Ныййарджытӕ, уӕ сывӕллӕтты хорз миниуджытыл ахуыр кӕнут
1 Сывӕллон хорз миниуджытӕ йӕ мады гуыбынӕй нӕ рахӕссы, стӕй йӕм ӕвиппайды дӕр нӕ фӕзынынц. Уый нӕ, фӕлӕ ма сывӕллоны хорз миниуджытыл сахуыр кӕнынӕн хъӕуы рӕстӕг дӕр. «Ахуыр кӕнын» нысан кӕны «сындӕггай дӕттын» кӕнӕ «ӕртахгай тадзын». Ныййарджытӕ хъуамӕ ӕдзухдӕр архайой, цӕмӕй «ахуыр кӕной [сӕ сывӕллӕтты] Хицауы ахуырады ӕмӕ зондамынды» (Еф. 6:4).
2 Райдайут сабибонтӕй. Сабитӕ ахуыр кӕнынмӕ ӕмӕ ног цыдӕртӕ аразынмӕ куыд арӕхсынц, уый диссаг у. Зӕгъӕм, кӕд стыртӕн арӕх ног ӕвзаг сахуыр кӕнын зын вӕййы, уӕд скъоламӕ чи нӕма цӕуы, уыцы сывӕллӕттӕн сӕ бон у ӕмрӕстӕджы дыууӕ-ӕртӕ ӕвзаджы сахуыр кӕнын. Афтӕ уӕм макуы кӕсӕд, уӕ сывӕллон хорз минуджытыл ахуыр кӕнынмӕ гыццыл кӕй у, уый. Библийы ӕцӕгад ын гыццылӕй куы райдайат амонын ӕмӕ уыцы хъуыддаг дарддӕр дӕр куы кӕнат, уӕд сывӕллонмӕ цалдӕр азмӕ фӕзындзӕн, «зонд [ын] ирвӕзындзинадмӕ» чи ратдзӕн, уыцы зонындзинӕдтӕ (2 Тим. 3:15).
3 Сахуыр сӕ кӕнут хъусын кӕнын. Сывӕллон йӕ рӕзыныл куы вӕййы, уӕд ӕй цы хорз миниуджытыл ис сахуыр кӕнӕн, уыдонӕй иу у Хуыцауы Паддзахады тыххӕй хорз уацхъуыд хъусын кӕнын. Ныййарджытӕй бирӕтӕ уый райдайынц, сӕ сывӕллӕттӕ ма сабитӕ куы вӕййынц, уӕд: акӕнынц сӕ семӕ хӕдзарӕй-хӕдзармӕ хъусын кӕнынмӕ. Ныййарджытӕ сӕхӕдӕг хъусын кӕныны хъуыддаджы ӕдзухдӕр хайад куы исой, уӕд уый сӕ цотӕн ӕххуыс кӕндзӕн лӕггаддзинадӕн аргъ кӕнынӕн ӕмӕ зӕрдиагӕй лӕггад кӕнынӕн. Уымӕй уӕлдай ма ныййарджыты бон у сӕ сывӕллӕттӕн равдисын, лӕггаддзинады алы хуызты куыд ис хайад исӕн, уый дӕр.
4 Ноджыдӕр ма сывӕллӕттӕн баххуыс кӕндзӕн, Теократон лӕггаддзинады скъолайы фыст куы уой, уӕд уый дӕр. Уым сахуыр уыдзысты Библи ахуыр кӕнын ӕмӕ йӕ афтӕ кӕсын, цӕмӕй йӕ ӕмбарой. Базондзысты ма, адӕмимӕ Библийы тыххӕй ныхас кӕнын, искӕмӕ дыккаг хатт бацӕуын ӕмӕ адӕймагимӕ Библи ахуыр кӕнын куыд хъӕуы, уый дӕр. Ахӕм ахуыр сӕ, гӕнӕн ис, сразӕнгард кӕна пионертӕй лӕггад кӕнынмӕ ӕмӕ ма лӕггаддзинады фылдӕр хӕстӕ ӕххӕст кӕнынмӕ. Вефилты кусджытӕй ӕмӕ миссионертӕй бирӕтӕ ӕхсызгонӕй ӕрхъуыды кӕнынц сӕ фыццаг бонтӕ лӕггаддзинады скъолайы ӕмӕ дзурынц, зӕгъгӕ сын уый баххуыс кодта хорз миниуджытыл сахуыр кӕнынӕн.
5 Мах иууылдӕр Номдзыд Дурынгӕнӕг Иегъовӕйы къухты стӕм ӕлыг (Ис. 64:8). Цас ногдӕр у ӕлыг, уыйас дзы ӕнцондӕр ис исты скӕнӕн. Цас фылдӕр лӕууа, уыйас та тынгдӕр хъӕбӕр кӕны. Хъуыддаг афтӕ у адӕмимӕ дӕр. Ӕрыгонӕй ӕнцондӕрӕй тасынц, ӕмӕ цас ӕрыгондӕр уой, уыйас — хуыздӕр. Сывӕллӕттӕ сӕйраджыдӕр сӕ рӕзгӕ азты сахуыр вӕййынц хорзыл кӕнӕ ӕвзӕрыл. Уӕдӕ куыд уарзӕгой ныййарӕг, афтӕ дӕ хъӕбулты гыццылӕй райдай ахуыр кӕнын хорз миниуджытыл чырыстон лӕггаддзинады.