адӕймагӕн йӕ хъус ӕрдарын, Йегъовӕ цы зӕгъы, уымӕ, цӕмӕй йӕхӕдӕг раст уынаффӕ рахӕсса. Зӕгъӕм, Хуыцау бафӕдзӕхста, цӕмӕй нӕхи хизӕм тугӕй (Хъуыд. 15:29). Уыцы фӕдзӕхст бӕлвырд ӕмбарын кӕны, чырыстонӕн йӕ бон кӕй нӕу, туг кӕнӕ туджы цыппар сӕйраг хайӕ искӕцы кӕм ис, ахӕм хостӕй дзӕбӕх кӕнын. Ӕмӕ дзырд гыццыл фракцитыл, ома, туджы цыппар хайӕ кӕй рахицӕн кӕнынц, уыдоныл, куы цӕуа, уӕд дӕр чырыстонӕн йе ’фсарм, чи зоны, уый бар ма ратта, цӕмӕй сыл сразы уаa. Нӕхи куыд дзӕбӕх кӕндзыстӕм, уый аскъуыддзаг кӕнын нӕ куы хъӕуа, уӕд ма нын Библийӕ цавӕр уынаффӕ баххуыс кӕндзӕн?

8. Нӕхи куыд дзӕбӕх кӕндзыстӕм, уый скъуыддзаг кӕнгӕйӕ нын Филиппӕгтӕм 4:5 куыд баххуыс кӕндзӕн?

⁸ Ӕмбисӕндты 14:15 стихы фыст ис: «Ӕвӕлтӕрд алы ныхасыл дӕр ӕууӕнды, ӕмбаргӕ адӕймаг та хъуыды кӕны йӕ къахдзӕфтыл». Абон цы низтӕ ис, уыдонӕй иуӕй-иутӕн хос нӕма ӕрхъуыды кодтой. Ӕмӕ нын, чи зоны, исчи цавӕрдӕр хосӕй кӕнӕ хос кӕныны мадзалӕй дзура, зӕгъгӕ, уыцы низӕй дзӕбӕх кӕны. Фӕлӕ уыцы ныхӕстӕн бӕлвырдгӕнӕнтӕ куы нӕ уа, афтӕмӕй сыл куы баууӕндӕм, уӕд уый зондыл дзурӕг нӕ уыдзӕн. Павел ныффыста: «Уе ’мбаргӕдзинадӕй уӕ зонӕд алчидӕр» (Фил. 4:5). Ӕмбаргӕдзинад нын баххуыс кӕндзӕн, цӕмӕй нын царды сӕйрагдӕр не ’нӕниздзинадимӕ баст хъуыддӕгтӕ ма уой, фӕлӕ Йегъовӕйӕн лӕггад кӕнын. Не ’нӕниздзинад нын ӕппӕты ахсджиагдӕр куы суа, уӕд ӕрмӕст нӕхиуыл мӕт кӕнын райдайдзыстӕм (Фил. 2:4). Мах зонӕм, ацы дунейы ӕппындӕр ма рынчын кӕнӕм, уый гӕнӕн кӕй нӕй. Уымӕ гӕсгӕ нын сӕйрагдӕр хъуамӕ уа Йегъовӕйӕн лӕггад кӕнын. (Бакӕс Филиппӕгтӕм 1:10.)

9. Ромӕгтӕм 14:13, 19 стихтӕм гӕсгӕ, не ’нӕниздзинадимӕ баст фарстаты фӕдыл уынаффӕтӕ куы хӕссӕм, уӕд нӕ зӕрдыл цы хъуамӕ дарӕм? Не ’хсӕн цы иудзинад ис, уымӕн тӕссаг кӕд вӕййы?

⁹ Ӕмбаргӕ чырыстон иннӕтӕн тыхӕй нӕ хъардзӕн, йӕ хъуыдымӕ гӕсгӕ раст цы у, уый. Иу бӕстӕйы иу бинонтӕ хотӕ ӕмӕ ’фсымӕртӕн ӕппынӕдзух цавӕрдӕр хостӕй (пищевые добавки) ӕмӕ цавӕрдӕр диетӕйӕ ӕппӕлыдысты. Ӕмӕ кӕйдӕрты сразы кодтой, цӕмӕй уыцы хостӕ нуазой, кӕйдӕрты та – нӕ. Фӕлӕ уыцы хостӕ ӕмӕ диетӕ хотӕ ӕмӕ ’фсымӕртӕн куы нӕ баххуыс кодтой, уӕд сӕм бирӕтӕ фӕхӕрам сты. Уыцы бинонтӕн сӕхи бар уыди, сӕхицӕн куыд хос кӕндзысты, уый. Фӕлӕ цавӕрдӕр хос кӕныны мадзӕлтты тыххӕй ӕмбырды иудзинад тӕссаг уавӕры кӕй ӕппӕрстой, уый цымӕ ӕмбаргӕдзинадыл дзурӕг уыд? Раджы заманты Ромы цы чырыстӕттӕ цард, уыдон дӕр цавӕрдӕр хӕринаг ӕмӕ цавӕрдӕр бӕрӕгбӕтты тыххӕй иухуызон нӕ хъуыды кодтой. Цымӕ сын Павел цавӕр уынаффӕ радта? Павел загъта: «Чидӕр иу бон иннӕмӕй ахсджиагдӕрыл нымайы, кӕмӕндӕр та бонтӕ иууылдӕр ӕмхуызон сты. Алкӕй дӕр хъуамӕ фидарӕй уырна, куыд хъуыды кӕны, уый раст кӕй у». Цӕй уӕдӕ иннӕтӕн цӕлхдур макуы суӕм. (Бакӕс Ромӕгтӕм 14:5, 13, 15, 19, 20.)

10. Иннӕтӕ цы уынаффӕтӕ рахӕссынц, уыдонмӕ фаутӕ цӕуылнӕ хъуамӕ хӕссӕм? (Кӕс нывмӕ статьяйы райдианы.)

¹⁰ Чи зоны, иуӕй-иу хатт нӕ фембарӕм, ӕмбырды чидӕр, ӕрмӕстдӕр йӕхимӕ чи хауы, уыцы хъуыддаджы фӕдыл цавӕрдӕр уынаффӕ цӕмӕн рахаста, уый. Цымӕ уӕд нӕхи куыд хъуамӕ дарӕм? Хъуамӕ-иу ын уайтагъд тӕрхон кӕнынмӕ ма фӕуӕм кӕнӕ йын йӕ хъуыды аивыныл ма архайӕм. Чи зоны йӕ нырма йе ’фсарм ахуыр кӕнын хъӕуы кӕнӕ та йын, чи зоны, бирӕ цӕмӕндӕрты бар нӕ дӕтты (1 Кор. 8:11, 12). Йе та нӕ, чи зоны, нӕхи ӕфсарм хъӕуы ахуыр кӕнын. Махӕй алчидӕр хъуамӕ йе ’нӕниздзинадимӕ баст фарстатӕ йӕхӕдӕг скъуыддзаг кӕна ӕмӕ йӕ уынаффӕтӕн дзуапп йӕхӕдӕг дӕтта.

ХОРЗ ИРХӔФСӔНТӔ ӔВЗАР

11, 12. Ирхӕфсӕнтӕ ӕвзаргӕйӕ нын Библи куыд ӕххуыс кӕны?

¹¹ Йегъовӕ адӕймаджы афтӕ сфӕлдыста, ӕмӕ йӕ фӕфӕнды баулӕфын, йӕхи аирхӕфсын, ӕмӕ йын уый пайда дӕр хӕссы. Соломон ныффыста, зӕгъгӕ, ис «рӕстӕг худынӕн» ӕмӕ «рӕстӕг кафынӕн» (Еккл. 3:4). Фӕлӕ ирхӕфсӕнтӕ се ’ппӕт пайда не сты ӕмӕ се ’ппӕт уӕнгрог нӕ кӕнынц. Стӕй хорз нӕ уыдзӕн, ирхӕфсӕнтыл ӕгӕр бирӕ рӕстӕг дӕр куы хардз кӕнӕм. Цымӕ нын не ’фсарм куыд баххуыс кӕндзӕн, ӕхсызгон нын чи уа ӕмӕ нын пайда чи фӕуа, ахӕм ирхӕфсӕнтӕ ӕвзарынӕн?

¹² Библи нӕ фӕдзӕхсы «тӕригъӕдджын буары хъуыддӕгтӕй». Уыцы хъуыддӕгтӕм хауынц «хӕтын, чъизи хъуыддӕгтӕ, хӕлд митӕ кӕнын, мӕнгхуыцӕуттӕн кувын, хинтӕ-кӕлӕнтӕ кӕнын, искӕмӕ знаджы цӕстӕй кӕсын, хыл кӕнын, ӕнӕууӕнк кӕнын, мӕстӕй рафыцын, загъд кӕнын, къордтыл, сектӕтыл дихтӕ кӕнын, хӕлӕг кӕнын, фыднозт кӕнын, ӕнӕуаг цӕл-минас кӕнын ӕмӕ ӕндӕр ахӕм хъуыддӕгтӕ». Павел ныффыста: «Ахӕм хъуыддӕгтӕ чи кӕны, уыдон Хуыцауы паддзахад бынӕн нӕ райсдзысты» (Гал. 5:19–21). Уӕдӕ нӕ алчидӕр хъуамӕ ахъуыды кӕна: «Иуӕй-иу спортивон хъӕзтыты вӕййы тыхми ӕмӕ быцӕутӕ, кӕнӕ адӕймаджы йӕ бӕстӕйы сӕрыл хӕцынмӕ фӕразӕнгард кӕнынц. Цымӕ мын ме ’фсарм ӕххуыс кӕны, цӕмӕй мӕхи ахӕм спортивон хъӕзтытӕй хизон? Бирӕ киноты ӕнӕгъдаудзинад, фыднозт кӕнӕ хинтӕ-кӕлӕнтӕ афтӕ февдисынц, цыма дзы ӕвзӕрӕй ницы ис. Ахӕм киномӕ бакӕсын мӕ куы фӕфӕнды, уӕд мын ме ’фсарм цы фӕдзуры?»

13. 1 Тимофеймӕ 4:8 стихы ӕмӕ Ӕмбисӕндты 13:20 стихы цы уынаффӕтӕ ис, уыдон нын ирхӕфсӕнтӕ ӕвзаргӕйӕ куыд ӕххуыс кӕндзысты?

¹³ Библийы уагӕвӕрдты фӕрцы нӕ бон у не ’фсарм ахуыр кӕнын, цӕмӕй нын ирхӕфсӕнтӕ ӕвзаргӕйӕ ӕххуыс кӕна. Зӕгъӕм, бирӕты хъуыдымӕ гӕсгӕ, адӕймаг хъуамӕ ӕдзухдӕр тренировкӕтӕ кӕна, уымӕн ӕмӕ, дам, спорт адӕймаджы уӕнгрог кӕны ӕмӕ йе ’нӕниздзинадӕн дӕр пайда у. Фӕлӕ Библийы фыст ис, зӕгъгӕ, «буары уӕнгтӕ фидар кӕнынӕй бирӕ пайда нӕй» (1 Тим. 4:8). Уымӕй уӕлдай ма хъуамӕ ахъуыды кӕнӕм, кӕимӕ тренировкӕ кӕндзыстӕм, ууыл дӕр. Ӕмбисӕндты 13:20 стихы фыст ис: «Зондджынтимӕ чи цӕуы, уый суыдзӕн зондджын, ӕнӕзӕндтимӕ чи лымӕн кӕны, уый та фыдбылызы бахаудзӕн». Уӕдӕ ахсджиаг у, цӕмӕй ирхӕфсӕнтӕ ӕвзаргӕйӕ хъусӕм, не ’фсарм нын цы дзуры, уымӕ.

14. Иу бинонтӕ куыд спайда кодтой, Ромӕгтӕм 14:2–4 цы уынаффӕ ис, уымӕй?

¹⁴ Кристиан ӕмӕ Даниелӕйӕн ис дыууӕ чызджы, ахуыр кӕнынц хистӕр кълӕсты. Кристиан загъта: «Бинонты ахуыры рӕстӕг ныхас кодтам ирхӕфсӕнтыл. Не ’ппӕт дӕр разы уыдыстӕм, иуӕй-иу ирхӕфсӕнтӕ хорз кӕй сты, иннӕтӕ та – нӕ. Нӕ чызджыты бафарстам, хорз ӕмбӕлттӕ схонӕн кӕй ис, зӕгъгӕ. Ӕмӕ сӕ иу загъта, скъолайы переменӕйы рӕстӕг ӕрыгон Ӕвдисӕнтӕй иуӕй-иутӕ сӕхи куыд фӕдарынц, уый йӕм раст кӕй нӕ кӕсы. Ӕмӕ йын зын уыди, уымӕн ӕмӕ йӕм афтӕ каст, ӕмӕ йӕхи уыдоны хуызӕн куы нӕ дара, уӕд ӕм ӕвзӕр цӕстӕй кӕсын райдайдзысты. Мах аныхас кодтам, алкӕмӕн дӕр йӕхи ӕфсарм кӕй ис, ууыл ӕмӕ адӕймаг, цы араздзӕн ӕмӕ йӕ рӕстӕг кӕимӕ ӕрвитдзӕн, уый ӕвзаргӕйӕ кӕй хъуамӕ хъуса, йе ’фсарм ын цы дзуры, уымӕ». (Бакӕс Ромӕгтӕм 14:2–4.)

15. Матфейы 6:33 фыст ныхӕстӕ нын куыд баххуыс кӕндзысты, нӕхи аирхӕфсын куы фӕнд кӕнӕм, уӕд?

¹⁵ Ирхӕфсӕнтыл дын цас рӕстӕг ацӕуы? Царды дын сӕйрагдӕр ӕмбырдтӕ, уацамынд ӕмӕ Библи ахуыр кӕнын у ӕви ирхӕфсӕнтӕ? Чырысти загъта: «Фыццаджыдӕр агурут Хуыцауы паддзахад ӕмӕ йӕ рӕстдзинад, ӕмӕ уын ӕппӕт уыдӕттӕ дӕр уыдзӕни» (Матф. 6:33). Ирхӕфсӕнтыл цас рӕстӕг ӕрвитдзынӕ, уый куы фескъуыддзаг кӕныс, уӕд дын де ’фсарм Чырыстийы ныхӕстӕ дӕ зӕрдыл ӕрлӕууын кӕны?

НЕ ’ФСАРМ НӔ РАЗӔНГАРД КӔНЫ ХЪУСЫН КӔНЫНМӔ

16. Не ’фсарм нӕ цӕмӕ разӕнгард кӕны?

¹⁶ Не ’фсарм нӕ ӕрмӕст ӕвзӕр хъуыддӕгтӕй нӕ фӕдзӕхсы, фӕлӕ ма нӕ хорз хъуыддӕгтӕм дӕр разӕнгард кӕны. Уыцы хъуыддӕгтӕм хауынц хӕдзарӕй-хӕдзармӕ ӕмӕ, фадат куы фӕзына, уӕд хъусын кӕнын. Павелы дӕр йе ’фсарм уымӕ разӕнгард кодта. Павел ныффыста: «Уый мӕ хӕс у. Ӕмӕ мӕгуыр мӕ бон, хорз хабар куы нӕ хъусын кӕнон, уӕд!» (1 Кор. 9:16). Мах дӕр Павелы куы фӕзмӕм ӕмӕ, раст цы у, уый куы аразӕм, уӕд нӕ цӕсгом уыдзӕн сыгъдӕг. Ӕмӕ адӕмӕн хорз хабар куы хъусын кӕнӕм, уӕд уыдоны дӕр разӕнгард кӕндзыстӕм хорз хъуыддӕгтӕм. Павел загъта: «Рӕстдзинад ӕргом кӕнгӕйӕ, Хуыцауы раз алы адӕймагӕн дӕр стӕм фӕзминаг» (2 Кор. 4:2).

17. Иу ӕрыгон хо, йе ’фсарм ын цы дзырдта, уымӕ гӕсгӕ куыд архайдта?

¹⁷ Нӕ хо Жаклиныл 16 азы куы цыд, уӕд скъолайы биологийы урочы ахуыр кодтой эволюцийы теори. Жаклин загъта: «Ме ’фсарм мын уый бар нӕ лӕвӕрдта, цӕмӕй дзуаппытӕ лӕвӕрдтаин, ӕндӕр хӕттыты-иу куыд кодтон, афтӕ. Мӕ бон нӕ уыд эволюцийы теорийы сӕрыл дзурын. Ӕмӕ ахуыргӕнӕгмӕ бацыдтӕн ӕмӕ йын мӕ хъуыды бамбарын кодтон. Уый ӕнхъӕл дӕр нӕ уыдтӕн, ахуыргӕнӕг афтӕ хӕларзӕрдӕ кӕй разындзӕн ӕмӕ мын бар кӕй ратдзӕн, цӕмӕй, алцыдӕр Хуыцау кӕй сфӕлдыста, уый тыххӕй ӕгас къласӕн дӕр радзурон». Жаклин тынг райгондӕй баззад, йе ’фсарм ын цы дзырдта, уымӕ кӕй байхъуыста, уый тыххӕй. Дӕу дӕр де ’фсарм, раст цы у, уымӕ фӕразӕнгард кӕны?

18. Цӕмӕн нӕ хъуамӕ фӕнда, цӕмӕй нын не ’фсарм хорз уынаффӕгӕнӕг уа?

¹⁸ Махӕн нӕ нысан у Йегъовӕйы уагӕвӕрдтӕ ӕмӕ закъӕттӕм гӕсгӕ цӕрын. Ӕмӕ нын не ’фсарм ӕххуыс кӕндзӕн, цӕмӕй уый нӕ къухы ӕфта. Ӕдзухдӕр Хуыцауы Ныхас куы ахуыр кӕнӕм ӕмӕ йыл куы хъуыды кӕнӕм, стӕй, цы базыдтам, уымӕ гӕсгӕ куы цӕрӕм, уӕд не ’фсарм ахуыр кӕндзыстӕм. Ӕмӕ нын уӕд уыцы диссаджы лӕвар ӕцӕгдӕр хорз уынаффӕгӕнӕг уыдзӕн!