Хӕларзӕрдӕдзинад – ныхасӕй ӕмӕ хъуыддагӕй бӕрӕг чи вӕййы, ахӕм миниуӕг

ИСЧИ нын хорзӕй исты куы саразы кӕнӕ нын исты хорз ныхас куы фӕзӕгъы, уӕд нын уый стыр ныфсы хос куыннӕ вӕййы! Иннӕтӕ ныл куы батыхсынц, уӕд сӕ тынг бузныг вӕййӕм. Алкӕй дӕр нӕ фӕнды, цӕмӕй йӕм иннӕтӕ хӕларзӕрдӕ уой. Фӕлӕ нӕхӕдӕг дӕр хъуамӕ уыцы миниуӕгыл кусӕм. Цымӕ уый нӕ бон куыд у аразын?

Хӕларзӕрдӕ адӕймаг иннӕтыл зӕрдиагӕй фӕтыхсы, ӕмӕ уый бӕрӕг вӕййы ныхасӕй дӕр ӕмӕ хъуыддагӕй дӕр. Фӕлӕ, ӕцӕг хӕларзӕрдӕдзинад уый нӕу, ӕмӕ ӕнӕуи уӕздан уай. Хӕларзӕрдӕ схонӕн ис, иннӕты чи уарзы ӕмӕ сын се ’нкъарӕнтӕ чи фембары, ахӕм адӕймаджы. Уымӕй уӕлдай, хӕларзӕрдӕдзинад у, Хуыцауы сыгъдӕг тыхы дыргъмӕ цы миниуджытӕ хауы, уыдонӕй иу (Гал. 5:22, 23). Йегъовӕйы фӕнды, цӕмӕй уыцы миниуӕгыл кусӕм. Уӕдӕ ӕркӕсӕм, йӕхӕдӕг дӕр ӕмӕ йӕ Фырт дӕр хӕларзӕрдӕдзинад куыд ӕвдисынц ӕмӕ сӕ нӕ бон куыд у бафӕзмын.

ЙЕГЪОВӔ АЛКӔМӔ ДӔР У ХӔЛАРЗӔРДӔ

Йегъовӕ алкӕмӕ дӕр у хӕларзӕрдӕ, суанг, «хорздзинад чи не ’мбары ӕмӕ фыдзӕрдӕ чи у», уыдонмӕ дӕр (Лук. 6:35). Зӕгъӕм, уый «йӕ хур скӕсын кӕны ӕвзӕртыл дӕр ӕмӕ хӕрзтыл дӕр, ӕмӕ къӕвда дӕр ратты рӕстгӕнджытӕн дӕр ӕмӕ фыдгӕнджытӕн дӕр» (Матф. 5:45). Уӕдӕ, Йегъовӕйы йе Сфӕлдисӕгыл чи нӕ нымайы, суанг уыдон дӕр царды хорздзинӕдтӕй хайджын сты ӕмӕ сӕ бон у цин кӕнын.

Йегъовӕйы хӕларзӕрдӕдзинад ирдӕй зыны, Адам ӕмӕ Евӕйы тыххӕй цы сарӕзта, уымӕй дӕр. Тӕригъӕд куы сарӕзтой, уымӕй бирӕ нӕ рацыд, афтӕ «легъуибӕласы сыфтӕ кӕрӕдзийыл бахуыдтой ӕмӕ сӕ сӕ астӕутыл ӕрбабастой». Фӕлӕ Йегъовӕ зыдта, Едемы цӕхӕрадоны ӕдде цӕрынӕн сӕ ӕндӕр дзаумӕттӕ кӕй хъӕудзӕн, уымӕн ӕмӕ, зӕхх ӕлгъыст кӕй уыд, уый тыххӕй йыл зад «сындзытӕ ӕмӕ хӕмпӕлгӕрдӕг». Гъемӕ сыл афтӕ батыхст, ӕмӕ сын «цӕрмттӕй скодта даргъ дзаумӕттӕ» (Райд. 3:7, 17, 18, 21).

Кӕд Йегъовӕ алкӕмӕ дӕр, суанг «ӕвзӕртӕм дӕр», у хӕларзӕрдӕ, уӕддӕр уӕлдай хӕларзӕрдӕ у йӕ иузӕрдион лӕггадгӕнджытӕм. Дӕ зӕрдыл-ма Библийӕ иу хабар ӕрлӕууын кӕн. Пехуымпар Захарийы заман израилӕгтӕ Иерусалимы кувӕндон ногӕй аразын райдыдтой, фӕлӕ цасдӕры фӕстӕ уыцы хъуыддаг ӕрлӕууыд. Иу зӕды уый тынг тыхсын кодта, ӕмӕ Йегъовӕйӕн уый тыххӕй загъта. Хуыцау ӕм лӕмбынӕг байхъуыста, ӕмӕ йын «хорз, ныфсы ныхӕстӕ» загъта (Зах. 1:12, 13). Йегъовӕ ма афтӕ батыхст пехуымпар Илийайыл дӕр. Илийайӕн иуафон йӕ ныфс афтӕ асаст, ӕмӕ Йегъовӕйӕ мӕлӕт курын райдыдта. Хуыцау Илийайы ӕнкъарӕнтӕ ӕмбӕрста, ӕмӕ йӕм йӕ зӕды арвыста, цӕмӕй йӕ бафидар кодтаид. Стӕй ма дзы ныфс бауагъта, иунӕг кӕй нӕу. Йегъовӕ Илийамӕ ахӕм хӕларзӕрдӕдзинад кӕй равдыста, уый фӕрцы йӕм хъарутӕ фӕзынд, цӕмӕй йыл цы хӕс уыд, уый дарддӕр ӕххӕст кодтаид (1 Пад. 19:1–18). Фӕлӕ цымӕ Йегъовӕйы хӕларзӕрдӕдзинад йӕ лӕггадгӕнджытӕй ӕппӕты тынгдӕр чи фӕзмыдта?

ЙЕСО ӔВДЫСТА ДИССАДЖЫ ХӔЛАРЗӔРДӔДЗИНАД

Йесо зӕххыл куы цард, уӕд ӕй иууылдӕр зыдтой, алкӕддӕр хӕларзӕрдӕ чи уыд ӕмӕ иннӕты хорзыл чи хъуыды кодта, ахӕм адӕймагӕй. Уый адӕммӕ тызмӕг цӕстӕй никуы каст ӕмӕ сын йӕхи хицау никуы кодта. Уый сын фӕлмӕнӕй загъта: «Фыдӕбон чи кӕны ӕмӕ уӕззау уаргъ чи хӕссы,– уе ’ппӕт дӕр мӕм ӕрцӕут, ӕмӕ уын ӕз удӕнцой ратдзынӕн» (Матф. 11:28–30). Ахӕм хӕларзӕрдӕ кӕй уыд, уымӕ гӕсгӕ-иу адӕм йӕ фӕдыл цыдысты, кӕдӕмфӕнды ма цыдаид, уӕддӕр. Йесо адӕмӕн тӕригъӕд кодта, ӕмӕ-иу, ӕххормаг чи уыд, уыдонӕн хӕринаг радта, рынчын чи уыд, уыдоны та-иу сдзӕбӕх кодта, стӕй сын йӕ Фыды тыххӕй «бирӕ цыдӕртӕ» амыдта (Мар. 6:34; Матф. 14:14; 15:32–38).

Йесо иннӕты ӕнкъарӕнтӕ ӕмбӕрста ӕмӕ сыл зӕрдиагӕй тыхсти. Чи-иу ӕм ӕрбацыд, уыдонӕй-иу алкӕмӕн дӕр хӕларзӕрдӕйӕ баххуыс кодта, куы-иу ӕй не ’вдӕлд, суанг уӕд дӕр (Лук. 9:10, 11). Ахъуыды-ма кӕн, 12 азы тугцыдӕй чи удхар кодта, уыцы сылгоймаджы хабарыл. Уый Йесойы уӕлӕдарӕсыл андзӕвыд, кӕй сдзӕбӕх уыдзӕн, уый ныфсӕй. Фӕлӕ йын уый бар нӕ уыди, уымӕн ӕмӕ Моисейы закъонмӕ гӕсгӕ сыгъдӕг нӕ уыд (Лев. 15:25–28). Цымӕ Йесо уымӕ цы цӕстӕй ракаст? Уайдзӕф ын нӕ бакодта. Уый федта, сылгоймаг кӕй фӕтарст ӕмӕ йын фӕтӕригъӕд кодта, уыйбӕрц рӕстӕг кӕй хъизӕмар кодта, уый тыххӕй ӕмӕ йын загъта: «Мӕ чызг, дӕ уырнындзинад дӕ фервӕзын кодта. Фарнимӕ цу. Дӕ удхайраг низӕй макуыуал схъӕрз» (Мар. 5:25–34). Цӕй диссаджы хӕларзӕрдӕдзинад равдыста Йесо!

ХӔЛАРЗӔРДӔ ЧИ У, УЫЙ ИННӔТӔН ЙЕ ’ХХУЫС НӔ БАВГЪАУ КӔНЫ

Цы цӕвиттонтӕм ӕркастыстӕм, уыдонӕй зыны, ӕцӕг хӕларзӕрдӕдзинад хъуыддӕгтӕй кӕй вӕййы бӕрӕг. Иннӕтӕн ӕххуыс кӕнын куыд ахсджиаг у, уый равдисыны тыххӕй Йесо радзырдта фӕсномыг ныхас самариаг лӕджы тыххӕй. Кӕд самариӕгтӕ ӕмӕ дзуттӕгтӕ кӕрӕдзимӕ знаджы цӕстӕй кастысты, уӕддӕр уыцы фӕсномыг ныхасы самариаг лӕг фӕтӕригъӕд кодта, абырджытӕ кӕй фӕнадтой ӕмӕ фӕндагыл ӕрдӕгмардӕй кӕй ныууагътой, уыцы дзуттаг лӕгӕн. Самариаг лӕг хӕларзӕрдӕ кӕй уыд, уымӕ гӕсгӕ йӕ бафӕндыд уыцы лӕгӕн баххуыс кӕнын. Уый йын йӕ цӕфтыл сой рауагъта ӕмӕ йӕ фысымуатмӕ аласта. Самариаг лӕг фысымуаты хицауӕн ӕхца радта, цӕмӕй уыцы дзуттаг лӕгмӕ базылдаид ӕмӕ йын загъта, уымӕй уӕлдай ма йыл цы схардз кӕна, уый дӕр ын кӕй бафиддзӕн (Лук. 10:29–37).

Хӕларзӕрдӕдзинад ма равдисӕн ис зӕрдӕфидаргӕнӕн ныхӕстӕй дӕр. Библийы фыст ис: «Сагъӕстӕй адӕймаджы зӕрдӕ ныууӕззау вӕййы, хорз ныхас та зӕрдӕйыл базыртӕ басадзы» (Ӕмб. 12:25). Хӕларзӕрдӕдзинад баст у хорздзинадимӕa, ӕмӕ нӕ уыцы дыууӕ миниуӕджы разӕнгард кӕнынц, цӕмӕй-иу иннӕты ныхасӕй бафидар кӕнӕм, ӕмӕ сын уый ӕрхӕссы стыр удӕнцой. Иннӕтӕн-иу хорз ныхӕстӕ куы зӕгъӕм, уӕд-иу афтӕмӕй равдисдзыстӕм, кӕй сыл тыхсӕм. Ӕмӕ сын уый фӕрцы ӕнцондӕр уыдзӕн сӕ зындзинӕдтимӕ тох кӕнын (Ӕмб. 16:24).

НӔ БОН КУЫД У ХӔЛАРЗӔРДӔДЗИНАД НӔ УДЫХЪӔДЫ ФИДАР КӔНЫН?

Хуыцау нӕ йӕхимӕ гӕсгӕ кӕй сфӕлдыста, уымӕ гӕсгӕ адӕмӕн се ’ппӕтӕн дӕр сӕ бон у хӕларзӕрдӕдзинад ӕвдисын (Райд. 1:27). Зӕгъӕм, Павелы Роммӕ чи хъуамӕ фӕхӕццӕ кодтаид, уыцы ромаг ӕфсӕддон хицау, Юлий, Павелӕн горӕт Сидоны «ахӕм хорздзинад ракодта, ӕмӕ йӕ йе ’мбӕлттӕм ауагъта, цӕмӕй йӕм фӕкастаиккой» (Хъуыд. 27:3). Уымӕй цасдӕры фӕстӕ та, Павел ӕмӕ иннӕ бӕлццӕттӕ цы науыл цыдысты, уый куы ныппырх, уӕд сакъадах Мальтӕйы цӕрджытӕ «диссаджы хӕларзӕрдӕ разындысты» – арт сын скодтой, цӕмӕй сӕхи батавтаиккой ӕмӕ схъарм уыдаиккой (Хъуыд. 28:1, 2). Кӕй зӕгъын ӕй хъӕуы, ӕфсӕддон хицау дӕр ӕмӕ Мальтӕйы цӕрджытӕ дӕр хорз хъуыддӕгтӕ сарӕзтой. Фӕлӕ Йегъовӕйы зӕрдӕ рухс кӕныны тыххӕй хӕларзӕрдӕдзинад иу хатт равдисын фаг нӕу. Адӕймаг хъуамӕ алкӕддӕр уа хӕларзӕрдӕ.

Йегъовӕйы фӕнды, цӕмӕй хӕларзӕрдӕдзинад нӕ удыхъӕды сфидар кӕнӕм. Уымӕ гӕсгӕ йӕ лӕггадгӕнджытӕн дзуры, цӕмӕй уыцы миниуӕг скӕной, «дӕ уӕлӕ дзаумӕттӕ куыд скӕнай, афтӕ» (Кол. 3:12, фип.). Фӕлӕ, раст куы зӕгъӕм, уӕд алы хатт ӕнцон нӕ вӕййы ацы миниуӕг ӕвдисын. Цымӕ афтӕ цӕмӕн у? Хатгай нын къуылымпыйы хос вӕййы, ӕфсӕрмыгӕнаг, ӕнӕныфсхаст кӕнӕ кӕмдӕр хиуарзон кӕй стӕм, уый. Стӕй ма нын, чи зоны, уыцы миниуӕг ӕвдисын зын вӕййы, чи нӕ бафхӕры, уыдонмӕ. Фӕлӕ куыдфӕнды ма уа, уӕддӕр, Йегъовӕйӕ йӕ сыгъдӕг тых куы курӕм ӕмӕ йын йӕ хӕларзӕрдӕдзинад куы фӕзмӕм, уӕд нын уыдӕттӕ къуылымпыйы хос нал уыдзысты (1 Кор. 2:12).

Нӕ бон куыд у базонын, цавӕр хъуыддӕгты нӕ хъӕуы уыцы миниуӕгыл ноджы тынгдӕр бакусын? Нӕ бон у ахӕм фарстатыл ахъуыды кӕнын: «Иннӕтӕм лӕмбынӕг фӕхъусын ӕмӕ сын се ’нкъарӕнтӕ бамбарыныл фӕархайын? Иннӕты цавӕр ӕххуыс хъӕуы, уымӕ мӕ хъус фӕдарын? Мӕ бинонтӕй чи нӕу кӕнӕ ме ’мбал чи нӕу, уыдонӕн фӕстаг хатт хорзы кӕд бацыдтӕн?» Уый фӕстӕ нӕ бон у нӕ разы, зӕгъӕм, ахӕм нысан сӕвӕрын, цӕмӕй иннӕты, уӕлдайдӕр та не ’мбырды хотӕ ӕмӕ ӕфсымӕрты, хуыздӕр базонӕм. Афтӕмӕй зондзыстӕм, цавӕр зындзинӕдтыл ӕмбӕлынц ӕмӕ сӕм цӕмӕй фӕкӕсын хъӕуы, уый. Ӕмӕ-иу стӕй хъуамӕ ууыл архайӕм, ӕмӕ, мах куыд фӕнды, цӕмӕй нӕм адӕм хӕларзӕрдӕ уой, афтӕ сӕм нӕхӕдӕг дӕр уӕм хӕларзӕрдӕ (Матф. 7:12). Уыцы миниуӕгыл куы кусӕм ӕмӕ Йегъовӕйӕ ӕххуыс куы курӕм, уӕд нын нӕ фыдӕбонӕн раарфӕ кӕндзӕн (Лук. 11:13).

АДӔМ ХӔЛАРЗӔРДӔДЗИНАДӔН ФӔАРГЪ КӔНЫНЦ

Апостол Павел ранымадта, Хуыцауы лӕггадгӕнӕг кӕй у, уый цы миниуджытӕй у бӕрӕг, уыдон, ӕмӕ «хӕларзӕрдӕдзинады» кой дӕр скодта (2 Кор. 6:3–6). Павел адӕмыл зӕрдиагӕй тыхст, ӕмӕ уый бӕрӕг уыд йӕ ныхӕстӕй дӕр ӕмӕ йӕ хъуыддӕгтӕй дӕр, ӕмӕ йын иннӕтӕ аргъ кодтой (Хъуыд. 28:30, 31). Мах дӕр хӕларзӕрдӕ куы уӕм, уӕд, чи зоны, иннӕты бафӕнда рӕстдзинад базонын. Алкӕмӕ дӕр, суанг не ’фхӕрджытӕм дӕр, хӕларзӕрдӕ куы уӕм, уӕд, гӕнӕн ис, сӕ зӕрдӕтӕ ӕрфӕлмӕн уой ӕмӕ сӕ «маст атайа» (Ром. 12:20, фип.). Чи зоны сӕ цасдӕры фӕстӕ бафӕнда Библийы тыххӕй фылдӕр базонын.

Ног дунейы чи райгас уа, уыдон сӕхиуыл банкъардзысты, ӕцӕг хӕларзӕрдӕдзинад цы у, уый, чидӕртӕ та уый сӕхиуыл, чи зоны, фыццаг хатт банкъарой. Ӕмӕ уӕд сӕхи дӕр бафӕнддзӕн уыцы миниуӕг ӕвдисын. Хӕларзӕрдӕдзинад ӕвдисын ӕмӕ иннӕтӕн ӕххуыс кӕнын кӕй нӕ фӕнда, ахӕм адӕмӕн Хуыцауы Паддзахады дӕлбар цӕрыны фадат нал уыдзӕн. Дзӕнӕты ӕнустӕм цӕрдзысты, иннӕты чи уарза ӕмӕ хӕларзӕрдӕ чи уа, ӕрмӕстдӕр ахӕм адӕм (Пс. 37:9–11). Уый уыдзӕн, иууылдӕр ӕдасӕй ӕмӕ фӕрнӕй кӕм цӕрдзысты, ахӕм дуне! Фӕлӕ цымӕ абон та уыцы миниуӕг цы пайда хӕссы?

ХӔЛАРЗӔРДӔДЗИНАД ЦЫ ПАЙДА ХӔССЫ?

Библийы фыст ис: «Иннӕты ӕнувыд уарзтӕй чи уарзы, уый йӕ удӕн хорз кӕны» (Ӕмб. 11:17). Иннӕты ӕнувыд уарзтӕй чи фӕуарзы, уый вӕййы хӕларзӕрдӕ. Иннӕтӕ ахӕм адӕймагӕн фӕаргъ кӕнынц ӕмӕ йын йӕхимӕ дӕр хӕларзӕрдӕдзинад равдисынц. Йесо загъта: «Уӕхӕдӕг цы барӕнӕй барат, ахӕм барӕнӕй бардзысты сымахӕн дӕр» (Лук. 6:38). Уӕдӕ хӕларзӕрдӕ адӕймаг хорз ӕмбӕлттӕ ӕнцонтӕй ссары ӕмӕ цӕрӕнбонтӕм вӕййынц ӕмбӕлттӕ.

Апостол Павел Ефесы ӕмбырды чырыстӕтты баразӕнгард кодта, зӕгъгӕ, «кӕрӕдзимӕ ут хӕларзӕрдӕ, уӕ кӕрӕдзийы зын ӕмбарут ӕмӕ кӕрӕдзийӕн... зӕрдӕйӕ хатыр кӕнут» (Еф. 4:32). Ӕмбырды алчидӕр хӕларзӕрдӕ куы вӕййы, иннӕты ӕнкъарӕнтӕ бамбарыныл ӕмӕ сын баххуыс кӕныныл куы фӕархайы, уӕд уый ӕмбырдӕн стыр пайда ӕрхӕссы. Ахӕм адӕймӕгтӕ фаутӕ никӕуыл февӕрынц, никӕй фыдкой фӕкӕнынц, тызмӕг ӕмӕ ӕлхыскъ ныхас никуы фӕкӕнынц. Уыдон фӕархайынц, цӕмӕй-иу иннӕты ныхасӕй бафидар кӕной (Ӕмб. 12:18). Ӕмӕ уый фӕрцы ӕмбырды иууылдӕр Йегъовӕйӕн цингӕнгӕйӕ фӕлӕггад кӕнынц.

Уӕдӕ хӕларзӕрдӕдзинад у, ныхасӕй дӕр ӕмӕ хъуыддагӕй дӕр бӕрӕг чи вӕййы, ахӕм миниуӕг. Хӕларзӕрдӕдзинад куы равдисӕм, уӕд афтӕмӕй бафӕзмӕм нӕ уарзӕгой ӕмӕ нӕ рӕдау Хуыцау Йегъовӕйы (Еф. 5:1). Ӕмӕ уый фӕрцы ӕмбырды ис иудзинад, стӕй иннӕты дӕр бафӕнды Йегъовӕйӕн лӕггад кӕнын. Цӕй уӕдӕ, нӕ бон цыдӕриддӕр у, уый аразӕм, цӕмӕй иннӕтӕ уыной, Йегъовӕйы лӕггадгӕнджытӕ хӕларзӕрдӕ адӕм кӕй сты!