СӔЙРАГ ТЕМӔ | КУВЫН ИСТЫ ПАЙДА У?
Адӕм цӕмӕн фӕкувынц?
«Иуафон ӕхцайыл хъазыныл фӕцалх дӕн. Куывтон-иу, цӕмӕй бирӕ ӕхца рамбылдтаин, фӕлӕ мӕ куывдтытӕй ницы рауад» (Самюэльa, Кени).
«Скъолайы куы ахуыр кодтон, уӕд-иу нын куывдтытӕ ӕнӕ кӕсгӕйӕ сахуыр кӕнынмӕ радтой» (Тересӕ, Филиппинтӕ).
«Фӕкувын, исты зын уавӕры куы бахауын, уӕд. Хуыцауӕй фӕкурын, цӕмӕй мын мӕ тӕригъӕдтӕ ныххатыр кӕна ӕмӕ цӕмӕй чырыстон миниуджытӕ мӕ удыхъӕды ирддӕрӕй зыной» (Магдалинӕ, Ганӕ).
Самюэль, Тересӕ ӕмӕ Магдалинӕйы ныхӕстӕй бӕрӕг у, адӕм бирӕ цӕйдӕрты тыххӕй кӕй фӕкувынц. Иуӕй-иутӕ фӕкувынц хорз хъуыддӕгты тыххӕй, иннӕты куывдтытӕ та бынтон хорз хъуыддӕгты тыххӕй нӕ вӕййынц. Иутӕ фӕкувынц зӕрдӕйӕ, иннӕтӕ та – куыдфӕндыйӕ. Фӕлӕ адӕймаг цӕйфӕнды тыххӕй ма кува, зӕгъӕм, цӕмӕй йӕ экзамен хорз ратта, йӕ уарзон спортивон командӕ рамбула, Хуыцау ын йӕ бинонты царды фӕдыл разамынд ратта кӕнӕ ма бирӕ ӕндӕр цӕйдӕрты тыххӕй, уӕддӕр иу хъуыддаг у бӕлвырд: милуангай адӕм ӕмбарынц, кувын кӕй хъӕуы. Ахуыргӕндты бӕрӕггӕнӕнтӕм гӕсгӕ, диныл хӕст чи нӕу, уыдонӕй дӕр чидӕртӕ ӕдзух фӕкувынц.
Дӕуӕй та цы зӕгъӕн ис? Кӕд фӕкувыс, уӕд цӕй тыххӕй? Арӕх фӕкувыс ӕви нӕ, уӕддӕр, чи зоны, фӕхъуыды кӕныс: «Кувын исты пайда у? Мӕ куывдтытӕ мын исчи хъусы?» Иу фыссӕг загъта, зӕгъгӕ, кувын «хисабыргӕнӕн хос йеддӕмӕ ницы у». Дохтыртӕй дӕр иуӕй-иутӕ куывд нымайынц хос кӕныны мадзалыл. Уӕдӕ цымӕ адӕм ӕрмӕстдӕр уый тыххӕй фӕкувынц, ӕмӕ афтӕ сахуыр сты кӕнӕ сын афтӕмӕй фенцондӕр вӕййы?
Библийӕ куыд зыны, афтӕмӕй кувын ӕрмӕст хисабыргӕнӕн хос нӕу. Уым фыст ис, чидӕр кӕй хъусы, раст чи кувы ӕмӕ хорз хъуыддӕгты тыххӕй чи кувы, уыдоны. Цымӕ уый ӕцӕгдӕр афтӕ у? Цӕй ӕмӕ йӕ базонӕм.
a Иуӕй-иу нӕмттӕ ивд сты.