Йегъовӕйӕн алцыдӕр у йӕ бон

КУЫСТОЙ ХУРЫСКАСТӔЙ ХУРНЫГУЫЛДМӔ

Ӕз райгуырдтӕн 1937 азы Хъыргъызстаны, горӕт Токмакмӕ хӕстӕг, иу колхозы. Нӕ бинонтӕ сты хъыргъызӕгтӕ ӕмӕ дзургӕ дӕр хъыргъызаг ӕвзагыл кӕнӕм. Мӕ ныййарджытӕ-иу хурыскастӕй хурныгуылдмӕ колхозы куыстой. Колхозы кусджытӕн хӕринаг ӕдзухдӕр лӕвӕрдтой, фӕлӕ сын ӕхца та фыстой афӕдз ӕрмӕстдӕр иу хатт. Мӕ мад бирӕ фыдӕбон кодта, цӕмӕй нӕ мӕ кӕстӕр хоимӕ фӕдардтаид. Фондз къласы куы фӕдӕн, уӕд ӕз дӕр райдыдтон колхозы кусын.

Кӕм цардтӕн, уыцы облӕсты мӕгуыр адӕм бирӕ уыд, ӕмӕ дзы цардамӕлттӕ кӕнын тынг зын уыди. Ӕрыгон куы уыдтӕн, уӕд, адӕймаг цӕмӕн цӕры ӕмӕ фидӕны цы уыдзӕн, уыдӕттыл хъуыды дӕр нӕ кодтон. Ӕмӕ уый ӕнхъӕл дӕр нӕ уыдтӕн, Йегъовӕ Хуыцау ӕмӕ йӕ фӕндты тыххӕй куы базонон, уӕд мын уый мӕ цард афтӕ тынг кӕй фӕивдзӕн. Хорз хабар Хъыргъызстанмӕ куыд ӕрхӕццӕ ӕмӕ куыд апарахат, уый диссаг у. Хабӕрттӕ райдыдтой цӕгат Хъыргъызстаны, нӕ облӕсты.

РАЗДӔР ХАСТ ЧИ УЫД, УЫДОН ХОРЗ ХАБАР ХЪЫРГЪЫЗСТАНМӔ ФӔХӔЦЦӔ КОДТОЙ

Хъыргъызстаны Йегъовӕ Хуыцауы тыххӕй рӕстдзинад фыццаг хатт фехъуыстой 1956 азы. Фӕлӕ уыцы рӕстӕг Хъыргъызстан Советон Цӕдисмӕ кӕй хауд, уый тыххӕй дзы адӕмӕн сӕ фылдӕр уыдысты коммунисттӕ, ӕмӕ сын хорз хабар сӕ зӕрдӕмӕ айсын зын уыд. Советон Цӕдисы цӕрӕг Йегъовӕйы Ӕвдисӕнтӕ политикӕимӕ баст хъуыддӕгты нӕ архайдтой (Иоан. 18:36). Уый тыххӕй сӕ нымадтой коммунизмы знӕгтыл, ӕмӕ сӕ фӕдыл зылдысты. Фӕлӕ сыгъдӕгзӕрдӕ адӕймаг цавӕрфӕнды зондыл хӕст куы уа, уӕддӕр Хуыцауы Ныхас йӕ зӕрдӕмӕ айсдзӕн. Мӕ царды иу ахсджиаг хъуыддаг бамбӕрстон: Йегъовӕйӕн «алцыдӕр у йӕ бон» (Мар. 10:27).

Советон Цӕдисы Йегъовӕйы Ӕвдисӕнты фӕдыл кӕй зылдысты, уый фӕрцы хорз хабар Хъыргъызстанмӕ дӕр фӕхӕццӕ. Куыд? Советон Цӕдисы-иу адӕмы знӕгтыл нымад чи ’рцыд, уыдоны-иу Сыбырмӕ ахастой. Ӕмӕ-иу сӕ куы ссӕрибар кодтой, уӕд-иу бирӕтӕ ӕрцыдысты Хъыргъызстанмӕ. Ӕмӕ се ’хсӕн уыд, хорз хабар нӕм чи фӕхӕццӕ кодта, уыцы Ӕвдисӕнтӕ дӕр. Уыдонӕй иу уыди Эмиль Янцен. Уый райгуырд Хъыргъызстаны 1919 азы. Эмилы арвыстой, адӕмӕн тыхкуыст кӕнын кӕм кодтой, ахӕм лагермӕ, ӕмӕ уым Ӕвдисӕнтимӕ базонгӕ. Уый рӕстдзинад йӕ зӕрдӕмӕ айста ӕмӕ 1956 азы фӕстӕмӕ ардӕм ӕрыздӕхт. Эмиль ӕрбынат кодта нӕ облӕсты, горӕт Сокулукмӕ хӕстӕг. 1958 азы Сокулукы фӕзынд ӕмбырд. Уый уыд Хъыргъызстаны фыццаг ӕмбырд.

Иу афӕдзы бӕрц куы рацыд, уӕд Сокулукмӕ ӕрлыгъд Виктор Винтер. Уыцы иузӕрдион ӕфсымӕр рӕстдзинады тыххӕй бирӕ зындзинӕдтӕ бавзӕрста. Дыууӕ хатты йӕ ӕртӕ азмӕ ахӕстоны сбадын кодтой, политикӕимӕ баст хъуыддӕгты кӕй нӕ архайдта, уый тыххӕй. Фӕстӕдӕр ма ахӕстоны ноджыдӕр дӕс азы фӕбадт, ӕмӕ фондз азы та хаст уыд. Фӕлӕ кӕд Йегъовӕйы адӕмы фӕдыл зылдысты, уӕддӕр раст дин парахат кодта.

РӔСТДЗИНАД БАХӔЦЦӔ, КӔМ ЦАРДТӔН, УЫЦЫ ГОРӔТМӔ

1963 азмӕ Хъыргъызстаны уыд 160 Ӕвдисӕны бӕрц. Бирӕтӕ сӕ уыдысты Германийӕ, Уӕрӕсейӕ ӕмӕ Украинӕйӕ. Уыдонӕй иу уыд Эдуард Вартер. Уый донаргъуыд райста 1924 азы Германийы. 1940-ӕм азты йӕ нацисттӕ арвыстой концлагермӕ, цалдӕр азы фӕстӕ та йӕ лагермӕ арвыстой Советон Цӕдисы коммунисттӕ. 1961 азы уыцы иузӕрдион ӕфсымӕр цӕрынмӕ ӕрлыгъд, кӕм цардтӕн, уыцы горӕтмӕ хӕстӕг чи у, уыцы горӕт Кантмӕ.

Канты ма цард ноджыдӕр иу Ӕвдисӕн, хо Элизаветӕ Фот. Элизаветӕ куыста хуыйӕгӕй. Йӕ куысты тынг дӕсны уыд, ӕмӕ йӕ клиенттӕй бирӕтӕ уыдысты дохтыртӕ ӕмӕ ахуыргӕнджытӕ. Уыдонӕй иу уыд Аксамай Султаналиева, йӕ лӕг прокуратурӕйы цыдӕр хицауӕй куыста. Аксамай Элизаветӕмӕ йӕ заказы тыххӕй ӕрбацыд, ӕмӕ йӕм бирӕ фарстатӕ фӕлӕвӕрдта, адӕймаг цӕмӕн цӕры ӕмӕ мӕрдтӕ цы уавӕры сты, уый фӕдыл. Элизаветӕ йын йӕ фарстатӕн дзуаппытӕ комкоммӕ Библийӕ лӕвӕрдта. Фӕстӕдӕр Аксамай сси зынгзӕрдӕ хъусынгӕнӕг.

Уыцы рӕстӕг нӕм Молдовӕйӕ иу ӕфсымӕры, Николай Чимпоешы, районон цӕстдарӕгӕй снысан кодтой. Районон цӕстдарӕгӕй фӕлӕггад кодта 30 азы бӕрц. Николай ӕрмӕст ӕмбырдтӕ нӕ бӕрӕг кодта, фӕлӕ ма йӕ хъус дардта, цӕмӕй нӕ литературӕйӕн мыхуыргӕнӕн машинкӕйыл къопитӕ кодтаиккой ӕмӕ йӕ парахат кодтаиккой. Цы куыст кодта, уый хицауадӕй ӕнӕбафиппайгӕ нӕ фӕци. Эдуард Вартер Николайӕн радта иу хорз уынаффӕ: «Хицауады кусджытӕ дӕ куы фӕрсой, уӕд-иу сын ӕргом зӕгъ, нӕ литературӕ Бруклинӕй, нӕ сӕйраг хайадӕй, кӕй исӕм. КГБ-йы кусӕгӕн-иу комкоммӕ йӕ цӕстытӕм кӕс ӕмӕ-иу мацӕмӕй тӕрс!» (Матф. 10:19).

Уымӕй бирӕ нӕ рацыд, афтӕ Николаймӕ фӕдзырдтой, КГБ-йӕн Канты цы сӕйраг хайад уыд, уырдӕм. Дарддӕр цы ’рцыд, уый тыххӕй Николай радзырдта: «КГБ-йы кусӕг мӕ бафарста, нӕ литературӕ кӕцӕй исӕм, уымӕй. Ӕз ын загътон, зӕгъын, Бруклинӕй. Ӕмӕ мын цы загътаид, уый нал зыдта. Ауагъта мӕ, ӕмӕ мӕм никуыуал фӕдзырдтой». Николай ӕмӕ иннӕ Ӕвдисӕнтӕ уыдысты къӕрцхъус ӕмӕ афтӕмӕй хорз хабар цӕгат Хъыргъызстаны, нӕ облӕсты дарддӕр дӕр хъусын кодтой. Ӕппынфӕстаг 1980-ӕм азты хорз хабар фехъуыстой мӕ бинонтӕ дӕр. Фыццаг уыд мӕ бинойнаг Майрамбюбю.

МӔ БИНОЙНАГ УАЙТАГЪД БАМБӔРСТА, УЫЙ РӔСТДЗИНАД КӔЙ У

Майрамбюбю схъомыл Нарыны облӕсты, Хъыргъызстаны облӕсттӕй сӕ иуы. 1974 азы августы мӕ кӕстӕр хомӕ уазӕгуаты ӕрбацыд, ӕмӕ йӕ уӕд фыццаг хатт федтон. Майрамбюбю уайтагъд мӕ зӕрдӕмӕ фӕцыд. Ӕмӕ тӕккӕ уыцы бон нӕ цард баиу кодтам.

1981 азы январы Майрамбюбю автобусыл базармӕ куы фӕцӕйцыд, уӕд фехъуыста, райдианы кӕй кой скодтон, уыцы ныхӕстӕ. Фылдӕр базонын ӕй бафӕндыд, ӕмӕ, уыцы ныхӕстӕ кӕмӕй фехъуыста, уыцы сылгоймагмӕ бацыд ӕмӕ йӕ йӕ номӕй ӕмӕ йӕ адрисӕй бафарста. Сылгоймаг ын йӕ ном загъта, Апун, зӕгъгӕ. Фӕлӕ арӕхстгай архайдта, уымӕн ӕмӕ суанг 1980-ӕм азты дӕр Ӕвдисӕнтӕн хъусын кӕныны бар нӕма уыд. Йӕ адрис раттыны бӕсты дзы Апун нӕхи адрис райста. Уыцы бон Майрамбюбю нӕхимӕ уыцы хъӕлдзӕгӕй ӕрбаздӕхт.

«Диссаджы хабӕрттӕ фехъуыстон!» – загъта Майрамбюбю. «Иу сылгоймаг мын загъта, тагъд адӕм кӕй нал мӕлдзысты. Суанг ма, дам, хъӕддаг сырдтӕ дӕр адӕмӕн зиан нал хӕсдзысты». Уыцы ныхӕстӕ мӕм аргъауы хуызӕн фӕкастысты, ӕмӕ йын загътон: «Фӕлӕуу, ӕрбацӕуӕд уал ӕмӕ нын хабӕрттӕ бӕстон радзурӕд».

Апун нӕм ӕрбацыд ӕртӕ мӕйы фӕстӕ. Уый фӕстӕ та нӕм цыдысты ӕндӕр Ӕвдисӕнтӕ, ӕмӕ афтӕмӕй базонгӕ стӕм, хъыргъызӕгтӕй Ӕвдисӕнтӕ фыццаг чи сси, уыдонӕй кӕимӕдӕрты. Уыцы хотӕ-иу нын радзырдтой Йегъовӕйы тыххӕй, стӕй йӕ диссаджы фӕндты тыххӕй. Немӕ Библи ахуыр кодтой, «От потерянного до возвращенного рая»a, зӕгъгӕ, чи хуыйны, уыцы чиныджы фӕрцы. Токмакы ахӕм чиныг иу йеддӕмӕ кӕй нӕ уыд, уый тыххӕй йӕ нӕхицӕн къухӕй рафыстам.

Ӕппӕты фыццаг цы базыдтам, уыдӕттӕй иу уыд Райдианы 3:15 фыст пехуымпарад. Уыцы пехуымпарад сӕххӕст уыдзӕн Хуыцауы Паддзахады Паддзах Чырыстийы фӕрцы. Уый у, алчидӕр кӕй хъуамӕ фехъуса, ахӕм ахсджиаг хабар! Ӕмӕ уый зонгӕйӕ адӕймаг куыннӕ хъуамӕ хъусын кӕна! (Матф. 24:14). Бирӕ нӕ рацыд, афтӕ нын Библийы рӕстдзинад нӕ цард ивын райдыдта.

КӔД ТӔССАГ УЫД, УӔДДӔР ӔМБЫРДТӔМ ЦЫДЫСТӔМ ӔМӔ ДОНАРГЪУЫД РАЙСТАМ

Иухатт нӕ Токмакы иу ӕфсымӕр чындзӕхсӕвмӕ фӕхуыдта. Майрамбюбюимӕ бафиппайдтам, Ӕвдисӕнтӕ иннӕ адӕмӕй куыд тынг хицӕн кӕнынц, уый. Чындзӕхсӕвы карз нозт нӕ уыд ӕмӕ дзы алцыдӕр уыди уаг ӕмӕ ӕгъдауыл. Уый размӕ-иу цы чындзӕхсӕвты уыдыстӕм, уым-иу арӕх адӕм ныррасыг сты, ӕнӕгъдау митӕ-иу кодтой ӕмӕ-иу ӕвзӕр дзыхӕй дзырдтой. Ам та хабар бынтон ӕндӕрхуызон уыд.

Цалдӕр хатты Токмакы ӕмбырды дӕр уыдыстӕм. Хорз боныхъӕд-иу куы уыди, уӕд-иу ӕмбырдтӕ ауагътой хъӕды. Мах зыдтам, пъӕлицӕйы кусджытӕ нӕ фӕдыл сусӕгӕй кӕй зилынц, ӕмӕ-иу ӕфсымӕртӕй исчи хъахъхъӕнӕгӕй ныллӕууыд. Зымӕджы та-иу ӕмбырдтӕ хӕдзӕртты ауагътой. Ӕмбырды рӕстӕг нӕм цалдӕр хатты пъӕлицӕйы кусджытӕ ӕрбацыдысты, ам цы кусут, зӕгъгӕ. 1982 азы июлы Майрамбюбюимӕ иу цӕугӕдоны, Чу, зӕгъгӕ, донаргъуыд куы истам, уӕд дӕр хъуамӕ не ’ппӕт дӕр тынг къӕрцхъус уыдаиккам (Матф. 10:16). Донаргъуыды фӕдыл хъӕды ауагътам сӕрмагонд фембӕлд. Ӕфсымӕртӕ уырдӕм ӕрцыдысты гыццыл къордтӕй. Уыцы фембӕлды Паддзахады зарджытӕ азарыдыстӕм ӕмӕ донаргъуыды фӕдыл раныхасмӕ байхъуыстам.

ФЫЛДӔР ХЪУСЫН КӔНЫНӔН НЫН ФАДАТ ФӔЗЫНД, ӔМӔ ДЗЫ СПАЙДА КОДТАМ

1987 азы мын иу ӕфсымӕр загъта, цӕмӕй горӕт Балыкчыйы бабӕрӕг кодтаин, фылдӕр базонын кӕй фӕндыд, иу ахӕм адӕймаджы. Кӕм цардыстӕм, уырдыгӕй мӕ уыцы горӕтмӕ хъуыди цыппар сахаты поездыл цӕуын. Балыкчымӕ хъусын кӕнынмӕ цалдӕр хатты куы ацыдыстӕм, уӕд федтам, бирӕты дзы кӕй фӕндыд Хуыцауы тыххӕй фылдӕр базонын. Уый хорз фадат уыд, цӕмӕй фылдӕр хъусын кӕнын райдыдтаиккам.

Майрамбюбюимӕ-иу Балыкчымӕ арӕх ацыдыстӕм. Улӕфгӕ бонтӕн-иу сӕ фылдӕр уым арвыстам. Хъусын кӕнынмӕ-иу ацыдыстӕм ӕмӕ-иу дзы ӕмбырдтӕ ауагътам. Нӕ публикацитӕ-иу нын чи каст, уыцы адӕм фылдӕрӕй-фылдӕр кодтой. Публикацитӕ-иу немӕ Токмакӕй картофы голладжы ӕрбаластам. Дыууӕ голладжы дзаг литературӕ-иу нын тыххӕйты иу мӕйы фаг сси. Хъусын-иу кодтам суанг поезды дӕр, Балыкчымӕ ӕмӕ-иу фӕстӕмӕ куы цыдыстӕм, уӕд.

Балыкчымӕ фӕцыдыстӕм аст азы, ӕмӕ дзы 1995 азы фӕзынд ӕмбырд! Уал азмӕ фӕндаггагыл бирӕ бахардз кодтам. Нӕ къух уыйбӕрц нӕ амыдта. Фӕлӕ нын иу ӕфсымӕр ӕдзухдӕр ӕхца лӕвӕрдта, цӕмӕй-иу нӕ бон уырдӕм цӕуын уыдаид. Йегъовӕ уыдта, фылдӕр хъусын кӕнын нӕ кӕй фӕнды, ӕмӕ нын «арвы дуӕрттӕ» байгом кодта (Мал. 3:10). Ӕцӕгдӕр, Йегъовӕйӕн алцыдӕр у йӕ бон!

МӔ БИНОНТӔ ӔМӔ МӔ ЛӔГГАД

1992 азы мӕ снысан кодтой хистӕр нӕлгоймагӕй. Нӕ бӕстӕйы хъыргъызӕгтӕй хистӕр нӕлгоймаг фыццаг ӕз сдӕн. Уыцы рӕстӕг Токмакы не ’мбырдӕн лӕггад кӕнынӕн ног фадӕттӕ фӕзынд. Библи ахуыр кӕнын райдыдтам, бынӕттон техникумты чи ахуыр кодта, бирӕ ахӕм ӕрыгон хъыргъызаг студенттимӕ. Уыцы студенттӕй иу ныр лӕггад кӕны филиалы комитеты, дыууӕйӕ та дзы сты сӕрмагонд пионертӕ. Уымӕй уӕлдай ма ӕмбырды дӕр иннӕтӕн ӕххуыс кодтам. 1990-ӕм азты райдианы нӕм публикацитӕ уыд ӕрмӕстдӕр уырыссаг ӕвзагыл, стӕй ӕмбырдтӕ дӕр уырыссаг ӕвзагыл уагътам. Фӕлӕ ӕмбырды, йӕ мадӕлон ӕвзаг хъыргъызаг кӕмӕн уыд, ахӕмтӕн сӕ нымӕц фылдӕрӕй-фылдӕр кодта. Уымӕ гӕсгӕ-иу сын ӕмбырды рӕстӕг тӕлмац кодтон, цӕмӕй сын рӕстдзинад сӕ зӕрдӕтӕм бахъардтаид.

Майрамбюбюимӕ ма нӕ хъуыди нӕ сывӕллӕтты хъомыл кӕнын дӕр. Немӕ-иу сӕ уацамынды ӕмӕ ӕмбырдтӕм кодтам. Нӕ чызджытӕй сӕ иуыл, Гулсайрӕйыл, уӕд 12 азы йеддӕмӕ нӕ цыд, ӕмӕ йӕ зӕрдӕмӕ тынг цыди, уынджы-иу кӕуыл фембӕлдыстӕм, уыдонимӕ Библийы тыххӕй дзурын. Нӕ сывӕллӕттӕ ма уарзтой Библийы стихтӕ ахуыр кӕнын. Уыдӕттӕ нӕ цотӕн, фӕстӕдӕр та нӕ цоты цотӕн дӕр, баххуыс кодтой, цӕмӕй ӕмбырды хъуыддӕгты зӕрдиагӕй архайын райдыдтаиккой. Нӕ цот сты 9 адӕймаджы, нӕ цоты цот та – 11 адӕймаджы. 16 дзы Йегъовӕйӕн лӕггад кӕнынц – чидӕртӕ сӕ донаргъуыд сты, чидӕртӕ та сӕ ныййарджытимӕ ӕмбырдтӕм фӕцӕуынц.

ДИССАДЖЫ ИВЫНДЗИНӔДТӔ

1950-ӕм азты нӕ облӕсты Йегъовӕйы хъуыддаг чи райдыдта, уыцы зынаргъ хотӕ ӕмӕ ӕфсымӕртӕ, сӕ фыдӕбон цы стыр тыллӕг ӕрхаста ӕмӕ нӕм цы диссаджы ивындзинӕдтӕ ӕрцыд, уыдон куы фениккой, уӕд, хӕрзаг, бадис кӕниккой. Зӕгъӕм, 1990-ӕм азтӕй фӕстӕмӕ нӕ бон у сӕрибарӕй хъусын кӕнын ӕмӕ стыр къордтӕй ӕмбырд кӕнын.

1991 азы Майрамбюбюимӕ фыццаг хатт уыдыстӕм конгрессы. Уыцы конгресс уыди Хъазахстаны, горӕт Алма-Атайы, ныр хуыйны Алматы. Ӕмӕ 1993 азы та фыццаг хатт конгресс ацыд Хъыргъызстаны, Бишкекы, стадион «Спартакы». Конгрессы размӕ хотӕ ӕмӕ ӕфсымӕртӕ уыцы стадион ӕнӕхъӕн къуыри фефснайдтой. Стадионы директоры уый ахӕм дисы бафтыдта, ӕмӕ стадионы тыххӕй ӕхца исын дӕр нӕ бакуымдта.

1994 азы ма нӕ организацийы ӕрцыд ноджыдӕр иу ахсджиаг хабар – рацыд фыццаг публикаци хъыргъызаг ӕвзагыл. Ӕмӕ ныр дӕр нӕ литературӕ хъыргъызаг ӕвзагмӕ тӕлмац кӕнынц, Бишкекы нын цы филиал ис, уым. Уымӕй уӕлдай ма 1998 азы Хъыргъызстаны хицауад Ӕвдисӕнтӕн радта сӕрибарӕй архайыны бар. Уӕдӕй нырмӕ нӕ нымӕцыл тынг бафтыд, ӕмӕ ныр нӕ бӕстӕйы ис 5 000 хъусынгӕнӕгӕй фылдӕр. Хъыргъызстаны ис 83 ӕмбырды ӕмӕ 25 къорды англисаг, китайаг, туркаг, узбекаг, уйгураг, уырыссаг, уырыссаг къухӕйамонгӕ ӕмӕ хъыргъызаг ӕвзӕгтыл. Уыцы ӕмбырдтӕ ӕмӕ къордты чи лӕггад кӕны, уыцы зынаргъ хотӕ ӕмӕ ӕфсымӕртӕ кӕд алыхуызон адӕмыхӕттытӕй сты, уӕддӕр Йегъовӕйӕн уӕхски-уӕхск лӕггад кӕнынц. Ӕмӕ уыцы диссаджы ивындзинӕдтӕ иууылдӕр ӕрцыдысты Йегъовӕйы руаджы.

Йегъовӕйы фӕрцы мӕхи царды дӕр бирӕ цыдӕртӕ аивта. Кӕд мӕгуыр хӕдзары схъомыл дӕн ӕмӕ фондз къласы йеддӕмӕ нӕ фӕдӕн, уӕддӕр мӕ Йегъовӕ уыцы кады аккаг скодта, цӕмӕй хистӕр нӕлгоймагӕй лӕггад кӕнон ӕмӕ, мӕнӕй бирӕ ахуыргонддӕр чи у, ахӕм адӕмӕн Библийы рӕстдзинад амонон. Йегъовӕ сарӕзта, ӕнхъӕл дӕр кӕмӕн нӕ уыдтӕн, ахӕм хъуыддӕгтӕ. Царды мыл цы хабӕрттӕ ӕрцыд, уыдоныл хъуыды кӕнгӕйӕ мӕ фӕфӕнды дарддӕр дӕр иннӕтӕн Йегъовӕйы тыххӕй, йӕ бон алцыдӕр кӕмӕн у, уыцы Хуыцауы тыххӕй, хъусын кӕнын (Матф. 19:26).