Хуыцауы стыр хорзӕхы фӕрцы ссӕрибар стут

1, 2. Ромӕгтӕм 5:12 стих Йегъовӕйы Ӕвдисӕнтӕн ахсджиаг цӕмӕн у?

ЗӔГЪӔМ дӕ фӕнды, хорз кӕй зонӕм ӕмӕ уацамынды арӕх кӕмӕй фӕпайда кӕнӕм, уыцы стихтӕ ӕрхъуыды кӕнын. Ӕвӕццӕгӕн дын дзы Ромӕгтӕм 5:12 стих ӕнӕмӕнг уыдзӕн. Ахъуыды-ма кӕн, адӕмӕн цал хатты бакастӕ ацы ныхӕстӕ: «Иу адӕймаджы аххосӕй дунемӕ ӕрцыд тӕригъӕд, тӕригъӕды уылты та – мӕлӕт, ӕмӕ афтӕмӕй мӕлӕт ахӕлиу ӕппӕт адӕмыл дӕр, уымӕн ӕмӕ иууылдӕр ракодтой тӕригъӕд».

² Ромӕгтӕм 5:12 арӕх ӕмбӕлы, адӕмимӕ Библи кӕй фӕрцы фӕахуыр кӕнӕм, уыцы публикациты. Дӕ сывӕллӕттимӕ кӕнӕ ӕндӕр искӕимӕ Библи куы фӕахуыр кӕныс, уӕд, ӕвӕццӕгӕн, бакӕсыс ацы стих, зӕгъӕм, зӕхх ныртӕккӕ дзӕнӕт цӕуылнӕ у, адӕмы тыххӕй нывонд ӕрхӕссын цӕмӕн хъуыди йе та адӕймаг цӕмӕн мӕлы, уый куы фембарын кӕныс, уӕд. Фӕлӕ, дӕхицӕн Хуыцауы раз цавӕр ном ис, дӕ хъуыддӕгтӕ цӕуыл дзурӕг сты ӕмӕ дӕм цавӕр цард ӕнхъӕлмӕ кӕсы, ууыл куы фӕхъуыды кӕныс, уӕд дӕр цымӕ ацы стих дӕ зӕрдыл ӕрлӕууы?

3. Абон цы уавӕры стӕм, уый тыххӕй нӕ зӕрдыл цы хъуамӕ дарӕм?

³ Не ’ппӕт дӕр ӕй зонӕм, тӕригъӕдджын кӕй стӕм. Иу бон дӕр афтӕ нӕ рацӕуы, ӕмӕ ма фӕрӕдийӕм. Фӕлӕ нын ныфсы хос у, Йегъовӕ фӕлмӕнзӕрдӕ кӕй у, уый. Уымӕй рох нӕу, сыджытӕй конд кӕй стӕм, ӕмӕ нын нӕ рӕдыдтытӕ хатыр кӕны (Пс. 103:13, 14). Йесо дзырдта, Хуыцауӕй нӕ рӕдыдтыты тыххӕй хатыр кӕй хъуамӕ курӕм (Лук. 11:2–4). Ӕмӕ нын Хуыцау кӕй ныххатыр кодта, уыцы тӕригъӕдты тыххӕй хъуамӕ мауал мӕт кӕнӕм. Фӕлӕ уӕддӕр хорз уыдзӕн ахъуыды кӕнын, Хуыцау нын цӕй фӕрцы ныххатыр кодта, ууыл.

ЙЕ СТЫР ХОРЗӔХЫ ФӔРЦЫ НЫН НЫХХАТЫР КОДТА

4, 5. а) Цы нын баххуыс кӕндзӕн Ромӕгтӕм 5:12 бамбарынӕн? б) Ромӕгтӕм 3:24 цы «стыр хорзӕхы» кой ис, уый цы у?

⁴ Цӕмӕй Ромӕгтӕм 5:12 стихы фыст ныхӕстӕ хуыздӕр бамбарӕм, уый тыххӕй хъуамӕ ӕркӕсӕм ацы чиныгмӕ ӕнӕхъӕнӕй, уӕлдайдӕр та 6 сӕрмӕ. Уый фӕрцы бамбардзыстӕм, Йегъовӕ нын цӕй фӕрцы хатыр кӕны, уый. Ромӕгтӕм 3 сӕры фыст ис: «Се ’ппӕт дӕр тӕригъӕд ракодтой... Гъемӕ уӕдӕ, рӕстгӕнджытыл нымад кӕй ӕрцыдысты, уый сын у лӕвар – йе стыр хорзӕхмӕ гӕсгӕ, Йесо Чырысти сӕ кӕй балхӕдта ӕмӕ кӕй ссӕрибар сты, уый фӕрцы» (Ром. 3:23, 24). Цымӕ, Павел цы «стыр хорзӕхы» кой кодта, уый цы у? Цы грекъаг дзырдӕй спайда кодта, уый амоны, адӕймагӕн исчи цавӕрдӕр хорздзинад хӕларзӕрдӕйӕ куы ракӕна, кӕй бафыдӕбон кодта, уый тыххӕй нӕ, фӕлӕ ӕнӕуи, ӕмӕ дзы уый тыххӕй йӕхицӕн куы ницы дома.

⁵ Иу ахуыргонд куыд бамбарын кодта, афтӕмӕй уыцы грекъаг дзырд арӕх фӕамоны, Хуыцау ӕмӕ Чырысти адӕмы тӕригъӕд ӕмӕ мӕлӕтӕй фервӕзын кӕныны тыххӕй цы сарӕзтой, уымӕ. Фӕлӕ Хуыцау йе стыр хорзӕх бӕлвырдӕй куыд равдыста? Уый фӕрцы абон дӕр цавӕр хорздзинӕдтӕй хайджын стӕм? Стӕй нын фидӕнӕй та цавӕр ныфс ис? Цӕй ӕмӕ йӕ базонӕм.

6. Хуыцауы стыр хорзӕх пайда кӕмӕн хӕссы ӕмӕ сын цавӕр пайда хӕссы?

⁶ «Иу адӕймаг», Адам, тӕригъӕд кӕй ракодта, уый аххосӕй «дунемӕ ӕрцыд» тӕригъӕд ӕмӕ мӕлӕт. Афтӕмӕй «иу адӕймаджы тӕригъӕд уымӕ ӕркодта, ӕмӕ уыцы иуы аххосӕй мӕлӕт паддзах уыд». Фӕлӕ Хуыцау ахӕм стыр хорзӕх равдыста, ӕмӕ «иу адӕймаджы, Йесо Чырыстийы», радта, цӕмӕй ӕппӕт адӕмӕн дӕр фервӕзыны фадат фӕзындаид (Ром. 5:12, 15, 17). «Иу адӕймаг [Йесо] коммӕгӕс кӕй уыди, уый фӕрцы бирӕтӕ суыдзысты рӕстгӕнджытӕ». Гъемӕ Хуыцауы стыр хорзӕхы фӕрцы ӕмӕ «Йесо Чырыстийы фӕрцы... адӕм ӕнустӕм цӕрдзысты» (Ром. 5:19, 21).

7. Хуыцау йӕ Фырты мах тыххӕй кӕй радта, уый стыр хорзӕх схонӕн цӕмӕн ис?

⁷ Йегъовӕ хӕсджын нӕ уыд йӕ Фырты мах тыххӕй раттын. Фӕлӕ йе стыр хорзӕхмӕ гӕсгӕ уӕддӕр батыхст, цӕмӕй нын тӕригъӕд ӕмӕ мӕлӕтӕй фервӕзыны фадат фӕзындаид. Хуыцау ӕмӕ Йесо мах тыххӕй цы сарӕзтой, уый аккаг нӕ иу дӕр нӕ уыд. Уӕдӕ нӕ тӕригъӕдтӕ хатыргонд кӕй цӕуынц ӕмӕ нын ӕнустӕм цӕрыны ныфс кӕй ис, уымӕн хъуамӕ аргъ кӕнӕм, ӕмӕ уый хъуамӕ нӕ цардӕй дӕр бӕрӕг уа.

АРГЪ КӔНӔМ ХУЫЦАУЫ СТЫР ХОРЗӔХӔН

8. Иуӕй-иутӕ цавӕр рӕдыд хъуыдыйыл хӕст вӕййынц?

⁸ Мах зонӕм, Хуыцау нын нӕ рӕдыдтытӕ, суанг стыр тӕригъӕдтӕ дӕр, кӕй хатыр кӕны. Фӕлӕ уый тыххӕй хъуамӕ афтӕ ма хъуыды кӕнӕм, зӕгъгӕ, кӕд рӕдийын ӕмӕ Хуыцауы цӕсты тӕригъӕд аразын, уӕддӕр ницы кӕны, ныххатыр мын ӕй кӕндзӕн. Хъыгагӕн, фыццаг ӕнусы, нырма апостолтӕй дӕр чидӕртӕ ӕгас куы уыдысты, уӕд, иуӕй-иу чырыстӕттӕ раст ахӕм зондыл хӕст уыдысты. (Бакӕс Иудӕйы 4.) Чи зоны, ахӕм хъуыды ӕргом никуы фӕзӕгъӕм. Фӕлӕ, гӕнӕн ис, нӕхинымӕр хатт афтӕ ахъуыды кӕнӕм йе та нӕ исчи ахӕм зондыл араза.

9, 10. Павел ӕмӕ иннӕтӕ тӕригъӕд ӕмӕ мӕлӕтӕй куыд ссӕрибар сты?

⁹ Павел загъта, раст кӕй нӕу афтӕ хъуыды кӕнын, зӕгъгӕ, тӕригъӕд куы ракӕнон, уӕддӕр мӕ Хуыцау бамбардзӕн ӕмӕ мын ныххатыр кӕндзӕн. Цымӕ уыцы хъуыды раст цӕуылнӕ у? Павел куыд загъта, афтӕмӕй чырыстӕттӕ «тӕригъӕдӕн амардысты». (Бакӕс Ромӕгтӕм 6:1, 2.) Уымӕй йӕ цы зӕгъын фӕндыд?

¹⁰ Чырыстийы нывонды фӕрцы фыццаг ӕнусы Хуыцау Павелӕн дӕр ӕмӕ иннӕ чырыстӕттӕн дӕр сӕ тӕригъӕдтӕ ныххатыр кодта, йӕ сыгъдӕг тыхӕй сӕ байсӕрста ӕмӕ сӕ йӕ фырттыл банымадта. Ӕмӕ йыл кӕронмӕ иузӕрдионӕй куы баззадаиккой, уӕд фидӕны Йесоимӕ уӕлӕрвты паддзӕхтӕ уыдаиккой. Фӕлӕ кӕд нырма зӕххыл уыдысты, уӕд тӕригъӕдӕн куыд амардысты? Павел ахӕм абарстӕй бамбарын кодта, сӕ цард бынтондӕр кӕй фӕивта. Павел загъта, Йесо йӕ мӕлӕты фӕстӕ кӕй райгас ӕнӕмӕлгӕ буары. Уымӕ гӕсгӕ Йесойыл «мӕлӕты бар... нал цӕуы». Раст афтӕ сӕрст чырыстӕттӕ дӕр цыма мӕлгӕ акодтой, афтӕ уыдысты. Сӕ цард бынтондӕр фӕивта, уымӕн ӕмӕ сӕ тӕригъӕдджын буары монцты фӕдыл нал цыдысты. Уӕдӕй фӕстӕмӕ сӕ тых, сӕ бонӕй архайдтой, цӕмӕй сӕ цардӕй Хуыцауы зӕрдӕ рухс кодтаиккой. «Тӕригъӕдӕн сӕхи нымадтой мардыл ӕмӕ цардысты Хуыцауы тыххӕй Йесо Чырыстийы фӕрцы» (Ром. 6:9, 11).

11. Абоны чырыстӕттӕ тӕригъӕдӕн цы хуызы амардысты?

¹¹ Абоны чырыстӕттӕй та цы зӕгъӕн ис? Раздӕр ӕй, гӕнӕн ис, ӕмӕ ӕмбаргӕ дӕр нӕ кодтам, афтӕмӕй Хуыцауы цӕсты бирӕ ӕвзӕр хъуыддӕгтӕ арӕзтам. Мах уыдыстӕм «чъизи митӕ ӕмӕ фыдхъуыддӕгты цагъартӕ», ӕндӕр ныхасӕй – «тӕригъӕды цагъартӕ» (Ром. 6:19, 20). Фӕлӕ стӕй Библийӕ рӕстдзинад базыдтам, нӕ цард фӕивтам, нӕхи Хуыцауӕн снывонд кодтам ӕмӕ донаргъуыд райстам. Уӕдӕй фӕстӕмӕ нӕ тынг фӕнды, цӕмӕй «Хуыцауӕн зӕрдӕйӕ коммӕгӕс уӕм» ӕмӕ нын «цы бацамыдта, уымӕ гӕсгӕ цӕрӕм». Мах «тӕригъӕдӕй... ссӕрибар стӕм» ӕмӕ «систӕм рӕстдзинады цагъартӕ» (Ром. 6:17, 18). Уӕдӕ махӕй дӕр зӕгъӕн ис, ӕмӕ «тӕригъӕдӕн амардыстӕм».

12. Алкӕй дӕр нӕ цы фӕхъӕуы равзарын?

¹² Ахъуыды-ма кӕн Павелы иннӕ ныхӕстыл дӕр: «Тӕригъӕд уӕ зӕххон буӕрттӕн паддзах мауал уӕд, цӕмӕй уӕ буары монцты фӕдыл ма цӕуат» (Ром. 6:12). Куыд бакӕндзыстӕм, уый кӕнгӕ у нӕхицӕй: кӕнӕ нӕ тӕригъӕдджын хъуыдыты ӕмӕ фӕндты фӕдыл цӕудзыстӕм, кӕнӕ сын сӕ рохтыл хӕцдзыстӕм. Уӕдӕ хъуамӕ ахъуыды кӕнӕм: «Мӕ зӕрдӕ мӕм цы дзуры? Мыййаг, иуӕй-иу хатт ме ’нӕххӕст зонд ӕмӕ буары фӕдыл нӕ ацӕуын? Ӕви ме ’взӕр фӕндтӕн уайтагъд сӕ хурхыл бахӕцын?» Кӕд Хуыцауы стыр хорзӕхӕн аргъ кӕнӕм, уӕд нӕ бон цыдӕриддӕр у, уый араздзыстӕм, цӕмӕй йын йӕ зӕрдӕ рухс кӕнӕм.

ТӔРИГЪӔДЫЛ ФӔУӔЛАХИЗ УЫДЗЫНӔ!

13. Цӕмӕн ис фидарӕй зӕгъӕн, ӕмӕ нӕ бон у тӕригъӕдджын хъуыддӕгтӕ ныууадзын?

¹³ Фыццаг ӕнусы Коринфы цӕрджытӕй чидӕртӕ уыдысты давджытӕ, гомосексуалисттӕ, расыггӕнджытӕ, сӕ цардӕмбӕлттыл гадзрахатӕй цыдысты, куывтой мӕнгхуыцӕуттӕн. Фӕлӕ Йегъовӕйы куы базыдтой ӕмӕ йӕ куы бауарзтой, уӕд фӕивтой. Сӕ хъуыддӕгтӕ сӕм худинаг ӕркастысты (Ром. 6:21; 1 Кор. 6:9–11). Ромы ӕмбырды дӕр иуӕй-иутӕ сӕ царды ахӕм ивындзинӕдтӕ скодтой. Павел сӕм ныффыста: «Уӕ буӕрттӕ тӕригъӕды къухмӕ ма дӕттут ӕвзӕр хъуыддӕгтӕ аразынӕн, фӕлӕ, мард чи уыд ӕмӕ цардмӕ чи раздӕхт, уыдонӕн куыд ӕмбӕлы, афтӕ уӕхи раттут Хуыцауы къухмӕ, ӕмӕ уӕ буӕрттӕ дӕр раттут Хуыцауы къухмӕ раст хъуыддӕгтӕ аразынӕн» (Ром. 6:13). Павел нӕ дызӕрдыг кодта, сӕ бон кӕй уыди, Хуыцауы цӕсты раст цы у, уый аразын, цӕмӕй дарддӕр дӕр Хуыцауы стыр хорзӕхӕй хайджын уыдаиккой.

14, 15. Цавӕр фарстатыл нӕ хъӕуы ахъуыды кӕнын?

¹⁴ Нӕ рӕстӕджы дӕр хабар афтӕ у. Нӕ хотӕ ӕмӕ не ’фсымӕртӕй чидӕртӕ раздӕр уыдысты Коринфы цӕрджыты хуызӕн. Фӕлӕ Йегъовӕйы куы базыдтой, уӕд фӕивтой. Уый уыд, цыма ӕхсад ӕрцыдысты, афтӕ. Йегъовӕйы зӕрдӕ барухс кӕныны тыххӕй махӕй алчидӕр йӕ царды цыдӕртӕ фӕивта. Фӕлӕ цымӕ ныр дӕр дӕ хъуыддӕгтӕй бӕрӕг у, Хуыцауы стыр хорзӕхӕн тынг кӕй аргъ кӕныс? Ныр дӕр дӕ тӕригъӕдджын фӕндтимӕ тох кӕныс ӕмӕ дӕхи ӕнӕхъӕнӕй дӕр Хуыцауы къухмӕ дӕттыс?

¹⁵ Кӕй зӕгъын ӕй хъӕуы, хъуамӕ нӕхи хизӕм, коринфӕгтӕй иуӕй-иутӕ цы стыр тӕригъӕдтӕ арӕзтой, уыдонӕй. Науӕд афтӕ зӕгъӕн нӕ уыдзӕн, ӕмӕ нын Хуыцауы стыр хорзӕхӕй хай ис ӕмӕ ныл «тӕригъӕды бар нал цӕуы». Фӕлӕ чидӕр стыр тӕригъӕдыл кӕй нӕ нымайы, ахӕм хъуыддӕгтӕй та цы ис зӕгъӕн? Цымӕ ӕдзухдӕр архайӕм, цӕмӕй уыдонӕй дӕр нӕхи хизӕм ӕмӕ афтӕмӕй, Йегъовӕйӕн «зӕрдӕйӕ коммӕгӕс» кӕй стӕм, уый ӕвдисӕм? (Ром. 6:14, 17).

16. Кӕцӕй йӕ зонӕм, 1 Коринфӕгтӕм 6:9–11 кӕй кой нӕй, уыцы тӕригъӕдтӕй дӕр нӕхи кӕй хъуамӕ хизӕм?

¹⁶ Ахъуыды-ма кӕнӕм апостол Павелыл. 1 Коринфӕгтӕм 6:9–11 цы стыр тӕригъӕдты кой ис, ахӕм тӕригъӕдтӕ, кӕй зӕгъын ӕй хъӕуы, нӕ арӕзта. Фӕлӕ уӕддӕр афтӕ нӕ дзырдта, ницы тӕригъӕд аразын, зӕгъгӕ. Уый ныффыста: «Ӕз... дӕн ӕнӕххӕст, ауӕй мӕ кодтой тӕригъӕдӕн. Гъемӕ, цы аразын, уый мӕхӕдӕг дӕр не ’мбарын. Цы мӕ фӕфӕнды, уый нӕ бакӕнын, ме сӕфт цӕмӕй уынын, уый та саразын» (Ром. 7:14, 15). Ацы ныхӕстӕй бӕрӕг у, Павел тӕригъӕдыл ӕндӕр цавӕрдӕр хъуыддӕгтӕ дӕр кӕй нымадта, ӕмӕ уыдонимӕ дӕр тох кодта. (Бакӕс Ромӕгтӕм 7:21–23.) Цӕй уӕдӕ мах дӕр Павелы фӕзмӕм ӕмӕ, нӕ бон цыдӕриддӕр у, уый аразӕм, цӕмӕй Йегъовӕйӕн «зӕрдӕйӕ коммӕгӕс» уӕм.

17. Цӕмӕн дӕ фӕнды, ӕмӕ ӕнӕзӕрдӕхудт уай?

¹⁷ Зӕгъӕм, мах зонӕм, Йегъовӕйӕн чи лӕггад кӕны, уый ӕнӕзӕрдӕхудт кӕй хъуамӕ уа, ома мӕнг ныхӕстӕ ӕмӕ сайгӕ кӕй хъуамӕ ма кӕна. (Бакӕс Ӕмбисӕндтӕ 14:5; Ефесӕгтӕм 4:25.) Мах нӕ фӕнды, ӕмӕ уӕм Сайтаны хуызӕн, уымӕн ӕмӕ уый у «мӕнгдзинады фыд». Стӕй, зӕгъӕм, Анани ӕмӕ йӕ ус, сайгӕ кӕй акодтой, уый тыххӕй амардысты. Уӕдӕ мах мӕнг ныхӕстӕ нӕ кӕнӕм (Иоан. 8:44; Хъуыд. 5:1–11). Фӕлӕ цымӕ уый фаг у, цӕмӕй адӕймаджы ӕнӕзӕрдӕхудт схонӕн уа? Хуыцауы стыр хорзӕхӕн чи аргъ кӕны, уый алы хъуыддаджы дӕр уыдзӕн ӕнӕзӕрдӕхудт.

18, 19. Ӕнӕзӕрдӕхудт уай, уый цӕуыл дзурӕг у?

¹⁸ Гӕнӕн ис, афтӕ дӕр рауайа, ӕмӕ адӕймаг комкоммӕ гӕдыныхӕстӕ нӕ кӕны, фӕлӕ йӕ уӕддӕр ӕнӕзӕрдӕхудт схонӕн нӕй. Йегъовӕ израилӕгтӕн загъта: «Давгӕ ма кӕнут, ма сайут, ма кӕнут цӕстфӕлдахӕн митӕ». Цымӕ ахӕм хъуыддӕгтӕй сӕхи цӕмӕн хъуамӕ хызтаиккой? Йегъовӕ загъта: «Ут сыгъдӕг адӕм, уымӕн ӕмӕ ӕз дӕн сыгъдӕг Хуыцау – ӕз, уӕ Хуыцау Йегъовӕ» (Лев. 19:2, 11). Чи зоны, мӕнг ныхас нӕ загътам. Фӕлӕ кӕд нӕ ныхӕстӕй иннӕты, ӕцӕг цы нӕу, ахӕм цӕуылдӕр баууӕндын кодтам, уӕд зӕгъӕн ис, ӕмӕ асайдтам.

¹⁹ Зӕгъӕм, адӕймаг йӕ куысты хицауӕн кӕнӕ йе ’мкусджытӕн зӕгъы, иннӕ бон куысты кӕй нӕ уыдзӕн кӕнӕ йӕ раздӕр ацӕуын кӕй хъӕудзӕн, уымӕн ӕмӕ йӕ дохтырмӕ хъӕуы. Фӕлӕ, «дохтырмӕ хъӕуы» цы хоны, уый у, цыбыр рӕстӕгмӕ йӕ кӕй хъӕуы аптекӕмӕ кӕнӕ дохтырмӕ бауайын. Ӕцӕгӕй та куыстӕй йӕхи уый тыххӕй куры, цӕмӕй йӕ бинонтимӕ улӕфынмӕ раздӕр ацӕуа. Афтӕ кӕй загъта, дохтырмӕ мӕ хъӕуы, зӕгъгӕ, уым, чи зоны, цыдӕр раст у. Фӕлӕ дзы афтӕ зӕгъис, ӕмӕ ӕнӕзӕрдӕхудт, кӕнӕ ӕнӕхин, адӕймаг у? Ӕви уӕддӕр зӕгъӕн ис, ӕмӕ асайдта? Чи зоны, дӕхӕдӕг дӕр зоныс, афтӕ-иу чи бакодта, ахӕмты. Хатт адӕймаг афтӕ бакӕны, цӕмӕй ӕфхӕрд ма баййафа кӕнӕ цӕмӕй иннӕтӕй йӕхицӕн исты расайа. Фӕлӕ мах хъусӕм Йегъовӕмӕ, ӕмӕ нын уый та бафӕдзӕхста: «Ма сайут». Мах фӕнды, Хуыцауы цӕсты раст ӕмӕ сыгъдӕг цы у, уый аразын (Ром. 6:19).

20, 21. Кӕд Хуыцауы стыр хорзӕхӕн ӕцӕгдӕр аргъ кӕнӕм, уӕд ма нӕхи ноджыдӕр цӕмӕй хиздзыстӕм?

²⁰ Кӕй зӕгъын ӕй хъӕуы, мах нӕхи хизӕм хӕтындзинадӕй, фыднозтӕй ӕмӕ ӕндӕр ахӕм уӕззау тӕригъӕдтӕй. Фӕлӕ цӕмӕй афтӕ зӕгъӕн уа, ӕмӕ Хуыцауы стыр хорзӕхӕн аргъ кӕнӕм, уый тыххӕй фылдӕр цыдӕр хъӕуы. Зӕгъӕм, нӕхи ӕрмӕст хӕтындзинадӕй нӕ хиздзыстӕм, фӕлӕ, ӕнӕгъдау митӕ кӕм ис, ахӕм ирхӕфсӕнтӕй дӕр. Стӕй, фыднозт кӕй нӕ кӕнӕм, уымӕй уӕлдай ма-иу уыйбӕрц нӕ бануаздзыстӕм, ӕмӕ нӕ фӕрасыг кӕнынмӕ бирӕ мауал хъӕуа. Цӕмӕй нӕ зӕрдӕйы ӕвзӕр фӕндты фӕдыл ма цӕуӕм, уый тыххӕй нӕ, чи зоны, хъӕуа ӕппӕт хъарутӕй тох кӕнын. Фӕлӕ уӕддӕр нӕ бон у, ӕмӕ уыцы тохы фӕуӕлахиз уӕм.

²¹ Мах тырнӕм, Павел цӕмӕ разӕнгард кодта, уымӕ. Уый загъта: «Тӕригъӕд уӕ зӕххон буӕрттӕн паддзах мауал уӕд, цӕмӕй уӕ буары монцты фӕдыл ма цӕуат» (Ром. 6:12; 7:18–20). Кӕй зӕгъын ӕй хъӕуы, ӕппындӕр макуы мацӕмӕй фӕрӕдийӕм, уый нӕ бон нӕ бауыдзӕн. Фӕлӕ кӕд алы тӕригъӕдимӕ дӕр тох кӕнӕм, уӕд афтӕмӕй равдисдзыстӕм, Хуыцау ӕмӕ нӕм Чырысти цы стыр хорзӕх равдыстой, уымӕн ӕцӕгдӕр кӕй аргъ кӕнӕм.

22. Хуыцауӕй йе стыр хорзӕхы тыххӕй бузныг чи у, уыдонмӕ цавӕр хӕрзиуӕг ӕнхъӕлмӕ кӕсы?

²² Йегъовӕ нын йе стыр хорзӕхмӕ гӕсгӕ нӕ тӕригъӕдтӕ ныххатыр кодта ӕмӕ нын сӕ дарддӕр дӕр хатыр кӕндзӕн. Ӕмӕ дзы мах уый тыххӕй тынг бузныг стӕм! Уӕдӕ цӕй ӕмӕ ӕппӕт тыхтӕй архайӕм, цӕмӕй, Хуыцауы цӕсты раст цы нӕу, уыдӕттӕй нӕхи хизӕм, кӕд исчи уыцы хъуыддӕгтӕ тӕригъӕдыл нӕ нымайы, уӕддӕр. Цымӕ нӕм уый тыххӕй цавӕр хӕрзиуӕг ӕнхъӕлмӕ кӕсы? Павел загъта: «Тӕригъӕдӕй кӕй ссӕрибар стут ӕмӕ Хуыцауы цагъартӕ кӕй систут, уымӕ гӕсгӕ ныр та уӕ тыллӕг у сыгъдӕг цард, ӕмӕ уӕ уый кӕны ӕнусон цардмӕ» (Ром. 6:22).