Йегъовӕ нӕ кӕй уарзы, уый цавӕр хъуыддӕгтӕй зыны?

1. Апостол Иоанны ныхӕстӕм гӕсгӕ, цӕуыл хъуамӕ ахъуыды кӕнӕм ӕмӕ цӕмӕн?

АПОСТОЛ Иоанны ныхӕстӕ нӕ разӕнгард кӕнынц, цӕмӕй Йегъовӕйы стыр уарзондзинадыл лӕмбынӕг ахъуыды кӕнӕм. 1 Иоанны 3:1 стихы фыст ис: «Ахъуыды-ма кӕнут, Фыд нӕ куыд тынг бауарзта!» Йегъовӕ нӕ куыд тынг уарзы ӕмӕ йӕ уарзондзинад куыд ӕвдисы, ууыл куы хъуыды кӕнӕм, уӕд ӕм ӕввахсдӕр кӕндзыстӕм ӕмӕ йӕ ноджы тынгдӕр уарздзыстӕм.

2. Иуӕй-иутӕн зын цӕмӕн у, Хуыцау сӕ кӕй уарзы, ууыл баууӕндын?

² Фӕлӕ иуӕй-иутӕ не ’мбарынц, уый гӕнӕн куыд ис, ӕмӕ сӕ Хуыцау уарза. Сӕ хъуыдымӕ гӕсгӕ, Хуыцау адӕммӕ уазал зӕрдӕ дары ӕмӕ сӕ ӕрмӕстдӕр уый домы, цӕмӕй дзы тӕрсой ӕмӕ йӕ коммӕ кӕсой. Иуӕй-иу мӕнг ахуырӕдты тыххӕй чидӕртӕ Хуыцауӕй афтӕ хъуыды кӕнынц, ӕмӕ ӕгъатыр у ӕмӕ йӕ уарзӕн нӕй. Иннӕты хъуыдымӕ гӕсгӕ та Хуыцау адӕмы се ’ппӕты дӕр уарзы, цыфӕнды ма аразой, уӕддӕр. Фӕлӕ Библи кӕй ахуыр кӕнӕм, уый фӕрцы Йегъовӕйы тыххӕй рӕстдзинад базыдтам. Базыдтам, уарзондзинад йӕ сӕйрагдӕр миниуӕг кӕй у ӕмӕ мах тыххӕй йӕ Фырты нывондӕн кӕй радта (Иоан. 3:16; 1 Иоан. 4:8). Фӕлӕ куыд ӕмӕ кӕм схъомыл стӕм, уый тыххӕй нын, гӕнӕн ис, зын уа, Йегъовӕ нӕ кӕй уарзы, ууыл баууӕндын.

3. Йегъовӕ нӕ кӕй уарзы, уый бамбарынӕн нын цы баххуыс кӕндзӕн?

³ Йегъовӕ нӕ кӕй уарзы, уый бамбарыны тыххӕй уал фыццаг хъуамӕ нӕ зӕрдыл ӕрлӕууын кӕнӕм, не Сфӕлдисӕг кӕй у, уый. Цард нын уый радта. (Бакӕс Псалом 100:3–5.) Библи дӕр фыццаг адӕймаг Адамы «Хуыцауы фырт» уымӕн хоны (Лук. 3:38). Ӕмӕ Йесо дӕр йӕ фӕдылдзӕуджыты Хуыцаумӕ афтӕ кувын ахуыр кодта, «нӕ уӕларвон Фыд», зӕгъгӕ (Матф. 6:9). Уӕдӕ Йегъовӕ у нӕ Фыд ӕмӕ адӕмы уарзы, хорз фыд йӕ сывӕллӕтты куыд фӕуарзы, афтӕ.

4. а) Йегъовӕ цавӕр Фыд у? б) Ацы ӕмӕ иннӕ статьяйӕ цы базондзыстӕм?

⁴ Фыды кой кӕнгӕйӕ кӕмӕндӕрты зын у сӕ цӕстытыл уарзӕгой фыды ауайын кӕнын, уымӕн ӕмӕ сӕ, чи зоны, гыццылӕй сӕ фыд тынг ӕфхӕрдта ӕмӕ зӕрдӕрыст сты. Фӕлӕ Йегъовӕ йӕ сывӕллӕтты никуы фефхӕры. Уый ӕппӕты хуыздӕр Фыд у (Пс. 27:10). Хуыцау нӕ тынг уарзы ӕмӕ ныл алы хъуыддаджы дӕр тыхсы. Ӕмӕ уый цас хуыздӕр ӕмбарӕм, уыйас ӕй нӕхӕдӕг дӕр тынгдӕр уарздзыстӕм ӕмӕ йӕм ӕввахсдӕр кӕндзыстӕм (Иак. 4:8). Ацы статьяйы аныхас кӕндзыстӕм, Йегъовӕ нӕ кӕй уарзы, уый цы хъуыддӕгтӕй зыны, уыдонӕй цыппарыл. Иннӕ статьяйы та базондзыстӕм, Хуыцауы кӕй уарзӕм, уый нӕ бон цавӕр цыппар хъуыддагӕй у равдисын, уый.

ЙЕГЪОВӔ У УАРЗӔГОЙ ӔМӔ РӔДАУ

5. Апостол Павел афинӕгтӕн Хуыцауы тыххӕй цы загъта?

⁵ Апостол Павел Грецийы горӕт Афинты куы уыд, уӕд федта, адӕм дзы бирӕ мӕнгхуыцӕуттӕн кӕй кувынц ӕмӕ сӕ кӕй уырны, уыцы хуыцӕуттӕ сын цард кӕй дӕттынц. Ӕмӕ сын уӕд радзырдта, «дуне ӕмӕ, дунейы цыдӕриддӕр ис, уый чи сфӕлдыста», уыцы Хуыцауы тыххӕй. Загъта сын, зӕгъгӕ, Хуыцау «алкӕмӕн дӕр йӕхӕдӕг дӕтты цард дӕр, улӕфт дӕр ӕмӕ алцыдӕр» ӕмӕ «мах уый фӕрцы цӕрӕм, змӕлӕм ӕмӕ стӕм» (Хъуыд. 17:24, 25, 28). Йегъовӕ нӕ кӕй уарзы, уый тыххӕй нын дӕтты, амондджынӕй цӕрынӕн нӕ цыдӕриддӕр хъӕуы, уый. Ахъуыды-ма кӕнӕм уыцы хъуыддӕгтӕй цалдӕрыл.

6. Йегъовӕ нын цавӕр хӕдзар радта? (Кӕс нывмӕ статьяйы райдианы.)

⁶ Зӕгъӕм, Йегъовӕ нын радта рӕсугъд хӕдзар – зӕхх (Пс. 115:15, 16). Хуыцау цы планетӕтӕ скодта, уыдонӕй зӕххӕй диссагдӕр никӕцы у. Ахуыргӕндтӕ дуне ӕхца хардз кӕнынц, цӕмӕй, космосы цы ис, уый раиртасой. Ӕмӕ кӕд бирӕ планетӕтӕ ссардтой, уӕддӕр дзы, цӕрынӕн чи бӕззы, ахӕм иу дӕр нӕй. Йегъовӕ зӕхх ӕрмӕст афтӕ не скодта, цӕмӕй йыл цӕрӕн уа, фӕлӕ ма йыл цӕмӕй алцыдӕр уа рӕсугъд ӕмӕ йыл нӕ бон уа зӕрдӕрухсӕй ӕмӕ ӕдасӕй цӕрын (Ис. 45:18). Нӕ Фыд Йегъовӕ нын цы диссаджы хӕдзар скодта, ууыл куы фӕхъуыды кӕнӕм, уӕд бамбарӕм, куыд тынг нӕ уарзы, уый. (Бакӕс Иов 38:4, 7; Псалом 8:3–5.)

7. Йегъовӕ нӕ куыд сфӕлдыста, уымӕй куыд зыны, ӕцӕгдӕр нӕ кӕй уарзы?

⁷ Фӕлӕ нын кӕд Йегъовӕ рӕсугъд хӕдзар радта, уӕддӕр зоны, ӕрмӕст уый фаг кӕй нӕу, цӕмӕй амондджын уӕм. Цӕмӕй сывӕллон амондджын уа, уый тыххӕй хъуамӕ зона, йӕ ныййарджытӕ йӕ кӕй уарзынц. Йегъовӕ адӕмы йӕхимӕ гӕсгӕ скодта – афтӕ сӕ сфӕлдыста, ӕмӕ сӕ бон у, кӕй сӕ уарзы, уый ӕмбарын ӕмӕ йын йӕхи дӕр уарзын (Райд. 1:27). Уымӕй уӕлдай ма Йесо загъта: «Амондджын сты, ӕнӕ Хуыцауӕй цӕрӕн кӕй нӕй, уый чи ӕмбары, уыдон» (Матф. 5:3). Йегъовӕ нын парахатӕй дӕтты, «циндзинад нын цыдӕриддӕр хӕссы, уый». Ӕцӕгдӕр, Йегъовӕ у уарзӕгой ӕмӕ рӕдау Фыд (1 Тим. 6:17; Пс. 145:16).

ЙЕГЪОВӔ НЫН РӔСТДЗИНАД АМОНЫ

8. Йегъовӕ нӕ ахуыр кӕна, уый нӕ цӕмӕн фӕнды?

⁸ Фыд йӕ сывӕллӕтты фӕуарзы ӕмӕ йӕ нӕ фӕфӕнды, цӕмӕй сыл исчи сайдӕй рацӕуа кӕнӕ сӕ ӕвзӕр фӕндагыл акӕна. Фӕлӕ абон ныййарджытӕй бирӕтӕ Библийы уагӕвӕрдтӕ ницӕмӕ дарынц. Уымӕ гӕсгӕ сӕ бон нӕу сӕ сывӕллӕтты раст хъомыл кӕнын, ӕмӕ уый тыххӕй арӕх сӕ бинонтӕ масты хай бавӕййынц (Ӕмб. 14:12). Фӕлӕ Йегъовӕ йӕ сывӕллӕттӕн дӕтты ӕппӕты хуыздӕр разамынд, уымӕн ӕмӕ «рӕстдзинады Хуыцау» у (Пс. 31:5). Йегъовӕ йӕ сывӕллӕтты уарзы ӕмӕ сын рӕстдзинады рухсы фӕрцы царды алы хъуыддаджы дӕр раст фӕндаг амоны, уӕлдайдӕр та йын кувын куыд хъӕуы, уыцы хъуыддаджы. (Бакӕс Псалом 43:3.) Цымӕ нын Йегъовӕ цавӕр рӕстдзинад раргом кодта ӕмӕ уымӕй куыд зыны, кӕй нӕ уарзы, уый?

9, 10. Йегъовӕ нӕ кӕй уарзы, уый куыд зыны: а) йӕхи тыххӕй нын рӕстдзинад кӕй раргом кодта, уымӕй? б) мах тыххӕй йӕм цавӕр фӕнд ис, уый нын кӕй ӕргом кӕны, уымӕй?

⁹ Фыццаг уый, ӕмӕ нын Йегъовӕ йӕхи тыххӕй рӕстдзинад раргом кодта, уымӕн ӕмӕ йӕ фӕнды, цӕмӕй йӕ зонӕм (Иак. 4:8). Йӕ ном дӕр нын уый тыххӕй раргом кодта. Уӕвгӕ, Библийы Хуыцауы ном цал хатты ӕмбӕлы, уал хатты дзы иу ном дӕр не ’мбӕлы. Стӕй ма нын Йегъовӕ дзуры, цавӕр Хуыцау у, уый дӕр. Цы сфӕлдыста, уыдӕттӕм куы фӕкӕсӕм, уӕд бамбарӕм, стыр тых ӕмӕ зонды хицау кӕй у, уый (Ром. 1:20). Библи кӕсгӕйӕ та базонӕм, ӕнӕхӕрам Хуыцау кӕй у ӕмӕ нӕ тынг кӕй уарзы. Ӕмӕ Йегъовӕйы рӕсугъд миниуджыты тыххӕй фылдӕр куы базонӕм, уӕд ӕм тынгдӕр баввахс вӕййӕм.

¹⁰ Уымӕй уӕлдай ма нын Йегъовӕ ӕргом кӕны, мах тыххӕй йӕм цавӕр фӕнд ис, уый дӕр. Ӕмӕ нын дзуры, дун-дунейы йын цы бинонтӕ ис, уыдонӕй кӕй стӕм. Стӕй ма нын ӕмбарын кӕны, цы хъуамӕ аразӕм, цӕмӕй йӕ бинонты ’хсӕн иудзинад ӕмӕ фарн уа. Библи нын бӕлвырдӕй дзуры, Хуыцау нӕ афтӕ кӕй не сфӕлдыста, цӕмӕй нӕхӕдӕг скъуыддзаг кӕнӕм, хорз ӕмӕ ӕвзӕр цы у, уый (Йер. 10:23). Йегъовӕ зоны, махӕн хуыздӕр цы уыдзӕн, уый. Ӕмӕ йӕ нӕ Хицауыл куы нымайӕм ӕмӕ йӕ коммӕ куы кӕсӕм, ӕрмӕстдӕр уӕд уыдзыстӕм фӕрнӕйдзаг ӕмӕ амондджын.

11. Нӕ уарзӕгой Фыд нын фидӕны тыххӕй цы дзуры?

¹¹ Уарзӕгой фыд йӕ сывӕллӕтты фидӕныл фӕхъуыды кӕны ӕмӕ йӕ фӕфӕнды, цӕмӕй сӕ цардӕй райгонд уой. Фӕлӕ, хъыгагӕн, абон адӕмӕн сӕ фылдӕр нӕ зонынц, фидӕны сӕм цы ӕнхъӕлмӕ кӕсы, уый кӕнӕ сӕ цард снывонд кӕнынц, рӕстӕгмӕ чи у, ахӕм хъуыддӕгтӕн (Пс. 90:10). Куыд бузныг стӕм нӕ уӕларвон Фыдӕй, абон нӕ цардӕй зӕрдӕрухс цӕй фӕрцы уыдзыстӕм, ӕрмӕст уый нын кӕй нӕ амоны, фӕлӕ ма нын диссаджы фидӕнӕй дӕр зӕрдӕ кӕй ӕвӕры!

ЙЕГЪОВӔ ЙӔ СЫВӔЛЛӔТТӔН УЫНАФФӔТӔ ДӔТТЫ ӔМӔ СЫН ЗОНД АМОНЫ

12. Йегъовӕ куыд архайдта, цӕмӕй Каин ӕмӕ Варухӕн баххуыс кодтаид?

¹² Каин фыддзинад саразынмӕ кӕй хъавы, уый Йегъовӕ куы федта, уӕд ӕй бафарста: «Цӕуыл смӕсты дӕ ӕмӕ дӕхи цӕуыл ныттар кодтай? Хорздзинад аразын куы райдайай, уӕд дӕ не сбӕрзонд кӕндзынӕн?» (Райд. 4:6, 7). Афтӕмӕй Йегъовӕйы фӕндыд Каинӕн баххуыс кӕнын, фӕлӕ йӕм уый нӕ байхъуыста ӕмӕ зындзинӕдты хай баци (Райд. 4:11–13). Ӕндӕр хатт та Йегъовӕ бафиппайдта, Варух раст кӕй нал хъуыды кодта ӕмӕ уый тыххӕй йӕ ныфс кӕй асаст. Йегъовӕ йын бамбарын кодта, йӕ зондахаст сраст кӕнын ӕй кӕй хъӕуы. Варух Йегъовӕйы уынаффӕмӕ байхъуыста, ӕмӕ уый фӕрцы йӕ цард бахъахъхъӕдта (Йер. 45:2–5).

13. Йегъовӕйы иузӕрдион лӕггадгӕнджытӕ фӕлварӕнты рӕстӕг цӕуыл ахуыр кодтой?

¹³ Йегъовӕ нын уынаффӕтӕ фӕдӕтты ӕмӕ нын зонд фӕамоны, уымӕн ӕмӕ нӕ уарзы. Хуыцауы зондамындмӕ, уайдзӕф нын кӕй бакӕны кӕнӕ нӕ кӕй бафхӕры, ӕрмӕст уый нӕ хауы. Хуыцау ма нӕ ахуыр дӕр кӕны (Дзут. 12:6). Библийы фыст ис, Йегъовӕ йӕ иузӕрдион лӕггадгӕнджыты кӕй ахуыр кодта, цӕмӕй сӕ ноджы хуыздӕр адӕймӕгтӕ рауадаид. Ӕрхъуыды-ма кӕнӕм Иосифы, Моисейы ӕмӕ Давиды. Тынг зын уавӕрты-иу бахаудысты, фӕлӕ-иу Йегъовӕ уыди сӕ фарсмӕ. Уыцы фӕлварӕнты рӕстӕг цӕуыл сахуыр сты, уый сын ӕххуыс кодта, Йегъовӕ сын сӕ бӕрны стырдӕр хъуыддӕгтӕ куы бакодта, уӕд дӕр. Йегъовӕ йӕ адӕмӕн куыд ӕххуыс кодта ӕмӕ сӕ куыд ахуыр кодта, уый тыххӕй Библийы куы фӕкӕсӕм, уӕд фембарӕм, ӕцӕгдӕр нӕ кӕй уарзы, уый. (Бакӕс Ӕмбисӕндтӕ 3:11, 12.)

14. Цӕмӕ гӕсгӕ ис зӕгъӕн, ӕмӕ нӕ Йегъовӕ фӕуарзы, исты рӕдыд къахдзӕф куы саразӕм, уӕд дӕр?

¹⁴ Исты рӕдыд къахдзӕф куы саразӕм, уӕд дӕр нӕ Йегъовӕ фӕуарзы. Ӕмӕ йын йӕ зондамынд нӕ зӕрдӕмӕ куы айсӕм ӕмӕ куы ’рфӕсмон кӕнӕм, уӕд нын «зӕрдиагӕй ныххатыр кӕны» (Ис. 55:7). Давиды ныхӕстӕй бӕрӕг у, куыд фӕлмӕнзӕрдӕ Фыд нын ис, уый. Давид загъта: «Уый дын хатыр кӕны дӕ рӕдыдтытӕ иууылдӕр, дзӕбӕх дӕ кӕны де ’ппӕт низтӕй дӕр, фервӕзын дӕ кӕны ингӕнӕй, кадыхудау дыл ӕркӕны ӕнувыд уарзт ӕмӕ фӕлмӕнзӕрдӕдзинад. [...] Хурыскӕсӕн хурныгуылӕнӕй куыд дард у, афтӕ адард кодта махӕй нӕ тӕригъӕдтӕ» (Пс. 103:3, 4, 12). Уӕдӕ нын Йегъовӕ уынаффӕ куы дӕтта кӕнӕ нын зонд куы амона, уӕд-иу ӕм уайтагъд байхъусӕм, уымӕн ӕмӕ нӕ тынг уарзы ӕмӕ нын нӕ хорзыл хъуыды кӕны (Пс. 30:5).

ЙЕГЪОВӔ НӔ ХЪАХЪХЪӔНЫ

15. Йегъовӕ нӕ кӕй уарзы, уый ма цавӕр хъуыддагӕй зыны?

¹⁵ Уарзӕгой фыд йӕ бинонты фыдбылызӕй фӕхъахъхъӕны. Нӕ уӕларвон Фыд Йегъовӕ дӕр афтӕ кӕны. Псаломзарӕггӕнӕг Йегъовӕйы тыххӕй загъта: «Уый хъахъхъӕны, иузӕрдион ыл чи у, уыдоны удтӕ, фыдгӕнджыты къухӕй сӕ ирвӕзын кӕны» (Пс. 97:10). Ахъуыды-ма кӕнӕм: Йегъовӕ йӕ адӕмы хъахъхъӕны, адӕймаг йӕ цӕстытӕ куыд фӕхъахъхъӕны, афтӕ. Уый ууыл дзурӕг у, ӕмӕ йын йӕ адӕм тынг зынаргъ сты. (Бакӕс Захарийы 2:8.)

16, 17. Йегъовӕ йӕ адӕмы куыд хъахъхъӕны?

¹⁶ Йегъовӕ йӕ адӕмы куыд хъахъхъӕны? Зӕгъӕм, зӕдты уылты (Пс. 91:11). Иухатт иу зӕд Ассирийы ӕфсадӕй иу ӕхсӕвмӕ ныццагъта 185 000 лӕджы ӕмӕ Хуыцауы адӕмы фервӕзын кодта (2 Пад. 19:35). Фыццаг ӕнусы та-иу зӕдтӕ ахӕстонӕй ссӕрибар кодтой Петры, Павелы ӕмӕ иннӕты (Хъуыд. 5:18–20; 12:6–11). Нӕ рӕстӕджы та Африкӕйы бӕстӕтӕй сӕ иуы цыди карз хӕст. Ӕнӕхъӕн бӕстӕ дӕр уыди ӕмтъеры: алы ран дӕр хӕцыдысты, давтой, тыхми кодтой ӕмӕ мардтой. Ӕмӕ кӕд не ’фсымӕртӕй ничи фӕмард, уӕддӕр сӕ бирӕтӕ ӕнӕ хӕдзар ӕмӕ ӕнӕ исбонӕй баззадысты. Сӕйраг хайады минӕвар сӕм бӕрӕггӕнӕг куы ’рцыд ӕмӕ сӕ куы бафарста, куыд стут, зӕгъгӕ, уӕд ын хотӕ ӕмӕ ’фсымӕртӕ загътой: «Бузныг Йегъовӕйӕн, алцыдӕр хорз у!» Уыдон ӕмбӕрстой, Йегъовӕ сӕ кӕй уарзы ӕмӕ сыл кӕй тыхсы. Ӕмӕ кӕд зындзинӕдтӕ баййӕфтой, уӕддӕр амондджын уыдысты.

¹⁷ Иуӕй-иу хатт Йегъовӕ бауадзы, цӕмӕй йын знӕгтӕ йӕ иузӕрдион лӕггадгӕнджытӕй кӕйдӕрты амарой. Зӕгъӕм, афтӕ уыд Стефаны хабар. Фӕлӕ йӕ адӕмы се ’ппӕты фесафын никуы бауадздзӕн. Йегъовӕ нӕ хъахъхъӕны, Хӕйрӕджы хин митӕй нӕ кӕй фӕдзӕхсы, уый фӕрцы (Еф. 6:10–12). Фӕдзӕхсгӕ та нӕ кӕны Библийы уылты ӕмӕ, йӕ организаци цы публикацитӕ уадзы, уыдоны уылты. Уый фӕрцы зонӕм, цӕмӕй тӕссаг у Интернет, ӕхца уарзын, стӕй цавӕр зиан хӕссынц, ӕнӕгъдаудзинад ӕмӕ тыхми кӕм ис, ахӕм кинотӕ, чингуытӕ ӕмӕ хъӕзтытӕ. Бӕрӕг у, Йегъовӕ нӕ кӕй уарзы ӕмӕ нӕ кӕй хъахъхъӕны.

СТЫР КАД

18. Йегъовӕ дӕ кӕй уарзы, уый тыххӕй цы хъуыды кӕныс?

¹⁸ Моисей Йегъовӕйӕн бирӕ азты дӕргъы куыд лӕггад кодта, ууыл хъуыды кӕнгӕйӕ загъта: «Райсомӕй нӕ бафсад де ’нувыд уарзтӕй, цӕмӕй фырцинӕй зарӕм ӕмӕ цин кӕнӕм цӕрӕнбонты» (Пс. 90:14). Уый нӕ дызӕрдыг кодта, Йегъовӕ йӕ кӕй уарзы, ууыл. Мах дӕр уыцы арфӕдзинадӕй хайджын стӕм, ӕмӕ ӕмбарӕм, Йегъовӕ нӕ кӕй уарзы, уый. Йегъовӕ дӕ уарза, уымӕй стырдӕр кад нӕй! Ӕмӕ мах дӕр фӕнды апостол Иоаннау зӕгъын: «Ахъуыды-ма кӕнут, Фыд нӕ куыд тынг бауарзта!» (1 Иоан. 3:1).